Nwiriyaneke Nsu na Yehova Khuta Opuro Oryaanyu
“Owaruni wanyu munimwiwa nsu ninrowa wohimeryani wira, ‘ephiro yorera t’ila’”.—YES. 30:21.
MWAAROWA WAAKHULA SAI?
Moota xeeni Satana onimananiha awe wira hiyo nihiiweke nsu na Yehova?
Moota xeeni murima ahu okhanle awe oonoceeliha onwiriyana Yehova?
Exeeni ekhanle ahu oopaka wira naakhele malakiheryo a Muluku?
1, 2. Yehova onaalavuliha sai arummwa awe?
KHALAI okathi waalempwa Biibiliya, atthu anceene yahaakhela malakiheryo a Yehova mwa inamuna soovirikana. Atthu akina, Muluku aanaalavuliha orumeelaka nlaikha, oloha ni sowooniherya, okathi mukina aanaasuweliha etthu yaarowa okhumelela muhoolo. Okathi mukina anaavaha muteko mmosa wowooneya wira avare. (Moth. 7:89; Ezek. 1:1; Dan. 2:19) Akina yaanivahiwa malakiheryo ni apinaatamu yahoolela mulokiheryo wa Muluku valaponi, yaawo yaalavula mwa nsina na Yehova. Voohicikha etthu sa enamuna yaarumeeliwa wira yaakhele nuulumo na Yehova, atthu otheene yaale yaiwelela malakiheryo awe yanireelihiwa.
2 Olelo-va, Yehova onnaalakiherya atthu awe oorweela wa Biibiliya, munepa awe wootteela, ni muloko. (Mit. 9:31; 15:28; 2 Tim. 3:16, 17) Malakiheryo annivaha awe towiiweya saana vanakhala ntoko ‘maaru ahu taniiwa masu ottuli wahu ariki: “Ephiro yorera t’ila, mutthareke yela”’. (Yes. 30:21) Tthiri Yesu onninikhaliherya wiiwa nsu na Yehova vaavo vanihoolela awe muloko omurumaka “Murumeyi òroromeleya n’ankhili”. (Math. 24:45) Hiyo nihaana wiiwelela moomalela malakiheryo awo, okhala wira woopowa wahu onilipa ni wiiwelela wahu.—aHéb. 5:9.
3. Exeeni ekhanle oohonona wiiwelela wahu malakiheryo a Yehova? (Nwehe elatarato yoopacerya.)
3 Satana Diabo oniphavela omala-maliha ephiro eyo Yehova enirumeela awe wira onivaheke malakiheryo anoopola ekumi. Ohiya-vo ‘murima ahu wowotha’, pooti onoceeliha otthara oratteene malakiheryo a Yehova. (Yer. 17:9) Ti maana aya, vanitthuneya ahu othokorerya moota woowanana mixankiho siniiriha woonaka ovila omwiiwelela Muluku. Ninrowa-tho othokorerya moota ovaanela saana ni Yehova, onikhapelela aya wataana wahu ni yena voohicikha etthu sa ele ennikhumelela.
WAAXINTTA APALANO A SATANA
4. Satana onimananiha sai opahula muupuwelo wa atthu?
4 Satana onnimananiha opahula muupuwelelo wa atthu omwarya-mwaryaka itthu sowoothiwa. (Mmusome 1 Yohani 5:19.) Wuncererya ijornale ni iliivuru sinilempwa mulaponi, itthu ntoko raadio televisau ni Internet sinnimwarya-mwarya itthu olumwenku wotheene. Nnaamwi itthu iyo okathi mukina silaleyaka itthu sookhalela, ikwaha sinceene sinitumererya mweettelo onivirikanya sooruma sa Yehova. (Yer. 2:13) Mwa ntakiheryo, ihapari ni inamuna sa otthekula sinikumiheriwa mulaponi, sinnalavula atthu a enoka emosa anithelana sintoko etthu yohitthekeya, nto anamunceene anoona wira ele Biibiliya enihimya awe etthu yootepexa ovila weettela.—1 aKor. 6:9, 10.
