Mwiilokiherye Naanano Vaava Wira Mwakhaleke Elapo Esya

“Ekhaleke athajiri ni miteko saya sorera, . . . Yira siso, . . . anophwanya ekumi yekekhai”.​—1 TIM. 6:18, 19.

ISIPO: 43, 40

MWAAROWA WAAKHULA SAI?

Makhalelo xeeni ooloka a omunepani aniwehererya ahu waakhela elapo esya?

Inamuna xeeni nikhanle ahu oowiilokiherya nenna-va wira nakhaleke elapo esya?

Soolukama sa omunepani sinnikhaliherya sai wiilokiherya wira nakhaleke elapo esya eleiheriwe ni Muluku?

1, 2. (a) Mareeliho xeeni a werutthuni aniwehererya ahu waakhela eParayiisu eniwehererya ahu valaponi? (Nwehe elatarato yoopacerya.) (b) Mareeliho xeeni oomunepani aniwehererya ahu elapo esya?

“EKUMI YEKEEKHAI”. Anamunceene yaiwaka masu ala anuupuwela yooleiherya ahu ya ekumi ehinimala mParayiisu valaponi. Tthiri murummwa Paulo ahooniherya olikana waya “ekumi ehinimala” ni “ekumi yekekhai”. (Mmusome 1 Timótheyo 6:12, 19.) Hiyo ninlipelela ekumi ehinimala yeeyo enrowa oniruuhela mireerelo soohimala ni ohakalala wuulupale. Tthiri khanniwerya osuwela oratteene moota sinirowa aya okhala ovenya khula nihiku nirineene ekumi yooloka mwerutthuni, mmuruni ni muupuwelelo ahu. (Yes. 35:5, 6) Nkahaya muupuwelele moota sinirowa aya okhala otthikela okumana ni amusi, apatthani anaaphenta ahu waahela muhina ale yaakhwiiye ahihimuxiwe! (Yoh. 5:28, 29; Mit. 24:15) Ninrowa wunnuuherya osuwela wahu itthu sa siensia, wiipa, oteka ipa, wala miteko sikina sinivekela oratta.

² Nnaamwi niwehereryaka itthu iyo sinceene soohakalaliha muhoolo, mareeliho maalupale aniwehererya ahu elapo esya, taale oomunepani. Tthiri ninrowa okhala ootteeliwa murima vanceene osuwela wira nsina na Yehova nootteelihiwa ni Omwene awe woovuwihiwa! (Math. 6:9, 10) Ninrowa oohakalala vanceene vaavo vanrowa ahu woonaka yoolakela ya Yehova ya elapo ni apinaatamu, yaakhwanelaka. Nkahaya muupuwele-tho moota vanirowa aya okhala vookhweya omwaattamela Yehova, mwaha wa okhala oomalela!​—Esal. 73:28; Yak. 4:8.

3. Xeeni vanireerela aya wiilokiherya nenna-va?

³ Hiyo nnoowerya waakhela mareeliho awo otheene, okhala wira Yesu aahilipiherya oriki “Muluku khivo enojelawe”. (Math. 19:25, 26) Masi vakhala wira hiyo ninniphavela okhala elapo eyo esya, ni okhala nuumala Olamulelo wa Iyaakha Ekonto Emosa wa Kristu, nihaana ovarexexa ekumi ehinimala nenna-va. Nikhaleke nilipelelaka wanikisa wa olumwenku ola wootakhala ni opaka mavalo annikhaliherya wiilokiherya osuwela ikhaleliwo sa elapo esya. Nto ninrowa opaka sai eyo hata nikhalaka elapoyeela yootakhala?

NINROWA WIILOKIHERYA SAI?

4. Nvahe ntakiheryo na moota wowiilokiherya wira nakhaleke elapo esya.

⁴ Ninrowa wiilokiherya sai nenna-va wira nakhaleke elapo esya ya Muluku? Nuupuwele, vaakhanle wira nimphavela othaamela elapo ekina. Naarowa wiilokiherya sai wira othaama wahu ohikhale wooxankiha? Woonasa wene naarowa opacerya wiixutta nttaava ninlavuliwa ni atthu anikhala elapo eyo. Nave wiixutta soolema sa elapo eyo waamunikhaliherya. Vannireerela olawiha yoolya ya elapo eyo. Tthiri okhuma okathi owo hiyo naarowa okhala ntoko niri elapo yeeyo eniphavela ahu othaamela. Okhala wira eyo ti enamuna enirowa ahu okhalaka elapo eyo. Vamosaru, hiyo nihaana wiilokiherya wira nasuweleke okhala elapo esya eniwehererya ahu mpakha vaniwerya ahu olelo vaava. Vano muthokorerye matakiheryo vakhaani anittharelana.

