Nwiiweleleke Akukhuli a Yehova
“Nwìweleleke ale anettiha muthukumano, mutthareke molumo aya, okhala wira annokhapelelani mutthu ti mutthu, yawo anrowa okohiwa mwaha wa nyuwo”.—AHÉB. 13:17.
MUNROWA WAAKHULA SAI?
Axitokweene anikukhula sai ipwittipwitthi sa Muluku?
Xeeni ipwittipwitthi vanitumereriwa aya owiiwelela amakampusi aya athanliwe ni Yesu?
Xeeni ohimalela wa axitokweene ohikhanle aya etthu eniiriha ohiiwelela miruku sinikumiha aya mBiibiliyani?
1, 2. Xeeni varya aya vooreerela Yehova wiilikanyiha ni makampusi?
YEHOVA onniilikanyiha ni makampusi. (Ezek. 34:11-14) Eyo enninikhaliherya osuwela makhalelo a Yehova. Okhala wene makampusi ooloka onniphavela mureerelo ni okhala saana wa ipwittipwitthi sawe. Owo onniroiha mapuro oowaatta yoolya ni maasi. (Esal. 23:1, 2); onnikhapelela ni orupelela othana ni ohiyu. (Luka 2:8) onnaakiherya (1 Sam. 17:34, 35); onnaakhapelela axaana (Yes. 40:11); onnaavya soorimeela ni osuka oratteene ele eniwereiwa.—Ezek. 34:16.
2 Okhala wira nloko na Yehova nakhalai naakhala mapuro yaalimmwa ni yaahuwa inama, nto awo yaanoona okhweya wiiwexexa yootaphulela ya Yehova Muluku wiilikanihaka ni makampusi oophenta. Awo yaanisuwela wira ipwittipwitthi saahaana okhapeleliwa oratteene wira sirelane. Etthu emosaru ennitthuneya wa atthu mwa enamuna ya omunepani. (Mar. 6:34) Atthu yaahikhapeleliweke ni ohooleliwa saana annihaawa. Awo anikhala oowaakuva okuxeya ni othweelela, ntoko sisaale siniira aya ‘ipwittipwitthi sihirina amakampusi aya’. (1 Mam. 22:17) Masi okhala wira Yehova toophenta owo onnaakhapelela atthu awe.
3. Ninrowa othokorerya exeeni muru ola?
3 Nlikanyiho na Yehova ni makampusi ninnivareleya muteko olelo-va. Nlelo Yehova onnaakhapelela atthu anilikana ni ipwittipwitthi. Nrowe niwehe moota oneettiha awe ni okhapelela ipwittipwitthi sawe. Nave-tho ninrowa othokorerya moota ipwittipwitthi sikhanle aya ootthara malakiheryo oophenta a Yehova.
MAKAMPUSI OOLOKA ONNAATHANLA AKINA WIRA AMUKHALIHERYEKE
4. Muritti xeeni Yesu orina awe wa okhapelela ipwittipwitthi sa Yehova?
4 Yehova oomukhaliha Yesu muru wa muloko wa eKristau. (aÉf. 1:22, 23) Ntoko makampusi ooloka Yesu onnimutakiha Tiithi awe yoowo onooniherya mikhalelo ni soolakela sooloka. ‘Yesu oleva ekumi awe mwaha wa ipwittipwitthi sawe’. (Yoh. 10:11, 15) Nto yowoopola ya Yesu ti mareeliho maalupale avahiwe aya apinaatamu. (Math. 20:28) Aayo, eri yoolakela ya Yehova ‘wira othene ale animwamini yowo [Yesu], ehirimelé, masi ekhalane ekumi ehinimala’!—Yoh. 3:16.
5, 6. (a) Yesu aathanlale aani wira akhapeleleke ipwittipwitthi sawe, nto etthu xeeni enitthuneya ahu opaka wira nittottele mureerelo malokiheryo awo? (b) Nthowa xeeni nuulupale ninniiriha ophavelaka owiiwelela axitokweene mmulokoni?
