Munoowerya ‘Ovikaniha Owehaweha?’
“Nwehereryeke, okhala wira khamusuwenle nihiku, nnákhala okathi ene”.—MATH. 25:13.
MWAAROWA WAAKHULA SAI?
Nintaphulela exeeni nlikanyiho na imwali 10?
Alipa-oowoottihiwa yaatthokiherya sai nlikanyiho na Yesu voohimya sa imwali 10?
Mwa inamuna xeeni “ipwittipwitthi sikina” sikhanle aya oottottela mureerelo nlikanyiho na imwali 10?
1, 2. (a) Exeeni Yesu yaalavunle awe voohimya sa mahiku ookiserya? (b) Makoho xeeni anrowa ahu othokorerya?
TTHIRI vaari voohakalaliha okilaathi oMwaako wa Olivera, nipuro mutthu aawerya awe woona etemplo oYerusalemu, nto khiyanwiriyana Yesu olavulaka iprofesia sawe soovara murima. Pedru, Andreya, Yakobo ni Yohani, yaaniwiriyana ni ephoole okathi Yesu aalavula awe iprofesia iye sooniherya itthu saarowa wiiraneya ohoolo ottaiwene. Owo ahaahimeerya itthu sinceene saarowa okhumelela mahiku ookiserya a makhalelo ala ootakhala, eyo piiyo, okathi yena aarowa awe olamulelaka Moomweneni wa Muluku. Owo aahihimya wira okathi owo, “Murumeyi òroromeleya ni ànkhili”, taarowa omukhaliheryaka yena valaponi, aavahaka arumeyi awe yoolya ya omunepani okathi wooreerela.—Math. 24:45-47.
2 Nlelo olavulaka sa eprofesia yeele, Yesu aahipaka nlikanyiho na imwali 10. (Mmusome Matheyo 25:1-13.) Vano nrowe nithokorerye makoho ala: (1) Nintaphulela exeeni nlikanyiho nla? (2) Moota xeeni alipa-oowoottihiwa oororomeleya yaavarihenle aya muteko miruku sa nlikanyiho nle, ni exeeni yaakhumelenle? (3) Moota xeeni khula mmosa a hiyo onrowa awe ottottela mureerelo nlikanyiho nla olelo-va?
NINTAPHULELA EXEENI NLIKANYIHO NLA?
3. Khalai, iliivuru sahu saatthokiherya sai nlikanyiho na Yesu voohimya sa imwali 10, nto exeeni yaakhumelenle?
3 Hiyo nihoona muru ovinre wira mahiku ala, murumeyi oororomeleya ni a ankhili, vakhaani-vakhaani onnirukunuxa enamuna ya otthokiherya Soolepa saattittimiherya malikanyiho a iprofesia, vano onikhalela nthiti wooniherya moota sinivareleya aya muteko. Khalai, iliivuru sahu saahihimya wira khula mpantta wa nlikanyiho na Yesu voohimya sa imwali 10, waahikhalana yootaphulela, hata itthu saamukhaani ntoko ixamaniya, makhura, mirinki ni itthu sikina. Niireke anna ale yaaheemya ohiya ottittimiherya masu ookhweya a nlikanyiho nla? Ntoko sinirowa ahu woona, waakhuliwa wa nikoho nla ti wootthuneya vanceene.
4. Mwa nlikanyiho nla, ninrowa omusuwela sai (a) mutheli? (b) imwali?
4 Nrowe nthokorerye yootaphulela ya nlikanyiho na Yesu. Wanipacerya mwaasuwele atthu aniromoliwa. Ti pani onihimmwa okhala mutheli nlikanyiho nla? Moowiiwaneya saana, Yesu aihimya mmansawe. Tthiri okathi mukina aahihimya wira owo mwaneene aari mutheli! (Luka 5:34, 35) Ankhi imwali? Nlikanyiho nla, Yesu onihimya wira imwali iye saahaana okhalana ixamaniya saya sipattaka okathi mutheli waarowa awe ophiya. Nwehe malaliheryo mamosaru yaawo Yesu aavanhe awe “nikoto namukhani” na atthareli awe oowoottihiwa wira: “Mukhaleke òlikanene ovara muteko, mpattinhene muthuko. Mulikaneke n’arumeyi aninwehererya pwiy’aya, ahokolowaka onìrani w’othela”. (Luka 12:32, 35, 36) Ohiya-vo, murummwa Paulo ni Yohani yahuupuxeriwa ni Muluku khulepa wira awiixutti oowoottihiwa a Kristu yaalikana ni imwali soohipaceriwa. (2 aKor. 11:2; Wis. 14:4) Nto vannooneya wira Yesu aaphavela wira nlikanyiho nilempwale va Matheyo 25:1-13, nirumeeliwe ntoko miruku ni yoolopola wa atthareli awe oowoottihiwa.
