Mmukhootteke Satana ni Miteko Sawe Soolavilavi

1, 2. Tani anihakalala okathi wa obatizo?

VAKHALA wira munimurumeela Yehova okhuma khalai, woonasa wene moowiriyana myaha sinceene sa obatizo mmithukumano sahu suulupale sa muttetthe. Nnaamwi nwiriyanne ene myaha sinceene, nyuwo munnikuxeya murima khuta ekwaha munaaweha anyu ale yiivaherenrye akilaathiki opuro ori ohoolo, ni yeemelaka wira abatiziwe. Okathi owo, atthu otheene annihakalala, nto moottharelana annimana makuphi. Woonasa wene, maithori anyu annimora vaavo vanaaweha anyu atthu akina ari-tho ootthuneya wa Yehova, athanlaka omurumeela. Tthiri, okathi owo hiyo ninnihakalala vanceene!

² Hiyo nniweha ibatismo vakhaani paahi siniiraneya muttetthe ahu khuta mwaakha, masi malaikha anniweha ibatismo sinceene. Munniwerya wuupuwelela ‘otthapa onikhala wirimu’ vaavo olumwenku wotheene, atthu oophiyeryaka ikonto thanu khuta esumana anibatiziwa aya, nto khiyiirela mpantta mulokiheryo wowooneya wa Yehova? (Luka 15:7, 10) Mwekeekhai, malaikha annihakalala vaavo vaniweha aya muloko wa Muluku wuncerereyaka!​—Hagayo 2:7.

SATANA ‘ONORUKURERYA NTOKO KHARAMU ONÒPA MURUKULU’

3. Nthowa xeeni Satana onrukurerya awe “ntoko kharamu onòpa murukulu”, ni exeeni eniphavela awe opaka?

³ Moovirikana ni ale anihakalala, aakhala malaikha ahinisiveliwa waaweha atthu abatiziwaka. Satana ni malaikha awe ootakhala, vannaananara waaweha atthu ikonto sene akhoottaka otthara mweettelo wa olumwenku ola wootakhala. Vannimunanara Satana ni malaikha awe, mwaha woowi owo aahihimya aikukumihaka wira apinaatamu khanimurumeela Yehova mwaha womphenta, ni khuuvo aarowa ovikaniha ororomeleya eehereriwaka. (Mmusome Yobi 2:4, 5.) Khuta ekwaha mutthu onithanla awe wiivahererya wa Yehova, vannoonihereya wira Satana nawoothe. Nto vankhala ntoko wira Satana onivahiwa ipuraata ikonto sene owiitho, khuta esumana. Ti nthowa naya ‘onirukurerya awe ntoko kharamu onòpa murukulu, amphavelaka òmukhura’! (1 Pedru 5:8) “Kharamu” ola oniphavela onikhuura mmukhalelo womunepani, ni ohonona aahiiso omala-maliha wataana wahu ni Muluku.​—Esalimo 7:2, 3; 2 Timótheyo 3:12.

4, 5. (a) Inamuna xeeni piili sootthuneya sinooniherya wira Yehova oohela mukano owerya wa Satana? (b) Exeeni muKristau onitthuneya awe okupali?

⁴ Nnaamwi nlupatthiwaka ni nwanani ootakhalexa, nihitepeke woova. Nthowa xeeni? Nthowa noowi Yehova oovukula owerya wa “kharamu [owo] onòpa murukulu” mu inamuna piili sootthuneya. Inamuna xeeni? Enamuna yoopacerya, Yehova oohimya okhuma khalai wira “muttitthi mulupalexa” wa maKristau eekeekhai onimoopowa “maxakha malupale” anrwa. (Wisupulula 7:9; Matheyo 24:21) Iprofesia sa Muluku khasinooceela wiiraneya. Masi Satana onnisuwela-tho wira khoniwerya waahapuxa atthu otheene a Muluku.

