Moota Axitokweene Aniwiiniha Aya Nikuruta Akina Mmulokoni

“Ikekhai sikìwalyanyu kihimyaka . . . , mwalèle atthu òroromeleya”.​—2 TIM. 2:2.

MWAAROWA WAAKHULA SAI?

Inamuna xeeeni mutokweene okhanle awe oomulipiha munna omunepani?

Soolepa xeeni sikhanle oomukhaliherya munna onooneya ntoko mutthu ohineemererya miritti mmulokoni?

Moota xeeni ale aniixuttihiwa akhanle aya oomutakiha Eliya?

1. (a) Exeeni anisuwela aya atthu a Muluku okhuma khalai voohimya sa owiixuttiha akina, nto xeeni eyo enivareleya aya muteko olelo-va? (b) Exeeni enrowa ahu othokorerya muru ola?

ATTHU a Muluku okhuma khalai annisuwela wira owiiniha nikuruta akina onnikumiherya mireerelo sinceene. Muhavinre Abrahamu “ahathukumanya arumeyi awe. . .  òtupexa”, wala oowiinihiwa nikuruta, wira amoopole Lothi, nto aahikhumela saana. (Maph. 14:14-16) Okathi wa Mwene Davidi, alipa-oowiipa mpaani mwa Muluku yahixuttihiwa wiipa nto “yanirattela owipela Apwiya”, ni yaaninvuwiha Yehova. (1 Wah. 25:7) Olelo-va hiyo ninniwana ekhotto ya omunepani ni Satana waahela muhina atthu awe. (aÉf. 6:11-13) Ohiya-vo, ninnipaka sotheene siniwerya ahu wira ninvuwihe Yehova. (aHéb. 13:15, 16) Tivonto, wira nilikaneke ni arumeyi a Muluku a khalai, nihaana wiixuttihiwa wira nikhumele saana. Mmulokoni wa eKristau, Yehova ohaavaha axitokweene muritti wa owiixuttiha akina. (2 Tim. 2:2) Nto inamuna xeeni sinirumeela aya axitokweene a miruku wira awiixuttihe anna osuwela ovara miteko sa okhapelela nikoto?

MMULIPIHE OMUNEPANI OLE ONIMWIIXUTTIHA ANYU

2. Ohinatthi omwiixuttiha mutthu itthu isya, exeeni mutokweene enitthuneya awe opaka, ni nthowa xeeni?

² Nyuwo mukhanle axitokweene, munnilikanyihiwa ni mulimi. Ohinatthi waala mmiso, mulimi pooti woonaka wira etthaya ele enitthuneya wunttelaniha wira oruwerye saana. Vamosa-ru, muhinatthi opacerya omwiixuttiha munna itthu sihinisuwela awe, nyuwo munitthuneya osuwela Soolepa sinrowa olokiherya murima awe wira owerye waakhelela oratteene itthu sinirowa awe wiixuttihiwa.​—1 Tim. 4:6.

3. (a) Moota xeeni masu a Yesu ari va Marko 12:29,30 akhanle aya oorumeeliwa okathi onivaanela anyu ni ole onimwiixuttiha anyu? (b) Ikuru xeeni sirinaaya nivekelo nnipakiwa ni mutokweene ohoolo wa ole onimwiixuttiha awe?

³ Wira musuwele moota ekeekhai enivara aya muupuwelelo ni itthu sinipaka awe ole oniixuttihiwa, nyuwo muhaana omukoha so, ‘Moota xeeni wiivahererya wanyu wa Yehova oturunke aya makhalelo anyu’? Nikoho nla nnoowerya okumiherya ovaanela wooloka voohimya sa ele enniiriha omurumeela Yehova ni murima ahu wotheene. (Mmusome Marko 12:29, 30.) Woonasa wene wanikisa wa ovaanela iwo vaamureerela opaka nivekelo, munvekelaka Yehova wira onvahe munepa awe wootteela ole onimwiixuttiha anyu wira owerye wiiwexexa ele enrowa awe wiixuttihiwa. Tthiri wira siiso onoomulipiha murima munna owo, vaavo vanrowa awe owiiwakani munvekelelaka!

4. (a) Nvahe matakiheryo a soolepa sa mBiibiliyani sikhanle oomukhaliherya ole oniixuttihiwa wunnuwa omunepani. (b) Yoolakela xeeni onikhalana awe mutokweene okathi oniwiixuttiha awe akina?