5 Nto ipwittipwitthi sinimwiiwelela sai Yesu Kristu yoowo ori Makampusi Ooloka? Yesu onihimya so: “Ipwittipwitthi saka sinnìwa nsu naka: miyo kinnisuwela seiyo, n’iyo sinnikitthara”. (Yoh. 10:27) Wiiwelela nsu na Makampusi Ooloka onitaphulela weettela ni otthara malakiheryo awe otheene. Eyo enihela muhina owiiwelela axitokweene yaawo athanliwe ni Yesu. Yesu aahooniherya wira arummwa ni awiixutti awe yaarowa ovikaniha ovara muteko yoole aapacenrye awe. Awo yaarowa ‘owixuttiha’ ni ‘walyiha amwapwittipwitthi’ a Yesu. (Math. 28:20; mmusome Yohani 21:15-17.) Vaavo ihapari sooreera vanuulaana aya ni awiixutti a Yesu vanincerereya aya, Yesu oopaka malokiheryo wira maKristau ookhoomala yaakukhuleke anna mmulokoni.—aÉf. 4:11, 12.
6 Okathi aalavula awe ni axitokweene a eseekulu yoopacerya a muloko wa Eefeso, murummwa Paulo aahittittimiherya wira munepa wootteela ti waakhalinhe axitokweene ‘wira yettiheke sana [muloko] wa Muluku’. (Mit. 20:28) Olelo-va, etthu emosaru enniiraneya ni axitokweene eeKristau, okhala wira awo-tho anithanliwa sitthariheliwaka sooruma sa Biibiliya seiyo suupuxeriwe ni munepa wootteela. Vaavo vaniwiiwelela ahu akukhuli a eKristau nnooniherya omuttittimiha Yehova ni Yesu yaawo akhanle Amakampusi aalupale. (Luka 10:16) Tthiri nlo ti nthowa nuulupale ninniiriha ophavelaka owiiwelela axitokweene. Masi aakhala mathowa makina anniiriha otthara mweettelo owo wa miruku.
7. Axitokweene anookhaliheryani sai okhalana wataana wooloka ni Yehova?
7 Okathi axitokweene anaakhaliherya aya annaya, awo annaavaha miruku ni waalipiha attharihelaka Soolempwa wala malakiheryo anikhuma mBiibiliyani. Yoolakela ya axitokweene khahiyo waakhanyererya anna aya otthara moonelo aya. (2 aKor. 1:24) Eniphavela aya waavaha miruku sinikhuma mBiibiliyani wira yaakhaliherye opaka soothanla sooloka seiyo sinrowa okumiherya wiiraana ni murettele mmulokoni. (1 aKor. 14:33, 40) Axitokweene ‘annimukhapelela mutthu ti mutthu’ aphavelaka wira amukhaliherye khula munna wala murokora ori mmulokoni okhalana wataana wooreera ni Yehova. Tivonto awo annaakuvela omukhaliherya munna wala murokora yoowo opanke wala ohaanle opaka “etthu yotakhala”. (aGal. 6:1, 2; Yuda 22) Nto khamunoona wira ala mathowa ooreerela a ‘owiwelela ale anettiha muloko’?—Mmusome aHéberi 13:17.
8. Axitokweene anaakiherya sai nikoto na Muluku?
8 Murummwa Paulo yoowo aari makampusi amphenta Muluku aahaalepela annawe aKolosi ariki: “Mwipasope: muhimuhiyé mutthu òvarakani ni mo’lumo òwòtotha ni miruku sihikhanle etthu, atthu ntoko s’awo khanimwamini Kristu, masi anitthara solimalela s’atthu n’itthu s’olumwenku”. (aKol. 2:8) Yoolopola eyo enninooniherya nthowa nikina ninniiriha otthara miruku sa Biibiliya sinivahiwa ahu ni axitokweene. Awo anniwaakiherya annaya vaavo vanaakhapelela aya wira ohikhale onrowa ohonona waamini waya. Murummwa Pedru aahilopola wira yaamukhumelela “maprofeta òwòtha” ni “awixuttihi òwòtha” yaawo yaarowa ‘wototha mirima solosowa’ wira sipakeke itthu sootakhala. (2 Ped. 2:1, 14) Axitokweene a mahiku ala ahaana waalopolaka anna mwa enamuna emosaru vaatthuneyaka. Okhala wira tookhomala moomunepani awo annisuwela itthu sinci. Ohiya-vo, awo ahinatthi othanliwa annooniherya wira annisuwelexa saana Soolempwa, ni wira anniphwanelela owiixuttiha atthu itthu sooloka. (1 Tim. 3:2; Tito 1:9) Okhoomala waya, osuwela waya otthokiherya saana itthu ni omuroromela waya Biibiliya onniwiiriha ovahaka malakiheryo oophwanelela mmulokoni.