⁵ Enamuna ya nenli tiile yaahimmwe khalai ni mulopwana mmosa oororomeleya a Muluku. Profeta Azariya aahimuleela Mwene Asa, wira: “Apwiya annikhala ni nyuwo, mwakhalakaru n’awo”. (2 Wahala a Mamwene 15:2; mmusome 1 aKorinto 10:13.) Matakiheryo manceene alempwale, annooniherya wira khalai Satana khonawerye omuhapuxa hata murumeyi mmosa oororomeleya a Muluku. (aHéberi 11:4-40) Olelo-va, muKristau onaataana vanceene ni Muluku onoowerya omukhoottela, hata omuxintta Satana. Nuulumo na Muluku ninninlipiherya wira: “Mmukhotteke Satana: Satan’owo onimotthyawani”.​—Yakobo 4:7.

NOOKHALANA ‘EKHOTTO . . . NI MALAIKHA ÒTAKHALA A MUSULU’

6. Satana oniwana sai ni khuta muKristau?

⁶ Satana khoniwerya oxintta ekhotto yotheene erina ahu nuuwo, masi pooti omuxintta mutthu mmosa, akhala wira mutthu owo khoniikasoopa. Satana oosuwela wira onoowerya onihapuxa akhala wira onootteettheiha wataana wahu ni Yehova. Onipaka sai etthu eyo? Onnipaka eyo orweela mwa onlupattha vanceene, owana ni khuta mmosa a hiyo, ni orumeela olavilavi. Vano nrowe nthokorerye inamuna iya.

7. Nthowa xeeni Satana onitepa awe waalupattha atthu a Yehova?

⁷ Onlupattha vanceene. Murummwa Yohani ohimmye so: “Elapo yothene enniweriwa ni Mutakhali”. (1 Yohani 5:19) Moolumo awo annaalopola maKristau otheene eekeekhai. Okhala wira Satana ohaahapuxa atthu otheene ahinimurumeela Yehova, nto vano oniilipiha wira aahapuxe ale animurumeela Yehova. (Mikeya 4:1; Yohani 15:19; Wisupulula 12:12, 17) Satana oonanariwa vanceene okhala wira oosuwela wira okathi awe ohanle vakhaani omala. Tivonto onincererya awe olupattha wawe. Olelo-va, ninniweha wiimananiha wawe wootakhala ni wookiserya, ophavelaka ohonona wataana wahu ni Muluku.

8. Exeeni anitaphulela aya moolumo a Paulo oowi nookhalana “ekhotto” ni malaikha ootakhala?

⁸ Omulupattha khuta mmosa a hiyo. Murummwa Paulo aahaalopola maKristau oriki: ‘Nokhalana ekhotto . . . ni malaikha òtakhala a wirimu’. (aÉfeso 6:12) Muthinto xeeni wa ekhotto Paulo aahimya awe? Ekhotto Paulo aahimya awe tiile eniwaniwa atthu anli yaattamanne ene. Eyo enooniherya wira khuta mmosa a hiyo ookhalana ekhotto oniwana awe ni malaikha ootakhala. Hata nikhalaka elapo atthu anikupali aya wira malaikha ootakhala aakhala aahiiso nnaari, nihiliyaleke wira okathi niivaherenrye ahu wa Yehova, hiyo naahipacerya owana ekhotto yomunepani. Okhuma okathi yoole muKristau onibatiziwa awe, owo onnikela ekhotto eyo. Tivonto murummwa Paulo aattittimihenrye awe maKristau a wEefeso wira ‘akhaleke òlipene’!​—aÉfeso 6:11, 13, 14.

9. (a) Nthowa xeeni Satana ni malaikha awe ootakhala anirumeela aya miteko soovirikana ‘s’olavilavi’? (b) Nthowa xeeni Satana oneererya awe ohonona muupuwelo ahu, nto ninrowa owerya sai omukhoottela? (Nwehe ekaaxa eri “Mwiikasope ni Miteko Soovavilavi sa Satana!”) (c) Muteko xeeni woolavilavi ninrowa ahu othokorerya vano?

