Xeeni Vanitthuneya Ahu Okhala Oowaarya?

“Mukhaleke òwarya”.​—ONAM. 11:45.

MWAAROWA WAAKHULA SAI?

Xeeni arumeyi otheene a Yehova vanireerela aya othokorerya saana ele enitaphulela aya wiirattela wa Aroni ni anaawe?

Moota xeeni wiiwelela wahu onivarihana aya ni okhala oowaarya?

Yoothanla xeeni enitthuneya ahu opaka voohimya sa nlamulo na Yehova na ohilya ephome?

1. Enrowa onikhaliherya sai eliivuru ya Onamukuttho?

ELIIVURU ya Onamukuttho, nuulumo noowi waarya ninnirumeeliwa vanceene ovikana iliivuru sikina siri mBiibiliyani. Okhala wira oratta wala waarya, etthu yootthuneya vanceene wa ale animukokhorela Yehova ni ekeekhai, nto wiiwexexa saana onooniiriha osiveliwa eliivuru ya Onamukuttho ni onikhaliherya-tho okhala oowaarya.

2. Iponto xeeni suulupale siniphwanyaneya eliivuru ya Onamukuttho?

² Eliivuru ya Onamukuttho yeeyo elempwale ni profeta Moise, eniirela mpantta “Solempwa sothene” seiyo sinniphwanyiha mureerelo ni oniixuttiha. (2 Tim. 3:16) Nsina na Muluku ninniphwanyaneya ikwaha 10 khula ekapitulu ya eliivuru ela. Wiiwexexa oratteene eliivuru ya Onamukuttho onrowa onikhaliherya osyaka opaka khula etthu yaarowa onyohola nsina na Muluku. (Onam.  22:32) Nto moolumo anooneya muliivuruni-mu oowi ‘Ti miyo Yehova’, ahaana onuupuxeryaka wira nimwiiweleleke Muluku. Muru ola ni onittharelana, ninrowa othokorerya ikeekhai suulupale, niire so, soovaha sa Muluku, seiyo sinrowa onikhaliherya omukokhorela Yehova ntoko atthu oowaarya.

OTTHUNEYA WAYA OKHALA OOWAARYA

3, 4. Waataphulela exeeni orapihiwa wa Aroni ni anaawe? (Nwehe elatarato yoopacerya.)

³ Mmusome Onamukuttho 8:5, 6. Yehova aahimuthanla Aroni wira okhale namukuttho muulupale a nloko na Isarayeli, nave anaawe yaari anamukuttho a nloko nle. Aroni aathoonyerya Yesu Kristu, nto anaawe yaathonyerya atthareli oothanliwa a Yesu. Vano niireke orapa wa Aroni waathonyerya wiirattela wa Yesu? Nnaari, okhala wira Yesu khonattheke ni khaarina etthu “yonanara”, tivonto khaatthuneya otteelihiwa wala orapihiwa. (aHéb. 7:26; 9:14) Hata vari siiso wiirattela wa Aroni onnittittimiherya makhalelo ooloka ni exariya ya Yesu. Vano waataphulela exeeni orapihiwa wa anaawe Aroni?

⁴ Orapihiwa wa anawe Aroni waathoonyerya oratta wa ale yaathanliwe orowa okhala anamukuttho wiirimu. Nto niireke obatizo wa alipa oowoottihiwa onnivarihana ni orapihiwa wa anaawe Aroni? Nnaari, okhala wira obatizo khonirapiha itampi; masi, onooniherya wira mutthu owo ohiivahererya moomalela wira omurumeeleke Yehova Muluku. Orapihiwa wa alipa oowoottihiwa oniireya orweela wa “masu”, nto eyo enaatumererya wiiwelela ni murima aya wotheene sowiixuttiha sa Kristu. (aÉf. 5:25-27) Tthiri awo toorapihiwa ni oowaarya. Ankhi “ipwittipwitthi sikina”?​—Yoh. 10:16.