MAKAMPUSI OOLOKA ONNILYIHA NI OKHAPELELA IPWITTIPWITTHI
9. Moota xeeni Yesu oneettiha awe ni olyiha muloko wa eKristau mahiku ala?
9 Orumeelaka mulokiheryo awe Yehova onnikumiherya yoolya yoomunepani yowaatta, wa anna ari olumwenku wotheene. Miruku sinci sa mBiibiliyani sinniphwanyaneya muhina mwa iliivuru sahu soovirikana. Moowuncererya eyo, okathi mukina mulokiheryo wa Yehova onnivaha malakiheryo orweela wa axitokweene a mmulokoni, ipaphelo wala malakiheryo aniruuhiwa ni axitokweene ooweetteetta. Mwa enamuna ela ipwittipwitthi sinnaakhela malakiheryo oowiiwanyeya saana.
10. Muritti xeeni arinaaya amakampusi oomunepani voohimya sa ale arimenle mmulokoni?
10 Mmukhalelo wa omunepani axitokweene aakhalana muritti wa waakhapelela, waalyiha ni waakhaliherya anna a mmulokoni, vanceenexa ale atteetthen’ye ni aniwereiwa omunepani. (Mmusome Yakobo 5:14, 15.) Atthu akina anihimmwa va ti yaale akhumme mmulokoni wala ahin’ye ovara miteko sa eKristau. Vakhala siiso, nto khivaareerela axitokweene orumeela ikuru sotheene sirina aya wira yaavye khula epwittipwitthi wira attikiherye munikotoni, eyo piiyo, mmulokoni? Aayo! Yesu aahimmye so: “Siso-tho, Atith’inyu ari wirimu khantthuna wira arimele nnákhala mmosá a axikhani ala”.—Math. 18:12-14.
NOONELEKE SAI SOOVONYA SA AMAKAMPUSI ANEETTIHIWA NI KRISTU?
11. Exeeni eniwiiriha atthu akina woonaka ovila owiiwelela axitokweene?
11 Yehova ni Yesu, awo amakampusi oomalela. Masi apinaatamu yaavanhe aya muteko wookhapelela muloko khahiyo oomalela. Eyo pooti owiiriha atthu akina woonaka okhala voovila otthara miruku sa axitokweene. Atthu akina pooti wuupuwelaka so: ‘Ale atthu ohimalela ntoko yoohi. Nto xeeni vanirummwa ahu wiiwelela miruku saya?’ Ekeekhai wira axitokweene toohimalela. Masi nihaana okhalana moonelo wooloka voohimya sa soovonya ni sootteettheya saya.
12, 13. (a) Exeeni enisuwela ahu voohimya sa soovonya sa atthu yaale Yehova aatonko awe waavaha miritti? (b) Xeeni soovonya sa atthu akina yaarina miritti silempwale aya mBiibiliyani?
12 Biibiliya onnihimya mooluluwanya soovonya sa atthu yaale Yehova aavanhe awe okhulupale khalai. Mwa ntakiheryo Davidi aari mwene oowoottihiwa ni mukhulupale a Isarayeli. Hata vari siiso Davidi aahipaka yoottheka ya mararuwo ni wiiva. (2 Sam. 12:7-9) Nave-tho mmuupuwele murummwa Pedru. Vanaamwi aavahiwe miritti sinci mmuloko wa eKristau a eseekulu yoopacerya, owo aahipaka soovonya suulupale. (Math. 16:18, 19; Yoh. 13:38; 18:27; aGal. 2:11-14) Voohikhala Yesu, khaavo pinaatamu mukina oomalela okhuma Adamu ni Eva mpakha olelo-va.
13 Xeeni Yehova eemereryaka wira silempwe mBiibiliyani soovonya sa ale yaarumme awe? Nnaamwi akhanle ene mathowa makina, masi nthowa nuulupale, ti mwaha woophavela wooniherya wira owo pooti waavarihela muteko apinaatamu oohimalela wira aweettiheke atthu awe. Tthiri okhala wene oniira siiso. Tivonto nihikhanle ahu oorumeela ohimalela wa atthu annihoolela olelo-va, wira niixinleke ni ohivaha efaita okhulupale aya. Yehova oniphavela wira hiyo naattittimiheke ni owiiwelela anna awo.—Mmusome Okhuma 16:2, 8.
14, 15. Exeeni eniixutta ahu mwa enamuna Yehova aalavulana awe atthu awe khalai?
