Moota Wookhaliherya Soothowa sa Akina

Francois, mutokweene onikhala elapo yowaatta atthu ohaawa, onihimya so: “Nuumala wiiraneya mwaathanle, ennikhumelela ekhotto mwaha wa ivootu, nto ekhotto eyo enniwiiriha Anamoona a Yehova anceene otthyawa muttetthe waakhala aya. Itthu ntoko yoolya ni murette wa hospitali sinnithowa, waphwanya vale sinikhala sowaatta musurukhu. Obanko, maakina anikumiha musurukhu khanikhalana musurukhu, wala khanivara muteko”.

Anna ooBetheli moohipisa annipacerya oroiha sookhaliherya wa Anamoona a Yehova atthyawenle muSalau ya Omwene mapuro manceene a elapo eyo. Khuta mpantta, anakhotto annittiyelela iphiro, masi okhala wira otheene saya annaasuwela Anamoona wira khaniirela mpantta ipoliitika, ikaaro sa ofiliyaali sinneemiheriwa ovira.

François onihimya so: “Nrowaka oSalau ya Omwene, anakhotto annoopela ekaaro ahu ni kapwitthi. Masi ibaala soopiwa khasaaniphwannye. Nuumala omoona toropa orwaaka ohoolo wahu, omukunxeene kapwitthi, mowaakuveya nahirukunuxa ekaaro ahu khiyatthika, nahuupiha ekaaro nitthikelaka oBetheli. Nimuxukhurela Yehova mwaha wootthika niryeene akumi. Mmeeloni mwaya, anna oowiiraka 130, a eSalau yaarowa ahu noceela ophiya, yaahirowa opuro wohitepa woopiha. Anna akina yaanirowa ofiliyaali, wira awerye ophwanya itthu saathowa omunepani ni werutthuni mpakha muxankiho ole omala”.

François onnivikaniha oriki: “Muhoolo mwaya efiliyaali yahakhela ipaphelo sinceene sa anna a miloko sinci axukhurelaka nikhaliheryo navahiwa aya. Khuhimya wira nikhaliheryo na anna a ilapo sikina nihincererya omuroromela waya Yehova”.

Okathi onikhumelela aya ihasara sa ephattu wala iye sinikumiheriwa ni apinaatamu, hiyo khahiyo nnolavula paahi wira “muroke ni murettele mòre, nvone”. (Yak. 2:15, 16) Ohiya-vo, ninnimananiha waavaha itthu sinaathowa sa weerutthuni. Vamosaru, eseekulu yoopacerya, nuumala wiiwa wira yaamukhumelela etala, awiixutti ‘yahivarihana othukumanya muhakhu, khula mutthu avahaka saweryawe, wira yarumihele [anna aya] yakhala oYudeya’.​—Mit. 11:28-30.

Ntoko arumeyi a Yehova ninniphavela tthiri waakhaliherya mwa werutthuni atthu oothoiwa. Masi, atthu annithoiwa-tho itthu somunepani. (Math. 5:3) Tivonto, wira akhaliheriwe omusuwela saana Muluku ni omurumeela mookhalela, Yesu aahaaruma atthareli awe orowa waapaka awiixutti. (Math. 28:19, 20) Khula mmosa a hiyo onnivaha okathi, ikuru ni mihakhu sawe wira ovare muteko owo. Nikhuuru nootthokiheya ninnirumeela soovaha sa atthu akina wira naakhaliherye ale axankale mwa werutthuni, masi soovaha iyo sinnirumeeliwa vanceenexa mmiteko sa Omwene wira nimwarya-mwarye ihapari sooreera. Mwa enamuna eyo, ninnooniherya ophenta wa Muluku ni wa namwaattamanani ahu.​—Math. 22:37-39.

Ale anivaha misonkheryo saya akhaliheryaka muteko wa Anamoona a Yehova a ilapo sotheene, akupaliki-tu wira soovaha saya sinnirumeeliwa saana ni mookhalela. Niireke munniphavela waakhaliherya anna yaale anitthuneya okhaliheriwa? Munniphavela okhaliherya muteko woowaapaka awiixutti? Mwaaphavelaka, xontte “muhikhotté owirela sorera ale anovekelani okathi wothene oniweryanyu”.​—Mir. 3:27.