5, 6. Moota xeeni wiiwelela malakiheryo a Muluku onnikhaliherya aya wiilokiherya wira nakhaleke elapo esya?

⁵ Elapo esya, atthu otheene anrowa wiiwelelaka olamulelo wa Muluku. Eyo enrowa okhala etthu yoovirikana ni olumwenku ola onilamuleliwa ni Satana atthu aniithanlela aya mekhaya ele enaasivela! Olelo-va atthu aniphavela opaka itthu sinaasivela paahi, vano exeeni ekhumelenle? Ohiiwelela malakiheryo a Muluku wookumiherya maxakha, ohaawa ni ihasara. (Yer. 10:23) Tthiri ninniwehererya okathi apinaatamu anrowa aya omwiiwelela Yehova ni olamulela wawe woophenta!

⁶ Tthiri vanrowa okhala voohakalaliha wiiwelela marehereryo a Yehova a elapo esya nivaraka muteko wira nireerihe elapo, owiixuttiha atthu anrowa ohihimuxiwa, ni waakhwaniherya yoolakela ya Yehova wa apinaatamu. Masi, mwaarowa opaka exeeni vaakhanle wira nvekeliwe ovara muteko ohinoosivelani? Niireke mwaamwiiwelela malakiheryo awo nvaraka muteko owo ni murima anyu wotheene? Anamunceene pooti waakhula ariki aayo! Masi, niireke vanninikhweyerya wiiwelela malamulo a Muluku olelo-va? Nto vakhala wira ninnipaka eyo, tthiri noolikanela wira nakhaleke elapo esya enilamuleliwa ni Yehova.

7, 8. (a) Xeeni vanireerela ahu wunnuuherya munepa woowiiwelela? (b) Marukunuxo xeeni yaakhumelenle maKristau akina? (c) Etthu xeeni enireerela ahu osuwela voohimya sa makhaleliwo a elapo esya?

⁷ Wiilokiherya wira nakhaleke elapo esya, khonivekela wiiwelela malakiheryo a Yehova olelo-va paahi, masi onihela muhina wiimananiha okhala otteeliwa murima ni okhalana munepa wowiiwelela. Vakhala wira ninniwiiwelela ale anihoolela olelo-va, woonasa wene ninrowa okhala otteeliwa murima ni miteko isya ninrowa ahu ovahiwa, ni ovikaniha okhala owiiwelela. (Mmusome aHéberi 13:17.) Elapo Yooleiheriwa, khula mutthu a nloko na aIsarayeli aakhala opuro aakaweliwe awe. (Moth. 26:52-56; Yox. 14:1, 2) Tthiri olelo-va khannisuwela nipuro xeeni khula mutthu onrowa awe ovahiwa wira akhaleke elapo esya. Masi, okhala oowiiwelela onrowa onikhaliherya otteeliwa murima vanceene ni waakhelela moohakalala khula nipuro Yehova onrowa awe onivaha wira nikhaleke.

⁸ Eparakha erina ahu ya okhala nilamuleliwaka ni Omwene wa Muluku ti yuulupale ni ennireerela opaka sotheene siniwerya ahu wira niiweleleke malakiheryo anivahiwa ahu ni otthokeya wa Yehova. Makhalelo ahu pooti oturukeya khula okathi. Mwa ntakiheryo, anna anceene yaarumeela ni emusi ya oBetheli ya wEstados Unidos yaahivahiwa muteko wa orowa olaleerya, vano awo annaakhela mareeliho manceene avaraka enamuna ekina ya muteko wa okathi wotheene. Akina taale yaavara muteko wa weetteetta yaawo olelo va avahiwe muteko wa opioneero wa vameekhaaya mwaha wa wuuluvala ni myaha sikina. Vakhala wira ninnitteeliwa murima ni miteko iyo, onvekela Muluku wira onikhaliherye, ni opaka sotheene siniwerya ahu mmutekoni mwawe, ninrowa waakhela mareeliho manceene nnaamwi nikhalaka mahiku ooxankiha. (Musome Miruku 10:22.) Ankhi itthu siniwehererya ahu muhoolo? Woonasa wene pooti wiiraka nookhala nipuro nnoosivelani orowa okhalaka elapo esya, ankhi mwavekeliwa wira muthaamele nipuro nikina? Moohicikha etthu sa enamuna enrowa ahu orumeelaka ni muteko onrowa ahu ovaraka, hiyo nnoowerya okhala otteeliwa murima ni otthapa.​—Neh. 8:10.

9, 10. (a) Mmyaha xeeni sinirowa ahu otthuneyaka okhala oopixa murima elapo esya? (b) Ninrowa wooniherya sai wira ninnipixa murima?