5. Ninrowa okhootta sai owokiwa ni olavilavi wa Satana?
5 Nto moota xeeni ale aniphenta exariya ya Muluku sinrowa aya owerya okhootta owokiwa ni olavilavi wa Satana otempe wuulaana olelo-va? Anrowa owerya sai osuwela ohiyaniha itthu sooloka ni soohiloka? ‘Yiwelelaka molumo’ a Muluku! (Esal. 119:9) Nuulumo noolempwa na Muluku nookhalana malakiheryo anrowa onikhaliherya hiyo osuwela ekeekhai ni osyaka itthu sowoothiwa. (Mir. 23:23) Yesu aahilavula masu anikhuma mBiibiliyani yaawo ani: ‘Khahiyó ephawuru pahi mutthu t’onkhalawe mukumi, masi wa khula nulumo ninkhuma mwano mwa Muluku’. (Math. 4:4) Hiyo nihaana wiixutta ovarihela muteko miruku sa Biibiliya mweekumini mwahu. Mwa ntakiheryo, Moise ohinatthi olepa nlamulo na Yehova ninkhoottiha mararuwo, mmiravo Yosefe aahisuwela wira oraruwa khommusivela Muluku. Okathi eehereriwa awe ni mwaara Potifari wira opake etampi, Yosefe khuupuwenle itthu piili: ohimwiiwelela wala omwiiwelela Muluku. (Musome Maphattuwelo 39:7-9.) Nnaamwi aavinre okathi munceene eehereriwaka ni muthiyana ole, Yosefe khaaphavenle ottiyela maaru wira ohiiwe nsu na Muluku. Enamuna yoosuwela othanla itthu soohiloka ni sooloka ori onwiriyana Yehova, ni okhootta itthu sa Satana sikhanle oniiriha ohiiwa nsu nawe.
6, 7. Nipake exeeni wira nihiwokiwe ni miruku soohiloka sinikumiheriwa ni Satana?
6 Olumwenku ola woosareya itiini siniixuttiha itthu sowoothiwa, tivonto atthu akina anoona wira khivaniweryaneya ophwanya etiini ya ekeekhai. Masi, Yehova ookumiherya malakiheryo awe manceene ni oowiiwanyeya saana wira ale anitthuna attotteleke mureerelo. Hiyo aneene ti nirina muritti wa omuthanla ole onrowa ahu omwiiwelela. Okhala wira khivaniweryaneya okathi omosaru waawiriyana atthu anli anilavula, nto nihaana ‘osuwela nsu’ na Yesu ni onwiriyana yoowo. Yoowo paahi tothanliwe ni Yehova wira okhapeleleke ipwittipwitthi Sawe.—Mmusome Yohani 10:3-5.
7 Yesu aahimyale wira ‘mutthokelele sana etthu enìwanyu’. (Mar. 4:24) Malakiheryo a Yehova towiiweya saana ni taxariya, masi hiyo nihaana olokiherya murima ahu wira niiwe saana. Naahikhalane ephoole, hiyo pooti owokiwa nto murima ahu khiyakhootta wiiwelela miruku soophenta sa Muluku, khiyatthara nsu nootakhala na Satana. Tivonto muheemye itthu ntoko isipo, iviidiyu, televisau, iliivuru, apatthani, maprisoori, wala ale anihimmwa okhala asuweli a olumwenku ola, wira yeettiheke ekumi anyu.—aKol. 2:8.
8. (a) Moota xeeni murima ahu okhanle awe oomukhweiherya Satana? (b) Exeeni enrowa onikhumelela naahivahe ephoole itthu sinnilopola?
