MUNNUUPUWELA?

Niireke moosoma saana irevista Owehaweha sa naanano? Nanso, moone akhala wira munoowerya waakhula makoho anittharelana:

Niireke nihaana onvekelaka Yesu?

Nnaari. Yesu mwaneene ooniixuttiha onvekela Yehova, ni owo oonivaha ntakiheryo nooloka vaavo anvekela awe Tiithi awe. (Math. 6:6-9; Yoh. 11:41; 16:23) Tivonto, awiixutti ale yaahitthara malakiheryo a Yesu. Awo yanvekela Muluku, ohiya Yesu. (Mit. 4:24, 30; aKol. 1:3)—1/1, epaaxina 14.

Exeeni ekhanle ahu oopaka wira nilokiherye nihiku na wuupuwela okhwa wa Yesu khula mwaakha?

Etthu emosa ti ottharihela eprograma ya omusoma Biibiliya enivarihana ni okathi owo. Hiyo pooti wuncererya muteko ahu wa olaleerya okathi ene yoowo. Nave nihaana wuupuwelela ni mavekelo yoolipelela evahiwe ahu ni Muluku.—15/1, ipaaxina 14-16.

Waamalenle sai mulattu wa anamutthukiwa anli wEjiitu yaawo yaamuleelale yooloha aya yootikiniha Yosefe?

Yosefe aahimuleela mulipa aalawiha eviinyu wira aamutaphuliwa ni aamuttikiheriwa muteko awe. Masi mulipa oowooxa iphaau, yooloha awe yaataphulela wira Farawo aarowa omwiiva ni othomeya erutthu awe vamwirini. Nuuvira mahiku mararu, masu a Yosefe yaahiiraneya. (Maph. 40:1-22)—1/2, ipaaxina 12-14.

Yoovaha xeeni ya vameekhaaya yaakhenle aya anna oJapão?

Awo yaahaakhela elivirinyu yaalavula sa Evangelyo ya Matheyo, ekumihiwe Tradução do Novo Mundo. Eyo ennikaiwa okathi woolaleerya ni atthu anceene a oJapão ahimulimalenle Biibiliya ennaasivela.—15/2, epaaxina 3.

Moota xeeni makhalelo a eseekulu yoopacerya yaakhalihenrye aya muteko woolaleerya?

Murettele waakumiheriwe ni Pax Romana, waahimaliha ikhotto saawaniwa. Makristau yaahirumeela saana iphiro sooloka saapakiwe ni aRoma. Nttaava na eGriki naanilavuliwa ni atthu anceene eyo yaanikhweiherya olaleerya ni aYuda omwareela mittetthe sotheene sa Omwene ole. Ni awiixutti ale yaaniwerya orumeela nlamulo na oRoma wira yaakiherye ihapari sooreera.—15/2, ipaaxina 20-23.

Xeeni maKristau a ekeekhai ahinimwiira aya Paasikha?

Yesu aahaaruma awiixutti awe wira yuupuweleleke okhwa wawe paahi, ohiya ohihimuxiwa wawe. (Luka 22:19, 20)—1/3, epaaxina 8.

Khalai, iliivuru sahu saamakela olavula sa wiiraneya wa iprofesia woopacerya ni wanenli mahiku ala soottharuwa. Nthowa xeeni?

Biibiliya onnihimya wira atthu akina aakhalana nlikanyiho na etthu yuulupale. Ntakiheryo nimosa na eyo nimphwanyaneya iliivuru ya aGalasia 4:21-31. Vahikhanle wira Biibiliya tohimmye, hiyo nihimananiheke otthokiherya wira mutthu wala yowiiraneya yookhalana yootaphulela ya nthoonyeryo. Masi hiyo pooti omananiha wiixutta etthu ni atthu aniromoliwa mBiibiliyani. (aRom. 15:4)—15/3, ipaaxina 17-18.

Moota xeeni ifragmento sa epapiro saaphwanyiwe eriyari ya ikokhola wEjiitu siryaaya sootthuneya vanceene?

Eseekulu 20, sookhala iroolu saaphwanyiwe seiyo saarina masu a eliivuru ya Yohani. Woonasa wene, eliivuru eyo elempwale myaakha miloko vakhaani nuumala Yohani olepa eliivuru awe, ni masu aniphwanyaneya eliivuru eyo annooniherya wira Biibiliya toororomeleya ni tekeekhai.—1/4, ipaaxina 10-11.

Xeeni vanihimmwa aya wira okumihiwa mmulokoni mutthu ohinttharuwa etthu enooniherya ophenta?

Biibiliya onnihimya mathowa maalupale aniiriha mutthu okumihiwa, yaawo aniphwanyiha mureerelo. (1 aKor. 5:11-13) Okumihiwa onnivuwiha nsina na Muluku, onnikhaliherya muloko okhala woowaarya, ni onoomukhaliherya mutthu owo ottharuwa itampi sawe. —15/4, ipaaxina 29-30.