Nyuwo Munoowerya Owanana ni Omuxintta Satana!

“Mmukhotteke Satan’owo, mulimpene mowaminini”.​—1 PED. 5:9.

NINROWA WIILIPIHA SAI WIRA NIWANANE SATANA . . .

nisyakaka wiixinnuwiha?

nisyakaka ophenta mihakhu?

nisyakaka orupihana woohiloka?

1. (a) Xeeni ekhotto eniwana ahu ni Satana eryaaya yootthuneya mahiku ala? (b) Ninsuwela sai wira nnoowerya omuxintta Satana?

SATANA onniwana ni alipa oowoottihiwa nlelo ari valaponi ni “ipwittipwitthi sikina”. (Yoh. 10:16) Yoolaka ya Diabo waakhuura arumeyi a Yehova mowaakuveya okhala wira owo orina okathi vakhaani paahi. (Mmusome Wisupulula 12:9, 12.) Niireke hiyo nnoowerya omuxintta Satana? Aayo! Biibiliya onihimya so: “Tivó, mmwiweleleke Muluku. Mmukhotteke Satana; Satan’owo onimotthyawani”.​—Yak. 4:7.

2, 3. (a) Moota xeeni muupuwelo woowi Satana khokhanle onimukhweiherya aya Diabo waawoka atthu? (b) Niireke nyuwo munneemya wira Satana ookhala tthiri?

² Anamunceene khaneemererya wira Satana ookhala tthiri. Atthu awo anoona wira Satana ni minepa sawe khakhanle, anoolikana ni atthu aniromoliwa ni anoveela, ifilme sinooniherya itthu sowoopiha ni axooku a mucomputadoreni. Atthu awo anoona wira khuuvo mutthu orina ankhili ooloka onaamini wira minepa sootakhala sookhala. Vano, nyuwo munoona wira Satana ni axaapara awe ahinooneya yoohimmwa emosa ya ithale paahi? Nnaari khahiyo siiso! Wira siiso, waarowa omukhweiherya Satana ottiyela miruku sa atthu anceene wira ahikupaliki wira owo ookhala. (2 aKor. 4:4) Ottittimiherya wira minepa iyo khasikhanle ti ekaruma emosa Satana enirumeela awe wira aawoke atthu anceene.

³ Hiyo nikhanle arumeyi a Yehova, khinneemererya owokiwa ntoko atthu anceene awokiwe aya. Noosuwela wira Diabo ookhala tthiri, okhala wira ti yoole aalavunle ni Eva orumeelaka enowa. (Maph. 3:1-5) Satana aahinveiha Yehova mwaha wa waamini wa Yobi. (Yobi 1:9-12) Satana aahimananiha omweehererya Yesu. (Math. 4:1-10) Nto nuumala okhumelela Omwene wa Muluku mwaakha wa 1914, Satana aahipacerya “owana” ni alipa oowoottihiwa nlelo ari valaponi. (Wis. 12:17) Ekhotto eyo ennitepa wunnuwa vaavo Satana vaniphavelasa awe inamuna sa waamala-maliha a 144.000 ari valaponi ni ipwittipwitthi sikina. Wira nixintte ekhotto eyo, hiyo nihaana olipiha waamini wahu nimukhoottaka Satana owo. Muru ola onnithokorerya inamuna tthaaru sinirowa onikhaliherya opaka eyo.

MUSYAKE WIIXINNUWIHA

4. Moota xeeni Satana woonihenrye awe wira owo toowiixinnuwiha vanceene?

⁴ Okhala wene Satana toowiixinnuwiha. Tthiri yoopattuxiwa ele yomunepani yaahooniherya wiixinnuwiha iwo vaavale vaakhoottale aya olamulelo wa Yehova, nto khiyaphavela okhala muluku nave. Ti maana aya enamuna emosa ya omukhootta Satana ti osyaka wiixinnuwiha ni okhala oowiiyeviha. (Mmusome 1 Pedru 5:5.) Masi wiixinnuwiha exeeni? Niireke khula enamuna ya wiixinnuwiha ti yootakhala?

5, 6. (a) Niireke okhala wene wiixinnuwiha etthu yootakhala? Mutthokiherye. (b) Enamuna xeeni ya wiixinnuwiha eri yoohiloka, ni matakiheryo xeeni ari mBiibiliyani anooniherya eyo?