8 Satana onnisuwela-tho wira erutthu ahu osiveliwa itthu sootthekeya, nto oniphavela oniiriha woonaka ovila owanana yootteettheya eyo. Tivonto, okathi Satana onnituphela awe mwa enamuna eyo, vanikhala vooxankiha ovikaniha okhala oororomeleya. (Yoh. 8:44-47) Masi ninrowa owerya sai oxintta muxankiho owo? Nkahaya muupuwele sa mutthu ohincalela itthu sa omunepani onaphavela opuha paahi, owo pooti ovareya ni itthu iyo mpakha opaka etampi yahuupuwela awe wira ampaka. (aRom. 7:15) Eniireya sai etthu eyo yootakhala? Waaniheryasa mutthu onipacerya vakhaani-vakhaani mpakha ohiya owiriyana nsu na Yehova. Woonasa wene khonicalela itthu sinooniherya otteettheya wawe, khonikumiha vamurimani vawe itthu soohiloka. Mwa ntakiheryo, pooti wira oohiya opaka mavekelo, khonirowa olaleerya, wala onicompela mithukumano. Itthu iyo pooti omwiiriha opaka etthu yeele yaasuwela awe okhala yoohiloka. Masi hiyo nnoowerya osyaka ehasara eyo akhala wira ninnivaha ephoole soolopola sinoona ahu, ni olokiherya moohipisa etthu yoohiloka erina ahu. Ni vakhala wira hiyo ninniwiriyana nsu na Yehova, khivanireerela owiriyanaka etthu ekina yaarowa onaakanyerya.—Mir. 11:9.
9. Xeeni varyaaya vooreerela mutthu woonela vahinatthi itthu soohiloka sirina awe?
9 Waakuvela oloola oretta onnimwiiriha mutthu waakuva openuwa. Vamosaru, hiyo nnoowerya osyaka ihasara sinceene akhala wira ninnaakuvela omala-maliha itthu sikhanle oniruuhela ehasara. Nuumala woona wira nookhalana etthu yoohiloka, ti vooreera waakuvela opaka etthu, nihinatthi ovariwa ni Satana niri akumi. (2 Tim. 2:26) Nto nipakeke exeeni akhala wira niheemya muupuwelo ahu onihapuxaka mwa ele Yehova enniruma awe? Voohipisa nihaana otthikela wa yoowo mowiiyeviha, ni otthukula maaru ahu wira niiwe miruku sawe ni murima ahu wotheene. (Yes. 44:22) Nihaana osuwela wira napaka soothanla soohiloka olumwenku ola wa Satana onoonikumiherya maxakha maalupale. Tthiri ti vooloka okhootta khula etthu eniwerya oniphwanyiha ehasara yuulupale!
OXINTTA WIIXINUWIHA NI NRIMA
10, 11. (a) Mutthu owiixunuwiha onooneya sai? (b) Exeeni eniixutta ahu sa mweettelo woohiloka wa Kore, Datani ni Abirami?
10 Hiyo nihaana osuwela wira murima ahu pooti onihapuxa-tho. Tthiri yoottheka yookhalana owerya wuulupale mweekumini mwahu! Mwa ntakiheryo, vanniweryaneya hiyo okhala oowixinnuwiha ni anrima. Nkuupuwelani moota wiixinnuwiha ni nrima oniwerya aya ohonona enamuna eniiwa ahu nsu na Yehova nto khiyaniiriha orowa ephiro yoohiloka. Mutthu oowiixinnuwiha onuupuwela wira moonelo awe torina efaita waavikana akina. Owo pooti woonaka wira ookhalana ehakhi ya opaka khula etthu eniphavela awe voohikhala mutthu mukina onimuleela etthu yoopaka. Nto khiyoona wira khuuvo oniphwanela onvaha miruku, okhale munna awe ori muKristau, axitokweene, wala nikhuuru nootthokiheya na Yehova. Mutthu moota owo, khoniwerya wiiwa saana nsu na Yehova.
11 Okathi aIsarayeli yeetta aya moothakoni, Kore, Datani ni Abirami yaahikhotta ottittimiha okhulupale wa Moise ni Aroni. Mwaha wa wiixunnuwiha waya, awosa khiyaaphavela otthara malakiheryo yaakhanle a omukokhorela Yehova. Yehova oonenle sai mweettelo owo? Owo aahiwiiva atthu ale otheene. (Moth. 26:8-10) Tthiri yowiiraneya ela enniniixuttiha etthu yootepexa otthuneya! Omurukunuwela Yehova onnikumiherya maxakha. Nto otheene ahu nihaana wuupuwelaka wira “wisona okhuvela opweteya”.—Mir. 16:18; Yes. 13:11.