⁴ Okathi onipacerya anyu omwiixuttiha, muthokoreryeke sowiiraneya sa mBiibiliyani seiyo sinoona anyu wira sinoomukhaliherya ole onimwiixuttiha anyu wira iixutte wiivahererya, ororomeleya ni wiiyeviha. (1 Mam. 19:19-21; Neh. 7:2; 13:13; Mit. 18:24-26) Makhalelo awo tootthuneya wa ole oniixuttihiwa ntoko etthaya enitthuneya aya wunttelanihiwa. Awo annimwiiriha waakuva wunnuwa omunepani. Mutokweene mmosa a oFrança, oniireliwa Jean-Claude onihimya so: “Yoolakela aka kaamwiixuttihaka mutthu kiniphavela wira osiveliweke itthu sa Muluku. Kinniphavelasa okathi wooreerela wira nisome yoolepa emosa hoothe enrowa ‘omutthukula maitho’ ole onimwiixuttiha aka wira ‘oneke orattene ikano sothamaleya’ siri mBiibiliyani”. (Esal. 119:18) Nto inamuna xeeni sikina sinimukhaliherya ole oniixuttihiwa?

MMUKHALIHERYE OTHANLA YOOLUKAMA NI MMULAKIHERYE

5. (a) Xeeni varyaaya vootthuneya olavula ni ole onimwiixuttiha anyu voohimya sa soolukama sawe? (b) Xeeni axitokweene vanitthuneya aya opacerya owiixuttiha anna nlelo aryeene acikhaani? (Nwehe enoota.)

⁵ Mmukoheke so ole onimwiixuttiha anyu: ‘Tiivi sikhanle soolukama sanyu’? Vakhala wira owo nlelo khorina yoolakela yooreerela, mmukhaliherye othanla emosa enoona anyu wira enoomukhweyerya waakhwaniherya. Mmuhimeerye yoolukama yaatonko anyu othanla khalai, nto okathi onilavula anyu mooniheryeke otteeliwa murima waaphwannye anyu nuumala nyuwo waakhwaniherya eyo. Nnaamwi ekhalaka ntoko enamuna yoohisuwanyeya, masi ennivara muteko. Victor, yoowo ori mutokweene ni pioneero wAfrika onihimya so: “Okathi kaaryaaka mmiravo, mutokweene mmosa aahikikoha makoho vakhaani oothanliwa saana voohimya sa soolukama saka. Makoho ale yaahikikhaliherya opacerya wuupuwelela oratteene inamuna saka sa omurumeela Yehova”. Axitokweene apacenrye khalai ovara muteko owo annittittimiherya nave wira ti vootthuneya opacerya owiixuttiha anna aryeene nlelo acikhaani, naavahaka miteko mmulokoni sinivarihana ni munnuwelo ni owerya waya. Opacerya owiixuttiha anna aryeene acikhaani, onnaakhaliherya okhalana soolukama soomunepani sooloka ahinatthi wunnuwa vaavo vanrowa aya opaceryaka okhanyereriwa otthara itthu sa mulaponi.​—Musome Esalimo 71:5, 17.a

6. Etthu xeeni yooloka Yesu aapanke awe okathi wawiixuttiha awe atthu akina?

⁶ Nyuwo munoowerya omukhaliherya ole onimwiixuttiha anyu ophavela orumeela vakhala wira khamunimutthokiherya etthu yoopaka paahi, masi munnimuleela etthu enimwiiriha opaka eyo. Okathi onimooniherya anyu mathowa aya, nyuwo munnimutakiha Mwiixuttihi Muulupale, Yesu. Mwa ntakiheryo, ohinatthi waaruma atthareli awe orowa waapaka awiixutti, Yesu aahaahimeerya nthowa naya yaatthuneya aya wiiwelela yooruma eyo. Owo aahimmye so: “Kovahiwa owerya wothene wirimu ni vathí”. Nuumala-vo khwiira: “Vano, murowé, mwawixuttiheke atthu a maloko othene”. (Math. 28:18, 19) Nto nyuwo munrowa otakiherya sai enamuna ya Yesu ya owiixuttiha akina?

7, 8. (a) Moota xeeni axitokweene mahiku ala akhanle aya ootakiha enamuna ya wiixuttiha ya Yesu? (b) Xeeni varyaaya vootthuneya omuttottopela ole oniixuttihiwa? (c) Malakiheryo xeeni akhanle oowaakhaliherya axitokweene okathi oniwiixuttiha aya akina? (Nwehe ekaaxa eni “Moota Woowiiniha Nikuruta Akina.”)

