Nvaheke Efaita Eparakha Erina Anyu ya Ovara Muteko ni Yehova!

“Owanli ahu ninvara vamosá muteko wa Muluku”.​—1 AKOR. 3:9.

MWAAROWA WAAKHULA SAI?

Eparakha xeeni erina aya arumeyi a Yehova okhuma khalai?

Muteko xeeni nikhanle ahu oovaha efaita mahiku ala?

Etthu xeeni yoohakalaliha eniwehererya ahu muhoolo?

1. Yehova onoonela sai ovara muteko, nto eyo enimwiiriha opaka exeeni?

YEHOVA onnisiveliwa ni khula muteko onivara awe. (Esal. 135:6; Yoh. 5:17) Wira eemererye soopattuxiwa sawe sirina ankhili ophwanya ohakalala wuulupale onikhumelela nuumala mutthu ovara muteko, Yehova onnaavaha miteko sooloka ni soohakalaliha. Mwa ntakiheryo, owo aahimweemererya Mwanawe oopaceriwa opattuxiwa wira omukhaliherye miteko sa opattuxa. (Mmusome aKolosi 1:15, 16.) Biibiliya onnihimya wira ohinatthi okhala pinaatamu, Yesu aari vakhiviru ni Muluku wiirimu ‘ovara miteko iye sothene’.​—Mir. 8:30.

2. Exeeni enooniherya wira soopattuxiwa soomunepani okhuma khalai sinnivahiwa muteko wootthuneya ni woohakalaliha?

² Okhuma wanipacerya mpakha wanikisa wa Biibiliya ninniphwanya matakiheryo anooniherya wira Yehova onnaavaha muteko woovara anaawe oomunepani. Nuumala Adamu ni Eva ottheka ni woomoliwa mParayiisu mwaakhala aya, Muluku ‘ahipweha mmatta mwa wEdeni makerubi mpantte onikhuma nsuwa, ekunxene ekatana ya moro walikana n’itari, wira elipeleleke ephiro y’omwirini w’ekumi’. (Maph. 3:24) Nto Wisupulula 22:6 onnooniherya wira Yehova aahiruma “nlaikha nawe wira nathonyerye arumeyi awe sinrowa wiraneya vohilekela”.

NIIREKE YEHOVA ONNAVAHA MUTEKO APINAATAMU?

3. Moota xeeni Yesu aattharihenle awe ntakiheryo na Tiithi awe okathi waari awe valaponi?

³ Okathi waari awe valaponi ntoko pinaatamu oomalela, Yesu waanimusivela ovara khula muteko aavahiwa awe ni Yehova wira ovare. Ottharihelaka ntakiheryo na Tiithi awe, Yesu nave aahaavaha miteko sootthuneya awiixutti awe. Waatumereryaka moovara murima ele yaarowa aya opaka owo aahimmye so: “Kinolèlani ekhweli wira: ole onikamini, yowo-tho onovara miteko sinvaraka, hatá onovara sulupalexa ovikana, mana miyo kinrowa w’Atithi”. (Yoh. 14:12) Ophavelaka ottittimiherya wira muteko ole wahaana ovariwa moowaakuveya, Yesu aahimmye so: “Othana sisa, kihana ovara miteko s’Atithi akirumme. Ohiyu onnattamela, ohinweryawe mutthu ovara muteko”.​—Yoh. 9:4.

4-6. (a) Xeeni hiyo vanitthuneya ahu omuxukhuru Nowe ni Moise mwaha wa waakhwaniherya oratteene muteko yaavahiwe aya ni Yehova? (b) Etthu xeeni miteko sotheene Muluku sinaavaha awe apinaatamu sinikumiherya aya?

⁴ Hata khalai ohinatthi Yesu orwa valaponi, apinaatamu yaanivahiwa miteko soohakalaliha wira avareke. Nnaamwi Adamu ni Eva yooceelale ovara oratteene muteko yaavahiwa aya, masi atthu akina yaahivara miteko sa Muluku ntoko yaalakiheriwe aya. (Maph. 1:28) Nowe aahivahiwa malakiheryo oowiiwanyeya a moota saarowa awe oteka ekalawa yaarowa woopola ekumi okathi wa mutaaseke Muulupale. Owo aahivara sotheene aarummwale awe ni Yehova. Olelo-va nihaana omuxukhuru Nowe okhala wira aari mutthu owiiwelela moomalela!​—Maph. 6:14-16, 22; 2 Ped. 2:5.

