OVAANELA VOOHIMYA SA BIIBILIYA

Xeeni Muluku Onaahiya awe Atthu Ehaawaka?

Moolumo anittharelana, ori ovaanela okhanle owiiraneya eriyari ya Namoona a Yehova ni mwaneene etthoko. Nilikanyihe wira Namoona mmosa oniitthaniwa Monika oophiya owannyawe muthiyana oniihaniwa Sofia.

MULUKU ONOONELA SAI OHAAWA WAHU?

Monika: Sai ehaali Sofia? Vaakisivela woophwanyani.

Sofia: Miyo ka mukumi.

Monika: Ekwaha yookiserya naavaanenle ahu, naahilavula wira Muluku onnoonela othunku ohaawa wahu.a Nyuwo mwaahihimya wira mwaamakela wiikoha, akhala wira eyo ekeekhai, okhuma okathi yoole amaminyu yaaphwannye aya ehasara ya omaniwa ni ekaaro. Nto mahiku ala amaminyu ari sai?

Sofia: Vakhaani-vakhaani.

Monika: Ti voohakalaliha osuwela wira maama anyu onnoona saana. Khivanikhweya ovilela muxankiho onikumana anyu.

Sofia: Ekeekhai. Ikwaha sikina, kinniikoha akhala wira ohaawa onoomala.

Monika: Khahiyo vootthekeya wuupuwela siiso. Woonasa wene, nyuwo munnuupuwela wira mukwaha wookiserya naavaanenle ahu, kaahihiya nikoho naahimya so: ‘Xeeni Muluku oneemererya awe wira ohaawa ovikaniheke nnaamwi owo orineene ikuru soomaliha ohaawa iwo?’

Sofia: Aahe, kinnuupuwela.

Monika: Nihinatthi woona moota Biibiliya onaakhula awe nikoho nlo, nkahaya nuuluule vakhaani iponto niixuttale ahu esumana evinre.

Sofia: Vaareera.

Monika: Hiyo naahiixutta wira, mulopwana mmosa oororomeleya a khalai, aahikoha nthowa naya Muluku aahiya awe atthu ahaawaka. Masi, Muluku khampwapwenle, aahiiso, khaamuhimenrye wira khaarina waamini wuulupale.

Sofia: Nkaatonko wiiwa mwaha ole.

Monika: Nave-tho, naahiixutta wira Yehova Muluku khonisiveliwa onoona nihaawaka. Mwa ntakiheryo, Biibiliya onihimya wira okathi atthu awe yaahaawa aya, “Muluku aanixankiheya”.b Nto, khahiyo vooreera osuwela wira Muluku onnoonela othunku ohaawa wahu?

Sofia: Aayo, ekeekhai.

Monika: Wookiseryani, naahilavula wira wuupuwelela owerya wuulupale Mpattuxa ahu orina awe, onnooniherya wira owo ookhalana owerya wira onaakiherye ni omalihe ohaawa wahu.

Sofia: Eyo ti etthu enikixankiha. Akhala wira Muluku ohaana owerya woomaliha otakhala, nto xeeni oneemererya awe itthu iya siiraneyaka?

TI PANI AALAVUNLE EKEEKHAI?

Monika: Wira kaakhule nikoho nanyu, nrowe niwehe eliivuru yoopacerya ya Biibiliya, eniitthaniwa Maphattuwelo. Mootoko wiiwa yoohimmwa ya Adamu ni Eva enilavula sa muhokorokho wookhoottihiwa?

Sofia: Aayo kootoko wiiwa okerexa waka. Muluku aahimenrye wira ehilye muhokorokho wa mwiri waari eriyari ya ematta, masi khiyaamwiiwelenle ni khulya.

Monika: Eyo ekeekhai. Vano, nrowe noone ele yaawiirinhe Adamu ni Eva omutthekela Muluku. Eyo enoonikhaliherya osuwela nthowa naya hiyo ninhaawa ahu. Xontte musome eliivuru ya Maphattuwelo ekapiitulu 3 eveersu 1 mpakha 5.

