Mwiipasoopeke Satana Oniphavela Wookhuurani!
“Mwipasopeke. Nwanan’inyu, Satana, onorukureryani ntoko kharamu onòpa murukulu, amphavelaka òmukhura!”.—1 PED. 5:8.
MOOTA XEENI SATANA WOONIHENRYE AWE WIRA . . .
toowerya?
tootakhala?
nawoothe?
1. Mutthokiherye moota yoopattuxiwa ya omunepani ekhanle aya Satana.
WOOKHALA OKATHI, malaikha otheene yaari aya oowaataana ni Yehova. Masi muhoolo mwaya, yoopattuxiwa emosa yomunepani yaahipacerya ophavelaka okokhoreliwa ni apinaatamu. Ohiya okhoottela muupuwelelo ole woohiloka, nlaikha nle naaheemererya wira wunnuweke mpakha okumiherya etampi. (Yak. 1:14, 15) Hiyo noosuwela wira yoopattuxiwa ntoko Satana, “khanakhale n’ikekhai”. Owo aahimmwareela Yehova nto khukhala “tithi a wothá”.—Yoh. 8:44.
2, 3. Exeeni anooniherya aya moolumo oowi “Satana” “Diabo” “enowa” “enowa yulupalexa” voohimya sa nwanani muulupale a Yehova?
2 Okhuma vaavale Satana ommwareelale awe Yehova, ohooniherya wira owo nwanani muulupale ni wira khonaaphenta apinaatamu. Nsina naavahiwe awe Satana, ninnooniherya iphiro sawe sootakhala. Nsina noowi Satana nintaphulela “Munyokhani”, eyo enooniherya wira yoopattuxiwa ele yomunepani yootakhala kheneemererya olamulelo wa Muluku, ni enninyokha epakaka sotheene siniwerya aya wira epwetexe. Khiivo-tho etthu ekina eniphavela awe Satana ohiya opwetexa olamulelo wa Yehova.
3 Ntoko sinihimya aya eliivuru ya Wisupulula 12:9, enowa eniireliwa Diabo, eyo enitaphulela wira “Nawoothe”. Eyo enninuupuxerya wira Satana oomuramusa Yehova omuhimyaka okhala nawoothe. Nuulumo noowi “enowa” ya khalai enninuupuxerya nihiku nle yaakhumelenle aya ehasara wEedeni okathi yoole Satana aarumeelale awe enowa wira onwoke Eva. Nuulumo noowi “enowa yulupalexa” ninninuupuxerya enama emosa yuulupale yowoopiha ni ninnimphwanela Satana okhala wira onnimananiha ni owali wira omooceelihe Yehova waakhwaniherya yoolakela awe ni waapwetexa atthu awe.
4. Exeeni enrowa ahu othokorerya muru ola?
4 Moowiiwanyeya, Satana onniphavelexa tthiri opwetexa waamini wahu. Tivonto, Biibiliya vannilopola awe so: “Mwisumalihe, mwipasopeke. Nwanan’inyu, Satana, onorukureryani ntoko kharamu onòpa murukulu, amphavelaka òmukhura”. (1 Ped. 5:8) Moovarihana ni yoolopola eyo, muru ola onrowa othokorerya makhalelo mararu a Satana yoowo ori nwanani a Yehova ni atthu awe, anitthuneya ahu osyaka.
SATANA TOOWERYA
5, 6. (a) Muhimye matakiheryo anooniherya wira soopattuxiwa somunepani ‘ti sowerya’. (b) Mwa inamuna xeeni vanihimmwa aya wira Satana ookhalana ‘owerya’onikumiherya okhwa?
