Mmutakiheke Mukukhuli Muulupalexa
“Okhala wira Kristu ohohawelani-tho nyuwo, ni siso ohothonyeryani ephiro, wira mmutthareke yowo munvirawe”.—1 PED. 2:21
MUNROWA WAAKHULA SAI?
Axitokweene anrowa omutakiha sai Yehova?
Axitokweene anrowa omutakiha sai Yesu Kristu?
Yoolakela xeeni anikhalana aya axitokweene vaavo vanipaka aya mikwaha sa okukhula mmulokoni?
1, 2. (a) Exeeni enikhumelela ipwittipwitthi saakhapeleliwaka saana? (b) Xeeni atthu anceene okathi wa Yesu yaalikana aya ni ipwittipwitthi sihirina makampusi?
IPWITTIPWITTHI sinnirelana oratteene vaavo vanikhapeleliwa aya saana ni makampusi. Eliivuru emosa enitthokiherya moota woohuwa ipwittipwitthi enihimya wira: “akhala wira makampusi oniroiha mmathalani paahi ipwittipwitthi sawe masi khihiyathokorerya, moohipisa iyo sinoopacerya otteettheya, owereyasiwa, ni ohirelana”. Ipwittipwitthi saakhapeleliwaka saana, nto sinnimphwanyiha efaita ole onihuwa.
2 Etthu emosaru enniraneya mmulokoni, akhala wira khula epwittipwitthi ennikhapeleliwa saana, atthu otheene a mmulokoni anoophwanya mureerelo. Woonasa wene munnuupuwela wira Yesu aahimorela ikharari mittitthi sa atthu “okhala wira yari òthwelela ni ònyanyaliwa, ntoko ipwittipwitthi sihikhalanne makampusi aya”. (Math. 9:36) Etthu xeeni yaawiirinhe atthu ale okhala oomoriha ikharari? Mwaha woowi ale yaavahiwe muritti wa owiixuttiha Nlamulo na Muluku, yaari ootakhala, oohaaxa ni oowootha. Ohiya waakhaliherya ni waalyiha atthu a nloko naya, ahooleli a Isarayeli yanaareya atthu “miritti solemela” mmakhatani mwaya.—Math. 23:4.
3. Exeeni enitthuneya aya wuupuwelaka axitokweene a mmulokoni okathi anikhapelela aya ipwittipwitthi?
3 Makristau yaale olelo-va ari amakampusi, eyo piiyo, axitokweene oothanliwa aakhalana muritti muulupale. Okhala wira ipwittipwitthi sinikhapelela aya ti sa Yehova ni Yesu yaawosa anihimya wira ti “makampusi òrera murima”. (Yoh. 10:11) Ipwittipwitthi iyo sithummwale “n’isisapo emosá” yeeyo Yesu olinve awe ni ephome awe “yorerexa”. (1 aKor. 6:20; 1 Ped. 1:18, 19) Owo onniphenta vanceene ipwittipwitthi sawe mpakha ovahererya ekumi awe ntoko yowoopola. Axitokweene ahaana wuupuwelaka khula okathi wira awo aakhalana “makampusi mulupale a ipwittipwitthi”, Yesu Kristu yoowo ori Mwaana oophentiwa a Muluku.—aHéb. 13:20.
4. Ninrowa wiixutta exeeni mmwaha ola?
4 Moota xeeni axitokweene a eKristau anrowa aya okhapelelaka ipwittipwitthi? Atthu a mmulokoni annitumereriwa ‘owiwelela ale anettiha muthukumano’. Masi axitokweene a mmulokoni annitumereriwa-tho osyaka ‘wikhaliha mapwiya w’ale avahiwe aya wasuka’. (aHéb. 13:17; mmusome 1 Pedru 5:2, 3.) Moota xeeni axitokweene oothanliwa akhanle aya osyaka ohasula ipwittipwitthi iyo? Nikoho nikina ti nla, moota xeeni axitokweene anrowa aya okhapelela myaha sa ipwittipwitthi moohivikaniha mphimo wa otokweene ovahiwa aya ni Muluku?
