Mwaattittimiheke Ale Ari Owunnuwela Anikhala Eriyari Anyu

“Nvenyeke oholo wa nakhulu, mmuttittimiheke ni wuluvala wawe”.​—ONAM.  19:32.

MWAAROWA WAAKHULA SAI?

Yehova oniwoonela sai anna owunnuwela oororomeleya?

Muritti xeeni anamwane owunnuwela orina aya voohimya sa waathokorerya anamuyari aya owuuluvala?

Miloko sinrowa waattittimiha sai anna owunnuwela ari eriyari aya?

1. Makhalelo xeeni ooriipiha murima arina aya apinaatamu?

YEHOVA khaaphavela wira atthu saaphwanyeke mixankiho sinikhumelela mwaha wa wuuluvala. Owo aaphavela wira alopwana ni athiyana akhalane ekumi yoohakalala mParayiisu. Masi olelo-va “nosuwela tthiri wira sopattuxiwa sothene nlelo sinnìpulela”. (aRom. 8:22) Vano Muluku onoonela sai vaavo vaniwoona awe apinaatamu axankiheyaka mwaha wa sookhumelela sa yoottheka? Atthu owuuluvala anceene anninyanyaliwa ni amusi aya okathi yoole anitthuneya aya okhaliheriwa.​—Esal. 39:6; 2 Tim. 3:3.

2. Xeeni maKristau anitteeliwa aya murima ni atthu owunnuwela?

² Atthu a Yehova annitteeliwa murima mwaha wookhalana atthu owunnuwela mmulokoni mwaya. Hiyo ninnittottela mureerelo osuwela waya ni ninnitthara ntakiheryo naya na ororomeleya. Anamunceene a hiyo aakhalana amusi aya owunnuwela mmulokoni. Masi pooti anna awo ahikhanle amusi ahu, otheene ahu nohaana ophavelaka mureerelo ni okhala waya saana. (aGal. 6:10; 1 Ped. 1:22) Othokorerya moonelo wa Muluku voohimya sa anna owunnuwela onoonikhaliherya wiixutta etthu. Ninrowa othokorerya-tho miritti sa amusi ni anna otheene a mmulokoni voohimya sa waathokorerya anna oophentiwa owunnuwela anikhala eriyari ahu.

“MUHIKIKHOTTÉ”

3, 4. (a) Yooveka xeeni yookhalela yaapakiwe ni mulipa oolepa Esalimo 71, onvekelaka Yehova? (b) Etthu xeeni anna oowunnuwela a mmulokoni ekhanle aya onvekela Muluku?

³ Mulipa-oolepa Esalimo 71:9, aalompale so: “Vavo vuluvanlyaka, muhikikhotté, ikuru saka sivukuwaka, muhikinyanyalé”. Moolumo ala anikhala ntoko animaliherya Esalimo 70, yeeyo masu oopacerya anooniherya wira olempe ti “Davidi”. Tivonto, woonasa wene Davidi taavekela orumeelaka moolumo ala anisoma ahu va Esalimo 71:9. Owo aahimurumeela Yehova okhuma omiravo awe, nave Yehova aahimuruma opaka miteko suulupale. (1 Sam. 17:33-37, 50; 1 Mam. 2:1-3, 10) Hata vaari siiso, Davidi ahoona oreerela onvekela Yehova wira ovikanihe omureerela murima.​—Musome Esalimo 71:17, 18.

⁴ Anamunceene olelo-va anoolikana ni Davidi. Nnaamwi aryeene owunnuwela ni akhalaka “òripiwa murima”, awo annipaka itthu siniwerya aya wira anvuwihe Muluku. (Mus. 12:1-7) Anceene mwa anna awo, owehasa wene khaniwerya ovara itthu sotheene saavara aya khalai, ohela muhina miteko sa Muluku. Masi, awo anoowerya onvekela Yehova wira ohaaliyale ni ovikanihe waakhapelela. Anna ala owunnuwela ahaana okupaliki wira tthiri Muluku onimwaakhula mavekelo aya. Nave mavekelo awo anipaka aya anoolikana ni mavekelo Davidi aapanke awe uupuxeriwaka ni Muluku.

