WAAKHULIWA WA MAKOHO A MBIIBILIYANI

Xeeni nintthuneya ahu wuupuwelelaka okhwa wa Yesu?

Okhwa wa Yesu wookhalana efaita yuulupale: owo ohookhwa wira apinaatamu ephwanye ekumi yooloka. Atthu khapattuxiwe wira apakeke itthu sootakhala, awereiweke, wala akhweeke. (Maphatuwelo 1:31) Masi etampi yookela mulaponi mwaha wa mulopwana oopacerya, Adamu. Yesu oovaha okumi awe wira onoopole mwa etampi ni okhwa.​—Mmusome Matheyo 20:28; aRoma 6:23.

Muluku ohooniherya niphento nuulupale omurumihaka Mwanawe valaponi wira onikhwele. (1 Yohani 4:9, 10) Yesu aahaaleela atthareli awe wira yuupuweleke okhwa wawe apakaka niira noohaattiheriwa itthu na ephau ni eviinyu. Opaka eyo khula mwaakha onooniherya oxukhurela wahu ophenta wa Muluku ni wa Yesu.​—Mmusome Luka 22:19, 20.

Tani aniphwanelela okhuura ephau ni owurya eviinyu?

Okathi Yesu aalenle awe atthareli awe wira yuupuweleke okhwa wawe, owo aalavula sa nivarihano wala wataana. (Matheyo 26:26-28) Eyo yaahaavaha nlipelelo awiixutti ale ni atthu akina wira yakhale mamwene ni anamukuttho ni yena wiirimu. Nnaamwi atthu anceenexa yuupuwelelaka okhwa wa Yesu, anikhuura ephau ni owuurya eviinyu taale paahi anirowa wiirimu.​—Mmusome Wisupulula 5:10.

Mwa iyaakha soowiiraka 2.000, Yehova oniira aathanlaka ale anrowa okhala mamwene. (Luka 12:32) Awo ari vakhaani naalikanyiha naale anrowa okhalaka mahiku otheene valaponi.​—Mmusome Wisupulula 7:4, 9, 17.

Wira musuwele soohimmwa sikina, muwehe muru 5 wa eliivuru ela, yoolaleiwa ni Anamoona a Yehova

Enniphwanyaneya-tho va www.jw.org/vmw