⁷ Mmutthokiheryeke ole onimwiixuttiha anyu mathowa ari mBiibiliyani aniiriha ovekeliwaka opaka etthu emosa. Mwa enamuna eyo, nyuwo munimwiixuttiha wuupuwelela miruku sa mBiibiliyani. Mwa ntakiheryo, vakhala wira muninvekela munna wira orattele nivate na Empa ya Omwene wira nikhaleke nookhweya weetta. Nyuwo pooti othokorerya yoolepa ya Tito 2:10 nto khiyamutthokiherya wira muteko owo woorattela nivate na Empa ya Omwene onrowa ‘ottittimiha ehapari yorera ya Muluku Mòpoli ahu’. Nyuwo pooti omukhaliherya wira owuupuweleke ale oowunnuwela a mmulokoni mmo ni wira muteko onivara awe onaakhaliherya yaawo. Omulakiherya mwa enamuna eyo ole onimwiixuttiha anyu, onoomukhaliherya osiveliwa waakhapelela atthu ohiya woonaka onyoonya otthara sooruma paahi. Owo onrowa okhala ootteeliwa murima vaavo vaniwoona awe anna ni arokora attottelaka mureerelo muteko ovanre awe.

⁸ Ohiya-vo muhaana omuttottopela ole onimwiixuttiha anyu mwaha wa wiimananiha wawe ottharihela malakiheryo aninvaha anyu. Xeeni vanitthuneya aya wira siiso? Omuttottopela mutthu onoolikana ni okhuwari mwiri, nto eyo enoomukhaliherya wunnuwa.​—Mulikanyihe ni Matheyo 3:17.

MUXANKIHO MUULUPALE

9. (a) Voohimya sa owiixuttiha akina, muxankiho xeeni arina aya axitokweene anikhala ilapo soothaaciri? (b) Exeeni eniiriha ekeekhai ohikhala nipuro noopacerya mweekumini mwa amiravo akina?

⁹ Axitokweene anikhala ilapo soothaaciri aakhalana muxankiho muulupale wa waakhaliherya anna oobatiziwa arina iyaakha okhuma 20 mpakha 30 wira akhaleleke nthiti miteko sa mmulokoni. Hiyo nihaakoha axitokweene apacenrye khalai orumeela, anikhala ilapo soothaaciri soowiiraka 20, wira anihimeerye etthu anoona aya wira enniwooceeliha anna weemererya miritti mmulokoni. Anna akina yaakhunle so: Okathi anna awo yaannuwaya, khiyaakhaliheriwe okhalana soolukama sa omunepani. Okathi mukina, hata amiravo yaale yaarina soolukama somunepani, annikhanyereriwa ni anamuyari aya wira aphaveleke toko itthu sa mulaponi! Nto ekeekhai khenikhala nipuro noopacerya mweekumini mwa amiravo siisa.​—Math. 10:24.

10, 11. (a) Moota xeeni mutokweene onrowa awe owerya olokiherya muupuwelelo wa munna ohineemererya miritti mmulokoni? (b) Muupuwelo xeeni wa mBiibiliyani okhanle oorumeeliwa ni mutokweene wira ovaanele ni munna owo, nthowa xeeni? (Nwehe enoota.)

¹⁰ Vakhala wira ookhala munna ohineemya miritti mmulokoni, vanitthuneya okathi, wiimananiha ni opixa murima wira nimukhaliherye. Ntoko siisaale mulimi okathi mukina onikhaliherya awe wookolola miri sawe ohelelaka mavatta, nyuwo munoowerya omukhaliherya munna moota owo oturuka muupuwelelo awe wira opacerye waakhelela miritti mmulokoni. Masi moota xeeni?

¹¹ Musuke okathi wira mmusuwele oratteene munna owo. Mmuhimeerye wira owo onnitthuneya okhaliherya muloko. Nuuvira okathi, mmwiitthane wira nvaanelane mmukhaliheryaka wuupuwelela soolepa vakhaani ni mmuupuxerye voohimya sa wiivahererya wawe wa Yehova. (Mus. 5:4; Yes. 6:8; Math. 6:24, 33; Luka 9:57-62; 1 aKor. 15:58; 2 aKor. 5:15; 13:5) Nyuwo pooti omukoha so: ‘Exeeni yaamuleihenrya anyu Yehova okathi mwiivaherenrye anyu’? Mmananihe onvara murima mmukohaka so: ‘Yehova oonenle sai nihiku mbatiziwe anyu’? (Mir. 27:11) ‘Ankhi Satana oonenle sai nihiku nle?’ (1 Ped. 5:8) Muhipeepheihe moota yoolepa yoothanliwa saana eniwerya aya onvara murima munna.​—Mmusome aHéberi 4:12.b

NYUWO MUNIIXUTTIHIWA, MUKHALE OOROROMELEYA

12, 13. (a) Yoolakela xeeni yaarina awe Eliseyo okathi waixuttihiwa awe? (b) Yehova aamutthuvenle sai Eliseyo mwaha wa ororomeleya wawe?

