MWAHA WA VAKAAPANI | NIIREKE NINNIVIKANIHA OKHALA AKUMI NUUMALA OKHWA?

Niireke Ehaavo Yoolipelela wa Ale Akhwiiye?

Niireke alipa-ookhwa anookhala-tho akumi?

WAAKHULIWA WA MBIIBILIYANI: “Onophiya okathi onìraya atthu othene ari mmahiye, yiwe nsu na [Yesu] ekhume mmahiye”.​—Yohani 5:28, 29.

Yesu aalavula sa muhoolo, Moomweneni mwawe, vaavo atthu akhwiiye anrowa aya okhuma mmahiye. Fernando oromoliwe wanipacerya oni: “Ekwaha yoopacerya kaamusomme aka Yohani 5:28, 29, kaahitikinihiwa. Eyo yaahikivaha nlipelelo neekeekhai ni opacerya wuupuwelela moohakalala okumi wa muhoolo”.

Mulopwana oowaamini Yobi aanikupali wira namphiya nihiku Muluku aarowa awe omuttikiherya okumi. Yobi aakonhe so: “Mutthu okhwiye onowerya okhala-tho mukumi?” Nto owo aahaakhula moororomela oriki: “[Kinrowa owehererya mmahiye] okathi wothene w’ohawa waka, mpakha ophiya okathi w’omumula. Vano nyuwo [munrowa okìhana], miyo kiwakhuleni”.​—Yobi 14:14, 15.

Martha, murokorawe Laazaro, aanisuwela wira ohihimuxiwa wa atthu onimwiiraneya. Nuumala Laazaro okhwa, Yesu aahimuleela Martha wira: “Murokor’inyu onohihimuwa”. Martha aahaakhula wira: “Miyo kosuwela wira onohihimuwa nihiku nokiserya”. Nto Yesu aahimuhimeerya so: “Miyo ki ohihimuwa n’ikumi. Ole onikamini, hatá anakhwaru, onokhalatho mukumi”. (Yohani 11:23-25) Moohipisa Yesu aahimuhihimuxa Laazaro! Yowiiraneya ela yookuxa murima enniniiriha osuwela itthu sinrowa okhumelela muhoolo. Nkahaya muupuwele ohihimuxiwa onrowa wiiraneya elapo yotheene!

Niireke aakhala anirowa wiirimu?

WAAKHULIWA WA MBIIBILIYANI: Biibiliya onnooniherya wira ohihimuxiwa wa Yesu onnivirikana ni atthu ale 8, maana yaahitthikela-tho okhala akumi valaponi. Masi voohimya sa ohihimuxiwa wa Yesu ninsoma so: “Yesu Kristu . . . owenle wirimu ni vano onkhala mono wolopwana wa Muluku”. (1 Pedru 3:21, 22) Niireke Yesu paahi taarowa ohihimuxiwa wira orowe wiirimu? Okathi omosa, Yesu aalenle so arummwa awe: “Karowá, kòlokiheryani nipuro, kinohokolowa-tho kokuxeni, wira nipuro ninrowaka okhala, ni nyuwo-tho mwakhaleke nipuro nenlo”.​—Yohani 14:3.

Kristu oorowa wiirimu ni oolokiherya opuro wa awiixutti awe akina. Ale anirowa wiirimu, mwaattelo aya onrowa okhala 144.000. (Wisupulula 14:1, 3) Nto awo anrowa opakaka exeeni wiirimu?

Awo anookhalana muteko munceene! Biibiliya oni: “Òttottopeliwa ni òreriwa t’ale anrowa ovahiwa ohihimuwa nno wopajerya. Okhwa wanenli khunrowa wawerya: awo anrowa okhala anamukuttho a Muluku ni a Kristu, anokhalihiwa mamwene mpakha iyakha iye ekonto emosá”. (Wisupulula 20:6) Awo anrowa okhala mamwene ni anamukuttho ni Kristu wira elamuleleke valaponi.

Ti pani anrowa ohihimuxiwa wira ekhaleke valaponi?

WAAKHULIWA WA MBIIBILIYANI: Biibiliya onniromola masu ala a murummwa Paulo oriki: “Miyo kinniroromela oholo wa Muluku, ntoko yawo anroromelaya, wira atthu othene, ale òrera murima n’ale òtakhala murima, anohihimuwa mokhwani”.​—Miteko 24:15.

Tani ari “òrera murima” ntoko Paulo sihimyale awe? Mwa ntakiheryo, okathi naxariya Daniyeli aahala awe vakhaani okhwa, aahileeliwa so: “Nyuwo munimokhwa, masi munohihimuwa mokhwani mahiku òkiserya”. (Daniyeli 12:13) Nto Daniyeli onirowa okhalaka woowi? “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) Yesu aalavunle so: “Òreriwa t’ale òwimàliha, okhala wira animwakhela elapo ntoko yohiyeriwa”. (Matheyo 5:5) Daniyeli vamosa ni alopwana ni athiyana akina oowaamini, anirowa ohihimuxiwa wira ekhaleke valaponi mahiku otheene.

Tani ari “òtakhala murima” ntoko sihimmye awe Paulo? Awo ti yaale yaakhanle valaponi khukhwa, anceene a yaawo khiyaatonko omwiiwexexa Biibiliya ni weettela ele enihimya awe. Nuumala ohihimuxiwa, awo anrowa wiixutta omphenta Yehovaa ni Yesu. (Yohani 17:3) Ale anrowa othanla omurumeela Muluku anrowa okhalaka, sintoko Yehova, eyo piiyo, mwa mahiku otheene.

Okumi onrowa okhala sai valaponi?

WAAKHULIWA WA MBIIBILIYANI: Muluku “Onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”. (Wisupulula 21:4) “Atthu awo anrowa oteka ipa saya, ekhaleke memmo: anrowa ophatteya miri s’evidera, elyeke mihokorokho saya”.​—Yesaya 65:21.

Tthiri vanrowa okhala voohakalaliha vaavo amusi ahu akhwiiye anirowa aya ohihimuxiwa! Masi ninnikhumela-tho nikoho nni: Ninrowa okupali sai wira eyo ekeekhai?

[Enoota]

[Eponto yuulupale epaaxina 6]

Ale anithanla omurumeela Muluku anookhalana yoolipelela ya okhala mahiku otheene arina ene okumi wooloka ni woohakalaliha