5 Soopattuxiwa somunepani siniireliwa malaikha ‘ti sowerya’. (Esal. 103:20) Iyo soovirikana ni apinaatamu ni sinnisuwela itthu sinceene ni ti soowerya. Ekeekhai wira malaikha oororomeleya annirumeela owerya waya wira akumiherye mireerelo. Mwa ntakiheryo, ohiyu omosa paahi nlaikha na Yehova naahiwiiva anakhotto 185.000, a Asiria, eyo khiyaaweryaneya opakiwa ni mutthu mmosa hata nikhalaka nikoto ntero na anakhotto. (2 Mam. 19:35) Okathi mukina nlaikha nimosa naahirumeela owerya ni osuwela waya wira niwoopole atthareli a Yesu yaawo yaari mukhatteya. Yoopattuxiwa ele yoomunepani yaahivira ehooniwaka ni atthu yaalipelela nipuro nle, khohula mikhora, khwaakumiha arummwa ale, nuumala-vo khutthukwa mikhora iye, masi sotheene iyo siiraneya maguarda ale yeemenle ene vaavo!—Mit. 5:18-23.
6 Nnaamwi soopattuxiwa soororomeleya sa omunepani sirumeelaka owerya waya wira sikumiherye mureerelo, Satana onirumeela owerya wawe wira okumiherye itthu soohiloka. Tthiri owo ookhalana ikuru sinceene sinaawokana awe atthu. Soolempwa sinnimuhimya owo okhala namalamulela a “vathí-va” ni “muluku a vathí-va”. (Yoh. 12:31; 2 aKor. 4:4) Satana Diabo ti “ole orina owerya” wa okumiherya okhwa. (aHéb. 2:14) Eyo khentaphulela wira owo toniwiiwa atthu otheene mooluluwanya. Hata vari siiso, munepa awe wa ophavela wiiva woosareya mulaponi. Mwaha wa Eva ni Adamu omwiiwelela waya Satana, etampi ni okhwa woomwareela mulaponi motheene munikhala apinaatamu. (aRom. 5:12) Tivonto vanihimmwa aya wira Diabo ookhalana ‘owerya’ onikumiherya okhwa. Tthiri owo onniphwanelela nsina naavahiwe awe ni Yesu noowi “mulipa-òwiva”. (Yoh. 8:44) Tthiri Satana nwanani oowerya orina ahu!
7. Moota xeeni malaikha ootakhala yoonihenrye aya wira aakhalana owerya?
7 Vaavo vaninvirikanya ahu Satana, ninnipacerya owana ekhotto ohiya ni Satana paahi masi ni atthu otheene yaale animukhaliherya owanana olamulelo wa Yehova. Mwaattelo wa atthu awo onihela muhina egrupu ya malaikha oomwareya wala minepa sotakhala. (Wis. 12:3, 4) Imaara sinceene, minepa sotakhala sihooniherya owerya waya saakumiheryaka ihasara suulupale atthu ale anaahasula aya. (Math. 8:28-32; Mar. 5:1-5) Hiyo khanikhanle oopeepheiha owerya wa minepa sotakhala wala ‘mukhulupale aya’. (Math. 9:34) Naahikhaliheriwe-ru ni Yehova khinnirowa omuxintta Satana.
SATANA TOOTAKHALA
8. (a) Piivi ekhanle yoolakela ya Satana? (Nwehe elatarato yoopacerya.) (b) Moovarihana ni moonenelo anyu, muhimye moota olumwenku ola onooniherya aya makhalelo ootakhala a Satana.
8 Murummwa Pedru aahimulikanyiha Satana ni “kharamu onòpa murukulu”. Moovarihana ni eliivuru emosa enitthokiherya masu, nuulumo na eGriki nenno nitaphuleliwe “wopa murukulu” nnooniherya “enama yoowali yowoopiha ni yoovoliwa”. Otthokiheriwa nno onnivarihana ni makhalelo a Satana! Nnaamwi Satana olamulelaka olumwenku ola wotheene, masi owo nlelo oniphavela waakhuura atthu anceene. (1 Yoh. 5:19) Owo onnoona olumwenku wotheene okhala “yoolya yaamukhaani”. Tthiri Satana oniphavela “yoolya yuulupale”, eyo piiyo, alipa oowoottihiwa yaale nlelo ari valaponi, vamosa ni axaapara aya, “ipwittipwitthi sikina”. (Yoh. 10:16; Wis. 12:17) Yoolakela ya Satana waamirya atthu a Yehova. Olupatthiwa wuulupale waakumihenrye awe atthareli a Yesu okhuma eseekulu yoopacerya mpakha olelo-va, onnooniherya munepa ale wootakhala.