ONIMWAAKUXA MMATATANI MWAWE
5. Moolumo ari va Yesaya 40:11, anniixuttiha exeeni voohimya sa Yehova?
5 Omuhimyaka Yehova, profeta Yesaya oni: ‘Onniwettiha atthu awe, ntoko makampusi onilyihawe ipwittipwitthi sawe. Onnithukumanya simwareiye; onnakuxa axinama mmatatani mwawe. Onnettiha vorera iye siniwamwiha axan’aya’. (Yes. 40:11) Nlikanyiho nlo ninnikhaliherya woona wira Yehova onnaakhapelela otheene yaale ari ootteettheya ni oohilipa mmulokoni. Siisaale makampusi onisuwela awe sootthuneya sa khuta epwittipwitthi munikotoni mwawe, Yehova onnisuwela itthu sinitthuneya wa ale ari mmulokoni ni onniphavela waakhaliherya. Siisaale makampusi vanaakuxa awe axaana mmatatani mwawe wala vaniveruni okathi onitthuneya aya, Yehova yoowo ori “Tithi a ikharari” onrowa onikhapelela okathi wa mixankiho. Owo onrowa onilipiha vaavo ninkumana ahu yooweeha yuulupale wala vanitthuneya ahu okhaliheriwa.—2 aKor. 1:3, 4.
6. Moota xeeni mutokweene onrowa awe otthara ntakiheryo na Yehova?
6 Tthiri nla ntakiheryo nooloka na Tiithi ahu a wiirimu nenlo amakampusi a omunepani nikhanle aya ootthara! Awo aahaana okhapelela ipwittipwitthi oratteene ntoko Yehova siniira awe. Osuwelexa oratteene mixankiho ipwittipwitthi sinikumana aya ni itthu sinireerela waakuvela okhaliherya, inoomwiiriha mutokweene osuwela olipiha. (Mir. 27:23) Okhala wene mutokweene okhaleke oowiiwanana ni annawe. Nnaamwi mutokweene ohaatthara-ttharaka anna, owo onnirumeela ele eniiwa awe ni onoona awe wira moophenta ‘akhaliherye atthu ootteettheya’.—Mit. 20:35; 1 aTes. 4:11.
7. (a) Moota xeeni ipwittipwitthi sa Muluku sahaaxiwa aya mahiku a Ezekiya ni Yeremiya? (b) Etthu xeeni eniixutta ahu mwaha wa Yehova waapwapwela akukhuli ale oohiroromeleya?
7 Muthokorerye mukhalelo wa akukhuli yaale yaapwapweliwe ni Muluku. Mahiku a Ezekiyeli ni Yeremiya, Yehova aahaapwapwela yaale yaareerela okhapelelaka ipwittipwitthi, masi ahinakhapelela. Vaavo ahaakhanle awe mutthu ookhapelela, ipwittipwitthi iyo saanikhuurasiwa ni saahimwarya-mwareya. Ohiya olyiha ipwittipwitthi amakampusi ale yaampuherya ni ‘yailyiha axinene’. (Ezek. 34:7-10; Yer. 23:1) Waapwapwela wawe amakampusi ale, onnivareleya muteko wa ahooleli a eKristau yoowoka. Ela ennittittimiherya-tho otthuneya waya axitokweene maKristau okhapelela mwa enamuna yooloka ni moophenta nikoto na Yehova.
KIHOOTHONYERYANI EPHIRO
8. Moota xeeni Yesu Kristu ovanhe awe ntakiheryo nooloka, okathi aavaanyiha awe muupuwelo woohiloka wa awiixutti awe?
8 Mwaha wa ohimalela, ipwittipwitthi sikina sa Muluku sinnipisa wiiwexexa ele Yehova eniphavela awe. Tivonto ikwaha sikina vanooceela aya opaka etthu moovarihana ni miruku sa mBiibiliyani, wala anipaka aya itthu sinooniherya wira khakhomanle momunepani. Nto axitokweene yiireke sai? Awo ahaana omutakiha Yesu yoowo aari oopixa murima wa awiixutti awe, okathi yaawanela aya okhulupale Moomweneni. Ohiya onanariwa, Yesu aahivikaniha owiixuttiha atthareli awe, aavahaka miruku moophenta, sa moota wookhala oowiiyeviha. (Luka 9:46-48; 22:24-27) Vaavo aarapinhe awe inawu saya, Yesu aahiwiixuttiha wira ekhaleke oowiiyeviha, mukhalelo yoowo maKristau ari axitokweene okhanle aya owooniheryaka.—Mmusome Yohani 13:12-15; 1 Ped. 2:21.
9. Mukhalelo xeeni Yesu aatumerenrye awe awiixutti awe?
9 Moonelo wa Yesu voohimya sa amakampusi oomunepani onnivirikana ni ole wooniheriwe ni Yakobo ni Yohani. Arummwa ale anli yaaphavela okhala makhulupale Moomweneni. Masi Yesu aahivaanyiha muupuwela aya oriki: “Mosuwela mamwene a mulaponi-mu annaruma atthu ntoko t’awaya, makhulupale annahaxa atthu n’uwerya waya. Nto wa nyuwo vahìraneye siso, ohiya vo, ole omphavela okhala mulupale variyari vanyu, ohana warumela akhw’awe”. (Math. 20:25, 26) Arummwa ale yaahaana okhootta muupuwelo woophavela waahaaxa akhwaaya wala waalamulela atthu akina.