5. Moota xeeni Yesu oonihenrye awe okathi waarowa aya ovareleya muteko nlikanyiho nawe?
5 Moottharelana, nithokorerye okathi ene. Miruku sa Yesu saarowa ovareleya muteko okathi xeeni? Wuukiseryani wa nlikanyiho nla, Yesu onnooniherya oratteene okathi ene oriki: “Mutheli ahiphiya”. (Math. 25:10) Ntoko saatthokiheriwe aya ni erevista Owehaweha ya 15 a Julyo 2013, eprofesia ya Yesu elempwale va Matheyo ikapitulu 24 ni 25, enniromola masu oowi “orwa” ikwaha 8, ni wa khula nipuro ninrumeeliwa nuulumo nimosa na eGriki. Mapuro awo otheene, Yesu aahimya okathi wa maxakha maalupale vaavo aarowa awe ovara muteko woophukela ni opwetexa makhalelo ala ootakhala. Nto vannooneya wira nlikanyiho nla nnihimya mahiku ookiserya, masi wanikisa waya onrowa okhala okathi wa maxakha maalupale.
6. Moovarihana ni makhalelo a okathi naalavuliwe aya nlikanyiho nla, nintaphulela exeeni?
6 Nintaphulela exeeni nlikanyiho nla? Muupuwele makhalelo a okathi yaalavuliwe aya masu ala. Yesu iira omalinhe ene olavula voohimya sa “murumeyi òroromeleya ni ànkhili”. Murumeyi owo aarowa okhala nikhuuru naamukhaani na alipa-oowoottihiwa, yaarowa waahoolelaka atthareli a Kristu mahiku ala ookiserya. Yesu aahaalopola wira yaahaana ovikaniha okhala oororomeleya. Moottharela, owo ahiiwanyeiha masu ale ohimyaka nlikanyiho nla wira aalopole atthareli awe otheene oowoottihiwa, wira mahiku ala ookiserya ahaana okhala ‘owehaweha’, wira ahiyeleele etthuvo aya yuulupale. (Math. 25:13) Vano nrowe nithokorerye oratteene nlikanyiho nla wira noone moota alipa-oowoottihiwa anivarihela aya muteko miruku iya.
MOOTA ALIPA-OOWOOTTIHIWA ANIVARIHELA AYA MUTEKO MIRUKU SA NLIKANYIHU NLA
7, 8. (a) Mikhalelo xeeni miili saakhalihenrye imwali iye sa ankhili okhala soolikanela? (b) Moota xeeni alipa-oowoottihiwa anooniherya aya okhala oolikanela wira avare muteko aya?
7 Nlikanyiho na Yesu ninnittittimiherya wira moovirikana ni aximwali alolo, imwali sa ankhili saari soolikanela okathi mutheli aaphiyale awe. Moota xeeni? Mwaha wa mikhalelo miili: okhala oolikanela ni oowehaweha. Imwali iye saarummwale onweheryerya mutheli ohiyu, saahaana okhalana ixamaniya saavarela okathi wotheene ni saahaana owehererya okathi wotheene mpakha mutheli orwa. Moovirikana ni alolo ale, imwali thanu saahiilokiherya oratteene, khuruha makhura makina mmirinkini mwaya ni ixamaniya saya. Niireke alipa-oowoottihiwa oororomeleya annooniherya okhala oowiilokiherya oratteene?
