“Tthiri ti Siso Sitthunnyanyu”

“Okhala wira muhakhuwa itthu iya atthu òsuwela ni a miruku, khwasuweliha axikhani”.​—LUKA 10:21.

MWAAROWA WAAKHULA SAI?

Matakiheryo xeeni akhumelenle naanano anooniherya wira Yehova onnisiveliwa wiixuttiha mwa enamuna yookhweya wiiwexeexa?

Mwa enamuna xeeni ottokiherya wahu sowiiraneya sa mBiibiliyani olokiheriwe aya?

Moota xeeni wiiwexexa wahu malikanyiho a Yesu olokiheriwe aya?

1. Exeeni yaamwiirinhe Yesu ‘otteliwa murima ni munepa wottela’? (Nwehe elatarato yoopacerya.)

NIIREKE munniwerya omoona moota Yesu saaryaawe okathi ‘atteliwe awe murima ni munepa wottela’? Woonasa wene owo aahitheya ni maitho awe yaaryaka moohalala. Exeeni yaamwiirinhe opaka eyo? Owo iira omanle ene waaruma awiixutti awe 70 orowa olaleerya ihapari sooreera sa Omwene wa Muluku. Nto aaniphavela woona moota awo yaarowa aya ovara muteko ole. Tthiri yaahikhala awanani anceene yaakhoottiha olaleiwa ihapari sooreera, ntoko asuweli, atthu oosomexa, alipa oolepa ni Afarisi. Awo yaahaawoka atthu anceene wira amuramuseke Yesu amwiirelaka kalapintero ni awiixutti awe yaanaahimya okhala “atthu yahasomme ni yahòneliwa vatthu”. (Mit. 4:13; Mar. 6:3) Masi, awiixutti ale yaatthinke omutekoni waya atteeliwe ene murima vanceene. Awo yaahiwerya olaleerya hata yaakhoottiheriwa ni atthu anceene, ohela muhina minepa sootakhala! Exeeni yaakumihenrye ohakalala ni olipa waya murima?​—Mmusome Luka 10:1, 17-21.

2. (a) Moota xeeni awiixutti a Yesu yaryaaya ntoko acikhani? (b) Exeeni yaakhalihenrye atthareli a Yesu wiiwexexa ekeekhai?

² Moone wira omuhimyaka Yehova, Yesu aalavunle so: “Miyo kinnottottopelani, Tithi, mwanene wirimu ni vathí, okhala wira muhakhuwa itthu iya atthu òsuwela ni a miruku, kwasuweliha axikhani. Ayo, Tithi! Tthiri ti siso sitthunnyanyu”. (Math. 11:25, 26) Ekeekhai wira Yesu khaaphavela ohimya wira awiixutti awe ale yaari anamwane acikhaani tthiri. Owo aahimya okhala acikhaani moovirikana ni asuweli ale oosomexa yaakhala elapo ele yaixoona okhala oosuwelexa. Etthu yootepexa otthuneya, Yesu aahiwiixuttiha atthareli awe wira akhaleke oowiiyeviha ni oowaakuva wiixutta ntoko anamwane. (Math. 18:1-4) Mureerelo xeeni yaaphwanye aya mwaha wa okhala oowiiyeviha? Yehova, orumeelaka munepa awe wootteela, ahaakhaliherya wiiwexexa ekeekhai, variki atthu ale yaixoona okhala oosomelexa ni oosuwela, yaahikutteleliwa maitho ni Satana, ahinawerya woona ekeekhai mwaha wa wiixinnuwiha waya.

3. Ninrowa othokorerya exeeni muru ola?

³ Tivonto Yesu aaryaawe ootteeliwa murima vanceene! Etthu yaamwiiriha okhala ohakalala waari woona moota Yehova aawuupululenle awe ekeekhai atthu ale owiiyeviha a makhalelo otheene, moohicikha etthu sa isomelo saya wala osuwela waya itthu. Owo aahitteliwa murima okhala wira eyo ti yaari enamuna Tiithi awe yaathanlale awe wiixuttiha. Niireke Yehova ooturuka enamuna eyo? Onooniherya sai wira eyo ti enamuna ya wiixuttiha ethanlale awe? Okathi onirowa ahu othokorerya waakhuliwa wa nikoho nla; ninrowa okhala ootteeliwa murima ntoko siirale awe Yesu.