10. Yesu oniphavela wira axitokweene akhapeleleke sai nikoto, ni ntakiheryo xeeni Paulo ovanhe awe?
10 Yesu omphavela wira axitokweene akhapeleleke nikoto mwa enamuna emosaru ntoko owo saakhapelela awe. Awo ahaana weemya okhala arumeyi aakhwaaya ohiya waalamulela. Murummwa Paulo aahikhalana mukhalelo wowiiyeviha okhala wira aahaaleela axitokweene a wEfeso wira: “Nyuwo mosuwela mwettelo aka ni nyuwo, okhuma nihiku niphiyalyaka wAsia. Kihavarela muteko Apwiya ni wiyeviha waka wothene”. Murummwa Paulo aaphavela wira axitokweene ale yaakhaliheryeke akina mowiiyeviha ni mooreera murima. Owo aahimmye so: ‘Mwa sothene kowoniheryani wira nivaraka sisa, ti vanrowa ahu wakhaliherya atthu otteettheya’. (Mit. 20:18, 19, 35) Paulo aahaaleela aKorinto wira owo khaahiyo mwaneene nroromelo naya. Masi yaaphavela awe waari ovara muteko naawo wira atteeliweke murima. (2 aKor. 1:24) Paulo oovaha ntakiheryo wa axitokweene a olelo-va na wiiyeviha ni okhalela nthiti miteko.
NVAREXEXE MWIIXUTTIHO WOOREERA
11, 12. Axitokweene yaakhaliheryeke sai anna aya okathi woopaka sothanla?
11 Mutokweene a mmulokoni ohaana ovarexexa “mwixuttiho worera” okathi oniixuttiha awe. (Tito 1:9) Masi owo onipaka eyo “n’upixa murima”. (aGal. 6:1) Ohiya waakhanyererya arummwa akhwaaya mmulokoni, wira apakeke itthu moovarihana ni moonelo awe, mutokweene ooloka oniphavela waakhaliherya orumeelaka muupuwelelo wooloka. Mutokweene pooti wooniherya ele malakiheryo a Biibiliya ni iliivuru sahu sikina enihimya aya ni ovarihana waya ni mwaha owo, wira munna owo orumeele okathi oniphavela awe opaka yoothanla yuulupale. Ohiya-vo, pooti omooniherya munna owo moota mweettelo awe okhanle awe oohonona wala olipiha waataana wawe ni Yehova. Axitokweene pooti ottittimiherya otthuneya waya ovekela ni otthara malakiheryo a Yehova, ohinatthi opaka soothanla. (Mir. 3:5, 6) Nuumala othokorerya mwaha owo ni munna owo, mutokweene onrowa omweemererya wira opakeke yoothanla awe.—aRom. 14:1-4.
12 Okhulupale orina aya maKristau ari axitokweene onikhuma mBiibiliyani paahi. Tivonto varya aya wootthuneya axitokweene omurumeela saana Biibiliya ni weettela ele enihimya awe. Opaka eyo onniwiiriha axitokweene ohipuherya okhulupale aya. Tthiri axitokweene ahaana omwiiwelela ole aarumme, okhala wira khula munna wala murokora mmulokoni, onrowa okohiwa ni Yehova vamosa ni Yesu mwaha wa soothanla sinipaka awe.—aGal. 6:5, 7, 8.
NTAKIHERYO WA NIKOTO
13, 14. Miteko xeeni axitokweene anitthuneya aya ovaha ntakiheryo wa nikoto?
13 Nuumala waalopola axitokweene mmulokoni wira “muhikhaliheké mapwiya w’ale avahiwanyu wasuka”, murummwa Paulo ahaatumererya ‘wetta vophwanela wira etthariweke’ ni nikoto. (1 Ped. 5:3) Moota xeeni axitokweene anrowa aya okhala ntakiheryo wa nikoto? Muthokorerye soophwanelela piili sinitthuneya waakhwaniheriwa ni ale ‘aniphavela wettiha muloko’. Owo onitthuneya okhala “mutthu a miruku” ni ‘osuwela owettiha sana atthu ètthoko awe’. Akhala wira mutokweene ookhalana etthoko, ohaana weettihaka ni mukhalelo wooloka, okhala wira ‘ahisuweleke wettiha etthoko awe, ontthuna owerya sai okhapelela muloko wa Kristu’? (1 Tim. 3:1, 2, 4, 5) Wira mutthu ophwanelele okhala mutokweene, okhaleke a miruku ni wiiwexexa oratteene malakiheryo a Muluku ni osuwela moota woorumeela mookumini mwawe. Towiisumaaliha ni khonaakuvela waaphukela akhwa awe. Vaavo axitokweene vanooniherya aya mikhalelo iya anniwiiriha anna akina waaroromela.