⁹ Olavilavi. Paulo onnaatumererya maKristau okhootta miteko ‘s’olavilavi sa Satana’. (aÉfeso 6:11) Paulo onihimya wira Satana orina miteko soolavilavi, ooniheryaka wira onirumeela inamuna sinceene. Malaikha ootakhala annirumeela inamuna sinceene sa olavilavi, ohiya enamuna emosa paahi, tivonto ikwaha sikina annikhumela saana. Nuuvira wa okathi, arumeyi akina a Yehova yaawenrye ovilela yoweeha emosa, yaahooceela ovilela yoweeha ekina. Satana ni malaikha awe ootakhala anniwehexexa oratteene mweettelo wa khuta mmosa a hiyo, wira awehe moota woonihapuxa. Annittottela muraarelo khuta etthu, woonasa wene erina ahu, yeeyo yaarowa ohonona wataana wahu ni Muluku. Hiyo ninnihakalala okhala wira ninnisuwela inamuna sinceene soolavilavi Satana onirumeela awe, maana soolempwa mBiibiliyani. (2 aKorinto 2:11) Miru soopacerya sa eliivuru ela, noothokorerya inamuna iyo, ntoko ophavelasa mihakhu, wataana woohiloka, ni oraruwa. Vano nrowe nthokorerye enamuna ekina yoolavilavi Satana onirumeela awe, eyo piiyo, onamminepani.

OVARA ONAMMINEPANI ONNINVEEHA MULUKU

10. (a) Onamminepani exeeni? (b) Yehova onoonela sai onamminepani, ankhi nyuwo munoonela sai?

¹⁰ Mutthu onivara onamminepani aahiiso osatana, owo onnilavulana minepa sootakhala. Waaxerya ehako, okhwiri, omurava mukhwaawe, ni olavula ni alipa-ookhwa, siri miteko sa onamminepani. Ntoko ninsuwela ahu oratteene, Yehova ‘onninyokha’ onamminepani. (Otumererya 18:10-12; Wisupulula 21:8) Okhala wira hiyo-tho nohaana ‘othanya itthu sotakhala’, khaninkhala-khala niphavelaka wataana ni minepa sootakhala. (aRoma 12:9) Opaka eyo waamunveeha vanceene Tiithi ihu a wiirimu, Yehova!

11. Satana onixintta sai akhanle wira ononiiriha ovara itthu sa onamminepani? Nvahe nlikanyiho.

¹¹ Okhala wira ovara onamminepani onninveeha vanceene Yehova, ti nthowa naya Satana oniimananiha awe wira nivareke itthu sa onamminepani. Khuta ekwaha Satana oninwoka awe muKristau ovara itthu sa osatana, Satana owo onnixintta vanceene. Moota xeeni? Nkahaya muthokorerye ntakiheryo nna: Akhala wira toropa onniwokiwa, khiyaatthyawa atoropa a egrupu awe ni khinatakaahana ni ale yaari awanani awe, nto mukhulupale aanakhotto a egrupu ele otthyawenle awe, onootteeliwa murima vanceene. Mukhulupale owo onoomweesihaka toropa ole, voophavela onveeha mukhulupale a egrupu ele okhumme awe. Vamosaru, akhala wira muKristau onnivara itthu sa onamminepani, owo moolakelela onimutthyawa Yehova nto khiyairoiha wa Satana. Tthiri Satana aamusiveliwa omweesiha mutthu yoole aarowa ohiya omurumeela Yehova! Niireke hiyo ninniphavela omwiiriha Satana oxintta ekhotto eyo? Mwekeekhai, nnaari! Hiyo khahiyo atthu oohiroromeleya.