⁵ Disionaario mmosa onnitthokiherya so nuulumo noowi wiixinnuwiha “wiixoona okhala mutthu oophwanelela ni oottittimiheya” ni “wooniherya otteeliwa murima mwaha wa etthu yooloka epakiwe ni apatthani wala mutthu owo opanke awe ni mwaha wa okhalana etthu yooloka”. Eyo khahiyo etthu yootakhala. Murummwa Paulo ahaahimeerya aTesalonika wira: “Tivó, hiyo ninnìttottopa mwaha wa nyuwo eriyari ya ikereja sa Muluku, mwaha wa nthiti nanyu ni mwaha wo wamini wanyu molupatthiwani mwanyu mothene ni mmaxakhani munònanyu”. (2 aTes. 1:4) Nto otteeliwa murima mwaha wa itthu sooloka sipakiwe ni atthu akina, hata wiittottopa vakhaani onninikumiherya mureerelo. Tthiri khivanireerela hiyo wuuleliwa muri amusi ahu, makhalelo, wala elapo eyariwe ahu.​—Mit. 21:39.

⁶ Masi yookhala enamuna ekina ya wiixinnuwiha enihonona makhalelo ooloka ni wataana wahu ni apatthani hata ni Yehova. Wixinnuwiha moota owo onoowerya oniiriha hiyo wiixinla wala okhootta miruku sinivahiwa ahu. (Esal. 141:5) Wiixinnuwiha wa enamuna eyo onihimmwa okhala “mutthu oowiitthuna” wala “wiittottopa mwaha wa woonaka wira mutthu toolokexa waavikana atthu akina”. Yehova onnaanyokha atthu oowiixinnuwiha mwa enamuna ela. (Ezek. 33:28; Am. 6:8) Masi Satana vannimusivela waaweha atthu yooniheryaka munepa wa wiitthuna, okhala wira eyo ennimphwanyiha mureerelo. Tthiri makhalelo awo a Satana yaahooniheriwa ni atthu ntoko Nemurodi, Farawo, ni Absalomi, yaawo yaamorenle ntapha na wiixinnuwiha! (Maph. 10:8, 9; Okhum. 5:1, 2; 2 Sam. 15:4-6) Wiixinnuwiha tiwaamwiirinhe Kayini omwiiva muhimaawe. Owo aahilopoliwa ni Muluku, masi wiixinnuwiha waahimwiiriha okhootta wiiwelela miruku iye saavahiwe awe. Owo aahooniherya okhala mulolo, khukhootta wiiwelela yoolopola ya Yehova nto khutthimakela opaka ehasara.​—Maph. 4:6-8.

7, 8. (a) Exeeni ekhanle nthalu mwaha wa nikhuli, nto xeeni ohimmwaka wira eyo enamuna emosa ya wiixinnuwiha? (b) Mutthokiherye moota wiixinnuwiha okhanle aya oohonona makhalelo ooloka ni murettele mmulokoni.

⁷ Olelo-va, atthu anceene annooniherya wiixinnuwiha mwa inamuna sinceene sootakhala. Wiixinnuwiha tonikumiherya othanyana wa atthu mwaha wa ovirikana nikhuli. Disionaario mmosa olavulaka sa othanyana wa atthu onihimya so: “nthalu, waathanya atthu mwaha wa okhala a nloko nikina” ni “okupali wira atthu a makhuli oovirikana annisuwela ni aakhala itthu soovirikana, ni wira aakhala makhuli okhala wene ari oofai ovikana makina”. Wiixinnuwiha mwaha wa nikhuli onnikumiherya manyaku-nyaku, ikhotto, ni okathi mukina wiiviwa wa atthu anceene.