8 Tthiri awo ahiilokiherya! Mahiku ala ookiserya, maKristau oowoottihiwa annipaka itthu moolikana ni imwali iye sa ankhili, yaahiilokiherya wira yaakhwaniherye muteko yaavahiwe aya moororomeleya mpakha wanikisa. Anniitthokiha wira avare muteko moororomeleya, asuwelaka wira muteko owo onivekela oleva itthu sinceene sa werutthuni ni mireerelo sikhanle olumwenku ola wa Satana. Awo ahiivahererya wa Yehova paahi ni annimurumeela yoowo, ahittharihelaka nihiku wala okathi, masi anivara mwaha womphenta Muluku ni Mwanawe. Annivikaniha omurumeela, asyakaka otthara munepa wootakhala wa olumwenku ola ni mihakhu saya, ohiisuumaaliha ni wiitthuna. Awo ari oolikanela ene, annaarya ntoko muthuko moohittikinyeya, khanixankiheya mwaha wa opisa wa Mutheli.—aFil. 2:15.
9. (a) Moota xeeni Yesu onloponle awe voohimya sa mukhalelo ahu wa ephattu wa ophavela orupa? (b) Moota xeeni alipa-oowoottihiwa yiiwelenle aya masu oowi: ‘Mutheli òphiya’? (Nwehe enoota.)
9 Mukhalelo mukina waakhalihenrye aximwali ale okhala oolikanela waari oowehaweha. Niireke vanniweryaneya mutthu mmosa a ale oowoottihiwa ophwanya ikhove ohiyu ola woorakama orummwale aya owehererya? Aayo. Moone wira Yesu onihimya wira imwali sotheene iye 10 ‘sahipajerya wosèla, khurupasa’ okhala wira mutheli aanipisa orwa. Yesu aanisuwela wira hata mutthu yoole oniphavela orumeela, pooti oxinttiwaka ni sootteettheya sa erutthu. Alipa-oowoottihiwa oororomeleya anniiwelela ni ottharihela yoolopola ele ni anniilipiherya okhala oowehaweha. Nlikanyiho nlo nnihimya wira imwali sotheene saahiiwa okathi waalavuliwe aya masu oowi: “Mutheli òphiya!” Masi ale a ankhili tiyaawenrye oweherya mpakha wanikisa. (Math. 25:5, 6; 26:41) Ankhi alipa-oowoottihiwa mahiku ala? Mahiku ala ookiserya, awo annoona ithoonyeryo sinooniherya wira vahaanle vakhaani wiiwanyeya masu ani: “Mutheli òphiya!” Awo aavilela mpakha olelo-va, nlelo ari oolikanela mpakha ophiya Mutheli.a Masi, onoophiya okathi ninrowa aya wiiraneya nlikanyiho nla. Moota xeeni?
OTTHUVELIWA WA ALE ARINA ANKHILI NI OHUKHUMMWA WA ALOLO
10. Ovaanela wa imwali sa ankhili ni aximwali alolo, onikumiherya nikoho xeeni noovila waakhula?
10 Woonasa wene mpantta wootepa oxankiha ori wanikisa wa nlikanyiho nla, vaavo vanilavulihana aya aximwali a ankhili ni alolo. (Mmusome Matheyo 25:8, 9.) Mwaha owo onnikumiherya nikoho nla: “Okathi xeeni atthu a Muluku oororomeleya yaarowa aya okhootta waakhaliherya atthu yaavekela nikhaliheryo”? Vanooweryaneya waakhula nikoho nla vaavo vanitthikela ahu othokorerya okathi onikhumelela aya itthu iya. Muupuwele otthokiheriwa iwe wa naanano vaavo vanihimmwa aya wira Mutheli Yesu, onirwa wanikisa wa maxakha maalupale. Niireke eyo enihimya itthu sinrowa okhumelela vahalaka vakhaani ophiya okathi woophukela? Vanikhala wira ti siiso, maana okathi owo alipa-oowoottihiwa anrowa wiraka yaakhenle ene ekanyeryo ya othanliwa waya wookiserya.
11. (a) Exeeni enrowa okhumelela vahalaka vakhaani opacerya maxakha maalupale? (b) Yaataphulela exeeni masu a aximwali a ankhili vaavo vaawiirela aya alolo wira aroweke yathumeke makhura aya?
