WAAKHULIWA WA MAKOHO A MBIIBILIYANI

Xeeni vanivekela ahu wira Omwene wa Muluku orwe?

Omwene wa Muluku ti eguvernu ya wiirimu. Yesu aahaahimeerya atthareli awe ovekela wira Omwene orwe, mwaha woowi Omwene owo onooruuha exariya ni murettele valaponi. Khiivo eguvernu ya apinaatamu eniwerya omaliha otakhala, ohaawa, wala iretta, masi Omwene ola onoowerya. Muluku oomuthanla Mwanawe, Yesu, wira okhale Mwene. Nave-tho Yehova oothanla egrupu ya athareli a Yesu wira yalamulele nuuwo wiirimu.​—Mmusome Luka 11:2; 22:28-30.

Moohipisa, Omwene wa Muluku onimwaapwetexa awanani otheene a eguvernu awe. Nto vaavo ninvekela ahu wira Omwene wa Muluku orwe, nimphavela wira eguvernu awe emala-malihe iguvernu sotheene sa apinaatamu.​—Mmusome Daniyeli 7:13, 14; Wisupulula 11:15, 18.

Exeeni ennikupaliha wira Omwene wa Muluku ti wooloka?

Yesu onniphwanela okhala Mwene mwaha woowi owo toomoriwa ikharari. Nave-tho, mwaha wookhala Mwaana a Muluku, ookhalana owerya wira aakhaliherye ale anivekela okhaliheriwa ni Muluku.​—Musome Esalimo 72:8, 12-14.

Omwene wa Muluku onimwaakhaliherya ale anivekela wira Omwene owo orwe, ni ale animwiiwelela Muluku. Nto nyuwo munoophwanya mureerelo mwaha wa wiixutta ele Biibiliya onihimya awe sa Omwene wa Muluku.​—Mmusome Luka 18:16, 17; Yohani 4:23.

Wira musuwele soohimmwa sikina muwehe muru 8 a eliivuru ela, yoolaleiwa ni Anamoona a Yehova

Mubaxari va www.jw.org/vmw