Sofia: Kihiiwa. Enihimya so: “Enowa yari mulavilavi ovikana inama sothene sa mutakhwani Apwiya Muluku sipattuxalyaya. Enow’eyo yahimukoha muthiyana wira: ‘Ekekhai wira Muluku òhokhottiheryani olya mihokorokho sa mirí sothene sa mmatta?’ Muthiyana ahakhula wira: ‘Ninniwerya olya mihokorokho sa mirí sa mmatta, nto muhokorokho wa mwirí ori mmatta eriyari, Muluku ohimyalé wira: “Muhilyé-ru yowo, nnákhala muhivaré-ru yowo. Mwalya-ru, munimokhwa”’. Enowa yahimwakhula muthiyana wira: ‘Nnari, khamunokhwa! Muluku orosuwela wira nihiku ninkelanyu olya, maitho anyu anotthukuwa, nyuwo munokhala ntoko Muluku, musuwelaka oreriwa n’utakhaliwa’”.

Monika: Kooxukhuru. Nrowe nitokose iveersu iya okathi vakhaani. Moone wira enowa yaalavunle ni muthiyana, Eva. Epantte ekina ya Biibiliya ennooniherya wira enowa eyo aari Satana Diabo yoowo aalavula ni Eva.c Satana aahimukoha Eva sa yooruma ya Muluku voohimya sa mwiri wookhoottihiwa. Kiireke mooweha ehukhumu yaahimyale awe Muluku yaarowa waaphwanya Adamu ni Eva akhala wira yaamoolya mwiri owo?

Sofia: Awo yaamookhwa.

Monika: Eyo ekeekhai. Moone wira orumeelaka moolumo vakhaani paahi, Satana aahimootherya Muluku vanceene. Moone wira Satana aahimyale so: “Nnari, khamunokhwa!” Tthiri, owo aanimuhimya Muluku okhala nawoothe.

Sofia: Mwaha owo kinoopacerya wiiwa.

Monika: Nto vaavo Satana aamuhimyale awe Muluku okhala nawoothe, owo aahikumiherya mwaha yoowo waavekela okathi munceene wira ophukiwe. Nyuwo munnisuwela nthowa naya?

Sofia: Hmm, nkinsuwela.

Monika: Nkahaya nuupuwelele so: Nilikanyihe wira miyo kinoophiya vatthokoni vanyu nto khiyahimya wira miyo ka mutthu aikuru woovikanani nyuwo. Nyuwo mwaarowa wooniherya sai wira ele enihimya aka khahiyo ekeekhai?

Sofia: Kinoona wira naahaana opaka etthu wira nooniherye ti pani onilavula ekeekhai.

Monika: Eyo ekeekhai. Woonasa wene, naarowa wiiwanana othanla etthu yoolemelexa wira nimoone oniwerya ottukhula. Eyo yaamooniherya ti pani orina ikuru sinceene monvikana mukhwaawe.

Sofia: Kinniiwa enihimya anyu.

Monika: Ankhi kaahimmye wira miyo ka mutthu ooreera murima mowoovikanani nyuwo? Eyo yaarowa okhala etthu yooxankiha, kiira?

Sofia: Aayo.

Monika: Tthiri, oreera murima khahiyo etthu enooniheriwa orweela wa ikuru mutthu sirina awe.

Sofia: Ekeekhai.

Monika: Tthiri, enamuna emosa yoophuka muxankiho owo ori ovaha okathi wira akina yoone ti pani a hiyo ori ooreera murima.

Sofia: Kinnikupali enihimya anyu.

Monika: Vano, nkahaya moone-tho eliivuru ya Maphattuwelo. Niireke Satana aahimyale wira ta aikuru monvikana Muluku?

Sofia: Nnaari.

Monika: Mowaakuveya, Muluku aamooniherya ti pani aalavula ekeekhai. Masi, Satana aahimyale wira owo taari ooreera murima monvikana Muluku. Tthiri, owo aamulenle Eva wira: ‘Muluku onimoowokani, masi miyo kinihimya ekeekhai’.

Sofia: Nkaasuwela.