OKUMIHERYAKA MAKOHO ANIMWIIRIHA MUTTHU WAANIHERYA

12. Enamuna xeeni Satana onirumeela awe wira aakanyererye muupuwelo ahu voohimya sa onamminepani?

¹² Okhala wira ninnikhootta ovara itthu sa onamminepani, Satana khonrowa okhumela saana akhala wira onirumeela enamuna eyo wira onihapuxe. Tivonto, Satana onnisuwela wira ohaana waakanyerya muupuwelo ahu. Moota xeeni? Onnimananiha waawoka maKristau, moophavela owiiriha wuupuwelaka wira itthu ‘sorera ti sotakhala, sotakhala ti sorera’. (Yesaya 5:20) Vano Satana onirumeela enamuna emosa aarumenle awe khalai, eyo piiyo, okumiherya makoho animwiiriha mutthu waaniherya.

13. Satana aarumenle sai makoho moophavela owiiriha atthu ohoverya ele Muluku enihimya awe?

¹³ Nwehe moota Satana aarumenle awe makoho wira aawoke atthu, khalai. Oxardim ya wEedeni, Satana aahimukoha Eva wira: “Ekekhai wira Muluku òhokhottiheryani olya mihokorokho sa mirí sothene sa mmatta?” Mmahiku a Yobi, okathi malaikha yaathukumanne aya wiirimu, Satana aahimukoha Muluku, oriki: “Khino Yobi uwo onottittimihani mahala?” Nave-tho, wanipacerya wa muteko wa Yesu valaponi, Satana aahimweehererya Yesu oriki: “Nyuwo, mwàri Mwana a Muluku, murume maluku ala othatuwa, ekhalé ephau”. Nwehe wira okathi yoole Satana aamweehererya awe Yesu eererya omuramusa Yehova, orumeelaka masu yaale Yehova aalavunle awe isumana thanu namosa ottuli, okathi aahimmye awe wira: “Ola mwan’aka onimphentexaka: miyo kosiveliwa ni yowo”!​—Maphattuwelo 3:1; Yobi 1:9; Matheyo 3:17; 4:3.

14. (a) Moota xeeni Satana onirumeela awe makoho voophavela waakanyererya muupuwelo wa mutthu voohimya sa onamminepani? (b) Exeeni enrowa ahu othokorerya moottharelana?

¹⁴ Olelo-va, Satana onirumeela enamuna emosaru moophavela owiiriha atthu waaniheryaka akhala wira onamminepani ti wootakhala tthiri. Moothananiha, owo onniwerya waawoka maKristau makina eekeekhai. MaKristau awo annipacerya wiikoha akhala wira inamuna sikina sa onamminepani ti sootakhala tthiri. (2 aKorinto 11:3) Ninrowa waakhaliherya sai atthu awo olokiherya muupuwelo aya? Nipakeke exeeni wira nisyake ohapuweliwa ni miteko soolavilavi sa Satana? Wira naakhule makoho ala, nrowe nthokorerye epantte piili, seiyo moolavilavi Satana onirumeela awe onamminepani: matthekulelo ni inamuna sa olooliwa.

OTTOTTELAKA MURAARELO SOOPHAVELA SAHU

15. (a) Atthu anceene a ilapo sikina anoonela sai onamminepani? (b) Moota xeeni maKristau makina anihapuweliwa aya ni moonelo wa mulaponi voohimya sa onamminepani?

¹⁵ Elapo ya wAmerica, oCanada ni ipantte sikina sa wEuropa, sinnitepa othweelihiwa itthu ntoko maxitta, okhwiri, ni inamuna sikina sa onamminepani. Ifilme, iliivuru, iprograma sa televisau, ni axooku a mukomputatoreni, sinnooniherya itthu sa onamminepani ntoko itthu sooreera ni soohitakhala. Ifilme ni iliivuru sinilavula sa maxitta sihuulaana, nto atthu anisiveliwa annithukumana khiyapaka egrupu enikhaliherya itthu iyo. Tthiri, minepa sootakhala sinnikhumela saana, vaavo siniwiiriha aya atthu awo woonaka itthu iyo ntoko sooloka. Niireke moonelo owo ohaahapuwela maKristau? Akina aawokeya. Moota xeeni? Mwa ntakiheryo, nuumala muKristau oweha efilme yooniherya maxitta, owo aahimmye so: “Miyo kooweha efilme eyo, masi nkivanre onamminepani”. Nthowa xeeni muupuwelo owo oryaaya wowoopiha?

