MWAHA WA VAKAAPANI | MOOTA WOOSIVELIWA NI MUTEKO ANYU

MUTEKO WOOLUTTUWELIWA: Wookhalana Efaita?

Alex onniittha iphumu vaavo onipweha awe ekaaxa ekina mukaaroni mwa empresa enivara awe. Owo onniikoha so: ‘Xeeni kinivara aka muteko ola? Silini kinrowa aka ophwanya muteko wooloka? Okumi aka waamuloka vaakhanle wira nkinvara muteko!’

Ntoko Alex, anamunceene olelo-va khonaasivela ovara muteko mooluttuweliwa. Aroni, onilokiha ikaaro oni: “Atthu anci anuupuwela wira khonaaphwanela muteko onivariwa ni matata. Awo anuupuwela so: ‘Miyo kinnivara muteko ola kilipelaka ophwanya muteko wooloka’”.

Xeeni atthu anci ahinisiveliwa aya ni muteko wooluttuweliwa? Waaniheryasa, aniwokiwa ni ikaruma sinilaleya ihapari sinihimya wira okumi “wooloka” ti okhalana muhakhu moohihaawela. Matheyo, namuteko a manutenção oni: “Atthu anuupuwela wira vaavo munivara anyu muteko mooluttuweliwa, nyuwo khahiyo mutthu onikhumela saana”. Shane, oniwehaweha inupa sinivariwa muteko oni: “Atthu aniphavela musurukhu munceenexa, nto ole onivahiwa aya khula mweeri aniphavela wira avahiweke khula nihiku”.

Masi, anamunceene anikhumela saana annivaha efaita muteko. Daniyeli, orina iyaakha 25 oniteka inupa oni: “Kinoona wira ovara muteko onniphwanyiha mareeliho, akhala wira muteko owo onnivariwa ni soolukama sooloka”. Andre, orina iyaakha 23 oniira so: “Kinnikupali wira ovara muteko mooluttuweliwa onniphwanyiha ohakalala vanci. Nto ovara muteko vakhaani khoniphwanyiha ohakalala wa okathi munci, masi onikumiherya onyoonyiheya paahi!”

Daniyeli ni Andre, awenrye sai okhalana moonelo wooloka voohimya sa muteko? Awosa aneettela malakiheryo a Biibiliya. Nto, ohiya ohivaha efaita muteko wooluttuweliwa, Biibiliya onnitumererya okhala a nthiti ni ovilela. Masi, ohiya paahi onileela wira nivareke muteko, owo onninooniherya moota woosiveliwa ni muteko ahu.

Malakiheryo xeeni a Biibiliya anrowa wookhaliheryani ohakalala ni muteko anyu? Musome mwaha onittharelana wira moone malakiheryo awo.