Muxukhureleke Ovaha Wa Yehova
YEHOVA, Muluku oovaha. (Yak. 1:17) Okhuma wiirimu mpakha valaponi, soopattuxiwa sa Yehova, sinnivuwiha ovaha wawe.—Esal. 65:13, 14; 147:7, 8; 148:3, 4.
Nasalimo aanimuxukhuru vanceene Mpattuxa tivonto iipale awe nsipo nonvuwiha Yehova mwaha wa miteko sawe. Musome Esalimo 104, nto moone akhala wira khamunoonela siiso. Nasaalimo ohimmye so: “Kinowipela Apwiya mahiku othene èkumi aka: kinomutthapela Muluku aka mpakha okhwá”. (Esal. 104:33) Niireke nave ti etthu eniphavela anyu?
NTAKIHERYO NUULUPALE NA OVAHA
Yehova oniphavela wira nitthareke ntakiheryo nawe na ovaha. Onninleela nthowa naya vanitthuneya ahu okhala oovaha. Moone ele aamuupuxenrye awe murummwa Paulo oriki: “Nwirele ale akhalanne mihakhu sa vathí-va, wira ehìsoneké, ni wira ehiroromeleké mihakhu seiyo sihinlekela. Nto emuroromeleke Muluku, yowo onnivaha sorera sothene vowatta, wira niphwanye oreriwa. Athajiri yawo ewireleke sorera akhw’aya, ekhaleke athajiri ni miteko saya sorera, yavaheke òthoiwa ni murima woleva, yakaweleke akhw’aya itthu sirinaya. Yira siso, animwithukumanyerya muhakhu ohimpweteya oholo onkelelaya, anophwanya ekumi yekekhai”.—1 Tim. 6:17-19.
Okathi Paulo aalempe awe epaphelo awe ya nenli wa muloko wa oKorinto, owo aahittittimiherya anna okhalana muupuwelo wooloka okathi onivaha aya. Paulo aahimmye so: “Vano, khula mutthu avaheke attharihaka murim’awe, khahiyó ni murima omuripalene, nnákhala mwaha w’okhanyereriwa: tthiri Muluku onsiveliwa n’ule onvaha ni murima omuttenlene”. (2 aKor. 9:7) Moottharelana, Paulo onnihimya wira ale anivahiwa annittottela mureerelo, nave-tho ale anivaha annittottela mureerelo, maana anniphwanya mareeliho manceene omunepani.—2 aKor. 9:11-14.
Paulo onnimaliha olavula mwaha ola, oromolaka yowooniherya yuulupale yoowi Muluku toovaha. Owo olempe so: “Nimuxukhuruku Muluku mwaha wa sovaha sawe sotikiniha”. (2 aKor. 9:15) Soovaha sa Muluku, onihela muhina oreera murima wuulupale oniwooniherya awe atthu otheene orweela wa Yesu Kristu. Yoovaha eyo, ti yootthuneyexa ni ya faita yuulupale.
Ninrowa omuxukhuru sai Yehova ni Yesu mwaha wa itthu sotheene annipakela aya ni anrowa aya onipakela muhoolo? Enamuna emosa, ori ovaha okathi ahu, ikuru sahu, ni itthu sikina sa werutthuni, siyeve wala sinnuwe, wira nikhaliherye okokhorela wooloka wa Yehova.—1 Wah. 22:14; 29:3-5; Luk. 21:1-4.
