Yehova, Muluku Oophenta
“Muluku Ophentá”.—1 YOH. 4:8, 16.
MWAAROWA WAAKHULA SAI?
Moota xeeni ophenta wa Muluku onrowa aya waakhaliherya muhoolo ale animwiiwelela?
Yehova oonihenrye sai waaphenta alipa-oottheka?
Exeeni Omwene wa oMesiya onipaka aya, enookupalihani wira Muluku onnirumeela Omwene owo mmureerelo wa apinaatamu?
1. Tuuvi ori mukhalelo muulupalexa wa Muluku, nto nyuwo munoonela sai?
BIIBILIYA, yoowo uupuxeriwe ni Yehova, onninleela wira “Muluku ophentá”. Biibiliya khonihimya paahi wira ophenta ti mukhalelo mmosa muulupale wa Muluku, masi onihimya wira “Muluku ophentá”. (1 Yoh. 4:8) Ola ti mukhalelo wootepexa wooneya ni wootthuneyexa wa Muluku. Yehova khahiyo orookhalana paahi ophenta, masi owo mwaneene, tori ophenta. Tthiri ti voohakalaliha osuwela wira Mpattuxa a itthu sotheene wiirimu ni valaponi, Muluku a niphento! Sotheene onipaka awe, onipaka mwa niphento.
2. Ophenta wa Muluku onnikupaliha exeeni? (Nwehe elatarato yoopacerya.)
2 Ophenta Muluku orina awe ni soopattuxa sawe, onniniiriha okupali wira itthu sotheene silakenle awe waapakela apinaatamu sinimwiiraneya tthiri, ni sinimwaakumiherya mireerelo atthu otheene anaakhulela olamuleliwa ni yena. Mwa ntakiheryo, mwaha wooniphenta, Yehova “òthanla nihiku ninrowawe waphuka atthu othene n’ixariya, elamuliwaka ni mutthu mmosá omukupalihalyawe oholo w’atthu othene”, Yesu Kristu. (Mit. 17:31) Hiyo nihaana ororomela wira eyo enimwiiraneya tthiri. Apinaatamu animwiiwelela Muluku ni aneettela exariya, ophukeliwa waya onimwaakumiherya mareeliho ahinimala.
ITTHU SINIIRANEYA MULAPONI OKHUMA KHALAI
3. Vaakhanle wira Muluku khonaaphenta apinaatamu, okumi waarowa okhala sai muhoolo?
3 Okumi waarowa okhala sai vaakhanle wira Muluku khonaaphenta apinaatamu? Nnoowerya waakhula naweha itthu siniiraneya valaponi, ni anamalamulela oohiphenta yaawo aneettihiwa ni muluku aya oowali, Satana Diabo. (2 aKor. 4:4; 1 Yoh. 5:19; mmusome Wisupulula 12:9, 12.) Ela enooniherya moota okumi waarowa aya otepa onanara muhoolo, vaakhanle wira Muluku khonniphenta.
4. Nthowa xeeni Yehova eemerenrye awe wira olamulelo awe orukunuweliwe?
4 Okathi Diabo aamurukunuwenle awe Yehova, owo aahiwiiriha apinaatamu omurukunuwela Muluku. Owo aahivaanyiha ehakhi ya Muluku olamulela olumwenku wotheene. Satana aaphavela ohimya wira owo taarowa olamulelaka saana onvikana Mpattuxa. (Maph. 3:1-5) Nnaamwi Yehova omweemerenrye ene Satana olamulela, masi onvahale okathi vakhaani. Mwa miruku, Yehova onvaha Satana okathi oniphiyerya wira ooniherye wira Satana owo khoniwerya olamulela saana. Itthu sooriipiha murima siniiraneya, sinooniherya wira apinaatamu nnakhala Satana khaniwerya okumiherya olamulelo wooloka.
5. Exeeni sowiiraneya sa mulaponi sinooniherya aya?
5 Mwa iyaakha 100 sivinre, ikhotto sa mulaponi soowiiva atthu anivikana imilyau 100. Olelo-va, itthu sinnitepa onanara olumwenku wotheene. Ela ti etthu Nuulumo na Muluku naahimmye aya vahinatthi, wira yaarowa wiiraneya “okathi wokiserya” wa olumwenku ola, vaavo ‘atthu òtakhala murima ni òwòtha yarowa ovira etepaka’. (2 Tim. 3:1, 13) Sowiiraneya sinnooniherya saana ele Biibiliya enihimya awe wira: “Apwiya! Kosuwela sana wira mutthu khansuwela emalelo awe: owo khanwerya wettiha mavalo awe”. (Yer. 10:23) Mwekeekhai, Yehova khaavahale apinaatamu owerya ni ehakhi ya weettiha okumi aya mekhayaru.