16. Xeeni varyaaya vowoopiha othanla matthekulelo anivarihana ni maxitta?

¹⁶ Nnaamwi ovara onamminepani ohilikanaka ni oweha paahi, khontaphulela wira oweha onamminepani khahiyo etthu yootakhala. Mwaha wa xeeni? Nuulumo na Muluku ninnooniherya wira hata Satana, nnakhala malaikha awe ootakhala, khaniwerya osoma muupuwelo ahu.a Ntoko sihimmwale aya wanipacerya, aphavelaka osuwela ele enuupuwela ahu, malaikha awo ootakhala anniweha-weha oratteene soovara sahu, ohela muhina matthekulelo ahu. Akhala wira mweettelo wa muKristau onnooniherya wira onnisiveliwa ifilme ni iliivuru sinlavula sa anahako, okhwiri, ovariwa minepa, aahiiso itthu sikina sinivarihana ni minepa sootakhala, mutthu owo onilattula minepa sootakhala. Nto mutthu owo onniiriha malaikha ootakhala woona ohilipa wawe! Nto minepa sootakhala sinnincererya ekhotto aya ni muKristau owo, wira sittottele muraarelo otteettheya wawe mpakha omuxitta. Atthu yaale yaapacenrye vakhaani-vakhaani otthekula ni itthu sinivarihana ni maxitta, muhoolo mwaya aapaka itthu sa onamminepani.​—Mmusome aGalasia 6:7.

17. Enamuna xeeni ya olavilavi Satana onirumeela awe ophavelaka waawoka ale aniwereiwa?

¹⁷ Satana khahiyo paahi onittottela muraarelo matthekulelo anithanla ahu, masi-tho onnittottela muraarelo inamuna sa olooliwa sinithanla ahu. Moota xeeni? MuKristau oniwereiwa ni oniphavela inamuna sa olooliwa masi ohinavona, pooti oriipiwa murima. (Marko 5:25, 26) Nto Satana ni malaikha awe ootakhala, yaamuttottela muraarelo wira amuhapuxe muKristau owo. Awo annisuwela oratteene wira Biibiliya onnikhoottiha ophavela ‘okhaliheriwa n’ale anira sotakhala’. (Yesaya 31:2) Siphavelaka omwiiriha muKristau ohiiwelela yooruma eyo, minepa sootakhala pooti omweehererya ole oniwereiwa ni ovelavenle, opaka etthu yootakhalexa, eyo piiyo, ophavelasa inamuna sa olooliwa sinihela muhina maxitta aahiiso onamminepani. Vakhala wira olavilavi owo wa minepa sootakhala onookhumela saana, nto onoowerya ohonona wataana orina awe mutthu ole oniwereiwa ni Muluku. Moota xeeni?

18. Inamuna xeeni sa olooliwa muKristau onrowa awe okhootta, ni nthowa xeeni?

¹⁸ Aalopolaka anaIsarayeli yaawo yaaroromela maxitta, Yehova aahimmye so: “Mwakòkolelaka matat’anyu, miyo kinniphuta maitho: mwathipelelaka okivekela, miyo nkinowiriyanani”. (Yesaya 1:13, 15) Tthiri, hiyo ninnisyaka itthu sotheene saarowa wiiriha mavekelo ahu ohiphiya wa Yehova ni ohikhaliheriwa nuuwo, vanceenexa okathi oniwereiwa ahu. (Esalimo 41:4) Nto, akhala wira enamuna emosa yoolooliwa ennihela muhina onamminepani, muKristau eekeekhai ohaana okhootta.b (Matheyo 6:13) Apaka eyo, Yehova onoomukhaliherya.​—Nwehe ekaaxa eri eni: “Kiireke Ola Onamminepani Tthiri?”

VAAVO SOOHIMMWA SA MINEPA SOOTAKHALA SUULANNE AYA

19. (a) Satana onaawoka atthu wira akupaliki exeeni? (b) Soohimmwa xeeni maKristau anitthuneya aya osyakaka?