⁹ Nryeene elapo esya, wookhala okathi onrowa otthuneyaka okhala oopixa murima. Mwa ntakiheryo, hiyo pooti wiiwaka wira aakhala atthu atteeliwe murima okhala wira amusi wala apatthani aya aahihimuxiwa. Nto okathi owo hiyo ninrowa otthuneyaka olipelela wira niwaakhele amusi ahu nave. Nto eyo yakhumelela niireke hiyo nnoowerya okhala ootteeliwa murima ni atthu awo ni opixa murima? (aRom. 12:15) Tthiri wiixutta olipelela moopixa murima waakhwanela wa sooleiherya sa Yehova nenna-va onrowa onikhaliherya okathi owo.​—Mus. 7:8.

¹⁰ Ohiya-vo nihaana wiixutta opixa murima nenna-va okhala wira sookhala ikeekhai sinrowa wuupululiwa elapo esya. Niireke nyuwo munnisoma ni owehererya moopixa murima mpakha otthokiheriwa oratteene ikeekhai sa mBiibiliyani olelo-va? Vakhala wira munniira siiso, nto khivanirowa wooxankihani okhala oopixa murima vaavo Yehova onrowa awe owiixuttihaka apinaatamu yoolakela awe vakhaani-vakhaani elapo esya.​—Mir. 4:18; Yoh. 16:12.

11. Exeeni enniixuttiha awe Yehova nenna-va voohimya sa moota wowaakhapelela apinaatamu, nto eyo enrowa oniphwanyiha mureerelo xeeni?

¹¹ Mukhalelo mukina onrowa onikhaliherya okhala saana elapo esya ti munepa wa olevelela. Okathi wa Olamulelo wa Kristu wa Iyaakha Ekonto Emosa, apinaatamu oreera murima ni ale ootakhala murima, anrowa wiiraka nlelo arineene ohimalela waya. (Mit. 24:15) Niireke okathi owo munoowerya okhala mowiiraana ni atthu awo? Vakhala wira hiyo nnimwiixutta olelo vaava olevelela ni okhootta mweettelo woohiloka, nto vanrowa okhala vookhweya okhala elapo esya.​—Mmusome aKolosi 3:12-14.

12. Mutthokiherye ovarihana okhanle wa ekumi eniwehererya ahu ni ele erina ahu olelo-va.

¹² Ekeekhai wira ekumi ya elapo esya khentaphulela wira ninrowa ophwanyaka khula etthu okathi oniphavela ahu. Ohiya-vo, ekumi eyo enivekela oxukhurela ni otteeliwa murima ni khula etthu erina ahu nittottelaka mureerelo olamulelo woophenta wa Yehova. Eyo enitaphulela ovarihela muteko mikhalelo seiye Yehova sinniixuttiha awe olelo-va. Vaavo vanikhala ahu moovarihana ni makhalelo a elapo esya, tthiri ninniixutta makhalelo anrowa ahu orumeelaka voohimala. Eyo enoolipiha waamini wahu itthu sa “olumwenku ontthuna orwa”. (aHéb. 2:5; 11:1) Napaka eyo, ninrowa wooniherya wira ninniphavela waakhelela makhalelo awo axariya anrowa okhala valaponi. Tthiri hiyo ninniilokiherya wira nakhaleke elapo esya eleiheriwe ni Muluku.

VANO MUKHALELEKE NTHITI MITEKO SA MULUKU

13. Miteko xeeni sinrowa okhala nipuro noopacerya elapo esya?

¹³ Muthokorerye-tho enamuna ekina ya wiilokiherya wira nakhaleke elapo esya. Nnaamwi nileiheriwe ene yoolya yowaatta ni mireerelo sikina elapo esya, etthu enrowa otepaka onitteeliha murima ti ovahiwa itthu sotheene sinnithowa sa omunepani. (Math. 5:3) Miteko sa Muluku sinrowa okhala nipuro noopacerya, nto eyo enooniiriha ophwanya ohakalala wuulupalexa onikhuma wa Yehova. (Esal. 37:4) Vaavo vanihela ahu nipuro noopacerya miteko sa Muluku nenna-va, tthiri ninniilokiherya wira nakhaleke elapo esya enirwa.​—Mmusome Matheyo 6:19-21.

14. Soolukama xeeni soomunepani sikhanle oowaakhaliherya amiravo okhala yuupuwelaka ekumi yoohimala?

¹⁴ Masi ninrowa wunnuuherya sai osiveliwa wahu miteko sa Muluku? Enamuna yoopacerya ti okhalana soolukama soomunepani. Vakhala wira nyuwo mwa mmiravo oniphavela wira omurumeela Yehova okhale ti muteko anyu, xeeni ohisomaka malakiheryo akumiheriwe ni woona inamuna sa orumeela mukhanle anyu oothanla wira mmurumeele Muluku?a Vaamureerela olavula ni atthu avirinhe iyaakha sinceene avaraka muteko wa orummwa wa okathi wotheene. Vakhala wira munoothanla omurumeela Muluku wira okhale ti muteko anyu; nyuwo munniilokiherya wira mwavikanihe omurumeela Muluku elapo esya, yeeyo miteko sa Muluku siixuntte anyu sinrowa aya okhalana efaita yuulupale.