14 Owiiwelela ale annihoolela olelo-va etthu yootthuneya. Muupuwele moota Yehova saalavula awe ni atthu awe khalai okathi wa mixankiho. Vaavale nloko na Isarayeli naakhumale aya wEjitu khalai, Muluku ahaaruma wira amwiiweleleke Moise ni Aroni. Wira yoopowe ipahu muloko, yaahaana wiiwelela malakiheryo a yoolya ya vameekhaaya ni ottikitthela mukerekhere mwa mikhora ephome ya epwittipwitthi. Malakiheryo awo Muluku khaalavunle mmansawe oryeene wiirimu. Awo yaahaana waawiriyana axitokweene aya, yaawo yaakhela malakiheryo wa Moise. (Okhum. 12:1-7, 21-23, 29) Mahiku ale Moise ni axitokweene akina tiyaahimya malakiheryo a Yehova wa atthu awe. Axitokweene a eKristau anivara muteko mmosaru owo wootthuneya olelo-va.
15 Owehasa wene nyuwo munnuupuwela ikwaha sinceene sikina silempwale mBiibiliyani, vaavo Yehova aavanhe awe malakiheryo anoopola ekumi aarumaka atthu wala malaikha. Mikwaha iya sotheene Muluku aahoona okhala voreerela waaruma akina. Anamihupi yaalavula mwa nsina nawe, yaanaleela atthu a nloko naya malakiheryo a moota wowoopowa. Nto niireke khivanireerela wuupuwelaka wira Yehova pooti opaka etthu emosaru okathi wa Harmagedoni? Ekeekhai wira olelo-va, axitokweene yaale avahiwe miritti sa olavula mwa nsina na Yehova wala na mulokiheryo awe ahaana okhalana ephoole wira ahikhala-khale arumeelaka moohiloka okhulupale ovahiwe aya.
“NIKOTO NIMOSA NI MAKAMPUSI MMOSA”
16. “Masu” xeeni anitthuneya ahu owiriyanaka ni ephoole?
16 Atthu a Yehova aniirela mpantta “nikoto nimosa” nneettihiwa ni “makampusi mmosa”, Yesu Kristu. (Yoh. 10:16) Yesu aahaahimeerya awiixutti awe wira: “Vano miyo kinokhala ni nyuwo mahiku othene, mpakha elapo omala”. (Math. 28:20) Ntoko Mwene a wiirimu, owo onneettiha saana itthu sotheene siniiraneya mpakha ophukeliwa wa olumwenku ola wa Satana. Wira nikhale oowiiraana ni okhapeleleya ntoko nikoto nimosa na Muluku, hiyo nihaana owiriyana ‘masu’ annileela ephiro yootthara. “Masu” awo anihela muhina itthu sotheene silempwale mBiibiliyani orumeeliwaka munepa wootteela ni ele Yesu enihimya awe orweela mwa akukhuli yaathanlale awe.—Mmusome Yesaya 30:21; Wisupulula 3:22.
17, 18. (a) Satana oniphavela wiiriha exeeni nikoto, nto exeeni ekhanle ahu oororomela? (b) Exeeni enirowa othokoreriwa muru onitharelana?
17 Vanihimmwa wira Satana onimweettakasa “ntoko kharamu onòpa murukulu, amphavelaka òmukhura”. (1 Ped. 5:8) Ntoko sisaale kharamu oowali ni oovoliwa, owo onimwipitha owehereryaka okathi woreerela wira onvare ole ohiniikhapelela ni onikhuma munikotoni. Eyo tenniiriha ophavelaka okhala hoothe ni nikoto nnihooleliwa ni “makampusi onsuka” ikumi sahu. (1 Ped. 2:25) Voohimya sa atthu anrowa woopowa ohaawa wuulupale, Wisupulula 7:17 oni: “mwapwittipwitthi [Yesu] . . . onimwalyiha, onimwahola wehimeni, ori màsi èkumi. Vano, Muluku onopuputtha maithori aya othene”. Etthu xeeni yooloka yaarowa ahu oleiheriwa ovikana ela?
18 Nuumala othokorerya muteko wa aaxitokweene a mmulokoni, nto vannireerela wiikohoka so: Moota xeeni alopwana ala oothanliwa anirowa aya omananiha okhapelela mwa enamuna yookhalela ipwittipwitthi sa Yesu? Nikoho nna ninrowa waakhuliwa muru onittharelana.
[Elatarato epaaxina 21]
[Elatarato epaaxina 23]
Ntoko siisaale makampusi vanikhapelela awe nikoto nawe, axitokweene annikhapelela ipwittipwitthi sihiyeriwe aya ni Yesu. (Nwehe ettima 8)
[Elatarato epaaxina 25]
Axitokweene anniphavela okhapelela itthoko sirina namuyari mmosa wira sihiwokiwe ni opatthani woohiloka (Nwehe ittima 17, 18)