9, 10. (a) Moota xeeni Satana aaphavela awe okuttelela yoolakela ya Yehova ni nloko na Isarayeli? (Nvahe matakiheryo.) (b) Exeeni yaamwiiriha Satana okhalela nthiti waahasula aIsarayeli khalai? (c) Nyuwo munoona wira Satana onoonela sai vaavo murumeyi a Yehova vanipaka awe etampi yuulupale olelo-va?
9 Vaavo vaniimananiha awe okuttelela yoolakela ya Muluku, Satana onnooniherya okhala mutakhali mwa enamuna ekina-tho. Kharamu oovoliwa khonoonela othunku inama sinivara awe wira okhuure. Owo khonoonela othunku ohinatthi wiiva ni khonimoriwa ikharari nuumala wiiva. Mwa enamuna emosaru, Satana khoniwoonela othunku atthu aniphavela awe waakhuura. Mwa ntakiheryo, muupuwelele moota Satana Diabo ikwaha sinceene aawiipithela awe aIsarayeli wira apake itampi ntoko onamuttompe ni nrima. Okathi onisoma anyu sookhumelela soohiloka sa onamuttompe wa Zímiri ni nrima na Gehazi, munniwerya “omoona” kharamu oopaka mirukulu aatthapelaka atthu ale aaminrye awe?—Moth. 25:6-8, 14, 15; 2 Mam. 5:20-27.
10 Satana aahikhalana mathowa maalupale yaamwiiriha okhalela nthiti ohaaxa nloko na Isarayeli khalai. Tthiri nle ti naarowa omukumiherya Mesiya, yoowo aarowa ovahiwa muritti wa omunyakatta Satana ni waakiherya ehakhi ya olamulela wa Yehova. (Maph. 3:15) Satana khaaphavela wira aIsarayeli akhumeleke saana, nto aahirumeela inamuna sawe sootakhala wira aapahule ni etampi. Tthiri nyuwo munnoona wira Satana khammorenle ikharari vaavo Davidi vaararunwe awe wala omoonela othunku profeta Moise vaavo aayeleelale awe eparakha ya okela Elapo Yooleiheriwa. Ohiya-vo, Satana onnitteeliwa murima vaavo murumeyi a Yehova vanipaka awe etampi yuulupale. Tthiri, Diabo onnirumeela eyo wira onveihe Yehova.—Mir. 27:11.
11. Yoolakela xeeni yaarina awe Satana okathi waamulupattha awe Sara?
11 Satana aanilupattha vanceene emusi yeele yaarowa awe oyariwa Mesiya. Mwa ntakiheryo, muthokorerye ele yaakhumelenle nuumala Abrahamu ohimeeriwa wira owo aarowa okhala “nloko nulupale”. (Maph. 12:1-3) Okathi Abrahamu ni Sara yaari aya wEjiitu, Farawo, aahimukuxa Sara khumurowana owannyawe, woonasa wene aaphavela wira okhale mwaarawe. Masi, Yehova aahikhumelela nto khimwaakhiherya Sara wira ohipahuliwe ni makhalelo ale. (Musome Maphattuwelo 12:14-20.) Ohalaka okathi vakhaani wira oyariwe Isakhi, yaahikhumelela etthu yoolikana ni eyo muttetthe wa oGerari. Niireke Satana taarumiha opakiwa itthu iyo? Niireke owo uupuwela wira Sara yoowo aakhumme muttetthe woothaaciri wa Uri onarowa okhala muheemani, aarowa owokeya ni mihakhu saari empa ya Farawo ni Abimeleki? Niireke Satana uupuwela wira Sara ammuhiya iyawe ni Yehova nto otheliweke ni mulopwana mukina opakaka mararuwo? Biibiliya khonihimya eyo, masi hiyo nookhalana mathowa ooloka anniiriha okupali wira Diabo aamutteeliwa murima vaakhanle wira Sara aahipaka etthu yaarowa omwiiriha ohireerela okumiherya osuulu ole. Tthiri Satana khaarowa omoriwa ikharari nnakhala vakhaani mwaha wa opahula ekasamento yooloka yaarina awe ni ohonona wataana wooloka ni Yehova. Nto ninnoona wira tthiri Satana tootakhalexa!