⁵ Moise nave aahivahiwa malakiheryo owiiwanyeya sa moota aarowa awe omuteka tabernaakulu ni olokiherya miteko sa anamukuttho, nto owo aahittharihela saana. (Okhum. 39:32; 40:12-16) Olelo-va hiyo nave ninniphwanya mireerelo mwaha wa owo wiiwelela wawe saana malakiheryo a muteko aavahiwe awe. Moota xeeni? Murummwa Paulo aahitthokiherya wira itthu saattittimiheriwa Munlamuloni saathonyerya ‘itthu soloka sarowa okhumelela muholo’.​—aHéb. 9:1-5, 9; 10:1.

⁶ Miteko Muluku sinaavaha awe arumeyi awe sinnivirikana khula okathi moovarihana ni wiiraneya wa soolakela sawe. Hata vari siiso, khula muteko aavaha awe waaninvuwiha Yehova ni waaphwanyiha mireerelo apinaatamu. Eyo enihela muhina itthu Yesu aapanke awe ohinatthi orwa valaponi ni okathi aaryaawe valaponi. (Yoh. 4:34; 17:4) Vamosaru, muteko onivahiwa ahu mahiku ala onninvuwiha Yehova. (Math. 5:16; mmusome 1 aKorinto 15:58.) Xeeni ohimmwaka siiso?

OKHALANA MOONELO WOOLOKA VOOHIMYA SA MITEKO SINIVAHIWA AHU

7, 8. (a) Muteko xeeni maKristau arina aya eparakha ya ovara olelo-va? (b) Nooneleke sai malakiheryo anivahiwa ahu ni Yehova?

⁷ Moohaaniherya nyuwo munnoona wira etthu Muluku epanke awe ti yootikiniha okhala wira ohaavaha eparakha apinaatamu oohimalela ya ovara muteko vamosa ni yena. (1 aKor. 3:9) Ale avahiwe muteko wa oteka Ipa sa Omwene ni sa Mithukumano Suulupale, ni ipa sa obetheli annivara muteko onitthuneya ikuru ntoko ole waavariwe ni Nowe ni Moise. Akhala wira nyuwo munilokiherya Empa ya Omwene ya muloko anyu wala muteko wooteka eseedi esya oWarwick, oNew York, nvahe efaita enamuna eyo erina anyu ya omurumeela Muluku. (Nwehe elatarato yoopacerya wira moone moota sinirowa aya okhala empa ene yamalihiwa otekiwa.) Tthiri owo muteko wa Muluku. Tivonto vanilattuliwa aya maKristau manceene wira yakhaliherye otekiwa ipa iyo sa omwene. Matekeliwo aya aniireliwa onvuwiha Yehova ni waaphwanyiha mureerelo apinaatamu. (Mit. 13:47-49) Enamuna yooreerela ya ovara muteko ola ennitthokiheriwa ni nikhuuru na Yehova. Eyo enihela muhina okathi mukina mutthu ovahiwaka muteko musya.

⁸ Arumeyi oororomeleya a Yehova khula okathi onnaasivela wiiwelela malakiheryo a Muluku aya. (Mmusome aHéberi 13:7, 17.) Okathi mukina hiyo pooti ohiiwexexa etthu enitumereriwa ahu opaka mwa enamuna emosa. Masi hiyo ninnisuwela wira wiiwelela malakiheryo awo ni mirukunuxo sinikhumelela onniphwanyiha mureerelo okhala wira Yehova onnisuwela etthu enimwiiriha siiso.

9. Ntakiheryo xeeni nooloka voohimya sa ovara muteko anivaha aya axitokweene mmulokoni?

⁹ Yoophavela yuulupale ya waakhwaniherya yoolakela ya Yehova ennooneya mwa enamuna axitokweene anihoolela aya muloko. (2 aKor. 1:24; 1 aTes. 5:12, 13) Awo anniimananiha ovara muteko ni waakhulela mirukunuxo sinipakiwa mohiikhupanyerya. Awo annaakuvela ottharihela marukunuxo a inamuna sa olaleya Omwene yoowo otikitheriwe. Nnaamwi woopaceryani axitokweene akina yaapinse waakhulela ni olokiherya muteko wa olaleerya orumeeliwaka telefoni, mapuro aniphiya apakiti, mapuro oowaatta atthu, moohipisa yaahipacerya woona wira inamuna iyo sinnikumiherya mireerelo sinci. Mwa ntakiheryo, mapioneero maxexe wAlemanha yaahiiwanana orowa olaleerya muttetthe oniiriwa nakoso yoowo wahaalaleeriwa ikwaha sinceene. Michael onihimya so: “Hiyo kinaatonko olaleerya muttetthe siisaale, nto eyo yaahinithikila muthana. Woonasa wene Yehova aahoona oxankiheya wahu, nto aahinikhaliherya ovara saana muteko nihiku nle. Tthiri naahitteeliwa murima okhala wira naahittharihela malakiheryo yaakumiheriwe ni Orummwa Ahu wa Omwene ni ororomela wira Yehova aarowa onikhaliherya!” Niireke nyuwo munniphavela ottottela mureerelo iparakha sotheene isya sa olaleerya sinikhumelela mmuttettheni mwanyu?