Monika: Nto, mwaha woowi Muluku ta miruku, owo aanisuwela wira enamuna yooloka ya ophuka mwaha owo, waari ovaha okathi. Tthiri, eyo yaamooniherya ti pani aalavula ekeekhai ni ti pani aari nawoothe.

MWAHA MMOSA WOOTEPA OTTHUNEYA

Sofia: Kinoona wira nuumala Eva okhwa, eyo yahooniherya wira Muluku aalavula ekeekhai.

Monika: Aayo. Masi-tho, waahikhala muxankiho mukina waakumiheriwe ni Satana. Xontte, moone-tho eveersu 5. Niireke mooweha ele Satana aamuhimenrye awe Eva?

Sofia: Owo aahimmye wira akhala wira Eva aamoolya muhokorokho wookhoottihiwa, maitho awe yaamutthukuwa.

Monika: Eyo ekeekhai. Nave, Satana aahimuleela Eva wira owo ‘amukhala ntoko Muluku, asuwelaka oreriwa n’utakhaliwa’. Nto, Satana aahimyale wira Muluku aakhoottiherya apinaatamu etthu yooloka.

Sofia: Kinnikupali.

Monika: Nave-tho, owo waari muxankiho muulupale.

Sofia: Moota xeeni?

Monika: Satana aahimya wira Eva vamosa ni apinaatamu otheene, yaamukhala saana ahilamuleliwaka ni Muluku. Nto, Yehova aanisuwela wira enamuna yooloka ya ophuka muxankiho ole, waari omuhiya Satana wira eererye olamulela. Tivonto Muluku omweemerenrya awe Satana olamulela olumwenku ola mwa okathi vakhaani. Ti maana aya atthu anihaawa aya vanceene, okhala wira Satana tonilamulela olumwenku.d Masi sihaavo ihapari sooreera.

Sofia: Ihapari xeeni?

Monika: Biibiliya onnixuttiha ikeekhai piili sootthuneya voohimya sa Muluku. Wanipacerya: Yehova onnixankiheya vaavo ninhaawa ahu. Mwa ntakiheryo, moone masu a Mwene Davidi ari eliivuru ya Esalimo 31:8. Davidi aahikumana mixankiho sinceene mookumini mwawe. Masi moone ele aahimyale awe okathi anvekela awe Muluku. Xontte, munoowerya osoma yoolepa eyo?

Sofia: Khiva mwaha. Enihimya so: “Mwaha w’okiphenta wanyu, kinnitteliwa murima, kinnitthapa. Nyuwo muhona ohawa waka: mosuwela ovelavela waka”.

Monika: Nnaamwi Davidi aakumana mixankiho, owo aanilipa mwaha woosuwela wira Yehova aaniweha khula etthu aakumana awe. Niireke osuwela wira Yehova onnoona itthu sotheene sinniphwanya, hata miyuupuwelelo sahu seiyo apinaatamu akina ahinisuwela aya saana onnoolipihani?

Sofia: Aayo, onnikilipiha.

Monika: Ekeekhai ya nenli tiila: Muluku khonrowa weemya wira nihaaweke okathi wotheene. Biibiliya oniixuttiha wira moohipisa, Muluku onoomaliha olamulela wootakhala wa Satana. Nto onirowa omala-maliha moomalela otakhala okhumelenle, ohela muhina itthu sinoohaaxani nyuwo ni amaminyu. Moosuwela, kinootthika esumana eyo wira kiwooniheryeni nthowa naya nintthuneya ahu okupali wira moohipisa Muluku onoomaliha ohaawa wotheene. Kirweeke okathi yoola?e

Sofia: Aayo, munookiphwanya.

Monika: Vaareera, mpakha esumana eyo.

Niireke nyuwo muhaana mwaha mukina a Biibiliya onootikinihani? Wala muniphavela osuwela sookupali ni sowiira sa Anamoona a Yehova? Akhala wira ti siiso, muhoovelele omukoha Namoona a Yehova. Owo onrowa osiveliwa othokorerya myaha iyo ni nyuwo.

[Inoota]