⁸ Tthiri itthu moota owo khasineemereriwa mmulokoni wa eKristau. Masi, ohiiwanana wa anna, weiwo okathi mukina onikhumelela mwaha wa wiixinnuwiha onnihonona makhalelo ooloka. Woonasa wene, etthu eyo yaaniiraneya muloko wa eKristau wa eseekulu yoopacerya, nto yaahimwiiriha Yakobo olepa nikoho nla noovara murima oriki: “Owanawana n’ikhotto eríyari anyu sinkhuma vai?”. (Yak. 4:1) Tthiri, ohiyererya sikhalaka vamurimani vahu miyuupuwelelo soohiloka ni wiixinnuwiha pooti opahula ilavulelo ni enamuna enipaka ahu itthu, nto eyo pooti waakumiherya maxakha atthu akina. (Mir. 12:18) Voowiiwanyeya saana, wiixunnuwiha onoowerya ohonona makhalelo ooloka a mmulokoni.

9. Moota xeeni Biibiliya onnikhaliherya awe osyaka waathanya atthu mwaha wa nikhuli ni khula enamuna ya wiixinnuwiha? (Nwehe elatarato yoopacerya.)

⁹ Vakhala wira hiyo okathi mukina ninniixoona okhala oofai waavikana atthu akina, nto nnitthuneya wuupuwela wira Yehova ‘onnaviruwela ale owisona’. (Mir. 16:5) Nave vaamureerela ovarerya moonele ahu voohimya sa atthu arina nikhuli noovirikana, anikhuma elapo ekina, wala arina makhalelo oovirikana. Vakhala wira ninniphwanya vamurimani vahu muupuwelelo wa nthalu wala wiixinnuwiha mwaha wa elapo eyariwe ahu, nto ninniliyalela wira “mwa mutthu mmosaru Muluku ohakumiha atthu a maloko othene”. (Mit. 17:26) Mwa enamuna eyo, vannooneya wira apinaatamu otheene amusi, okhala wira akhumme nipuro nimosa paahi, eyo piiyo, wa Adamu. Nto vanooniherya othoiwa ankhili waaminiki wira aakhala maloko oofai ovikana makina. Muupuwelelo owo ti wa Satana yoowo oniphavela opwetexa wiiraana wa muloko wa eKristau. (Yoh. 13:35) Wira niwanane ni omuxintta Satana, hiyo nihaana osyaka khula enamuna ya wiixinnuwiha wala wiisoona woohiloka.​—Mir. 16:18.

MUSYAKE OPHENTA MIHAKHU NI ITTHU SA MULAPONI

10, 11. (a) Exeeni woonasa wene ekhanle oomwiiriha mutthu opacerya ophenta olumwenku? (b) Moota xeeni Dema oonihenrye awe wira aaniphenta olumwenku?

¹⁰ Satana tonilamulela “vathí-va” ni olumwenku ola ori mmatatani mwawe. (Yoh. 12:31; 1 Yoh. 5:19) Ti maana aya itthu sinceene sinaasivela atthu olumwenku ola sinnivirikanya malakiheryo ari mBiibiliyani. Ekeekhai wira khahiyo wira khula etthu eri moolumwenkuni ti yoohiloka. Masi hiyo nihaana osuwela wira Satana onoowerya orumeela khula etthu eri olumwenku ola wira onitumererye opaka etampi wala ovenyerya ophenta olumwenku ni omuthanya Yehova.​—Mmusome 1 Yohani 2:15, 16.

¹¹ Tthiri ophenta olumwenku waahaapahula maKristau makina a eseekulu yoopacerya. Mwa ntakiheryo, murummwa Paulo aahilepa wira: “Dema òkinyanyala, mwaha w’osiveliwa n’itthu sa vathí”. (2 Tim. 4:10) Biibiliya khonihimya mooluluwanya etthu ya molumwenkuni yaamusivela Dema, mpakha omunyanyala Paulo. Woonasa wene Dema aapacenrye ophenta mihakhu ohiya itthu sa Muluku. Vakhala wira ti yeeyo yaakhumelenle, nto Dema aahiyeleela mihakhu sa Muluku. Masi aaphwannye exeeni? Niireke Dema aahiphwanya mireerelo saavikana mareeliho yaarowa awe ovahiwa ni Yehova, vaakhanle wira aahivikaniha weetta ni Paulo?​—Mir. 10:22.