6. Nthowa xeeni Muluku oneemererya awe otakhala?
6 Mwaha wa Muluku weemererya otakhala ovikanihaka mookathi vakhaani, onnooniherya-tho etthu ekina, ohiya paahi wooniherya wira olamulelo wa apinaatamu ti weethiru. Eyo ennooniherya saana wira olamulelo wa Muluku paahi tonikhumela saana. Nuumala Yehova omaliha otakhala ni waamaliha ale anikumiherya otakhala iwo, nto akhala mutthu mukina onrowa ovaanyiha olamulelo awe, Yehova khonrowa-tho weemererya ovaanyihiwa. Owo onrowa orumeela ele yiiraneyale ni apinaatamu ntoko mathowa a waapwetexa anammwareya awo okathi ene yoowo, nto khoniweemererya-tho okumiherya otakhala.
YEHOVA OHOONIHERYA OPHENTA WAWE
7, 8. InamunaxeeniYehovaonooniheryaawe ophenta?
7 Yehova onnooniherya ophenta wawe mwa inamuna sinceene. Mwa ntakiheryo, nkahaya muupuwele itthu siri wiirimu ni valaponi. Sookhala igalaxia sinceene, khula egalaxia yookhalana itheneeri ni iplaneta soohikontareya. Egalaxia ahu, eniitthaniwa Via Láctea, yookhalana nsuwa, nenno nniiriha oweryaneya okhala okumi valaponi. Soopattuxiwa iya sotheene, ethoonyeryo yoowi Yehova ti Muluku, ni sinninisuweliha mikhalelo sawe, ntoko owerya, osuwela, ni ophenta. Tthiri, “okhuma vapattuxalyawe Muluku olumwenku, atthu anniwerya osuwela makhalelo ahinòneya a Muluku, hatá owerya wawe n’oMuluku awe wohimala, yonaka n’utthokelela itthu sipattuxalyawe”.—aRom. 1:20.
8 Valaponi, Yehova oopaka itthu sotheene mmureerelo wa soopattuxiwa sipakeliwe okhala valaponi. Aahaapakela apinaatamu eparayiisu ni aahaavaha erutthu ni muupuwelo woomalela wira akhaleke mookathi ohinimala. (Mmusome Wisupulula 4:11.) Ohiya-vo, ‘onnivaha yolya itthu sothene sipattunxawe: oniphenta wawe ti wohimala’.—Esal. 136:25.
9. Nnaamwi oryeene Muluku oophenta, etthu xeeni Yehova oninyokha awe, ni nthowa xeeni?
9 Yehova, Muluku oophenta, masi owo onninyokha itthu sootakhala. Mwa ntakiheryo, Esalimo 5:5-7 ennimuhimya eriki: “Nyuwo Muluku khamunsiveliwa ni sotakhala . . . Nyuwo munniphweliwa n’ale anìra sotakhala”. Ennincererya-tho eriki: “Munnanyokha anawive n’anawothe”.
OTAKHALA ONOOMALA MOOHIPISA
10, 11. (a) Exeeni enrowa owiiraneela atakhali? (b) Yehova onrowa waatthuvela sai anaxariya?
10 Okhala wira Muluku toophenta ni onninyokha otakhala, owo oolakela omaliha otakhala olumwenku wotheene, okathi yoowo onrowa awe ophuka khuluwi mwaha wa olamulelo. Nuulumo na Muluku ninnilaiherya wira: “Atthu òtakhala anrowa opweteya: vano ale animuroromela Muluku anokhala ni murettele vathí-va. Atakhali anorimela nananoru . . . Awanani a Muluku anonyala, yùme, ntoko munyepu ohirina màsi; anolakaseya ntoko mwixi ontthuwa”.—Esal. 37:9, 10, 20.