12, 13. (a) Nvahe nlikanyiho nnooniherya moota nrima ninwerya aya okumiherya ehasara. (b) Mutthokiherye moota nrima nniinuwa aya voowaakuveya naahisyakiwe.
12 Nrima etthu yootakhala-tho. Mutthu anrima, ikwaha sinceene towiikuxererya ni onnivikana mukano awe. Nuumala mukhulupale aanakhotto oSiria, Naamani, openuxiwa maretta yaarina awe, owo aahinvaha mireerelo Profeta Eliseyo, nto Eliseyo khukhootta. Masi, murumeyi a Eliseyo, Gehazi aahirowa waakhelela mireerelo iye. Gehazi uupuwenle so: “Wa Muluku mukumi, miyo kinomutthimakela [Naamani], kanvekele etthu p’itthu”. Ohooniwaka ni Eliseyo, owo aahimutthimakela Naaamani, nto khukelela wootha onvekelaka “etalento emosa ya eparatha ni sowara pili”. Nto exeeni yaamukhumelenle Gehazi mwaha wa omootherya profeta a Yehova? Makuttula a Naamani yaahimukela naanrima ole Gehazi!—2 Mam. 5:20-27.
13 Wira mutthu okhalane nrima onipacerya vakhani-vakhaani, masi aahimala-malihe, nnooweerya wunnuwa mowaakuveya, mpakha ompahula mutthu owo. Yowiiraneya ya Akani ennooniherya saana owerya orina aya nrima. Moone moota nrima na Akani naakunve aya wunnuwa. Owo aalavunle wira nuumala ‘wona nlaya norerexa ni norikexa, nakhumme oBabilonia, ni eparatha ixékeli miloko miloko mili (200), n’iwero, olemela waya wari ixékeli miloko mithanu (50); kahikhummwa murima, khukuxa. Akani khakhoottale muupuwelo woohiloka, tivonto nrima nahimwiiriha wiiya ni orowa ovitha muheemani mwawe. Nuumala Yoxuwa osuwela etthu yoohiloka yaapanke awe Akani, aahimuhimeerya wira Yehova aarowa omuruuhela ehasara. Akani ni emusi awe yaahivonyakasiwa maluku mpakha okhwa. (Yox. 7:11, 21, 24, 25) Tthiri nahikhalane ephoole nrima nnoowerya onipahula. Tivonto vanitthuneya ahu wiipasoopa wira ‘nihikhalé atthu òwùnlela muhakhu’. (Luka 12:15) Khula okathi onikhalana ahu muupuwelo woohiloka, ntoko ophavela itthu sa ekhapa, vaamureerela olokiherya muupuwelo ahu wira niheemye etthu eyo yinnuwaka mpakha oniiriha opaka etampi.—Mmusome Yakobo 1:14, 15.
14. Exeeni ekhanle ahu oopaka akhala wira ninnoona murima ahu ophavela itthu sa nrima ni wixiinnuwiha?
14 Wiixinnuuha ni nrima pooti okumiherya ehasara. Wuupuwelela ele enikhumelela mwaha wa otthara mweettelo woohiloka, onoonikhaliherya okhootta khula etthu yaarowa onoceeliha wiiwelela nsu na Yehova. (Otum. 32:29) MBiibiliyani, Muluku a ekeekhai khoninleela ephiro yooloka paahi, masi onninleela-tho mireerelo sikhanle sa weettela ephiro eyo ni ihasara sinrowa onikhumelela narowa ephiro yoohiloka. Akhala wira murima ahu onniniiriha ophavela opaka etthu yootakhala enivarihana ni nrima vamosa ni wiixinnuwiha, vaarowa okhala vamiruku wuupuwela toko ele enrowa onikhumelela. Hiyo nihaana wuupuwelaka moota etthu eyo yootakhala enrowa waariipiha murima atthu anaaphentta ahu ni vanceenexa wataana wahu ni Yehova.