11 Nto, ahinatthi opacerya maxakha maalupale, alipa-oowoottihiwa otheene ari valaponi anrowa wiiraka yaakhenle ene othanliwa waya wookiserya. (Wis. 7:1-4) Okhuma vaavo, anrowa owehereryaka wiitthaniwa paahi. Masi muupuwele okathi ahinatthi opacerya maxakha maalupale. Yaarowa waakhumelela exeeni ale oowoottihiwa yaarowa wooceela ovikaniha okhala oowehaweha wala oyeleela waamini waya? Awo yaanpweteiwa eparakha aya ya orowa wiirimu. Eyo enooniherya wira awo anooyeleela eparakha aya maxakha maalupale ahipacenrye. Okathi owo anrowa wiiraka arantteliwe ni akina oororomeleya. Okathi onirowa aya opacerya maxakha, alolo awo anrowa oriipiwa murima mwaha wa opwetexiwa wa Babilonia Muulupale. Vano tanrowa aya osuwela wira khalikanenle omwaakhelela Mutheli. Nto okathi owo wooxanka, enrowa okhumelela exeeni vakhala wira anoovekela nikhaliheryo? Nlikanyiho na Yesu ninnaakhula mwa enamuna ehinaasivela. Imwali sa ankhili sahikhootta waavaha makhura aya aximwali ale alolo, nto khwaahimeerya wira aroweke yathumeke awaya. Muupuwele wira eyo yaarowa wiiraneya “ohiyu eriyari”. Niireke awo yanwerya waaphwanya atthu yaatumiha makhura okathi ole? Nnaari. Tthiri khivaaweryaneya omphwanya mutthu.
12. (a) Okathi wa maxakha maalupale, waakhula xeeni wooriipiha murima anrowa aya wiiwa atthu ale yaari oowoottihiwa khalai, masi ahinye waamini waya ohinatthi ophiya okathi wa othanliwa wookiserya? (b) Anrowa omalela vai ale ari ntoko aximwali alolo?
12 Vamosaru, okathi wa maxakha maalupale, alipa-oowoottihiwa oororomeleya khanirowa omukhaliherya mutthu ohinye waamini wawe. Nto khuuvo onrowa waakhaliherya tthiri. Onrowa wiiraka okathi omanle ene. Nto anrowa omalela vai? Yesu onnitthokiherya ele yaakhumelenle okathi aximwali alolo yaaronwe aya ophavelasa makhura, oriki: “Mutheli ahiphiya. Aximwali yari òlikanene yahikela ni yowo mpani mwa nìra n’othela. Mukhora khuwaliwa”. Okathi Kristu onirwa awe ni waarya wawe waattamela wanikisa wa maxakha maalupale, onrowa waakuxa alipa-oowoottihiwa oowaamini aarowanaka wiirimu. (Math. 24:31; 25:10; Yoh. 14:1-3; 1 aTes. 4:17) Ale anilikana ni aximwali alolo anirowa owaleliwa mukhora aryeene ota. Tthiri awo anrowa wunla ariki: “Pwiya! Pwiya! Munihúlele!” Masi awo anrowa waakhuliwa mwa enamuna yaakhuliwe aya ale anilikana ni ipuri okathi wa ophukeliwa: “Kinohimeryani ekhweli wira: nkinosuwelani!” Tthiri ti vooriipiha murima!—Math. 7:21-23; 25:11, 12.
13. (a) Xeeni vahinreerela aya ohimya wira alipa-oowoottihiwa anceene a Kristu anrowa oyeleela waamini waya? (b) Moota xeeni masu oolopola a Yesu anooniherya aya waaroromela wawe arumeyi awe? (Nwehe elatarato yoopacerya.)
13 Ntoko sitthokiheriwe ahu, nto nikupaliki exeeni? Niireke eyo enihimya wira arumeyi oowoottihiwa a Yesu anceene yaarowa ohiya waamini waya, nto atthuneyeke orantteliwa? Nnaari. Muupuweleke wira Yesu ahimulopola “murumeyi òroromeleya ni ànkhili” wira ohikhale murumeyi ootakhala. Eyo khentaphulela wira aakupali wira eyo yaarowa okhumelela. Olelo-va nlikanyiho nla nookhalana yoolopola yuulupale. Ntoko siisale imwali iye thanu saryaaya sa ankhili ikina thanu sikhala alolo, khula mutthu oowoottihiwa ookhalana owerya wa othanla okhala oolikanela ni oowehaweha wala oohiroromeleya. Murummwa Paulo aahuupuxeriwa olavula masu oolikana ni awo okathi waalavulana awe maKristau oowoottihiwa akhwaawe. (Mmusome aHéberi 6:4-9; mulikanihe ni Otumererya 30:19.) Moone wira olopola wa Paulo waari wooluluwanya, masi owo muhoolo mwaya aahilavula masu yooniherya niphento ni waaroromela wawe oriki: ‘itthu sooloka’ samwaakhumelela anna ni arokora maKristau. Vamosaru, yoolopola ya nlikanyiho na Yesu yaapakiwe yooniheryaka ophenta ni ororomela. Kristu onnisuwela wira khula mutthu oowoottihiwa onoowerya okhala oowaamini mpakha waakhela etthuvo!