14 Ohoolela mmuteko woolaleerya, enamuna ekina yeeyo axitokweene enivaha aya ntakiheryo nooloka wa maKristau akhwa aya. Yesu ohaavaha ntakiheryo axitokweene. Olaleerya ihapari sa Omwene waari muteko muulupalexa mweekumini mwa Yesu okathi ari awe valaponi. Owo aahiwooniherya awiixutti awe moota muteko ola waatthuneya awe ovariwaka. (Mar. 1:38; Luka 8:1) Mahiku ala tthiri ti voolipiha wa anamalaleerya olaleerya hoothe ni axitokweene wira yoone nthiti na axitokweene mmuteko ola oniwoopola atthu ni yiixutte mwa enamuna aya ya wiixuttiha! Nthiti na axitokweene na oviriha okathi ni wiimananiha alaleeryaka ihapari sa omwene nnaamwi aryeene owaatteliwa miteko onnitumererya muloko wotheene wooniherya nthiti nimosaru. Axitokweene anoowerya ovaha ntakiheryo nooloka wa annaya vaavo vanilokiherya aya saana mipantta saya mmithukumanoni ni okhaliherya miteko sikina sa mmulokoni ntoko orattela ni olokiha eSalau ya Omwene.—aÉf. 5:15, 16; mmusome aHéberi 13:7.
“WAALIPIHA ALE AHILIMPE”
15. Itthu xeeni siniwiiriha axitokweene opaka mikwaha sa okukhula mmulokoni?
15 Makampusi ooloka onnaakuvela okaliherya vaavo epwittipwitthi enivulala aya wala owereiwa. Vamosaru axitokweene ahaana waakuvela omukhaliherya munna wala murokora mmulokoni onireerela okhaliheriwa moomunepani. Aretta ni ale owuuluvala anitthuneya nikhaliheryo na weerutthuni masi mwa vameekhaya annitthuneya nikhaliheryo na omunepani ni olipihiwa. (1 aTes. 5:14) Amiravo ammulokoni pooti wira anniwanana itthu “sohiloka s’omiravo”. (2 Tim. 2:22) Okukhula onihela muhina waaxekurya anna a mmulokoni wira axitokweene asuwele mixankiho saya ni waakhaliherya arumeelaka Soolempwa sinireerela. Vaavo myaha iyo vanikhapeleliwa aya sihinatthi wuunuwa, mixankiho sinceene sinnivukuwa sihinatthi otepa.
16. Nikhaliheryo xeeni axitokweene akhanle aya onvaha munna a mmulokoni yoowo onixankiheya momunepani?
16 Sai akhala wira onnikhumelela mwaha oniwerya ohonona murettele wa anna a mmulokoni? Mulipa-oomulepa Biibiliya Yakobo aakonhe so: ‘Àkhala mwa nyuwo aretta? Ewihane makhulupale a mmulokoni, awo yalompeleke, yattikitthele makhura ni nsina na Yehova. Malompelo ala, yavelelihiwa ni wamini, anowòpola arett’awo, nto Yehova onimwavoniha, onimwalevelela itampi sìralyaya’. (Yak. 5:14, 15.) Hata ole oniwereiwa momunepani ‘ahiwihanne’ axitokweene, awo yasuwela mwaha owo ahaana waakuvela orowa omukhaliherya. Vaavo awo vanivekela aya hoothe wala waavekelela ni waakhaliherya annaya okathi wa mixankiho, axitokweene animooniherya okhala ntthyawelo na annaya.—Mmusome Yesaya 32:1, 2.
17. Okathi axitokweene animutakiha aya ‘makampusi mulupale’ mureerelo xeeni onikhumelela?
17 Khuta etthu axitokweene enipaka aya mmulokiheryo mwa Yehova, annimananiha otthara ntakiheryo na “makampusi mulupale” Yesu Kristu. Nikhaliheryo ninvahiwa ni alopwana ala oororomeleya, nikoto ninnittottela muraarelo ni ninnivikaniha wunnuwa. Itthu iya sotheene sinniniiriha omuxukhurela ni ophavela onvuwiha Makampusi Ahu Muulupalexa Yehova.
[Elatarato epaaxina 26]
[Elatarato epaaxina 29]
Axitokweene annaakhaliherya atthu a vatthokoni vaya wiilokiherya wira yalaleerye (Nwehe ettima 13)
[Ilatarato siri epaaxina 30]
Axitokweene annivaha ntakiheryo nooloka mmuteko woolaleerya (Nwehe ettima 14)