MUVIKANIHE OVAANELA SAANA NI YEHOVA
15. Exeeni eniixutta ahu voohimya sa ovaanela waari-vo eriyari ya Yesu ni Yehova?
15 Yehova oniphavela mureerelo ahu. (Esal. 1:1-3) Owo onninivaha malakiheryo manceene akhanle ahu oophwanya khula okathi. (Mmusome aHéberi 4:16.) Nnaamwi Yesu aari mutthu oomalela, owo aalipana malakiheryo aavahiwa awe ni Yehova, nave aanilavula moohihiyererya ni Yehova orumeelaka mavekelo. Nto Yehova aahimukhaliherya ni omulakiherya Yesu mwa enamuna ya vameekha aya. Owo aahiruma malaikha wira yamukhaliherye, aahinvaha munepa wotteela wira omukhaliherye ni omulakiherya waathanla arumeyi awe ale 12. Nsu na Yehova nahiiwanyeya nikhumaka wiirimu, nooniheryaka wira owo aanimukhaliherya tthiri Yesu. (Math. 3:17; 17:5; Mar. 1:12, 13; Luka 6:12, 13; Yoh. 12:28) Nimutakihaka Yesu hiyo nihaana ovaneelaka ni Yehova, ni murima ahu wotheene. (Esal. 62:8, 9; aHéb. 5:7) Nirumeelaka mavekelo, hiyo nnoowerya ovaanela ni Yehova vamosa ni otthara ephiro yooloka eninvuwiha.
16. Ninrowa owerya sai okhaliheriwa ni Yehova wira niiweke saana nsu nawe?
16 Nnaamwi malakiheryo a Yehova aphwanyaneyaka wa atthu otheene, owo khonaakhanyererya atthu awo otthara malakiheryo awo. Hiyo nintthuneya onvekela munepa awe wootteela nto owo onrowa onivaha vooreera wawe murima. (Mmusome Luka 11:10-13.) Tivonto vanitumereriwa ahu wira ‘niphaveleke wiiwa orattene’. (Luka 8:18) Mwa ntakiheryo, vaarowa okhala wiiwoka, akhala wira mutthu onninvekela Yehova wira oxintte mweettelo woohiloka, ntoko onamuttompe, masi khiyavikaniha oweha epornografia wala ifilme sinooniherya itthu seekhapa. Tthiri nihaana opakaka itthu sinooniherya wira nimphavela okhaliheriwa ni munepa wa Yehova. Hiyo noosuwela wira munepa wa Yehova ori mmithukumano sa muloko. Arumeyi anceene a Yehova aawerya osyaka ihasara sinceene mwaha woorowa onwiriyana Yehova omuthukumanoni. Mithukumano sowiiriha atthu anceene woona etthu yoohiloka yaari vamurimani, nto khulokiherya mweettelo aya.—Esal. 73:12-17; 143:10.
MUVIKANIHE WIIWA NSU NA YEHOVA
17. Xeeni varyaaya vootakhala mutthu wiiroromela?
17 Nkahaya mmuupuwele Mwene Davidi a wIsarayeli a khalai. Okathi aaryaawe mmiravo, owo aahimuxintta Goliyathi nakhotto ootupexa aFilisti. Davidi aahitoko okhala nakhotto, mwene, owaakhiherya, ni mulipa aakumiherya malamulo wira atthariweke ni nloko notheene. Masi okathi waapacenrye awe wiiroromela, murima awe wahihapuxiwa nto aahipaka soottheka suulupale ni Bathixeba, nave aahimpaka palano wira iiviwe Uriya, iyawe Bathixeba. Masi okathi aalakiwe awe, Davidi moowiiyeviha aahaakhulela yoottheka awe, nto aahitthikela wataana vooloka ni Yehova.—Esal. 51:4, 6, 10, 11.
18. Etthu xeeni enrowa onikhaliherya ovikaniha owiriyana nsu na Yehova?
18 Nihaana wiiwelela yoolepa ya 1 aKorinto 10:12, ni okhala oohiiroromela vanceene. Vanniweryaneya mutthu onwiriyana Yehova, aahiiso Satana, mwaha woowi khanniwerya ‘wettiha mavalo ahu’. (Yer. 10:23) Nrowe nivikanihe opaka mavekelo, otthara malakiheryo a munepa wootteela, nave khula okathi nihaana onwiriyana Yehova.