WAAKHULIWA WA MAKOHO A MBIIBILIYANI

Ti pani onilamulela olumwenku ola tthiri?

Anamunceene anikupali wira Muluku eekeekhai tonilamulela olumwenku ola. Masi, akhala wira eyo ekeekhai, xeeni atthu anihaawa aya vanceene? (Otumererya 32:4, 5) Moovarihana ni Biibiliya, olumwenku oneettihiwa ni mutakhali.​—Mmusome 1 Yohani 5:19.

Mutakhali owo opacenrye sai weettiha olumwenku? Wanipacerya wa sowiiraneya sa apinaatamu, nlaikha nimosa naahimmwareela Muluku ni naatumererya Adamu ni Eva ohimwiiwelela Muluku. (Maphattuwelo 3:1-6) Anamathelana awo yaahithanla wiiwelela nlaikha nlo, ori Satana, amwiirihaka okhala namalamulela aya. Muluku Oowerya Sotheene, tori namalamulela oophwanela, masi owo oniphavela wira atthu amuthanle namalamulela yoowo animphenta aya. (Otumererya 6:6; 30:16, 19) Mooriipiha murima, atthu anci anniwokiwa nto khiyapaka yoothanla yoohiloka ntoko Adamu ni Eva.​—Mmusome Wisupulula 12:9.

Ti pani onrowa omaliha mixankiho sa apinaatamu?

Niireke Muluku onimweemya wira Satana ovikaniheke olamulela mootakhala? Nnaari! Muluku onirowa omurumeela Yesu wira olokiherye itthu sootakhala Satana opanke awe.​—Mmusome 1 Yohani 3:8.

Ovahiwaka ikuru ni Muluku, Yesu onrowa ompwetexa Satana. (aRoma 16:20) Nuumala-vo, Muluku onrowa waalamulela apinaatamu ni waattikiherya okumi woohakalala ni wa murettele ntoko saaphavenle awe wanipacerya.​—Mmusome Wisupulula 21:3-5.

Wira musuwele soohimmwa sikina, muwehe muru 3 wa eliivuru ela, yoolaleiwa ni Anamoona a Yehova.

Mubaxari va www.jw.org/vmw