[Ekaaxa epaaxina 15]
Moota Atthu Akina Anipaka Aya Misonkheryo Sa Muteko Wa Olumwenku Wotheene
Ntoko siiraneya aya mahiku a murummwa Paulo, anamunceene olelo-va annivalaanya wala osuka “musurukhu”, aahiiso annimpaka palano a musurukhu anirowa aya orihela ekaaxa elempwale “Obra Mundial”. (1 aKor. 16:2) Khula mweeri, miloko sinniroiha soovaha iyo ofiliyaali ya Anamoona a Yehova ya muttetthe aya. Vanniweryaneya khula mutthu oroiha mmansawe soovaha sawe orumeelaka nsina na mutthenkeso wa Anamoona a Yehova woweemereriwa wa muttetthe awe. Wira musuwele nsina na mutthenkeso woweemereriwa wa Anamoona a Yehova onirumeeliwa mmuttettheni mwanyu, xontte mukohe efiliyaali ya elapo anyu. Endereso ya khula efiliyaali enniphwanyaneya va www.jw.org. Inamuna sa soovaha sikhanle anyu ooroiha mmansinyu tiiya:
SOOVAHA SOOROIHA MUTTHU MWANEENE
• Ovaha musurukhu orumeelaka ikartau. Ifiliyaali sikina vanniweryaneya ovaha musurukhu orumeeliwaka saite ahu jw.org, wala esaite ekina ethanliwe.
• Ovaha itthu sikina sinikumiherya musurukhu, ntoko itthu sa eweero ni sikina.
• Mutthu owo ohaana olepa epaphelo ohimyaka wira tovanhe itthu iyo.
OVAHA MUSURUKHU OKHANLE AWE OOTTIKIHERIWA
• Mutthu pooti ovaha musurukhu okhanle awe oottikiheriwa okathi oniphavela awe.
• Muhinatthi ovaha, xontte mukohe efiliyaali anyu wira musuwele etthu ekhanle anyu oopaka.
OVAHA MISONKHERYO MWA INAMUNA SIKINA
Ohiya ovaha musurukhu paahi wala itthu sikina, sookhala inamuna sikina sa ovaha etthu mmureerelo wa muteko wa Omwene wa ilapo sotheene. Inamuna sene tiiya sihimmwale vathi-vo. Voohicikha etthu sa enamuna eniphavela anyu orumeela, xontte muhinatthi, muhaana okoha efiliyaali ya elapo anyu wira musuwele inamuna sinireerela. Okhala wira malamulo voohimya sa mpoosito annivirikana, ti vooreera omukoha mutthu onisuwela saana myaha sa mpoosito ni malamulo, muhinatthi othanla enamuna eniphavela anyu.
Ovaha omurumeelaka seguru: Mutthu pooti ompaka seguru ophavelaka wira Associação das Testemunhas de Jeová de Moçambique aphwanye mureerelo wa seguro de vida wala pensão.
Ekontha oBanko: Mutthu pooti orumeela ekontha ya obanko, epaphelo enooniherya wira woohela musurukhu obanko, wala ekontha ya musurukhu wa ereforma. Nto ohaana olepa idukumento sinivekeliwa ni nlamulo ohimyaka wira nuumala okhwa ekontha eyo ehaana okhala ya Anamoona a Yehova.
Enupa wala opuro wa mutthu: Mutthu pooti ovaha ntoko misonkheryo enupa awe wala opuro orina awe. Yakhala enupa enikhala awe, ohaana olepa ohimyaka wira onnivaha okathi yoole, wala muhoolo; ni nuumala okhwa Anamoona a Yehova tanrowa ohalana.
Ompaka Testamento: Mutthu pooti ompaka testamento wira ovahe etthu erina awe wala musurukhu. Nto ohaana olepa edukumento eneemereriwa ni nlamulo ohimyaka saana etthu eniphavela awe, wira musurukhu wala etthu erina awe akhwa vale ovahereriwe Associação das Testemunhas de Jeová de Moçambique.
Wira musuwele itthu sikina, nyuwo pooti okoha oskritoorio wa Associação das Testemunhas de Jeová de Moçambique, otelefonari wala olepa epaphelo murumeelaka endereso ela enittharelana, wala okoha ofiliyaali ya elapo eryaanyu.
Mwaaphavelaka soohimmwa sikina mukohe efiliyaali ya elapo anyu.