5. Xeeni ohimmwaka wira ipwittipwitthi sikina sirapihiwe ni Nuulumo na Muluku?

⁵ Anaawe Aroni khiyathoonyerya “muttitthi mulupale” wala ipwittipwitthi sikina sa Yesu. (Wis. 7:9) Nto niireke atthu awo otheene oobatiziwa arapihiwe ni Nuulumo na Muluku nenlo? Aayo! Vaavo ale arina nlipelelo na okhala valaponi vanisoma aya mBiibiliyani sa muteko onivara aya ni otthuneya waya ephome ya Yesu emwarexiwe, awo annaamini moolumo awo nto anamurumeela Muluku “othana n’uhiyo”. (Wis. 7:13-15) Ovikaniha waya okhalana ‘miteko sorera’ onooniherya wira alipa-oowoottihiwa ni ipwittipwitthi sikina khanihiyererya wiirattela. (1 Ped. 2:12) Tthiri Yehova onnimutteela murima waaweha atthu awe aryeene ooratteleya ni oowiiraana, amwiiwelelaka Makampusi aya, Yesu!

6. Wiivarerya xeeni onikumiherya mureerelo?

⁶ Yooruma yoowi anamukuttho wIsarayeli yaahaana orattela erutthu aya, yookhalana yootaphulela yuulupale wa atthu a Yehova olelo-va. Atthu yaale anaasomiha ahu Biibiliya ikwaha sinceene annisiveliwa woona wira opuro onimukokhorela ahu Yehova ti wooratteleya saana, nave-tho hiyo niri oowiiwariha saana. Tthiri wiirattela wa anamukuttho onninikhaliherya osuwela wira khula mutthu oniphavela owela vamwaako wa Yehova ohaana okhalana “murima woloka”. (Musome Esalimo 24:3, 4; Yes. 2:2, 3.) Muteko oninvarela ahu Muluku ohaana ovariwa ni mutthu orina muupuwelelo ni murima wooloka ohela muhina orattela erutthu awe. Eyo enivekela wiivarerya okathi ti okathi, nto vaatthuneyaka khiyapaka mirukunuxo suulupale wira mutthu okhale oowaarya. (2 aKor. 13:5) Mwa ntakiheryo, mutthu oobatiziwa onilakelela oweha epornografia ohaana wiikohaka so: ‘kiireke miyo nlelo kiri oowaarya?’ Nuumala-vo ohaana ovekela nikhaliheryo wira ottharuwe yoolema eyo yoohiirya.​—Yak. 5:14.

MUHAANA WIIWELELA WIRA MUKHALE OOWAARYA

7. Moovarihana ni Onamukuttho 8:22-24, ntakiheryo xeeni Yesu ovanhe awe?

⁷ Okathi waatikitheriwe aya onamukuttho wIsarayeli, Moise ahikuxa ephome ya epwittipwitthi, khuttikitthela niyaru nolopwana, ahittikitthela-tho ekatha yulupale ya ntata noolopwana ni elipwi yuulupale ya nnawu noolopwana na Namukuttho Muulupale Aroni ni anaawe. (Musome Onamukuttho 8:22-24.) Orumeeliwa wa ephome waataphulela wira anamukuttho ale yaarowa opakaka khula etthu aniwerya aya wira yaakhwaniherye muteko aya. Vamosaru, Namukuttho Muulupale, Yesu oovaha ntakiheryo wa alipa oowoottihiwa ni ipwittipwitthi sikina. Maaru awe yaahilimalela wiiwelela malakiheryo a Muluku. Matata awe yaanivara miteko sa Yehova, metto sawe khisaatonko okhuma ephiro yoowaarya.​—Yoh. 4:31-34.

8. Etthu xeeni anitthuneya aya opaka atthu otheene animukokhorela Yehova?

⁸ MaKristau oowoottihiwa ni ipwittipwitthi sikina sa Yesu ahaana otthara moororomeleya ntakiheryo na Namukuttho aya Muulupale. Anamakokhorela otheene a Yehova ahaana wiiwelela moomalela malakiheryo otheene aniphwanyaneya va Nuulumo na Muluku ni osyaka oriipiha murima munepa wa Muluku. (aÉf. 4:30) ‘Inawu saya sinitthara iphiro sowokololowa’.​—aHéb. 12:13.