10. Mirukunuxo xeeni sa mootthokeyani sikhumelenle ninaano?

¹⁰ Okathi mukina, sinnipakiwa mirukunuxo mootthokeyani wa Muluku. Iyaakha vakhaani sivinre, ifiliyaali sinceene sootakaahiwa emosa ni ekhwaaya. Okathi owo anna ni arokora a ifiliiyaali iyo annivekeliwa opaka marukunuxo manceene, ni akina vannaavila wiiwexexa wira eyo enookumiherya mireerelo muhoolo. (Mus. 7:8) Tthiri ti voohakalaliha woona wira anna ala owiivahererya annikhaliherya wooniherya mweettelo wooloka wa atthu a Yehova!

11-13. Muxankiho xeeni waaphwannye anna akina mwaha wa mirukunuxo sa mootthokeyani wa Muluku?

¹¹ Hiyo nnoowerya wiixutta itthu sinceene ni anna ale yaakhala efiliyaali etakaaheriwe ni ekina. Akina aaviriha iyaakha miloko sinceene arumeelaka eBetheeli ya elapo aya. Munna mmosa ni amwaarawe aarumeela eBetheeli emosa yaamukhaani ya wAmerica Central, aahivekeliwa wira othaamele eBetheeli ya oMéxico yeeyo yaari yuulupalexa ovikana ele yaarumeela awe. Rogelio onihimya so: “Waahiya amusi ni apatthani yaari etthu yooxankiha vanceene”. Munna mukina oniiriwa Juan, yoowo aavekeliwe wira othaamele oMéxico onihimya so: “Eyo enoolikana ni oyariwa vasya; mutthu ohaana opacerya makhalelo masya. Eyo enivekela opaka marukunuxo a soolimalela ni muupuwelelo wa mapuro awo masya”.

¹² Mabethelita makina yaathamihiwe ilapo sikina sa wEuropa arowaka wAlemanha yaahikhalana-tho mixankiho. Khula mutthu onisiveliwa ni myaako vaarowa okhala voomuxankiha othaama oSuíça, khiyahiya myaako iye suulupale sinirukurerya elapo ele siniireliwa Alpes. Nto ale yaathaamale wAustralia, yaaniwunkhela makhalelo oomaaleleya yaarina aya elapo ele.

¹³ Wa anna ale yaathaamenle elapo ekina, eyo yaataphulela olimalela empa yaarowa aya okhalaka, ovara muteko ni anna ni arokora ahinaasuwela aya, ni woonasa wene wiixutta muteko mukina woovirikana ni ole yaavara aya elapo aya. Eyo enihela muhina olimalela muloko mukina musya, muttetthe musya wa olaleerya, woonasa wene wiixutta nttaava nikina. Opaka mirukunuxo iyo sotheene etthu yoovila. Hata vari siiso maBethelita manceene aheemererya opaka eyo. Exeeni yaakhalihenrye awo owerya opaka eyo?

14, 15. (a) Moota xeeni anna anceene yoonihenrye aya wira annivaha efaita eparakha erina aya ya ovara muteko ni Yehova khula nipuro aniroihiwa aya? (b) Mwa enamuna xeeni anna awo akhanle aya ntakiheryo nooloka wa hiyo?

¹⁴ Grethel onihimya so: “Miyo kaaheemererya othaama okhala wira eyo ti enamuna ya omooniherya Yehova wira omphenta waka ti wuulupale ovikana elapo aka, empa, wala khula muteko orina aka”. Dayska onihimya so: “Mwaha woosuwela wira malakiheryo ale yaari a Yehova, miyo kaaheemererya moohakalala”. André ni Gabriela annakhuleliha eyo ariki: “Hiyo nahoona wira ele yaari eparakha ahu ya omurumeela Yehova ni ohiya ottuli itthu saanisivela. Hiyo nuupuwela so ‘vakhala wira Yehova tonikumiherya murukunuxo owo, khanirina enamuna ekina ya okhootta otthara malakiheryo awe’”.

