Yoosoma 4
Diabo Tani?
Xetwani, Diabo, okhumme woowi? (1, 2)
Xetwani onaawoka sai atthu? (3-7)
Xeeni vantthuneya anyu omukhoottela Diabo? (7)
1. Nuulumo noowi “diabo” nintaphulela mutthu yoole onilavula sowootha sotakhala voohimya sa mutthu mukina. Nuulumo noowi “Xetwani” nintaphulela munyokhani wala namavaanyiha. Ala ari masina aniihaneliwa munyokhani muulupale a Muluku. Wanipacerya, Xetwani aari nlaikha nooloka wiirimu, owo aakhala vamosa ni Muluku. Masi, nuuvira wa okathi, aahipacerya wiikupali. Nto wiikupali iwo waahimwiiriha ophavela okokhoreliwa weiwo moophwanelela ori wa Muluku.—Matheyo 4:8-10.
2. Nlaikha nna, Xetwani, naahilavula ni Eva orweela mwa enowa. Ohimyaka itthu sowootha, Xetwani aahimwiiriha Eva ohimwiiwelela Muluku. Mmukhalelo owo, Xetwani aahituphela ele eniihaniwa “ehakhi ya olamulela” wala ekhulupale ya Muluku a Vasuluxa. Xetwani aahivaanyiha akhala wira olamulela wa Muluku ti wooloka ni akhala wira onnikumiherya mireerelo wa ale onaalamulela Awe. Xetwani aahivaanyiha-tho akhala wira ookhala pinaatamu aarowa ovikaniha okhala oororomeleya wa Muluku. Mwaha wa ovaanyiha iwo, Xetwani aahiipaka okhala munyokhani a Muluku. Tivonto vaniihaniwa awe Xetwani Diabo.—Maphattuwelo 3:1-5; Yobi 1:8-11; Wisupulula 12:9.
3. Xetwani onniimananiha waawoka atthu ophavelaka okokhoreliwa. (2 aKorinto 11:3, 14) Enamuna emosa Satana enirumeela awe wira aawoke atthu eri etiini yoowoka. Vaavo etiini eniixuttiha aya itthu sowootha voohimya sa Muluku, eyo tthiri enipaka sootthuna sa Xetwani. (Yohani 8:44) Atthu yaawo aneettela etiini yoowoka woonasa wene anuupuwela wira animukokhorela Muluku eekeekhai. Masi ohimya ekeekhai, awo aninvarela muteko Xetwani. Owo tori “muluku a vathí-va”.—2 aKorinto 4:4.
4. Onammunepani eri enamuna ekina Xetwani enirumeela awe wira oweettiheke atthu. Atthu annivekela minepa sootakhala aphavelaka okhapeleliwa, waaphwanyiha maxakha atthu akina, aahiiso ohimya itthu sa muhoolo, wala opaka miiriirya. Xetwani tonivaha ikuru sootakhala siniiriha itthu iyo sotheene wiiraneya. Wira nimusivelihe Muluku, nohaana okhootta opaka etthu eri yotheene enivarihana ni onammunepani.—Otumererya 18:10-12; Miteko s’Arummwa 19:18, 19.
5. Xetwani onnaawoka-tho atthu orumeelaka wiixinnuuha mwaha wa nloko ni okokhorela mitthenkeso sa ipoliitika. Akina anuupuwela wira elapo aya, wala nloko naya ti noolokexa waavikana akhw’aya. Masi eyo khahiyo ekeekhai. (Miteko s’Arummwa 10:34, 35) Atthu akina anlipelela wira mitthenkeso sa ipoliitika sinrowa omala-maliha mixankiho sa apinaatamu. Mwaha wa eyo, awo annikhootta Omwene wa Muluku. Nto Omwene wa Muluku paahi tonrowa omala-maliha mixankiho sahu.—Daniyeli 2:44.
6. Enamuna ekina Xetwani enirumeela awe wira aawoke atthu ori oweehererya ni soophavela sootthekeya. Yehova onnintumererya okhootta itampi okhala wira owo oosuwela wira iyo sinonruuhela maxakha. (aGalasia 6:7, 8) Atthu akina pooti ophavelaka wira nyuwo mpakeke itthu soohiloka seiyo sinipaka aya. Masi, muupuweleke wira ti Xetwani tthiri oniphavela wira nyuwo muvareke itthu iyo.—1 aKorinto 6:9, 10; 15:33.
7. Xetwani pooti orumeela olupatthiwa wala ovaanyihiwa wira mmuhiye Yehova. Pooti wira atthu akina mwa yaale anaaphenta anyu anrowa onanariwa vanceene mwaha woowi nyuwo munimusoma Biibiliya. Akina pooti woveehani. Masi tani oovanheni ekumi erina anyu? Xetwani oniphavela owoopopihani wira muhiye wiixutta voohimya sa Yehova. Muhimuhiye Xetwani oxinttaka! (Matheyo 10:34-39; 1 Pedru 5:8, 9) Omukhoottela wanyu Diabo, onrowa omusiveliha Yehova ni wooniherya wira Muluku toniphwanelela olamulela.—Miruku 27:11.
[Efootu ya epaaxina 9]
Etiini yoowoka, onammunepani ni waakiherya elapo onnaawoka atthu