12. Mwa inamuna xeeni nikhanle ahu oohompwa ni “wototha wa muhakhu”?

¹² Etthu yoolikana ni eyo pooti onikhumelela hiyo. MaKristau okhala wene annisuwela wira aakhalana muritti wa okhapelela emusi aya avahaka itthu sa werutthuni. (1 Tim. 5:8) Yehova oniphavela wira hiyo nikhaleke nipuro nooloka, nave eyo ennooneya vaavo vanithokorerya ahu nipuro nooloka naapwenhe awe Adamu ni Eva. (Maph. 2:9) Masi Satana pooti orumeela makhalelo awo wira onihophe ni “wototha wa muhakhu”. (Math. 13:22) Anamunceene anuupuwela wira musurukhu onimwaaphwanyiha ohakalala wala okhalana mireerelo sinceene tonikumiherya ohakalala. Muupuwelelo owo ti woowoka, ni owo onoowerya oniiriha hiyo oyeleela etthu yoolokexa erina ahu, eyo piiyo, wataana wahu ni Yehova. Yesu aahaalopola atthareli awe oriki: “Khavo oniwerya warumela mamwene manli; mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamunwerya omurumela Muluku vamosá ni muhakhu”. (Math. 6:24) Vakhala wira hiyo ninrowa okhala epottha ya Mihakhu paahi, nto khuhiya omurumeela Yehova, eyo ti etthu eniphavela awe Satana wira nipake! Nto niheemererye musurukhu wala itthu sinithuma aya sipwetexaka wataana wahu ni Yehova. Wira nimukhootte Satana, hiyo nihaana okhalana moonelo wooloka voohimya sa mihakhu.​—Mmusome 1 Timótheyo 6:6-10.

NIKHOOTTEKE ORUPIHANA WOOHILOKA

13. Moota xeeni olumwenku ola onitumererya awe moonelo woohiloka voohimya sa ekasamento ni orupihana?

¹³ Muraakho mukina Satana onirumeela awe ti orupihana woohiloka. Olelo-va, anamunceene anoona wira othelana ni mutthu mmosa, hata ekasamento ene etthu ehinivareleya muteko ni ennimwiiriha mutthu opweteiwa vanceene. Mwa ntakiheryo, mulopwana mmosa oovuwa onaapaka anoveela onihimya so: “Khivaniweryaneya mutthu othelana ni mutthu mmosa paahi. Nkinimusuwela mutthu oororomeleya wala oniphavela okhala oororomeleya ni ole othelanne awe”. Muthiyana onaapaka anoveela onihimya so: “Nkinaamini vakhala wira hiyo nipakiwe wira nithelaneke ni mutthu mmosa ekumi ahu yotheene”. Satana onnitteeliwa murima vaavo vaniwoona awe atthu oovuwa alavulaka voonyohola yoovaha ya Muluku ya ekasamento. Diabo khoniphavela tthiri woona marehereryo a ekasamento yeettaka saana wala akumiheryaka mireerelo. Wira niwanane Satana ni omuxintta, hiyo nintthuneya ovarexexa marehereryo a Muluku voohimya sa ekasamento.

14, 15. Ninrowa okhoottela sai orupihana woohiloka?

¹⁴ Akhale ale athelanne wala nnaari, ahaana wiimananiha ni ikuru saya sotheene wira akhootte khula enamuna ya orupihana woohiloka. Niireke ekhotto eyo ti yookhweya? Nnaari! Mwakhala wira nyuwo mwa mmiravo, woonasa wene mootoko owiiwa amiravo akina ooxikola alavulaka sa orupihana ahinatthi othelana ni oroiha ifootu sa enoka aya amurumeelaka celulaari, mapuro makina eyo ennooniwa okhala yoolikana ni okawa epornografia ya anamwane. Biibiliya onihimya so: Ole “onìra s’ekhapa, onnitthekiha erutthu awe”. (1 aKor. 6:18) Ohaawa ni okhwa onnikhumelela mwaha wa wuulaana wa iretta siniravihaniwa moorupihanani. Amiravo ohithela wala oohitheliwa yaawo apwenxe eharusi aya anniikhupanyiha vanceene mwaha wa opaka eyo. Itthu sinikhumelela ni orupihana woohiloka ti soovirikana ni iye sinooniheriwa ni ikaruma sinilaleya itthekulelo, seiyo siniphavela onikupaliha wira ohiiwelela malamulo a Muluku khonikumiherya maxakha. Muupuwelelo owo onniwiiriha atthu anceene ‘wotothiwa n’itampi’.​—aHéb. 3:13.