5. Yehova oniwoonela sai anna owunnuwela?

⁵ Biibiliya onnihimya mowiiwanyeya wira Yehova onnaavaha efaita yuulupale anna owunnuwela oororomeleya, nave onnaatumererya arumeyi awe waattittimihaka. (Esal. 22:25-27; Mir. 16:31; 20:29) Mwa eliivuru ya Onamukuttho 19:32 Yehova aahimyale so: “Nvenyeke oholo wa nakhulu, mmuttittimiheke ni wuluvala wawe, siso munnithonyerya omuttittimiha wanyu Muluku”. Aayo, waattittimiha ale owunnuwela mmulokoni waari muritti muulupale okathi yaalempwale aya masu ala, nave-tho olelo-va eyo khevirikanne. Nto, olelo-va anikhapeleliwa sai? Ti pani orina muritti wowaakhapelela anna awo?

MURITTI WA AMUSI

6. Ntakiheryo xeeni Yesu aavanhe awe voohimya sa waakhapelela anamuyari?

⁶ Nuulumo na Muluku ninhimya so: ‘mwattittimiheke atithinyu n’ame anyu’. (Okhum. 20:12; aÉf. 6:2) Yesu aahittittimiherya nlamulo nlo vaavale aapwapwela awe aFarisi ni awiixuttihi a ikano yaawo yaakhootta wakhapelela anamuyari aya. (Mar. 7:5, 10-13) Yesu mwaneene aahivaha ntakiheryo nooloka. Mwa ntakiheryo, ahalaka vakhaani okhwa vamwirini, Yesu aahinvekela mwiixutti awe oophentiwa Yohani wira aakhapelele ame awe, woonasa wene yaawo yaari naamukhweli okathi ole.​—Yoh. 19:26, 27.

7. (a) Miruku xeeni murummwa Paulo saavanhe awe voohimya sa waakhapelela amusi? (b) Exeeni yaamwiirinhe Paulo olepa masu ale?

⁷ Murummwa Paulo aahuupuxeriwa ni Muluku khulepa wira maKristau ahaana waathokorerya amusi aya. (Mmusome 1 Timótheyo 5:4, 8, 16.) Nkahaya muthokorerye masu Paulo aamulepenle awe Timootheyo. Paulo aahimya sa atthu aniphwanela ni ale ahiniphwanela waakhela nikhaliheryo ninvahiwa ni muloko. Paulo aahiiwanyeiha saana wira anamwane, osuulu ni amusi akina ari mmulokoni, tarina muritti muulupale wowaakhapelela amusi aya ari oowunnuwela ni anaamukhweli. Tthiri, khivaareerela waahiyerya anna a mmulokoni muritti owo, amusi aweryaka okhaliherya. Vamosaru olelo-va, waakhapelela amusi awe oothoiwa, teri enamuna emosa ya muKristau wooniherya “omuttittimiha wawe Muluku”.

8. Xeeni Biibiliya ohitumereryaka enamuna emosa ya waakhapelela amusi, nto eyo enooneya sai okhala ya miruku?

⁸ Mmasu ookwasa niire so, khula muKristau orina amusi owunnuwela okhalana muritti wa waakhapelela amusi awe awo. Ekeekhai wira Paulo aahimya ‘amusi ari mmulokoni’, masi owo khaaphavela ohimya wira amusi ale ahikhanle maKristau anyanyaliweke. Enamuna anamwane ekhanle aya oowaakhapelela amusi aya ennivirikana wa khula emusi. Maana makhalelo a khula emusi annivirikana. Okhala wira sootthuneya, okumi ni muupuwelo wa ale anitthuneya okhaliheriwa, ti soovirikana. Atthu akina oowunnuwela aakhalana anamwane anci, masi akina arina mwaana mmosa paahi. Akina anniwerya okhaliheriwa ni guvernu, masi akina khanlipelela nikhaliheryo nlo. Soothanla sa mutthu owo onitthuneya okhaliheriwa sinnivirikana-tho. Tivonto ohikhanle aya wa miruku wala ohinooniherya aya ophenta waalavula moohiloka amusi yaale anithanla enamuna enaasivela ya waakhapelela amusi aya owunnuwela. Maana Yehova pooti wiiriha okhumela saana khula enamuna enithanliwa enivarihana ni Biibiliya, ntoko saarya aya okathi wa Moise.​—Moth. 11:23.