¹² Ankhi nyuwo amiravo munoowerya okhaliherya? Makhalelo xeeni anrowa wookhaliheryani okhumela saana? Wira naakhule nikoho nlo, nrowe nithokorerye yowiiraneya emosa yaakhumelenle khalai ni mutthu iixuttihiwa.

¹³ Mwa iyaakha sinaattamela 3.000 sivinre, profeta Eliya aahimulattula mmiravo Eliseyo wira okhale namakhaliherya awe. Voohipisa, Eliseyo aaheemererya muteko ole ni aahimurumeela profeta ole oowuuluvala ovaraka miteko soonyoonya. (2 Mam. 3:11) Nto nuuvira iyaakha 6 iixuttihiwaka, Eliseyo aahisuwela wira muteko wa Eliya wa waahoolela aIsarayeli waahanle omala. Okathi owo, Eliya aahimwiirela mwaapara awe ole aamwiixuttinhe awe itthu sotheene wira ohimuttareke-tho, masi Eliseyo aahimuhimeerya Eliya ikwaha ttharu wira: “Miyo nkinohiyani”! Owo aaphavela okhala ni mwiixuttihi awe mpakha vaaweryaneya aya. Nto Yehova aahimutthuvela Eliseyo mwaha wa ororomeleya wawe, khumweemererya woona emalelo yootikiniha ya Eliya.​—2 Mam. 2:1-12.

14. (a) Moota xeeni ole oniixuttihiwa olelo-va onrowa awe omutakiha Eliseyo? (b) Exeeni eniiriha okhala vootthuneyexa ole oniixuttihiwa okhala oororomelya?

¹⁴ Nyuwo amiravo munrowa omutakiha sai Eliseyo olelo-va? Mweemereryeke muhiikhupanyihaka miteko sinivahiwa anyu hata iye soonyoonya. Nwooneke okhala apatthani anyu ale aniwiixuttihani, ni mmuleeleke wira munnixukhurela wiimananiha onipaka awe wira owiixuttiheni. Enamuna enimwiiwelela anyu, pooti olikanaka ni masu oowi: “Miyo nkinohiyani”. Etthu yootepexa otthuneya, nyuwo muhaana wooniherya ororomeleya mwaakhwaniheryaka khula muteko onivahiwa anyu. Exeeni eniiriha eyo okhala yootthuneyexa? Mwaha woowi mwiira siiso axitokweene animoona wira Yehova oheemererya wira nvahiweke miritti sikina suulupale mmulokoni.​—Esal. 101:6; mmusome 2 Timótheyo 2:2.

MOONIHERYE NTTITTIMIHO NOOREERELA

15, 16. (a) Mwa enamuna xeeni Eliseyo oonihenrye awe omuttittimiha mwiixuttihi awe? (Nwehe elatarato yoopacerya.) (b) Moota xeeni Eliseyo aalipinhe awe maprofeta akhwaawe?

¹⁵ Yowiiraneya ya namaranttela a Eliya, Eliseyo, ennooniherya-tho moota anna olelo-va akhanle aya oowaattittimiha axitokweene apacenrye khalai orumeela. Nuumala Eliya ni Eliseyo oxekurya egrupu emosa ya maprofeta oYeriko, awosa yaheetta arowaka Omuro Yordani. Vaaphiyale aya, “Eliya ahirula mukhumi awe, ahikhuna, khumanela mmasini. Màsi awo yahikawanyeya”. Nuumala olapuwa muro ole woowuuma, awosa yaahivikaniha ‘ovanela yettaka sisale’. Vannooneya wira Eliseyo khaapuwela wira aahiixutta itthu sotheene saatthuneya. Mpakha okathi Eliya aakuxiwe awe, Eliseyo aanihela vamurimani vawe khula etthu yaixuttihiwa awe. Nto Eliya aahikuxiwa ni eyuupuri. Nuumala-vo, okathi waatthika awe, oryeene oYordani Eliseyo aahimana maasi ni mukhumi wa Eliya, ohimyaka so: “Ari vai Apwiya, Muluku Èliya?” Nto maasi ale yaahikawanyeya.​—2 Mam. 2:8-14.