11 Masi, Biibiliya onnilaiherya-tho oriki: “Anaxariya animwakhela elapo yohiyeriw’aya: anrowa okhalaka-mo mahiku othene”. (Esal. 37:29) Anaxariya awo “anokhala-mu ni murettele womalela”. (Esal. 37:11) Eyo enimwiiraneya mwaha woowi Muluku ahu oophenta, onipaka itthu mmureerelo wa arumeyi awe oororomeleya. Biibiliya onninleela: “Owo onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”. (Wis. 21:4) Tthiri atthu yaale animwiiwelela Yehova ni anisiveliwa ni ophenta wawe, anrowa ophwanya mareeliho manceene muhoolo!
12. Tani anihimmwa okhala ‘anaxariya’?
12 Nuulumo na Yehova nnihimya so: “Nkanweheni naxariya, nkamoneni mutthu òloka: ale aniphavela wiwanana anokhalana osùlu munjene. Masi alipa-òttheka othene anopwetexiwa vamosá: etthoko y’atakhali enomalihiwa”. (Esal. 37:37, 38) “Naxariya”, tuule onimusuwela Yehova ni Mwanawe, ni onipaka yootthuna ya Muluku. (Mmusome Yohani 17:3.) Owo onniiwelela moolumo ari va 1 Yohani 2:17, ani: “Vano, makhalelo ala [olumwenku ola] anomala vamosá n’itthu simphavelexaya: nto ole onettela otthuna wa Muluku onokhala mahiku othene”. Vaavo olumwenku ola onaattamela aya wanikisa, vannitthuneya ‘waroromela Apwiya [Yehova], wiwelela soruma saya’, moohipisa.—Esal. 37:34.
OPHENTA WUULUPALE WA MULUKU
13. Yowooniherya xeeni ya ophenta wuulupale Yehova aapakenle awe apinaatamu oohimalela?
13 Nnaamwi nryeene atthu oohimalela, hiyo nnoowerya ‘wiwelela soruma’ sa Yehova. Nnoowerya okhalana wataana wooloka ni Yehova mwaha wa oniphenta wawe. Owo oovaha mukuttho wowoopola wa Yesu Kristu, yoowo oniiriha oweryaneya apinaatamu woopoliwa etampi ni okhwa oravihiwe aya ni Adamu. (Mmusome aRoma 5:12; 6:23.) Yehova aanimuroromela moomalela Mwanawe mmoseene, yoowo oonihenrye ororomeleya wiirimu mwa okathi ohinikontareya. Ntoko Tiithi oophenta, Muluku vaahinwereya onweha Mwanawe eettihiwaka moohixariya, okathi ari awe valaponi. Hata vari siiso, Yesu aahaakiherya olamulelo wa Muluku moororomeleya, ni ahooniherya wira pinaatamu oomalela onoowerya okhala oororomeleya wa Yehova, hata ophwanyaka mixankiho sinceene.
14, 15. Okhwa wa Yesu okumihenrye exeeni?
14 Hata okathi yoole aahaaxiwa awe vanceene, Yesu aahivikaniha omuroromela Yehova ni okhaliherya olamulelo wa Tiithi awe mpakha okhwa. Ninnixukhurela osuwela wira okhwa wa Yesu wooliverya wira apinaatamu akhalane eparakha ya ophwanya okumi woohimala, elapo esya Muluku oleihenrye awe. Murummwa Paulo aahihimya wira yoovaha eyo yaari ethoonyeryo yoowi Yehova ni Yesu annaaphenta apinaatamu. Owo iirale so: “Okathi waryahu nlelo òhilipalipa, Yesu Kristu ohakhwela atthu òtakhala, okathi wophwanelela. Orikarika omphwanya mutthu onìleva wira amukhwele mukhw’awe àxariya: nto vanniweryaneya wira mutthu ailipihe wira amukhwele mukhw’awe òrera murima. Vano Muluku ònithonyerya khuluwi oniphenta wawe: tthiri Kristu ònikhwela hiyo, varyahu nlelo anatampi”. (aRom. 5:6-8) Murummwa Yohani olempe so: “Mota Muluku ònihenryawe oniphenta wawe t’ula: Owo òmuruma Mwan’awe mmosene orwa vathí-va, wira hiyo nikhalane ekumi mwa yowo. Vano, ophenta ti nno: khanihiyó hiyo nimphentale Muluku, nto yowo t’oniphentale, khumuruma Mwan’awe ntoko mukuttho w’olivela itampi sahu”.—1 Yoh. 4:9, 10.
