Anticristo ti Pani?

▪ Efilme emosa yowoopiha epakiwe niinano eniitthaniwa Anticristo.

▪ Egrupu emosa eniipa muusika woovuwa yoomukumiherya album a masipo oniitthaniwa Antichrist Superstar.

▪ Maene ni anamalamulela a eriyari ya iyaakha 500 mpakha iyaakha 1500 ohinatthi orwa Kristu, yaamakela owiitthana awanani aya okhala anticristo.

▪ Martinho Lutero, muhooleli a ireforma a wAlemanha aaniwiitthana mapaapa a ekerexa Katoolika Romana okhala anticristo.

OKHUMA khalai, nuulumo noowi “anticristo” ninnirumeeliwa mwa inamuna soovirikana, okhuma mapaapa mpakha ifilme. Nto anticristo ti pani? Niireke nihaana osuwela ele enitaphulela aya nuulumo nlo? Okhala wira ninnikhumela ikwaha 5 mBiibiliyani, ti vookhalela otokosa mBiibiliyani wira niphwanye yootaphulela aya.

OSUWANYEIHIWA WA ANTICRISTO

Murummwa Yohani paahi torumenle mBiibiliyani nuulumo noowi anticristo wala “nwanani a Kristu”. Nto ohimyale exeeni? Mwa epaphelo awe yoopacerya, olempe so: “An’aka òphentiwa: ola t’ukathi wokiserya. Nyuwo muhíwa wira onokhumelela nwanani a Kristu. Vano, àkhumelela awanani anjene a Kristu; tivá vansuwelahu wira okathi wokiserya wophiya. Awo yakhumme munlokoni mwahu, nto khiyahiyó awihu . . . Nto vano, nawothe t’ani? T’ule onihimya wira Yesu khahiyó Mòpoli. Yowo t’ukhanle nwanani a Kristu: owo onakhotta Atithi vamosá ni Mwan’aya”.​—1 Yohani 2:18, 19, 22.

Masu ala anniixuttiha exeeni? Yohani aahaaromola “awanani anjene a Kristu” wala anticristos. Eyo enooniherya wira nuulumo nla khinimmuhimya mutthu mmosa masi egrupu. Atthu wala makhuuru yaawo akhanle aniticristo, annilaleya itthu sowoothiwa, okhootta wira Yesu ti Mesiya, ni omananiha ovitha makhalelo a ekeekhai a Muluku ni a Yesu. Awanani a Kristu pooti okhala atthu aniihimya okhala Kristu wala arumeyi awe. Masi awo “khiyahiyó awihu” maana khaneettela-tho sowiixuttiha sa Biibiliya. Nave, egrupu ela yaahikhala okathi murummwa Yohani aalepa awe epaphelo awe. Waaniheryasa, masu oowi ‘okathi wokiserya’ anihimya iyaakha sookiserya sa arummwa a Yesu.

Murummwa Yohani aahilopola sa awanani a Kristu wala maprofeta oowootha oriki: “Khula eroho enihimya wira Yesu Kristu ohìsira mutthu ntoko hiyo, yeyo t’inrwa wa Muluku. Vano, khula eroho enihimya wira Yesu khahiyó Mwana a Muluku, eyo khinrwa wa Muluku: eyo t’iroho ya nwanani a Kristu. Nyuwo muhìwa wira nwanani uwo ohanle orwa, ni vano onkhaIa mulaponi-mumu”. (1 Yohani 4:2, 3) Vano mwa epaphelo awe ya nenli, Yohani aalempe so: “Atthu anjene òwòtha àmwarela mulaponi: awo annikhotta wemererya wira Yesu Kristu ohìpaka mutthu ntoko hiyo. Ole onìra siso ti mulipa-òwòtha ni nwanani a Kristu”. (2 Yohani 7) Tthiri, nuulumo noowi anticristo, nnaahimya atthu otheene anilakela omwara-mwarya sowootha voohimya sa Yesu Kristu ni sowiixuttiha sawe.