¹⁹ Anamunceene a wAmerica, oCanada, ni ilapo sikina sa wEuropa, khanikupali wira Satana ookhalana owerya wootakhala, masi anamuanceene a ilapo sikina annikupali. Satana onnaawoka atthu anceene ophavelaka waakupaliha wira owo ookhalana owerya wuulupalexa. Atthu akina annikhala, annoolya, annivara muteko ni annirupa yoovaka minepa sootakhala. Soohimmwa sa miteko soowerya sa minepa sootakhala sihuulaana. Ikwaha sinceene, atthu annihimya itthu iyo atteeliwe ene murima; atthu akina annisiveliwa owiriyana. Niireke hiyo nihaana olaleyaka soohimmwa iyo? Nnaari. Arumeyi eekeekhai a Muluku ahaana osyaka opaka eyo, mwaha wa mathowa manli ootthuneya.

20. Moota xeeni moohilakela mutthu aarowa awe omwarya-mwarya miteko sa Satana?

²⁰ Nthowa noopacerya tinla: mutthu onilaleya soohimmwa voohimya sa miteko sa malaikha ootakhala, owo onimukhaliherya Satana. Moota xeeni? Nuulumo na Muluku ninneemererya wira Satana onniwerya opaka miteko suulupale, masi-tho ninnilopola wira owo onirumeela ‘ithonyeryo sowototha’. (2 aTesalonika 2:9, 10) Okhala wira Satana namawoka muulupale, onnisuwela moota wowaawoka ale anisiveliwa itthu sa onamminepani ni owiiriha okupali itthu sihikhanle sekeekhai. Atthu awo pooti ohimyaka wira aaweha tthiri ni ahiiwa itthu sootikiniha, ni pooti ottittimiheryaka wira ekeekhai. Masi nuuvira okathi, atthu awo annincererya itthu sikina, vaavo anivira aya yaaleelaka akina. Akhala wira muKristau onnilaleya itthu iyo, owo onimukhaliherya Satana, yoowo ori “tithi a wothá”. Mutthu owo onimwarya-mwarya miteko sa Satana.​—Yohani 8:44; 2 Timótheyo 2:16.

21. Nihaana ovaaneelaka exeeni?

²¹ Nthowa na nenli tinla: hata muKristau yoole khalai aakumana ni malaikha ootakhala, ohaana osyaka omakelaka waaleela anna itthu iyo. Mwaha wa xeeni? Biibiliya oninleela so: “Ninwehexexeke Yesu pahi: owo t’onnihola ephiro yo wamini”. (aHéberi 12:2) Aayo, hiyo nihaana olavulaka voohimya sa Yesu, ohiya Satana. Okathi Yesu aaryaawe valaponi, khaamakela waaleela awiixutti awe itthu sa malaikha ootakhala, nnaamwi aasuwela itthu sinceene voohimya sa owerya wa Satana. Ohiya vo, Yesu aavaha ephoole ihapari sa Omwene. Nto, nimutakihaka Yesu ni arummwa, hiyo nihaana ovaanelaka voohimya sa “miteko sulupale sa Muluku”.​—Miteko 2:11; Luka 8:1; aRoma 1:11, 12.

22. Exeeni enitthuneya ahu opaka wira ‘otthapa wirimu’ wuncerereyeke?

²² Ekeekhai wira Satana onnirumeela inamuna sinceene sa olavilavi, ohela muhina onamminepani, ophavelaka ohonona wataana wahu ni Yehova. Masi, othanya itthu sootakhala ni opaka itthu sooreera, onoonikhaliherya omukhoottela Satana ni miteko sawe sotheene sa onamminepani. (Mmusome aÉfeso 4:27.) Tthiri malaikha a wiirimu ‘anotthapa’ akhala wira nnoovikaniha ‘wisakiha Satana n’ulavilavi awe’, mpakha okathi onrowa awe opwetexiwa!​—Luka 15:7; aÉfeso 6:11.