9. Masu xeeni anna araru yaatonko ovara muteko ni anna a Nikhuuru Noolamulela ahimmye aya ni moota xeeni masu awo akhanle aya oonikhaliherya ovikaniha okhala oowaarya?

⁹ Nrowe nithokorerye masu oovara murima alavuliwe ni anna arina nlipelelo na okhala valaponi masi atonko ovara muteko mwa iyaakha miloko sinceene vakhiviru ni anna a Nikhuuru Noolamulela. Munna mmosa onihimya so: “Ovara muteko ni anna awo eparakha ya vameekhaaya, masi okhala ni anna awo okathi munceene onnooniherya wira nnaamwi aryeene oowoottihiwa anna awo annooniherya wira toohimalela. Hata vari siiso, yoolakela aka mwa iyaakha iya sotheene ori owiiwelela anna ale annihoolela”. Munna a nenli onihimya so: “Yoolepa ntoko 2 aKorinto 10:5, yeeyo enihimya sa ‘omwiwelela Kristu’, yookikhaliherya okhala oowiiwelela ni ottharihela miruku sa ale anihoolela. Wiiwelela iwo ohaana okhumaka vamurimani”. Munna a neeraru onihimya so: “Osiveliwa ele enimusivela Muluku ni onyokha ele eninyokha awe, onihela muhina ottharihela malakiheryo awe ni opaka ele enimusivela, eyo enitaphulela wiiwelela mulokiheryo awe ni atthu anaaruma awe oroihela ohoolo miteko sawe valaponi”. Munna ola aahisuwela wira Nathan Knorr, yoowo ohoolo waya aari a Nikhuuru Noolamulela, aaheemya myaha saakhoottiwa ni atthu akina, seiye saakhumenle va erevista Watch Tower ya 1925, waahimya so: “Okhumelela wa Nloko”. Wiiwelela wawe waahivara murima wa munna ole. Wuupuwelela saana masu alavuliwe ni anna araru aromoliwe, anoonikhaliherya okhala oowaarya ni oowiiwelela.

OKHALA OOWAARYA NIIWELELAKA NLAMULO NA MULUKU VOOHIMYA SA EPHOME

10. Xeeni varyaaya vootthuneya hiyo wiiwelela nlamulo na Yehova voohimya sa ephome?

¹⁰ Mmusome Onamukuttho 17:10. Yehova aahaaruma aIsarayeli wira okhala wene ahilyeeke “ephome”. Ohilya ephome ya mwaamunama wala ohiheleliwa mwerutthuni, yooruma enivahiwa aya maKristau otheene. (Mit. 15:28, 29) Hiyo ninnikhootta khula etthu yaarowa omwiiriha Yehova ‘oniviruwela’ ni onoomola mmulokoni mwawe. Hiyo ninnimphenta owo ni nimphavela omuhakalaliha. Hata okathi yoole mameediku anihimya aya wira naahiheleliwe ephome nnimookhwa, hiyo khanneemya wira woova oniirihe wiiwelela sookhanyererya sa atthu ahinimusuwela Yehova ni ahimphavela omwiiwelela. Ekeekhai wira eyo ennikumiherya otheiwa ni oramusiwa mwaha wookhootta oheleliwa ephome, masi hiyo nimphavela omuhakalaliha Muluku. (Yuda 17, 18) Nto etthu xeeni enrowa onikhaliherya “wipasopa” wira nihilye wala nihiheleliwe ephome?​—Otum. 12:23.