OTTHOKIHERYA EKEEKHAI MWA ENAMUNA YOOKHWEYA WIIWEXEXA

4. Mwa inamuna xeeni erevista Owehaweha yookhweya osoma eryaaya yoovaha enooniherya ophenta?

⁴ Atthu a Muluku annitteeliwa murima mwaha wa nikhuuru na Yehova otthokiheryaka sowiixuttiha sinceene sa Muluku mwa enamuna yookhweya wiiwexexa. Nrowe nithokorerye malikanyiho mararu. Nipacerye ni okumiheriwa wa erevista Owehaweha yookhweya osoma.a Erevista eyo ehooniherya okhala nikhaliheryo na niphento wa anna animananiha wiixutta nttaava wala ahiniwerya osoma oratteene. Amahooleli a itthoko sinceene annoona wira anaaya annitepa ottottela mureerela erevista eyo ekhanle enamuna yuulupale enirumeeliwa wira nivahiwe yoolya ya omunepani. Anamunceene aalepa masu oovara murima anooniherya oxukhurela. Murokora mmosa aalempe wira anoovelela ovaha ekomentaario okathi wa Yoosoma ya Owehaweha. Owo aahimmye so: “Miyo kaari oowuuliwa muru”. Vano eyo yookimalela! Nuumala orumeela erevista yookhweya osoma, owo onihimya so: “Vano kinniwerya ovaha ikomentaario sinceene khula muthukumano, nto woova iwe wookimalela! Kinnimuxukhuru Yehova ni nyuwo anna”.

5. Mireerelo xeeni sinikumiherya awe Biibiliya musya a Tradução do Novo Mundo das Escrituras Sagradas?

⁵ Yanenli, ti okumiheriwa wa Biibiliya musya a Tradução do Novo Mundo das Escrituras Sagradas, a ntaava na Enkelexi yoowo aakumiheriwe okathi wa muthukumano wa mwaakha, nihiku na 5 a Outubro 2013.b Soolepa sinceene vano sinirumeela masu vakhaani masi khiyawerya wiiwanyeiha masu aya vootepexa okhweya. Mwa ntakiheryo, Yobi 10:1, aarina masu 27 vano orina masu 19; Miruku 8:6 aarina masu 20, vano orina 13. Nto iversu iyo vano sinnitepa wiiwanyeya Biibiliya ola musya. Munna mmosa oowoottihiwa oororomeleya, yoowo opacenrye khalai omurumeela Yehova onihimya so: “Nuumala osoma yoolepa ya Yobi kimurumeelaka Biibiliya musya, vanikhala ntoko kinoopacerya osoma eliivuru ela”! Anna anceene aalavula masu oolikana ni awo.

6. Munoonela sai otthokiheriwa wa naanano wa omwiiwexexa wahu Matheyo 24:45-47?

⁶ Yaneeraru, ninrowa othokorerya otthokiheriwa wa naanano wa omwiiwexexa wahu Biibiliya. Mwa ntakiheryo, naahitteeliwa murima mwaha wotthokiheriwa wa naanano voohimya sa “murumeyi òroromeleya ni ànkhili”, waakumiheriwe erevista Owehaweha ya 15 a Julyo, 2013. (Math. 24:45-47) Erevista ele yaatthokihenrye wira murumeyi oororomeleya ti Nikhuuru Noolamulela, nto “anamuteko akina”, ti atthu otheene anivahiwa yoolya ya omunepani, akhale oowoottihiwa wala a “ipwittipwitthi sikina”. (Yoh. 10:16) Tthiri ti vootteeliha murima wiixutta ikeekhai iyo ni owiixuttiha ale aniinaano mmulokoni! Moota xeeni Yehova woonihenrye awe wira vannimusivela wiixuttiha orumeelaka inamuna sookhweya ni soowiiwanyeya?