[Elatarato epaaxina 8]

[Ekaaxa epaaxina 9]

Moota Atthu Akina Anipaka Aya Misonkheryo Sa Muteko Wa Olumwenku Wotheene

Ntoko siireya aya okathi wa murummwa Paulo, olelo atthu anceene ‘annisuka’ musurukhu nto khiyarowa ohela mukaaxani ya soovaha elempwale so: “Muteko Onivariwa Ilapo Sotheene”. (1 aKor. 16:2) Khula mweeri miloko sinniroiha soovaha iyo oskritoorio wa Anamoona a Yehova ya elapo aya. Vanniweryaneya-tho nyuwo oroiha mmansinyu yoovaha anyu wa nikhuuru nisuweliwe ni nlamulo ninrumeeliwa ni Anamoona a Yehova elapo anyu. Wira musuwele masina yeemereriwe ni nlamulo ni anirumeeliwa ni Anamoona a Yehova elapo anyu, xontte muulume ni eskritoorio ya efiliyaali ya elapo anyu. Enderesu ya ifiliyaali eniphwanyaneya va www.jw.org. Enamuna ya soovaha sikhanle anyu ooroiha mmansinyu tiiya:

SOOVAHA SOROIHA MUTTHU MWANEENE

• Ovaha musurukhu wala itthu soorika musurukhu aya, ni itthu sikina sa efaita.

• Mutthu owo ohaana olepa epaphelo ohimyaka wira tovanhe itthu iyo.

OVAHA MUSURUKHU OKHANLE AWE OOTTIKIHERIWA NI MULOKO

• Mutthu pooti ovaha musurukhu okhanle awe oottikiheriwa okathi oniphavela awe.

• Muhinatthi ovaha, xontte muhimye oskritoorio ya efiliyaale anyu wira musuwele etthu ekhanle anyu oopaka.

OVAHA MISONKHERYO MWA INAMUNA SIKINA

Wuncererya misonkheryo sa musurukhu wala itthu sikina, sookhala inamuna sikina sa ovaha etthu mmureerelo wa muteko wa Omwene wa ilapo sotheene. Inamuna sene sihimmwale vathi-vo. Voohicikha etthu sa enamuna eniphavela anyu orumeela, xontte muhinatthi, muhaana okoha efiliyaali ya elapo anyu wira musuwele inamuna sinireerela. Okhala wira malamulo voohimya sa mpoosito annivirikana, ti vooreera omukoha mutthu onisuwela saana myaha sa mpoosito ni malamulo, mutthu ohinatthi othanla enamuna eniphavela awe.

Ovaha omurumeelaka seguru: Mutthu pooti ompaka seguru ophavelaka wira Associação das Testemunhas de Jeová de Moçambique aphwanye mureerelo wa seguro de vida wala pensão.

Ekontha oBanko: Mutthu pooti orumeela ekontha ya obanko, epaphelo enooniherya wira wodepositari musurukhu, wala ekontha ya musurukhu wa ereforma. Nto ohaana olepa idukumento sinivekeliwa ni nlamulo ohimyaka wira nuumala okhwa ekontha eyo ehaana okhala ya Anamoona a Yehova.

Enupa wala opuro wa mutthu: Mutthu pooti ovaha ntoko misonkheryo enupa awe wala opuro orina awe. Yakhala enupa enikhala awe, ohaana olepa ohimyaka wira onnivaha, okathi yoole, wala muhoolo; nuumala okhwa anrowa ohalana akhale Anamoona a Yehova.

Ompaka Testamento: Mutthu pooti ompaka testamento wira ovahe etthu erina awe wala musurukhu. Nto ohaana olepa edukumento eneemereriwa ni nlamulo ohimya saana etthu eniphavela awe, wira musurukhu wala etthu erina awe akhwa vale ovahereriwe Associação das Testemunhas de Jeová de Moçambique.

Wira musuwele itthu sikina, nyuwo pooti okoha oskritoorio wa Associação das Testemunhas de Jeová de Moçambique, otelefonari wala olepa epaphelo murumeelaka enderesu eyo enittharelana, wala okoha ofiliyaali ya elapo eryaanyu.

ASSOCIAÇÃO DAS TESTEMUNHAS DE JEOVÁ DE MOÇAMBIQUE

Rua da Micaia, N.° 160

Bairro Triunfo

Costa do Sol

MAPUTO

MOÇAMBIQUE

+258 21-450-500