12, 13. (a) Satana oonihenrye sai makhalelo awe ootakhala nuumala oyariwa Yesu? (b) Nyuwo munoona wira Satana oniwoonela sai amiravo animphenta ni omurumeela Yehova olelo-va?
12 Yesu aahiyariwa nuuvira iseekulu sinceene Abrahamu akhwiiye. Muhuupuwele wira Satana aamunyokha Yesu mwaha wa okhala mwaana ooreera, oophwaneliwa, wala a vameekhaaya. Satana aarosuwela wira mwanamwane ole annuwa aarowa okhala Mesiya aaleiheriwe. Mwekeekhai, Yesu ti mpantta woopacerya wa osuulu wa Abrahamu, ti yoowo muhoolo mwaya aarowa “opwetexa miteko sa Satana”. (1 Yoh. 3:8) Nyuwo munoona wira Satana aanuupuwela wira omwiiva mwanamwane yaari etthu yootepexa otakhala? Satana khorina makhalelo ooloka nnakhala vakhaani. Nto voohimya sa Yesu oryeene mwammiravo, Satana aahiphavelasa omwiiva moohipisa. Moota xeeni?
13 Mwene Herodi, aahinanariwa vanceene mwaha wa asuweli ale yaamukonhe wira “Ori vai mwené àYuda oyariwe nanano?”, nto okhuma vaavale aaniphavelasa omwiiva. (Math. 2:1-3, 13) Voophavela osuwelexa vakhala wira aamwiiviwa tthiri Yesu, owo aahirumiha wira yiivakasiwe anamwane axilopwana otheene yaarina iyaakha piili orowa vathi yaakhala oBethelehemu ni idistritu saya. (Mmusome Matheyo 2:13-18.) Ekeekhai wira mwene ole khaawenrye omwiiva Yesu, masi eyo ennooniherya exeeni voohimya sa nwanani ahu Satana? Eyo ennooniherya wira Diabo khonivaha efaita ekumi ya apinaatamu. Tthiri owo khoniwoonela othunku hata axinamwane. Mwekeekhai Satana “kharamu ònopa murukulu”. Muhikhala-khale mumpeepheihaka nwanani owo!
SATANA NAWOOTHE
14, 15. Moota xeeni Satana ottiyenle awe “miruku” sa atthu ahinaamini?
14 Orumeelaka wootha paahi, Satana onoowerya waahapuxa atthu wira ahimwiiweleleke Muluku oophenta, Yehova. (1 Yoh. 4:8) Orumeelaka wootha, Satana onnaawoka atthu wira ahooneke wira awo ‘amasikhini’ oomunepani. (Math. 5:3) Owo oottiyela “miruku saya, wira ehòneke warya wa w’Ehapar’iyo Yorera ya Kristu òvuwihiwa, yowo ori elatarato ya Muluku”.—2 aKor. 4:4.
15 Enamuna yuulupale enirumeela awe Satana wira aawoke atthu anceene ti etiini yoowoka. Tthiri owo onnitteeliwa murima vaavo vaniwoona awe atthu yaakokhorelaka amuhavinre aya, itthu soopattuxiwa, inama, wala etthu ekina omuhiya Yehova, yoowo oniphavela wira atthu ‘akhalé awawe pahi’! (Okhum. 20:5) Hata atthu anceene yaale anoona wira annimukokhorela Muluku mwa enamuna yookhalela aawayihiwa ni sookupali sa ethiru ni soolema sihirina efaita. Atthu arina makhalelo oomoriha ikharari, ntoko ale Yehova aamorela awe ikharari oriki: “Munihononela-ní musurukhu anyu n’itthu sihinlyiwa? Munojeiherya-ní makhuv’anyu n’itthu sihinvoniha? Mukìwe, mukiwiriyane: munophwanya yolya yorera; munimolya itthu sosiva, munovona”.—Yes. 55:2.