11. Xeeni vanihimya ahu wira itthu saapakiwa nihiku na ovekela oleveleliwa sookhalana efaita?

¹¹ Ephome ya mwaamunama yaarumeeliwa ni muulupale aanamukuttho Nihiku na Ovekela Oleveleliwa Soottheka khula mwaakha wIsarayeli a khalai, onoonikhaliherya osuwela moonelo wa Muluku voohimya sa ephome. Ephome yaarumeeliwa okathi wa vameekhaaya. Eyo yaarumeeliwa wira opakiwe mukuttho woolevelela itampi waaroiheliwa Yehova. Ephome ya enyompe ni ya epuri yaahaana otatheliwa ohoolo ni ottuli wa nivuku na wataana. (Onam. 16:14, 15, 19) Eyo yaanitthukula ephiro wira Yehova olevelele itampi sa aIsarayeli. Wuncererya eyo, Yehova aahihimya wira akhala mutthu onimwiiva mwaamunama ophavelaka omukhuura, owo ohaana omwarexela vathi ni wuuhweela ephome ni etthaya “okhala wira ekumi ya khula enama ephomé aya”. (Onam. 17:11-14) Niireke ele yaari yoolema pure? Nnaari. Ovariheliwa muteko wa ephome nihiku na ovekela oleveleliwa soottheka, vamosa ni nlamulo na omwarexela vathi, sinnivarihana ni malakiheryo Muluku aavanhe awe khalai wa Nowe ni anaawe voohimya sa ephome. (Maph. 9:3-6) Yehova Muluku aahikhoottiha olyiwa ephome wala oheleliwa wira mutthu oopole ekumi. Nto eyo enitaphulela exeeni wa maKristau?

12. Moota xeeni epaphelo Paulo aalepenle awe maKristau aHeeberi yoonihenrye aya ovarihana okhanle wa ephome ni oleveleliwa itampi?

¹² Okathi murummwa Paulo aalepenle awe maKristau aHeeberi voohimya sa ikuru ephome erina aya ya otteeliha itthu owo aahimmye so: “Sitthariheliwaka ikano, itthu sothene sinnirerihiwa n’iphome. Vano, itampi khasinleveleliwa, sahimwarexeliwe ephome”. (aHéb. 9:22) Paulo aahihimya-tho wira nnaamwi mikuttho sa inama saarina efaita, masi siireliwa owuupuxerya aIsarayeli wira yaari anamattheka ni wira yaanitthuneya ovahiwa etthu yaarowa owerya omaliha khuluwi itampi saya. Tthiri, Nlamulo ‘khinalikana vomalela n’itthu s’ekekhai, nari ntoko eruku pahi ya sorera satthuna orwa’. (aHéb. 10:1-4) Nto vaarowa oweryaneya sai oleveleliwa itampi?

13. Munoonela sai mwaha wa Yesu orowa ovahererya efaita ya ephome awe, wa Yehova?

¹³ Mmusome aÉfeso 1:7. Tthiri okhwa wa Yesu Kristu waari wa mukuttho; okhala wira ‘aivaherenrye votthuna vawe wa hiyo’, tivonto wookhalana yootaphulela yuulupale wa atthu animphenta owo ni Tiithi awe. (aGal. 2:20) Hata vari siiso, etthu Yesu yaapanke awe nuumala okhwa ni ohihimuxiwa ti etthu ekumihenrye oweryaneyaka apinaatamu oleveleliwa itampi saya. Yesu aahaakhwaniherya ele yaatumereriwa ni Nlamulo na Moise voohimya sa Nihiku na Ovekela Oleveleliwa Itampi. Nihiku nlo, muulupale aanamukuttho aanikuxa ephome vakhaani ya mwaamunama aapahiwa mukuttho khiyarowana nipuro Noowaaryexa mpaani mwa Muluku, muhoolo mwaya eyo yaanipakiwa mutemplo ya Salomoni ni khiyanvahererya Muluku, okhalaka ntoko aari vaavo. (Onam. 16:11-15) Mwa enamuna emosa, Yesu mwaneene ookela wiirimu, khurowa ovahererya efaita ya ephome awe ya opinaatamu, wa Yehova. (aHéb. 9:6, 7, 11-14, 24-28) Tthiri hiyo ninnitteeliwa murima mwaha wa osuwela wira itampi sahu sooleveleliwa ni nookhalana yowuupuxerya ya murima yooloka orweela wa ororomela wahu mukuttho wa Yesu!

14, 15. Xeeni varyaaya vootthuneya wiiwexexa ni wiiwelela nlamulo na Yehova voohimya sa ephome?