9-11. (a) Muxankiho xeeni anikumana aya atthu akina? (Nwehe efootu yoopacerya) (b) Xeeni anamuyari ahikhanle aya owaakhanyererya anaaya ohiya muteko wa okathi wotheene? Muhimye ntakiheryo.

⁹ Akhala wira amusi awo owunnuwela anikhala mapuro oorakamela, eyo pooti okumiherya muxankiho sa moota wowaakhapelela. Itthu sotutuxerya siniiraneya mweekumini mwaya, itthu ntoko omora, wunta nikhuva wala muxankiho mukina, sinniwiiriha anamwane orowa omuxukurya Maama wala Paapa, nnaamwi yahampanke palano. Ohiya-vo, atthu owunnuwela pooti otthuneyaka okhaliheriwa, okathi vakhaani wala mwa okathi munceene.a

¹⁰ Arumeyi a muteko wa okathi wotheene, yaale athanleliwe orowa ovaraka muteko ottaiwene ni opuro oyariwa aya, pooti woonaka okhala voovila opaka soothanla okathi owo. Ale anirumeela ntoko maBethelita, mamisionaario ni axitokweene oweetteetta, otheene aya annoona muteko othanleliwa aya okhala mareeliho anikhuma wa Yehova. Hata vari siiso, okathi oniwereiwa aya anamuyari aya, etthu enipacerya aya wuupuwela pooti okhala ela: ‘Niireke nihaana ohiya muteko ahu wira naakhapelele anamuyari ahu owaani?’ Masi, woonasa wene vaamukhala vamiruku opacerya ovekela wira mutthu owehe akhala wira eyo ti etthu anamuyari eniphavela aya, wala enrowa waahakalaliha. Khuuvo onitumereriwa waakuvela ohiya muteko a vameekha aya, maana ikwaha sikina pooti ohitthuneya opaka eyo. Nto vannitthuneya opaka makoho ala, niireke oretta owo onrowa ovira? Niireke oretta ene khotempe nto anna a mmulokoni khiyaarowa owerya okhaliherya?​—Mir. 21:5.

¹¹ Nrowe nthokorerye ntakiheryo na anna anli a emusi emosa yaawo khula mmosa aarumeela ottaiwene. Mmosa ari misionaario wa America do Sul, mukina aavara muteko oseedi wa muteko ahu a ilapo sotheene, Brooklyn Nova York. Nto anamuyari aya anna ale mwaha wa wuuluvala yaatthuneya okhaliheriwa. Anna awo owanli ni axaraaya yaahirwa waaxekurya anamuyari aya wira yoone nikhaliheryo xeeni naatthuneya ni moota woovaha nikhaliheryo nlo. Nuuvira okathi, mulopwana ni amwaarawe yaale yaarumeela wAamerica do Sul, yuupuwela ohiya muteko yaathanleliwa aya wira yaathokoreryeke anamuyari aya. Masi, okathi omosaru yaahitelefonariwa ni mutokweene onuuraanyiha nikhuuru na axitokweene na muloko waari anamuyari aya. Axitokweene awo yaahithokorerya mwaha ole nto khiyaphavela wira mamisionaario ale avikaniheke ovara muteko aya mpakha okathi ohinweryaneya aya ovikaniha. Axitokweene ale yaanisiveliwa ni muteko wemisionaario wa munna ole ni mwaarawe, tivonto yaaphavela aya opaka etthu piitthu yaawerya aya wira yaakhaliherye anamuyari ale owunnuwela. Nto emusi ele yotheene yaahitthapela nikhaliheryo nle noophenta.

12. Etthu xeeni imusi sa maKristau sinireerela aya othokorerya okathi woothanla enamuna ya omukhapelela mmusi owunnuwela?

¹² Wa khula enamuna muKristau enithanla awe ya waakhapelela anamuyari awe owunnuwela ehaana wooniherya ottittimiha nsina na Muluku. Hiyo khanniphavela olikanaka ni ahooleli a etiini a mahiku a Yesu. (Math. 15:3-6) Masi nimphavela wira soothanla sahu simuttittimiheke Muluku ni muloko.​—2 aKor. 6:3.