¹⁵ Okathi enitakaahiwa aya efiliyaali emosa ni ekhwaaya, maBethelita makina annivahiwa muteko wa opioneero. Eyo yaahikhumelela okaathi maBethelita a oDinamarca, oNoruega ni oSuécia yaathukumanyiwe aya nipuro nimosa khukhumelela efiliyaale ya muttetthe wEscandinávia. Eriyari ya anna awo yaahikhala Florian ni Anja, yaawo anihimya so: “Hiyo naanoonela muteko ahu musya okhala etthu yoohakalaliha. Okhala wira hiyo ninnoona okhala etthu yooloka weemya wira Yehova onivahe khula muteko onoona awe onireerela wira nimurumeele. Tthiri hiyo nnoowerya ohimya wira nooreelihiwa vanceene”! Nnaamwi hiyo otheene nihirowaka opaka marukunuxo ntoko awo, niireke khamunoona oreerela otakiha wiivahererya wa anna awo wira apwehe Omwene nipuro noopacerya? (Yes. 6:8) Yehova onnaareeliha ale anivaha efaita erina aya ya ovara muteko ni yena khula nipuro anivekeliwa aya orowa.

NVIKANIHE OKHALA OTTEELIWA MURIMA NI EPARAKHA ERINA ANYU YA OVARA MUTEKO NI YEHOVA!

16. (a) Exeeni ennileela awe aGalasia 6:4? (b) Eparakha xeeni yuulupalexa eniwerya aya okhalana apinaatamu?

¹⁶ Apinaatamu oohimalela waasivela wiilikanyiha ni atthu akina. Masi Nuulumo na Muluku ninnihimya wira nikhaleleke nthiti ele eniwerya ahu opaka mmansihu. (Mmusome aGalasia 6:4.) Anamunceene a hiyo kharina miritti munikhuuruni na Yehova. Nave khivaniweryaneya otheene ahu orumeela ntoko mapioneero, mamisionaario wala oBetheeli. Ekeekhai wira iparakha iyo ti sooloka okhalana! Masi hiyo nihiliyaleke wira eparakha yuulupalexa ekhanle awe ookhalana pinaatamu ti ele otheene ahu erina ahu. Eyo ti ovara muteko vamosa ni Yehova okathi onilaleerya ahu. Tthiri eyo eparakha enitthuneya ovahiwa efaita yuulupale!

17. Etthu xeeni yooxankiha erina ahu olumwenku ola wa Satana, masi xeeni vahinitthuneya ahu okhala ookhulumuwa?

¹⁷ Olumwenku ola wa Satana iparakha sahu sa omurumeela Yehova sinikhala vakhaani. Okhala wira hiyo khanniwerya weettiherya sinireerela aya miritti sahu sa vatthokoni, makhalelo a ekumi ahu, wala etthu ekina. Masi eyo khenireerela onikhulumulaka. Muhoone ohikhala etthu muteko onivara anyu vamosa ni Muluku okathi onilaleya anyu nsina nawe ni waakhaliherya akina osuwela Omwene awe khula okathi oniwerya anyu. Etthu yootepexa otthuneya okhala wira nyuwo munnivara muteko ni yena mpakha vaniwerya anyu ni onvekela wira ookhaliheryeni owerya okhala vamosa ni anna wira munnuuherye ele eniwerya anyu opaka. Muupuweleke wira khula mutthu onivuwiha nsina na Yehova ta faita yuulupale vamaithoni vawe!

18. Itthu xeeni nikhanle ahu ooleva wira nimurumeele Muluku, nto mwaha wa exeeni?

¹⁸ Moohicikha etthu sa otteettheya wahu ni okhala wahu oohimalela, Yehova, vannimusivela ovara muteko ni hiyo. Nto ninrowa wooniherya sai wira ninnivaha efaita eparakha erina ahu ya ovara muteko ni Muluku mahiku ala ookiserya? Hiyo nihaana oleva khula etthu ennisivela wala erina ahu wira nikhaliherye muteko wa Muluku, okhala wira yaphiya elapo esya, Yehova onrowa onivaha “ekumi yekekhai”, eyo piiyo makhalelo oohakalaliha, a murettele ni ekumi ehinimala.​—1 Tim. 6:18, 19.

19. Exeeni Yehova enisukenrye awe muhoolo?

¹⁹ Okathi ola onikhala ahu neemenle mukerekhere mwa elapo esya, muupuweleke masu ale Moise aahimeryale awe aIsarayeli ahalaka vakhaani okela Elapo Yooleiheriwa aya: “Apwiya Muluku anyu animorerihani mwa miteko sanyu sothene”. (Otum. 30:9) Ovirakaru Harmagedoni, atthu yaale yaavara muteko ni Muluku anrowa waakhela elapo eleiheriwe aya. Nto okhuma vaavo orowa ohoolo, ninrowa ovaraka muteko ahu musya, eyo, piiyo, okhaliha elapo ela eparayiisu!