WAAKHULIWA WA MAKOHO A MBIIBILIYANI

Niireke Yesu ahaahihimuxa alipa-ookhwa?

Biibiliya onnihimya wira Yesu aahaattikiherya okumi atthu yaakhwiiye. Sowiiraneya iyo khahiyo itthu soopakeleliwa, maana Biibiliya onnihimya opuro ni okathi siiranen’ye aya. Mwa ntakiheryo, elimwe ya 31 EC, muttitthi muulupale waahikhuma ni Yesu oKafarnawu erowaka oNayini. Okathi waaphiyale aya, yaahikumana ni muttitthi mukina. Nyuwo munoowerya okupali yowiiraneya ya ohihimuxiwa yaakhumelenle moottharelana mwaha woowi eyo yoolempwa mBiibiliyani, ni yiiraneyale ohoolo wa anamoona.​—Mmusome Luka 7:11-15.

Yesu aahimuhihimuxa mpatthani awe Laazaro, yoowo aamalinhe mahiku 4 okhwiiye ene. Munoowerya okupali ele Yesu aapanke awe nihiku nle okhala wira opuro ole yaahikhala atthu yoonale itthu iyo.​—Mmusome Yohani 11:39-45.

Xeeni Yesu ohalaka waahihimuxa alipa-ookhwa?

Yesu aahaavenxa alipa-ookhwa mwaha woowi aanoona othunku. Nave-tho, aaphavela wooniherya wira Tiithi awe, Mpattuxa a okumi, ookhalana owerya wo waahihimuxa alipa-ookhwa.​—Mmusome Yohani 5:21, 28, 29.

Okhala wira Yesu ahaahihimuxa alipa-ookhwa, eyo enninivaha nroromelo voohimya sa yooleiherya awe ya muhoolo. Owo onirowa waahihimuxa atthu anceene akhwiiye, waahela muhina atthu oohixariya yaawo yahaasuwela etthu voohimya sa Muluku ekeekhai. Nto onimwaavaha eparakha wira emusuwele ni omphenta Yehova Muluku.​—Musome Miteko 24:15.

Wira musuwele soohimmwa sikina muwehe muru 7 a eliivuru ela, yoolaleiwa ni Anamoona a Yehova

Mubaxari va www.jw.org/vmw