MURITTI WA MULOKO

13, 14. Moovarihana ni Biibiliya, exeeni enniiriha okupaliki wira muloko ookhalana muritti wowaakhaliherya anna owunnuwela?

¹³ Khahiyo wira khula okathi vanooweryaneya waakhaliherya anna ale anirumeela okathi wotheene ntoko simanle ahu woona. Hata vari siiso, yookhala yoowiraneya emosa yaakhumelenle muloko wa eseekulu yoopacerya enooniherya wira muloko wa eKristau onnisiveliwa waakhaliherya anna ni arokora owunnuwela. Biibiliya onnihimya wira muloko wa oYerusalemu “kharivo òthoiwa”. Eyo khentaphulela wira atthu otheene yaari anamuhakhu. Owehasa wene aakhala atthu yahaarina etthu, tivonto ‘khula mutthu anikaweliwa ntoko othoiwa wawe’. (Mit. 4:34, 35) Masi, muhoolo mwaya waahikhumelela muxankiho. Vanihimmwa wira “anamukhweli akina athiyana khiyajaliwa sana yakaiwaka yolya” ya khula nihiku. Tivonto arummwa yaatumerenrye aya othanliwa atthu oophwanelela, yaawo yaarowa opaka malokiheryo wira anaamukhweli ale akaweliweke itthu saathowa mwa enamuna yooloka. (Mit. 6:1-5) Ekeekhai wira okaiwa wa yoolya ele yaari malokiheryo a okathi vakhaani yaapakeliwe waakhaliherya atthu yaale yaakenle eKristau va Pentekoositi 33 EC, khuhala oYerusalemu wira yiixutte itthu sikina sa omunepani. Hata vari siiso, moota arummwa saathokorenrya aya mwaha ole onooniherya wira vanniweryaneya miloko waakhaliherya anna oothoiwa.

¹⁴ Ntoko soonale ahu Paulo aahinvaha Timootheyo malakiheryo yooniherya mikhalelo sa anaamukhweli yaaphwanela okhaliheriwa mmulokoni. (1 Tim. 5:3-16) Vamosaru, Yakobo yoole olempe epaphelo eri mBiibiliyani uupuxeriwaka ni Muluku, aanisuwela otthuneya waya muKristau waakhapelela anaamukhweli, ikwaasuni ni atthu akina ari mmaxakhani wala oothoiwa. (Yak. 1:27; 2:15-17) Murummwa Yohani aahimmye so: “Akhala mutthu ohinthoiwa muhakhu vathí-va, amona munn’awe òthoiwa, khùmiha murim’awe, khuhinvaha etthu, onwerya sai ohimya wira miyo kinniphenta Muluku?”. (1 Yoh. 3:17) Nto akhala wira khula muKristau ookhalana muritti wowaakhaliherya ale ari oothoiwa, niireke miloko khisirina muritti owo?

15. Myaha xeeni sikhanle oothokoreriwa voohimya sa waakhapelela anna ni arokora owunnuwela?

¹⁵ Ilapo sikina guvernu onnivaha musurukhu, yoolya ni ookhalana anamuteko anaakhapelela atthu owunnuwela. (aRom. 13:6) Masi mapuro makina itthu iyo khisivo. Tivonto, inamuna sa waakhapelela anna ni arokora awo owunnuwela, sinnivirikana wa khula emusi ni khuta muloko. Akhala wira munna owunnuwela ookhalana anamwane ari mapuro oorakamela, eyo enoowerya okumiherya muxankiho sa moota wowaakhaliherya anamuyari aya. Nto anamwane awo animwiira saana waakohererya axitokweene a muloko wira asuwele makhalelo a anamuyari aya. Mwa ntakiheryo, axitokweene pooti waakhaliherya anamuyari awo owunnuwela, apakaka marehereryo wira asuwele moota guvernu wala mitthenkeso sikina sikhanle aya oowaakhaliherya anna awo owunnuwela. Awo anoowerya oweha itthu ntoko envelopi ehihuliwe wala murette ohiwunrye aya yoowo onitthuneya anamwane owunnuwela wira akhaliherye. Wiiwanana moota owo onnikhaliherya wira ehikhumelele etthu yootepa ni onnikweiherya itthu. Waaphavela atthu akina akhanle owaasuweliha itthu siniireya anamwane owunnuwela anikhala ottaiwene, onnivukula oxankiheya wa amusi ari ottaiwene.