15 Olavulaka sa ophenta wa Muluku, Yesu aahimyale wira: “Vekekhai, Muluku ohaphentexa atthu mpakha wavaha Mwan’awe mmosene, wira othene ale animwamini yowo ehirimelé, masi ekhalane ekumi ehinimala”. (Yoh. 3:16) Muluku onnaaphenta apinaatamu vanceene, nto mwaha wa yeeyo khonaakhoottiherya etthu yooloka, hata eyo etaphulelaka oleva etthu yuulupale. Ophenta wawe khonimala. Pooti ororomelaka wira khula okathi onrowa oniphentaka. Paulo olempe so: “Tthiri, kosuwelexa wira khivo enwerya onimwalanyiha n’uphenta wa Muluku: nnákhala okhwa walá ekumi, nnákhala malaikha walá owerya n’ikuru sa wirimu, nnákhala nanano walá oholo, nnákhala ikuru s’osulú walá ikuru sa vathí, nnákhala itthu sikina sipattuxiwe. Khivo etthu enwerya onimwalanyiha n’uphenta wa Muluku, omphwanyahu mwa Yesu Kristu Pwiy’ahu”.—aRom. 8:38, 39.
OMWENE ONNILAMULELA VANO
16. Omwene wa oMesiya exeeni? Ti pani Yehova onvahale awe olamulela Omwene owo?
16 Ophenta wa Muluku onnooneya mwaha woowi Yehova ookumiherya Omwene wa oMesiya. Yehova onvahererya Omwene owo Mwanawe, yoowo onaaphenta apinaatamu ni oniphwanelela vanceene olamulela. (Mir. 8:31) Okathi onihihimuwa aya ale 144.000 anrowa olamulelaka ni Yesu wiirimu, nlelo annuupuwela okumi aya okathi yaari aya apinaatamu valaponi. (Wis. 14:1) Omwene wa Muluku ti waari mwaha muulupale Yesu aalavula awe, ni aahiwiixuttiha awiixutti awe ovekela so: ‘Tith’ihu, muri wirimu! Nsina nanyu nivuwihiwe; omwene anyu orwe; otthuna wanyu wireye ntoko wirimu siso vathí-va’. (Math. 6:9, 10) Tthiri waakhwanela wa mavekelo awo onimwaakumiherya mireerelo sinceene apinaatamu owiiwelela!
17. Onivirikana sai olamulelo wa Yesu ni wa apinaatamu?
17 Tthiri olamulelo wa Yesu onnivirikana vanceene ni olamulelo wa apinaatamu, yaawo aniwiiriha atthu anceene wiiviwa ni ikhotto. Yesu onnaathokorerya tthiri atthu onaalamulela awe, ni onnitakiha mikhalelo sooloka sa Muluku, vanceenexa ophenta. (Wis. 7:10, 16, 17) Yesu onihimya wira: “Nyuwo othene mukhulumunwe, mulemeliwene muritti mulupale, mukirwele miyo: komumuliheni. Mwireye muritti aka: mukihiye kolakeni, mana miyo ka mutthu òmàla ni òwiyeviha. Mwirá siso, munophwanya murettele murohoni mwanyu. Tthirí, muritti onoreyakani ti woveya: olemela onotexihakani ti wokhweya”. (Math. 11:28-30) Tthiri masu awo anninlipiha!
18. (a) Omwene wa Muluku onipaka exeeni, okhuma vaavale otikitheriwe aya? (b) Exeeni enrowa ahu othokorerya mwaha onittharelana?
18 Eprofesia ya mBiibiliyani ennooniherya wira Omwene wa Muluku wa wiirimu, otikitheriwe vaavale Kristu opacenrye awe olamulela, eyo piiyo, mwaakha wa 1914. Okhuma mwaakha ole, annithukumanyeriwa yaale anrowa olamulelaka ni Yesu wiirimu, nave-tho annithukumanyeriwa ale a “muttitthi mulupalexa”, yaawo anrowa woopowa okathi olumwenku ola wootakhala onrowa aya omalihiwa, ni anrowa okela elapo esya. (Wis. 7:9, 13, 14) Munnuwelo wa muttitthi muulupale ori sai vano? Exeeni enivekeliwa aya atthu awo aniirela mpantta egrupu ela? Mwaha onittharelana onrowa waakhula makoho awo.