OTTHOKIHERIWA WOOKHWEYA NI WOWIIWANYEYA WA SOWIIRANEYA SA MBIIBILIYANI

7, 8. Matakiheryo xeeni ari mBiibiliyani anooniherya wira iprofesia okathi mukina sinnikhalana nthoonyeryo?

⁷ Akhala wira nyuwo munimurumeela Yehova okhuma khalai, owehasa wene nyuwo moowerya woona moota siturukiwe aya inamuna iliivuru sahu sinitthokiherya aya sowiiraneya silempwale mBiibiliyani. Moota xeeni? Khalai, iliivuru sahu saamakela ohimya wira sowiiraneya silempwale mBiibiliyani saataphulela itthu piili. Sowiiraneya sa mBiibiliyani sooniwa wira saahikhalana wiiraneya woopacerya ni wiiraneya wa nenli okathi yaakhwanela aya eprofesia eyo. Niireke Biibiliya onnooniherya wira wookhala wiiraneya wa eprofesia wa nthoonyeryo ni wa ekeekhai? Aayo. Mwa ntakiheryo, Yesu aahiromola “nthonyeryo na Yona profeta”. (Mmusome Matheyo 12:39, 40.) Yesu aahitthokiherya wira okathi Yona aavirinhe awe oryeene mmirimani mwa ehopa, yeeyo woonasa wene yaarowa okhala mahiye awe ahoopoliwe ni Yehova, yaari eprofesia yaalavula wira Yesu aarowa oviriha mahiku mararu mmahiye.

⁸ Sookhala iprofesia sinceene mBiibiliyani sirina malikanyiho. Murummwa Paulo aahilavula iprofesia sinceene sa enamuna eyo. Mwa ntakiheryo, wataana wa Abrahamu, Agari ni Sara, naari nlikanyiho na eprofesia ya wataana wa Yehova ni nloko na aIsarayeli ni mpanta wa wiirimu wa otthokeya wa Muluku. (aGal. 4:22-26) Vamosaru, etabernaakulu, ni etemplo, Nihiku na Ovekela Oleveleliwa, namukuttho muulupale, ni itthu sikina saaromoliwa ni Nlamulo na Moise sookhalana ‘nlikanyiho na itthu sa ekekhai’ sintthuna okhumelela muhoolo. (aHéb. 9:23-25, 10:1) Ti voohakalaliha ni ti voolipiha nroromelo othokorerya malikanyiho ntoko awo. Nto Niireke eyo enihimya wira khula mutthu, wala yowiiraneya eniromoliwa mBiibiliyani yookhalana nthoonyeryo nnimuhimya mutthu wala etthu?

9. Khalai yaatthokiheriwa sai yowiiraneya eri mBiibiliyani voohimya sa Nabothi?

⁹ Khalai enamuna eyo yaanirumeeliwa ikwaha sinceene. Mwa ntakiheryo muthokorerye yowiiraneya enimuhimya Nabothi, yoowo moohittheka aaphukeliwe khwiiviwa ni Pwiyamwene ootakhala murima Yezabeli, ophavelaka wira iyawe Akhabi akuxe imatta sa evidera sa Nabothi. (1 Mam. 21:1-16) Mwaakha wa 1932, yowiiraneya ele yaahimmwa okhala yowiiraneya ya eprofesia. Akhabi ni Yezabeli yaahimmwa okhala Satana ni atthu awe; Nabothi aataphulela Yesu, nto okhwa wawe yaari eprofesia yaahimya wiiviwa wa Yesu. Nuuvira iyaakha miloko sinceene, eliivuru “Santificado Seja Teu Nome”, yaakumiheriwe mwaakha wa 1961, Nabothi aahimmwa okhala alipa oowoottihiwa, ni Yezabeli aahimmwa okhala maKristau Owootha. Nto, olupatthiwa wawe Nabothi ni Yezabeli waataphulela olupatthiwa wa alipa oowoottihiwa mahiku ala ookiserya. Mwa iyaakha sinceene, yoohimmwa ela ya mBiibiliyani yaanilipiha waamini wa atthu a Muluku. Nto xeeni ohalaka opakiwa murukunuxo?