¹⁶ Niireke nyuwo moowerya woona wira mwiiriirya woopacerya wa Eliseyo aapanke etthu emosaru yeele yaapakiwe ni Eliya? Exeeni eyo eryaaya yootthuneya? Woonasa wene, Eliseyo khaapuwenle wira vano kirina aka owerya, kihaana oturuka itthu sotheene. Ohiya-vo, mwaha wa ovikaniha otthara inamuna sa Eliya, Eliseyo aahooniherya omuttittimiha mwiixuttihi awe, ni aahaalipiha maprofeta akhwaawe. (2 Mam. 2:15) Muhoolo mwaya, muhina mwa iyaakha 60 sa muteko wa eprofeta, Yehova aahimweemererya Eliseyo opaka miiriirya sinceene ovikana iye saapakiwe ni Eliya. Nto eyo enniixuttiha exeeni olelo-va?

17. (a) Moota xeeni ale aniixuttihiwa olelo-va akhanle aya ootakiha muupuwelelo wa Eliseyo? (b) Waphiya okathi aya, Yehova onrowa waarumeela sai ale aniixuttihiwa?

¹⁷ Nto muhooneke wira nuumala ovahiwa miritti mmulokoni, muhaana orumeela okhulupale orina anyu wira muturuke enamuna itthu saapakiwa aya khalai. Opaka mirukunuxo khonikhumelela mwaha woowi ookhala mutthu oniphavela opaka eyo, masi ohaana okhala mwaha woowi muloko onnitthuneya ni vakhala wira yaakheliwe malakiheryo anikhuma mootthokeyani wa Yehova. Ntoko siisaale Eliseyo saalipinhe awe maprofeta ale ni oonihenrye awe omuttittimiha ole aamwiixuttinhe muteko, nyuwo muhaana waalipiha anninyu ni waattittimiha axitokweene akina a khalai nvikanihaka ottharihela malakiheryo ari mBiibiliyani anitthara aya. (Mmusome 1 aKorinto 4:17.) Ekeekhai wira okathi onirowa anyu wiixutta itthu sinceene, nyuwo munoowerya okumiherya mirukunuxo sinikhaliherya muloko weetta moovarihana ni mulokiheryo wa Yehova yoowo onirowa vahoolo. Tthiri ntoko siisaale seeranenye aya okathi wa Eliseyo, Yehova pooti oweemererya ale aniwiixuttiha anyu opaka itthu suulupale ovikana iye sipanke anyu nyuwo nwiixuttinhe.​—Yohani 14:12.

18. Xeeni wiixuttihiwa anna mmulokoni eryaaya etthu yootepexa otthuneya olelo-va?

¹⁸ Hiyo ninnaamini wira malakiheryo ala ni ale avahiwe muru ovinre animwaakhaliherya axitokweene osuka okathi wira awiixuttihe akina. Nave ninniwehererya wira anna anceene mmulokoni animweemererya wiixuttihiwa iwo ni muhoolo mwaya orumeela malakiheryo awo wira akhapelele ipwittipwitthi sa Yehova. Mweera siiso munoolipiha muloko wa olumwenku wotheene ni munoomukhaliherya khula mutthu okhala oororomeleya okathi wa mixankiho sinrowa okhumelela muhoolo.

[Inoota]

[Ekaaxa epaaxina 8]

Moota Woowiiniha Nikuruta Akina

AXITOKWEENE anisuwela saana owiiniha nikuruta akina, annivaha malakiheryo ala:

1. Nvaheke ntakiheryo na malavulelo ni itthu sinipaka anyu.

2. Wira wunnuwe omunepani mmutumererye ole onimwiixuttiha anyu okhalana eprograma ya omusoma Biibiliya ntero muhina mwa eyaakha emosa.

3. Nvareke muteko woolaleerya hoothe. (Nwehe elatarato eri vakaapani.)

4. Mmwiixuttihe ohoolela oratteene mithukumano sa muteko woolaleerya.

5. Okathi onilavula anyu mwaha wa atthu otheene, munvaheke ekoopiya ya mwaha anyu, wira owo wooneke moota munilavula anyu.

6. Okathi mukina mmulattuleke owo ni emusi awe wira akhale ni nyuwo okathi wa omulompa Muluku vatthokoni.

7. Mmulattuleke owo ni emusi awe wira murowe olaleerya ni emusi anyu muttetthe yoole ohinilaleeriwa vanceene.c

[Enoota]