¹⁵ Vakhala wira nyuwo muniwanana yoweeha ya orupihana woohiloka, exeeni ekhanle anyu oopaka? Mweemererye wira nyuwo mookhalana yootteettheya eyo. (aRom. 7:22, 23) Munvekele Muluku wira woolipiheni. (aFil. 4:6, 7, 13) Musyake makhalelo ni mapuro yaarowa okhweiherya orupihana woohiloka. (Mir. 22:3) Okathi onikhumelela aya yooweeha eyo, mukhootte voohipisa.​—Maph. 39:12.

16. Yesu aamwaakhunle sai Satana okathi weehereriwe awe, nto exeeni ekhanle ale ahu oowiixutta?

¹⁶ Yesu oonihiyerya ntakiheryo noolokexa na moota wookhoottela soweeha. Owo kheemerenrye owokiwa ni itthu saaleiheriwe awe ni Satana, nnakhala khaavirinhe okathi wuupuwelelaka mureerelo waarowa awe ophwanya ni sooleiherya iye. Ohiya-vo, owo aahimwaakhula mowaakuveya orumeelaka masu ala: “Volempwa wira”. (Mmusome Matheyo 4:4-10.) Yesu aanisuwela Nuulumo na Muluku, nto eyo yaahimukhweiherya waakuva waakhula orumeelaka soolepa okathi weehereriwa awe. Wira niwanane Satana ni omuxintta, hiyo niheemereryeke owokiwa wira nirupihaneke voohireerela.​—1 aKor. 6:9, 10.

NVILELE MPAKHA OMUXINTTA SATANA

17, 18. (a) Ikaruma xeeni sikina sirina awe Satana, nto xeeni iyo sihinnitutuxa aya? (b) Exeeni esukeriwe awe Satana, nto eyo enoolipihani sai wira nvilele mwaahaawaka?

¹⁷ Wiixinnuwiha, ophenta mihakhu, ni orupihana woohiloka ti ikaruma tthaaru sinirumeeliwa ni Satana. Masi sookhala ikaruma sikina sirina awe. Mwa ntakiheryo anna akina annilupatthiwa ni amusi aya, otheiwa ni axaapara aya a oxikola, wala annikhoottiheriwa ovara muteko woolaleerya ni makhulupale a mulaponi. Mixankiho iyo khasinintukutha, okhala wira Yesu aahaalopola awiixutti awe wira: “Nyuwo munonyokhiwa n’atthu othene mwaha wa miyo. Vano, ole onrowa ovilela mpakha omaliherya, onimòpowa”.​—Math. 10:22.

¹⁸ Nto ninrowa owerya sai owanana Satana ni omuxintta? Yesu aahaahimeerya awiixutti awe wira: Nvileleke; “siso munimòpola ekumi anyu”. (Luka 21:19) Khiivo etthu enipakiwa ni apinaatamu ekhanle oopwetexa nlipelelo nahu moomalela. Khuuvo mutthu oniwerya onaakha wataana wahu ni Muluku, vahikhanle wira hiyo nrimweemererya eyo ekhumelelaka. (aRom. 8:38, 39) Hata okhwa wa arumeyi a Yehova, khonimwiiriha Satana oxintta, okhala wira Yehova onrowa waahihimuxa! (Yoh. 5:28, 29) Tthiri Satana khorina nlipelelo nooloka. Nuumala opwetexiwa olumwenku awe ola wootakhala, Satana onrowa otthukweliwa iyaakha ekonto emosa. (Wis. 20:1-3) Wuukiseryani wa Olamulelo wa Iyaakha Ekonto Emosa wa Yesu, Satana onrowa “otaphuliwa okathi vakhani” wira omananihe oweehererya vookiserya apinaatamu oomalela. Nuuvira okathi owo, Satana onrowa opwetexiwa. (Wis. 20:7-10) Satana oniwehererya opwetexiwa paahi, masi nyuwo nnaari! Mwiilipihe, mmukhootte Satana owo, ni waamini woolipa. Nyuwo munoowerya owanana Satana mpakha omuxintta!