MAPROFETA OOWOOTHA NI OLE ORI MUTAKHALI

Okathi munceene Yohani ohinatthi olopola, Yesu Kristu aahaalopola awiixutti awe oriki: “Mwipasope n’atthu anìpaka maprofeta. Awo anorwelani yisoneihaka òmàla ntoko epwittipwitthi: vano murim’aya ori wotakhala ntoko mìji”. (Matheyo 7:15) Nave murummwa Paulo aahaalopola maKristau oTesalonika oriki: “Muhìhiyé motothiwaka nnákhala vakhani. Vekekhai, nihiku [na Yehova] khanniphiya, ohinatthi tokó orimela wamini n’ukhumelela mutakhali, yowo opattuxeriwe opweteya”.​—2 aTesalonika 2:3.

Masu awo anooniherya wira eseekulu yoopacerya yaahikhala maprofeta oowootha ni anammwareya yaamananiha otteettheiha muloko wa eKristau. Otheene yaale yaamwarya-mwarya sowootha voohimya sa Kristu ni sowiixuttiha sawe, yaari awanani a Kristu. Moonelo wa Yehova voohimya sa atthu awo waahooneya vaavo Paulo aahimyale awe wira ‘yaapattuxeriwe opweteya’.

MWIIPASOOPE NI AWANANI A KRISTU!

Ankhi olelo-va? Atthu ni makhuuru yaawo aniikhaliha anticristo, nlelo annimulupattha Kristu ni sowiixuttiha sawe. Awo annilaleya sowiixuttiha sowootha aphavelaka owiiriha atthu wira ahimusuweleke saana Yehova Muluku ni Yesu Kristu. Tthiri nookhalana mathowa ooloka wira niipasoopeke voohimya sa atthu awo! Nithokorerye mathowa manli:

Mwa iseekulu sinci, ikerexa sinnilaleya yowiixuttiha ya aMuluku araru, sihimyaka wira Tiithi ni Mwaana ti mutthu mmosaru. Tthiri, ikerexa iyo siniirela mpantta awanani a Kristu, maana sinnivitha makhalelo a Yehova Muluku ni Yesu Kristu. Yowiixuttiha eyo ennaakhoottiherya atthu a murima saana omutakiha Yesu Kristu ni opatthana ni Muluku, ntoko Biibiliya sinnitumererya awe.​—1 aKorinto 11:1; Yakobo 4:8.

Enamuna ekina ikerexa sinaawoka aya atthu ori okumiha nsina na Muluku, Yehova, mBiibiliyani ni waakhoottiherya atthu orumeela nsina nlo. Awo annipaka eyo nnaamwi wanipacerya nsina nlo naaphwanyaneya mBiibiliyani ikwaha sowiiraka 7.000. Ti maana aya atthu anci ahimmusuwela aya saana Muluku eekeekhai.

Masi, osuwela nsina na Muluku, Yehova, onnaakhaliherya anamunceene a murima saana omwaattamela Muluku. Eyo yaahimwiiraneela Richard. Uupuwelelaka sa ovaanela aarina awe ni Anamoona a Yehova anli, owo onihimya so: “Awo yaahikooniherya mBiibiliyani wira nsina na Muluku eekeekhai ti Yehova. Miyo kaahitikinihiwa, maana nkaatonko wiiwa wira Muluku ookhalana nsina. Wiixutta nsina na Muluku wookikhaliherya wataana saana ni yena”. Okhuma vaavo, Richard aahipaka marukunuxo mookumini wira omwiiwelele Biibiliya ni omuhakalalihe Yehova.

Mwa iyaakha sinceene, awanani a Kristu annivikaniha owoototha atthu imilyau sene. Masi, osoma Nuulumo na Muluku, Biibiliya, woonikhaliherya waasuwela awanani a Kristu, ni ohiwokiwa ni sowiixuttiha saya.​—Yohani 17:17.

[Eponto yuulupale epaaxina 15]

Murummwa Yohani aahisuwela wira anticristo aarowa omwarya-mwaryaka itthu sowoothiwa voohimya sa Yesu Kristu ni sowiixuttiha sawe