BIIBILIYA ONNIRUKUNUXA MIRIMA SA ATTHU
Murima aka waamutepa okhala wootakhala
Elavuliwe ni Stephen Mcdowell
MWAAKHA OYARIWE AWE: 1952
ELAPO OYARIWE AWE: WESTADOS UNIDOS
MWAHA ENE: AARINA MWEETTELO WOOTAKHALA
MWEETTELO AKA WA KHALAI: Kinnuwale oLos Angeles, California, EUA, ebairo yoosuweliwa mwaha wa atthu a mweettelo wootakhala ni yaatumiha mirette soohapala. Anamuyari aka yaarina anamwane 6, nto miyo kaari a nenli.
Amaama yaamakela oniroiha ekerexa evangélica. Masi okhuma omiravo aka, keettela mirima miili. Ettiminku kaanirowa okerexa weiwo kiipa aka masipo, masi mahiku makina a vasumani, kaalya mirette soohapala, ni orupihana woohiloka.
Miyo kaari mutthu ootakhala. Kaanirumeela khula etthu ohela muhina kapwitthi wira kiisaakihe. Ele kaaxuttaka okerexa, khiyaakikhaliherya. Nto kaamakela ohimya so: “Ohukhumu ti wa Apwiya, miyo kinvara muteko aya!” Wanikisa wa iyaakha sa 1960 kiryeene ensino médio, kaahipacerya osiveliwa ni egrupu ya epoliitika yaitthaniwa Panteras Negras, yaasuweliwa mwaha wa waakiherya ihakhi sa atthu mwa enamuna yootakhala. Nto kaahikela egrupu ya anaxikola yaakiherya ihakhi sa atthu. Ikwaha sinceene, naanipaka iprotesto seiyo siiriha owaliwa exikola.
Masi iprotesto khisaakiphiyerya. Nto kaahipacerya opaka ikrime mwaha wa nthalu. Mwa ntakiheryo, okathi omosa miyo ni apatthani aka naahirowa oweha eviidiyu yaalavula sa moota ipottha sa wAfrika sahaawa aya wEstados Unidos. Mwaha wa onyoonyiheya ni ohixariya iwe, naahaatuphela amiravo akunya yaari opuro ole. Nuumala-vo, naahirowa muttetthe wa akunya wira naamane.
Okathi kaari aka mmiravo, miyo ni axinnaka naanisuweliwa okhala anakrime. Nto mapoliisia yaaninaavya. Muhima aka iirela mpantta egrupu ekina ya anakrime, nto kaahikela egrupu awe. Murima aka waamutepa okhala wootakhala.
MOOTA BIIBILIYA ORUKUNUNXE AWE OKUMI AKA: Aahikhala mpatthani aka yoowo anamuyari awe yaari Anamoona a Yehova. Awo yaahikilattula orowa empa ya Omwene, nto kaaheemya. Kaahoona wira Anamoona toovirikana ni itiini sikina. Otheene yaahikhalana Biibiliya ni yaanimurumeela. Hata anamwane yaanilavula okathi wa iprograma! Kaahitikinihiwa wiixutta wira nsina na Muluku ti Yehova, nenno kiiwa aka nirumeeliwaka. (Esalimo 83:18, NM) Muloko ole, waahikhala atthu a ilapo soovirikana, masi khuuvo aarina nthalu.
Wanipacerya nkaaphavela omusoma Biibiliya ni Anamoona, masi vaanikisivela orowa mithukumano saya. Ohiyu omosa kiryeene omuthukumanoni, egrupu emosa ya apatthani aka yaahirowa ospetaakuluni weiwo yaamoopenle aya mmiravo mpakha okhwa mwaha wookhootta waavaha ekasako awe. Mmeeloni mwaya awo yaahiittottopa mwaha wa ekrime ele. Hata okathi waaphukeliwa aya khiyuupuwela wira yaahipaka ekrime. Anamunceene a yaawo yaahilamuliwa oviriha okumi aya wotheene mukhatteya. Tthiri, kaahihakalala vanci mwaha woohirowa ni egrupu ele. Kaahilakela oturuka okumi aka ni opacerya omusoma Biibiliya.