10. (a) Moota xeeni wuupuwelela saana onirinha aya okhalana ephoole mwa enamuna enimuttokiherya ahu Biibiliya? (b) Vano iliivuru sahu sinittittimiherya exeeni?

¹⁰ Ntoko sinisuwela ahu, mwa iyaakha sinceene Yehova onnimukhaliherya “murumeyi òroromeleya ni ànkhili” wuupuwelela saana. Miruku iyo sihiiriha okhalana ephoole wira khula yoohimmwa mBiibiliyani ehooniweke okhala eprofesia, vahikhanle wira Biibiliya tonooniherya mooluluwanya. Ohiya-vo vahooniwa wira otthokiheriwa iwo wa khalai waari woovila wiiwexexiwa ni atthu anceene. Otthokiheriwa wa ole aahimmwa ni ole aalikanyihiwa awe, khiwiiweya saana, vaanivila wuupuwela ni ovarihela muteko. Etthu ekina yaaxankiha okhala wira mwaha woophavela otthokiheriwa wiiraneya woopaceerya ni wa nenli wa eprofesia, vaanivila wiiwexexa ele yoohimmwa eyo eniixuttiha aya. Tivonto vanoona ahu iliivuru sahu olelo-va sitthokiheryaka myaha iyo mwa enamuna yokhweya ettittimiweryaka ele ennixuttiha aya voohimya sa waamini, ovilela, omoova Muluku ni makhalelo makina anihimmwa mBiibiliyani.c

11. (a) Ninsuwela exeeni voohimya sa yowiiraneya ya Nabothi, ni moota xeeni nikhanle ahu ottharihela ntakiheryo nawe? (b) Xeeni iliivuru sahu mahiku ala sihinihimya aya sowiiraneya sa mBiibiliya wira sirina sootaphulela piili? (Nwehe “Makoho Anikohiwa ni Ale Anisoma Irevista Sahu”, erevista yeela.)

¹¹ Vano enitthokiheriwa sai yowiiraneya ya Nabothi? Mwa enamuna yootepexa okhweya wiiwanyeya. Mulopwana ole a exariya khaiviwe ntoko nlikanyiho na eprofesia ya Yesu wala alip-oowoottihiwa, masi mwaha wa okhala mutthu oororomeleya. Owo aahiiwelela Nlamulo na Yehova okathi ole atthu yaalamulela aya moohixariya. (Moth. 36:7; 1 Mam. 21:3) Tthiri ntakiheryo nawe ninninikhaliherya vanceene okhala wira khula mmosa a hiyo pooti omukhumelela mixankiho moota owo. (Mmusome 2 Timotheyo 3:12.) Atthu a makhalelo otheene pooti wiiwexexa, wuupuwelela ni owerya ovarihela muteko ele enniixuttiha aya ntakiheryo nla noolipiha waamini.

12. (a) Exeeni ehikhanle ahu oowuupuwela voohimya sa sowiiraneya siri mBiibiliyani? (b) Vaniweryaneya sai hiyo otthokiheriwa voowiiweya saana itthu soovila? (Nwehe enoota.)