MOOTA XEENI “IPWITTIPWITTHI SIKINA” SINITTOTTELA AYA MUREERELO NLIKANYIHO NLA?
14. Moota xeeni atthu otheene a “ipwittipwitthi sikina” anittottela aya mureerelo nlikanyiho na Yesu na imwali 10?
14 Mwaha wa Yesu olavula nlikanyiho na aximwali 10 aahimyaka alipa-oowoottihiwa, enitaphulela wira nlo khanirina mureerelo wa “ipwittipwitthi sikina” sa Kristu? (Yoh. 10:16) Nnaari eyo khahiyo ekeekhai! Muupuwele wira masu ale alavuliwe mwa enamuna yookhweya wira: ‘Nvikanihe owehaweha’. Niireke masu awo annivareleya muteko wa alipa-oowoottihiwa paahi? Mukwaha mmosa Yesu aahimmye so: “Itthu iya kinohimeryakani nyuwo, kinahimerya atthu othene, mulipeleleke, muhirupé”. (Mar. 13:37) Yesu oniphavela wira awiixutti awe otheene alokiherye mirima saya wira akhale oororomeleya mmuteko mwawe ni wira otheene aya alikaneke okhala oowehaweha. Nto maKristau otheene annitthara ntakiheryo na alipa-oowoottihiwa, atakihaka waamini waya ni mweettelo aya wa ohela muteko woolaleerya nipuro noopacerya mweekumini mwaya. Nihaana wuupuwelaka wira aximwali alolo yaahaavekela makhura aximwali a ankhili. Nto yoovekela aya eyo enooniherya wira khula mutthu ohaana okhala oowaamini, otthara ekeekhai ni okhala ooweha-weha mmansawe. Khula mmosa a hiyo onrowa waakhulaka mekhawe ohoolo wa Namaphuka a xariya othanliwe ni Yehova. Hiyo nihaana okhala oolikana ene. Nto owo ohanle orwa!
15. Nlipelelo xeeni ekasamento ya Kristu nnaaphwanyiha aya maKristau otheene a ekeekhai?
15 MaKristau otheene anoowerya ottottela mureerelo nlikanyiho nlo na Yesu. Tthiri khuuvo mutthu ohinitteeliwa murima ni ekasamento eyo enrowa wiiraneya. Alipa-oowoottihiwa anrowa okhala wiirimu; nuumala ekhotto ya Harmagedoni awo anrowa okhala muthiyana oowaakameliwa a Kristu. (Wis. 19:7-9) Ekasamento eyo enrowa wiiraneya wiirimu enookumiherya mireerelo wa atthu otheene ari valaponi, okhala wira enookumiherya eguvernu yoolokexa ovikana sotheene sikhanle. Hata nirineene nlipelelo na okhala wiirimu wala valaponi, nihaana omananiha wiixutta etthu ni nlikanyiho na imwali 10. Nrowe nikhale oolikanela ene, nilokiheryaka mirima sahu wira sihittikinyeye, nikhale oowehaweha, wira niwerye waakhela mareeliho otheene anisukenrye awe Yehova muhoolo!
[Enoota]
a Nlikanyiho nla, ninnihimya wira onnivira okathi nuumala ohiimwa wira “Mutheli òphiya!” (eversu 6) ni okathi oniphiya awe tthiri (eversu 10). Mahiku ala ookiserya, alipa-oowoottihiwa anniwerya woona ekanyeryo ya orwa wa Kristu. Awo yaahisuwela wira owo “aahirwa”, niire so aahipacerya olamulela. Nto yaahaana ovilela mpakha orwa wawe.
[Eponto yuulupale epaaxina 16]
Oveka makhura wa aximwali ale alolo onnooniherya wira khula mutthu ohaana okhala oowaamini, otthara ekeekhai ni okhala ooweha-weha mmansawe