15. Soolukama xeeni soomunepani anamalaleerya a Omwene akhanle aya oothanla?

¹⁵ Hiyo nikhanle atthu anilaleya Omwene, nto soolukama xeeni sinireerela okhalana? Nihaana opaka okhala yoolukama ahu olokiherya inamuna sahu sa olaleerya. Wala hiyo pooti ophavelasa olokiherya ni wunnuuherya omwiiwexexa wahu Biibiliya ni miruku sawe ni ovarihela muteko. Ankhi wiimananiha wiixutta osuwela osoma oratteene ni olavula myaha wala opaka ikomentaario sooloka omuthukumanoni? Moohaaniherya sookhala inamuna sikina sinireerela sinuupuwela anyu. Etthu yuulupale tiila: Okhalana soolukama soomunepani onrowa wunnuuherya oluttuweliwa wanyu miteko sa Muluku, nto eyo enrowa wookhaliheryani wiilokiherya wira mwakhaleke elapo esya enirwa.

NOOPACERYA OPUHA MAREELIHO AHU!

16. Xeeni omurumeela Yehova eryaaya enamuna ya ekumi yootepexa ohakalaliha?

¹⁶ Niireke oviriha okathi niilokiheryaka wira naweryeke okhala elapo esya ya Muluku oyeleela okathi wala itthu sooloka sikhanle olelo-va? Nnaari khahiyo siiso! Omurumeela Yehova ti muteko wootepexa ohakalaliha orina ahu. Hiyo khannipaka eyo ntoko mutthu oniphavela oliviwa paahi wala wira noopowe maxakha maalupale. Masi eyo ti enamuna epakeliwe ahu ni ti yeeyo enikumiherya ohakalala wuulupale. Vaavo vanilakiheriwa ahu ni Yehova ni ottottela mureerelo oniphenta wawe, ninnoona wira iyo ti itthu sootepexa oreera ovikana ekumi ennivalaanya ni Yehova. (Musome Esalimo 63:2-4.) Ekeekhai wira khanniwehererya elapo esya wira naakhele mareeliho oomunepani yaawo anikhumelela mwaha wa omurumeela Yehova ni murima ahu wotheene, awo anniphwanyaneya nenna-va! Tthiri, aakhala atthu anipuha mareeliho awo mwa iyaakha miloko sinceene, ni hiyo noosuwela wira khiivo enamuna ekina ya ekumi eniphwanyiha mireerelo sinceene ovikana omurumeela Yehova.​—Esal. 1:1-3; Yes. 58:13, 14.

17. Opuro xeeni orina aya otthekula ni itthu sinnisivela mParayiisu?

¹⁷ Soophavela sahu ni itthu sinnisivela sookhalana opuro aya elapo esya ya Muluku. Tthiri eyo ennooneya mwa enamuna Yehova onipanke awe wira nisiveliweke ni ele enivara ahu ni nitthekuleke mwa enamuna yotteeliha murima. (Mus. 2:24) Enamuna eyo ni inamuna sikina Yehova ‘onnitthukula matat’awe’ wira aavahe atthu otheene itthu sinaathowa. (Esal. 145:16) Otthekula ni ophumurya wookhalana opuro aya, masi ohakalaliha waya onilipa ni wunnuuherya wahu ompatthani ahu ni Yehova. Nto mParayiisu valaponi onrowa okhala siiso. Tthiri vaarowa okhala vamiruku wiixutta ohela soophavela sahu nipuro ninreerela aya nto khiyahela Omwene nipuro noopacerya niphavelaka waakhelela mareeliho Yehova anaavaha awe atthu awe nenna-va!​—Math. 6:33.

18. Ninrowa wooniherya sai wira hiyo ninniilokiherya wira nakhaleke voohimala mParayiisu valaponi?

¹⁸ Muhoolo, eParayiisu enirwa, ninrowa ophwanya ohakalala ohinatoko ahu okhalana. Vannireerela wooniherya wira ninniphavela ekumi eyo yekeekhai niilokiheryaka nenna-va. Vano nrowe niphavelase okhalana makhalelo ooloka ni ophwanya ohakalala wekeekhai mwaha wa okhalela nthiti muteko woolaleerya yoowo ovahiwe ahu wira nivareke. Nikhalihe miteko sa Muluku etthu yootepexa onisivela ovara. Niroromelaka moomalela soolaiherya sa Yehova, niilokiheryeke wira nakhaleke elapo esya enirwa!

[Enoota]