¹² Niireke hiyo nihaana wuupuwelaka wira sowiiraneya sa mBiibiliyani sirina miruku soovareleya muteko paahi ni khasirina yootaphulela ekina? Nnaari. Olelo-va, iliivuru sahu okathi mukina sinniixuttiha etthu emosa siphavelaka onuupuxerya, murumeyi wala etthu ekina enilikana aya. Ikwaha sinceene iyo khasinihimya wira mwaha mmosa mBiibiliyani wookhalana wiiraneya woopacerya ni wa nenli. Mwa ntakiheryo, hiyo nnoowerya ohimya mookhalela wira ororomeleya wa Nabothi okathi waalupatthiwa awe ni okhwa wawe onninuupuxerya ororomeleya wa Kristu ni alipa oowoottihiwa. Nave enninuupuxerya waamini wa “ipwittipwitthi sikina” sa Apwiya. Enamuna eyo yookhweya ya orumeela nlikanyiho ti enamuna yuulupalexa ya wiixuttiha wa Muluku.d

OTTHOKIHERIWA WOOKHWEYA WA MALIKANYIHO YAAPAKIWE NI YESU

13. Matakiheryo xeeni anooniherya wira ninnitthokiherya mwa enamuna yookhweya malikanyiho a Yesu?

¹³ Yesu Kristu ti Mwiixuttihi muulupale aatonko okhala valaponi. Enamuna yuulupale ya wiixuttiha awe waari orumeela malikanyiho. (Math. 13:34) Malikanyiho annooniherya oratteene ele enihimmwa ni masu ni anniwerya ovara murima ni muupuwelelo wa mutthu. Niireke iliivuru sahu sinniwerya otthokiherya mwa enamuna yookhweya malikanyiho yaalavuliwe ni Yesu? Waakhuliwa wa nikoho nla ti aayo! Tthiri naahitteeliwa murima okathi yaatthokiheriwe aya oratteene malikanyiho a Yesu voohimya sa miropo, enuku ya mostarda ni ntthavi ninriheliwa mphareya, yaakumiheriwe erevista Owehaweha ya 15 a Julyo 2008. Vano hiyo ninniwerya woona wira malikanyiho ala anihimya Omwene wa Muluku ni owerya wawe waathukumanya atthareli a Kristu yaakumihaka elapo ela yootakhala.

14. (a) Khalai naatthokiherya sai nlikanyiho na muSamariya ooreera murima? (b) Mahiku ala nintthokiherya sai?

¹⁴ Ankhi malikanyiho wala matakiheryo makina yaalavuliwe ni Yesu? Makina anihimya iprofesia; makina aniixuttiha itthu soovareleya muteko. Masi ninrowa osuwela sai ovirikana waya? Waakhuliwa wa nikoho nla onniiwanyeya ni ovira wa iyaakha. Mwa ntakiheryo, muthokorerye moota Yesu aatthokihenrye awe nlikanyiho na muSamaria oreera murima. (Luka 10:30-37) Mwaakha wa 1924, erevista The Watch Tower yaahimya wira muSamariya aataphulela Yesu Kristu; ephiro yaakhuma oYerusalemu erowaka oYerikho yeeyo yaakhuruwela oneri, yaataphulela omwareeliwa Muluku waakhumelenle wEdeni; alipa-oowiiya yaari mphironi, yaahimmwa wira yaataphulela alipa a nakoso; nto muLevi ni namukuttho yaataphulela ahooleli a etiini. Olelo-va, iliivuru sahu sinnirumeela nlikanyiho nlo wira niwuupuxerye maKristau otheene wira ahaathanyeke atthu anitthuneya okhaliheriwa, vanceenexa ale anireerela nikhaliheryo na omunepani. Tthiri ninnitteeliwa murima woona wira Yehova onniniixuttiha mwa enamuna yookhweya!

15. Ninrowa othokorerya exeeni muru onittharelana?

¹⁵ Muru onittharelana, ninrowa othokorerya nlikanyiho nikina na Yesu, nle na imwali 10. (Math. 25:1-13) Moota xeeni Yesu olakenle awe wira atthareli awe yiiwexexeke oratteene malikanyiho awe mahiku ala ookiserya? Niireke malikanyiho a Yesu anihimya iprofesia wala ithoonyeryo sikhanle oolikanyihiwaka ni mutthu, etthu ni yowiiraneya? Wala owo aaphavela wira atthareli awe arumeeleke itthu siniixuttiha awe ni malikanyiho awo wira saakhaliheryeke mahiku ala ookiserya? Nrowe noone.

[Inoota]