16. Itthu xeeni maKristau makina anipaka aya wira yaakhaliherye anna owunnuwela?

¹⁶ Mwaha woophenta anna akina annivahererya okathi ni ikuru saya wira yaakhaliherye anna owunnuwela wa khula etthu eniwerya aya. Awo annipaka eyo mwa enamuna enooniherya niphento nuulupale wa anna owunnuwela ari mmulokoni mwaya. Anna akina yiivaherenrye annikawana miteko wira aranttelaneke waakhaliherya anna owunnuwela. Akina yaale anoona wira khaniwerya okela muteko wa okathi wotheene, annisiveliwa waakhaliherya anna owunnuwela wira anaaya anirumeela ottaiwene ahihiye orumeela opuro orya aya. Tthiri anna awo annikhaliherya mwa enamuna yootepexa oreera! Ekeekhai wira okhaliherya wa anna akina, khoniwiiriha anamwane woonaka wira kharina muritti wowaakhapelela anamuyari aya.

MWAATTITTIMIHE OWUNNUWELA NI MASU OOLIPIHA

17, 18. Mukhalelo xeeni wooloka onireerela wooniheryaka okathi onaakhapelela ahu anna owunnuwela?

¹⁷ Atthu otheene, niire so, ale anikhaliherya ni anikhaliheriwa ahaana wiimananiha wira etthu piitthu enipakiwa ekhale yoohakalaliha. Nto akhala wira ehaavo etthu ekhanle anyu oopaka, muhaana okhalana moonelo wooloka. Ikwaha sinceene wuuluvala onnikumiherya ovololiheya ni oriipiwa murima. Tivonto vanitthuneya aya wiimananiha wa vameekhaaya wira naattittimihe anna awo owunnuwela nilavulaka mmukhalelo wowaalipiha. Ale avanre muteko wa Muluku iyaakha sinceene ahaana ottottopeliwa. Yehova khonikhala-khala oliyalaka muteko anvarenle aya, nave-tho maKristau khanaaliyala.​—Mmusome Malakhiya 3:16; aHéberi 6:10.

¹⁸ Ohiya-vo, miteko sa khula nihiku sinoowerya okhumela saana, akhala wira, atthu otheene annimananiha ohimya etthu enikumiherya otheya wooreerela. (Mus. 3:1, 4) Anna anceene owunnuwela anniimananiha ohiveka itthu sinceene wira ahaaxankihe ale anaakhapelela. Awo annisuwela wira oxukuriwa ni okhapeleliwa waya onlipa ni ophavela okhaliherya wa ale anaakhapelela owunnuwela. Ikwaha sinceene ninniwiiwa atthu akina ahimyaka so: “Kaaronwe omulipiha mpatthani aka owunnuwela, masi miyo kilipihiwe”.​—Mir. 15:13; 17:22.

19. Etthu xeeni amiravo ni owunnuwela enireerela aya olipelelaka?

¹⁹ Vano hiyo ninniwehererya nihiku onrowa aya omala-malihiwa wuuluvala, ohaawa ni ohimalela orina ahu. Masi, nenna va, arumeyi a Muluku ahaana olipelelaka ni murima wotheene itthu sa muhoolo sihinrowa omala. Noosuwela wira waaroromela anatiri a Muluku onnilipiha okathi wa mixankiho. Mwaha wa nroromelo, ‘tivó vahinojeyahu. Nto akhala wira erutthu ahu enrowa omalamala, masi murim’ahu onotepa wululiwa nihiku ti nihiku’. (2 aKor. 4:16-18; aHéb. 6:18, 19) Nincereryaka olipiha wahu nroromelo, etthu xeeni ekina enrowa wookhaliheryani waakhapelela anna owunnuwela? Muru onittharelana onrowa othokorerya miruku soovareleya muteko sa moota woowerya opaka eyo.

[Enoota]