Okhala wira kannunwe ni atthu a nthalu, kaanitikinihiwa ni mukhalelo wa Anamoona. Mwa ntakiheryo, vaavo Namoona a Yehova, mukunya, aarowa awe elapo ekina, aanaahiya anaawe ekhapeleliwaka ni emusi ya anooriipe. Nave, emusi emosa ya akunya yaahimukuxa mmiravo nooriipe enakhalana hoothe yoowo ahaarina opuro wookhala. Kaahoona wira Anamoona anniiwelela masu a Yesu ari va Yohani 13:35 ani: “Atthu othene anosuwela wira mwá awixutti aka mwaphentanaka mukina ni mukh’awe”. Tthiri kaahiphwanya emusi yekeekhai.
Yoosoma ya Biibiliya yaahikooniherya wira kaahaana orukunuxa muupuwelo aka. Miyo kaahaana wiimananiha opaka itthu mwa murettele, ni okupali wira eyo ti yaari enamuna yooloka ya okumi. (aRoma 12:2) Vakhaani-vakhaani kaahirowa vahoolo. Nto Janero a 1974, kaahibatiziwa khukhala Namoona a Yehova.
Hata nuumala obatiziwa, kaahaana wiimananiha wira kilokiherye mweettelo aka. Mwa ntakiheryo, nihiku nimosa kiryeene ni egrupu yaalaleerya khula empa, kaahimutthimakela nawiiye aamukunxe raadio mukaaroni mwaka. Nto kihalaka vakhaani onvara, aahimuriha khutthyawa. Okathi kaalenle aka anna kaarina aka ele yaakhumelen-le, mutokweene mmosa a egrupu ahu aahikikoha wira: “Stephen,vaakhanle wira monvara, mwaarowa omwiira exeeni?” Nikoho nle naahikiiriha wuupuwela ni wiimananiha okhala mutthu a murettele.
Outubro 1974, kaahipacerya ovara muteko woolaleerya wa okathi wotheene, kivirihaka iwoora 100 khula mweeri kiwiixuttihaka atthu Biibiliya. Nuuvira okathi, kaahiivahererya orumeela oseedi ya elapo yotheene ya Anamoona a Yehova oBrooklyn, oNova Iorque. Eyaakha ya 1978, kaahitthikela oLos Angeles wira kaakhapeleleke amaama. Nuuvira iyaakha piili kaahimuthela Aarhonda. Owo aahikikhaliherya vanci waakhapelela amaama mpakha okhwa. Muhoolo mwaya, naahirowa Exikola Enimwiixuttiha Biibiliya ya oGileadi ya Torre de Vigia, ni naahithanliwa orowa oPanamá, weiwo niri ahu mamisionaario mpakha olelo-va.
Okhuma obatiziwa waka, sookiphwanya mixankiho sinci saarowa okiiriha onanariwa. Masi kihiixutta waasyaka atthu anikinyoonyiha; aahiiso, kinnimaliha muxankiho owo mwa inamuna sikina. Atthu anceene, ohela muhina mwaaraka, annikittottopela mwaha wa moota kixinttale aka soweeha iye. Hata miyo kinnitikinihiwa! Nkiniittotttopa mwaha wa marukunuxo ala a okumi aka. Kinnikupali wira eyo ennivaha onamoona yoowi Biibiliya ookhalana owerya.—aHéberi 4:12.
MOOTA OTTOTTENLE AKA MUREERELO: Biibiliya ookooniherya yoolakela ya okumi ni ookiixuttiha okhala mutthu a murettele. Vano nkinaamana-tho atthu; masi kinnaakhaliherya momunepani. Nto, koowerya omwiixuttiha Biibiliya mutthu yoowo aari nwanani aka a oxikola! Nuumala owo obatiziwa, naahikhala ekwartu emosa mwa okathi vakhaani, ni nlelo na apatthani eekeekhai. Miyo ni mwaaraka nihaakhaliherya atthu anivikana 80, okhala Anamoona a Yehova.
Kinnimuxukhurela vanceene Yehova mwaha wookivaha okumi orina yoolakela ni woohakalaliha vamosa ni emusi yowiiraana mwekeekhai.
[Eponto yuulupale epaaxina 11]
Miyo kaahaana wiimananiha opaka itthu mwa murettele, ni okupali wira eyo ti yaari enamuna yooloka ya okumi