16, 17. (a) Xeeni Yesu ohalaka omwiirela Pedru: “Satana wé! Khuma vamaithoni vaka”? (b) Moota xeeni Satana oniphavelasa awe oniwoka wira nooneke wira wanikisa khonrwa?
16 Satana pooti onwokaka murumeyi oolipa a Yehova. Mwa ntakiheryo, muthokorerye ele yaakhumelenle okathi Yesu waahimeeryale awe awiixutti awe wira aahala vakhaani wiiviwa. Mooreerela, murummwa Pedru aahimurowana okhwipi khukelela onvaanya iiraka: “Pwiya, Muluku ahitthuné eyo. Nnari! Etthu iyo ehokhumeleleni!” Waakhula wa Yesu moolipiherya waari so: “Satana wé! Khuma vamaithoni vaka!”. (Math. 16:22, 23) Xeeni Yesu ohalaka omwiirela Pedru “Satana wé”? Okhala wira Yesu aanisuwela ele yaarowa okhumelela. Tthiri waahiphiya okathi waarowa awe wiiviwa ni ovaha mukuttho yoowo waarowa wooniherya wira Diabo nawoothe. Okathi ole wooxankiha Yesu khaareerela okhootta wiiwelela yooruma ya Muluku. Opaka eyo waarowa omukhweiherya Satana onwoka Yesu.
17 Okhala wira ninkhala wanikisa wa makhalelo ala, nto nnikhala okathi wooxankiha. Satana oniphavela wira hiyo nihiye omwiiwelela Muluku, nto nikilaathiki olumwenku ola, nto eyo enooniiriha oliyala wira wanikisa ohaattamela. Muheemererye eyo yookhumelelakani! Ohiya-vo, nvikanihe ‘olipelela’. (Math. 24:42) Muhikupali itthu sowoothiwa sa Satana wira wanikisa ori ottaiwene, wala wira khonrwa.
18, 19. (a) Moota xeeni Satana onimananiha awe oniwoka orumeelaka moota hiyo nniixoona ahu? (b) Moota xeeni Yehova onnikhaliherya awe wira nihaakanyeriwe muupuwelelo ahu ni okhala oowehaweha?
18 Satana onnimananiha oniwoka mwa enamuna ekina. Owo oniphavela wira hiyo nikupaliki wira Muluku khonniphenta ni wira itampi sahu khasinirowa oleveleliwa. Iyo itthu vakhaani paahi Satana sinirumeela awe wira oniwoke. Tthiri ti pani ohiniphentiwa ni Yehova? Ti Satana. Ti pani ohinirowa oleveleliwa tthiri? Khuuvo-to mukina ohikhanle Satana. Masi Biibiliya onninileiherya so: “Vekekhai, Muluku naxariya, owo khanliyala miteko sanyu sorera n’uphenta wanyu, weiwo onthonyeryanyu nwirelaka sorera aKristu ntoko sinìranyu nlelo”. (aHéb. 6:10) Yehova onnixukhurela wiimananiha wahu ni muteko oninvarela ahu khahiyo wa mahala. (Mmusome 1 aKorinto 15:58.) Nto niheemererye owokiwa ni soohimmwa sowootha sa Satana.
19 Nihoona wira Satana, toowerya, tootakhala ni nawoothe. Nto ninrowa owerya sai omuxintta nwanani owo oowoopiha? Yehova khonihin’ye mekhihu. Nuulumo nawe ninniniixuttiha inamuna sa Satana, ni hiyo “nosuwela sana simphavelawe”. (2 aKor. 2:11) Vakhala wira hiyo ninnisuwela inamuna sa Satana, nto nnoowerya ovikaniha okhala oowehaweha. Masi osuwela inamuna sa Satana paahi khoniphiyerya. Biibiliya onihimya so: “Tivó, mmwiweleleke Muluku. Mmukhotteke satana, satan’owo onimotthyawani”. (Yak. 4:7) Muru onittharelana onrowa othokorerya inamuna tthaaru sinrowa ahu owanana ni omuxintta Satana.