MWAHA WOOPACERYA | NIIREKE MUHAANA OVEKELAKA?

Xeeni Atthu Anivekela Aya?

Niireke nyuwo munnivekela? Anamunceene annivekela, hata yaale ahinimukupali Muluku. Masi xeeni atthu anivekela aya? Moovarihana ni yootokosa ya oFrança, 50 pursento ya atthu a elapo eyo annivekela wala wuupuwelela “aphavelaka okhala saana paahi”. Ntoko anamunceene a wEuropa, awo khanivekela emukokhorelaka Muluku. Masi, aniphavela “mureerelo onikhumela mwaha woovekela”. Atthu akina animwaamini Muluku, aninvekela paahi okathi anixanka aya, aphavelaka ovahiwa mowaakuveya itthu aniveka aya.​—Yesaya 26:16.

Ankhi nyuwo? Niireke munuupuwela wira ovekela onikhaliherya paahi okathi wa mixankiho? Akhala wira munnimukupali Muluku, niireke ovekela onnookhaliheryani mookumini mwanyu? Wala onikhala wira mavekelo anyu khanaakhu-liwa? Biibiliya pooti wookhaliheryani osuwela wira ovekela khonikhaliherya paahi okathi wa mixankiho, masi ti enamuna yoolokexa wira mmwaattamele Muluku.