¹⁴ Niireke nyuwo vano munniwerya wiiwexexa oratteene etthu enimwiiriha Yehova ovaha nlamulo ninnikhoottiherya olya khula enamuna ya ephome? (Onam. 17:10) Niireke moowerya wiiwexexa eponto enimwiiriha Muluku woonaka ephome okhala yowaarya? Owo onnoona ephome okhala yoolikana ni ekumi. (Maph. 9:4) Niireke nyuwo munneemererya moonelo wa Muluku voohimya sa ephome ni munniphavela wiiwelela nlamulo na oheemererya olya ephome? Enamuna emosa paahi ya hiyo okhalana murettele ni Muluku, ori ororomela mukuttho onoopola wa Yesu ni ovaha efaita yuulupale ele enitaphulela aya ephome ya Yesu ohoolo wa mPattuxa ahu.​—aKol. 1:19, 20.

¹⁵ Khula mmosa a hiyo pooti omukhumelela oretta onrowa owiiriha mameediku otumererya oheleliwa ephome. Mmusi wala mpatthani ahu pooti owereiwaka khiyatthuneya opaka yoothanla ya weemya oheleliwa ephome wala oheemya. Okathi owo wa muxankiho, vannitthuneya-tho opakiwa soothanla voohimya sa ifrasau sa ephome ni inamuna sa olooliwa. Tivonto vanitthuneya ahu otokosa oratteene mwaha ola ni wiilokiherya ehinatthi okhumelela ehasara yootutuxerya. Wiilokiherya iwo vamosa ni mavekelo wa Yehova onoonikhaliherya ohimutthekela Muluku mmyaha iyo. Tthiri hiyo khanniphavela omuriipiha murima Yehova mwaha wa weemererya opaka etthu enikhoottihiwa mu Nuulumo nawe! Mameediku ni anamuteko akina a oxiripitaali annaatumererya atthu wira avaheke ephome yuupuwelaka wira eyo enrowa woopola ikumi sa atthu anceene. Masi atthu oowaarya a Yehova annisuwela wira mPattuxa ahu torina ehakhi ya ohimya moota ephome sinivareliwa aya muteko. Yehova onnoona “khula enamuna ya ephome” okhala yowaarya. Hiyo nihaana othanla wiiwelela nlamulo nawe voohimya sa ephome. Orweela wa mweettelo ahu wooloka, nihaana omooniherya Yehova wira hiyo ninnivaha efaita ikuru sa ephome ya Yesu, yeeyo erina owerya wa oleveleliwa itampi ni okumiherya ekumi ehinimala.​—Yoh. 3:16.

XEENI YEHOVA ONNITUMERERYA AWE OKHALA OOWAARYA?

16. Xeeni atthu a Yehova anitthuneya aya okhala oowaarya?

¹⁶ Okathi Yehova aawooponle awe aIsarayeli weepotthani wEjiitu, owo aahimenrye so: “Miyo k’Apwiya [Yehova] kokumihaleni elapo ya w’Ejitu, wira kikhalé Muluku anyu; mukhaleke òwarya, okhala wira miyo ki òwarya”. (Onam. 11:45) Atthu a Isarayeli yaanitumereriwa okhala oowaarya mwaha woowi Yehova toowaarya. Hiyo nikhanle Anamoona a Yehova nihaana okhala owaarya nave. Eliivuru ya Onamukuttho ennitthokiherya moowiiwanyeya mwaha ola.

17. Vano munoonela sai eliivuru ya mBiibiliyani ya Onamukuttho?

¹⁷ Othokorerya wahu mipantta sa eliivuru ya Onamukuttho wooniphwanyiha mureerelo munceene. Ohiya-vo yoosoma ela ehinnuuherya osiveliwa wahu eliivuru ela ya mBiibiliyani. Wuupuwelela itthu sinceene sootthuneya sinihimmwa eliivuru ela ya Onamukuttho, moohaaniherya ohookhaliheryani wiiwexexa mathowa aniiriha otthuneyaka hiyo okhala oowaarya. Masi itthu xeeni sootthuneya nlelo nikhanle ahu oophwanya mpantta ola wa Nuulumo noolempwa na Muluku? Etthu xeeni ekhanle ahu oowiixutta voohimya sa onvarela Yehova muteko woowaarya? Hiyo ninrowa othokorerya myaha iyo muru onittharelana.