Nitakiheke Opixa murima Wa yehova Ni Wa yesu

‘Musuweleke wira Muluku Pwiy’ahu onninivilela wira othene ahu nòpowe’.​—2 PED. 3:15

MUNROWA WAAKHULA SAI?

Oonihenrye sai Yehova opixa wawe murima?

Nthowa xeeni Yesu aatthuneya awe opixa murima okathi munceene?

Inamuna xeeni sinitthuneya ahu olipiha opixa wahu murima ntoko Muluku?

1. Nikoho xeeni aniikoha aya arumeyi akina oororomeleya?

M UROKORA mmosa oororomeleya yoowo ovilenle mixankiho iyaakha sinceene, mowiiyeviha aahikoha wira: “Kinoowerya oweha omala wa olumwenku ola wootakhala kihinatthi okhwa?” Tthiri ninninkheliwa ophiya nihiku nenlo Muluku onrowa awe omaliha mixankiho sinniphwanya vano ni opaka itthu isya. (Wis. 21:5)

2. Makoho xeeni anilavula sa opixa murima oniixuttihiwa ahu ni Muluku anrowa ahu othokorerya?

² Hata vari siiso Biibiliya onnihimya wira nihaana ovilelaka. Ntoko arumeyi a khalai nihinatthi hiyo, ninrowa waakhela itthu Muluku onilaihenrye awe akhala wira nookhalana nroromelo noolipa, ni owehereryaka moopixa murima okathi onkela aya waakhwaniheriwa anatiri awo. (Mmusome aHéberi 6:11, 12.) Mwaneene Yehova, onnivikaniha opixa murima. Owo anwerya omaliha sootakhala okathi ovinre khalai, masi oniwehererya okathi woophwanelela. (aRom. 9:20-24) Xeeni owo onivikaniha awe opixa murima? Nave moota xeeni Yesu oryaawe ntakiheryo nooloka na ovilela, ntoko Muluku onooniherya awe? Mareeliho xeeni aniphwanya ahu naapixaka murima? Waakhuliwa wa makoho ala onoonikhaliherya olipiha opixa wahu murima, nroromelo, pooti okathi onoona ahu okhalaka wira Yehova onoopisa.

XEENI YEHOVA ONOONIHERYA AWE OPIXA MURIMA?

3, 4. (a) Nthowa xeeni Yehova onooniherya awe opixa murima vaavo onaakhwaniherya awe yoolakela awe ni elapo ela? (b) Nto Yehova oonenle sai ohiiwelela waakhumelenle wEdeni?

³ Yehova ohaana mathowa animwiiriha opixa murima. Ekeekhai wira Yehova torina okhulupale wotheene wa olumwenku; masi omwareya wiiranen’ ye wEdeni onnikumiherya makoho maalupale molumwenkuni motheene. Nto, vanitthuneya wira Yehova apixe murima wira aakhule moomalela makoho awo yaakumiheriwe. Okhala wira owo onnisuwela oratteene miteko sa atthu ari wiirimu ni ale ari valaponi, tthiri owo onnipaka sotheene mmukhalelo onniphwanyiha mureerelo.​—aHéb. 4:13.

⁴ Yoolakela ya Yehova yaari wira anamwane a Adamu ni Eva esareye elapo ya vathi. Nuumala Satana onwoka Adamu ni Eva, Yehova khaahin’ ye yoolakela awe. Owo khaaxankihen’ye aahiiso ohoona yoopaka wala waanyanyala apinaatamu. Ohiya vo, aahipaka etthu wira awerye waakhwaniherya yoolakela awe voohimya sa apinaatamu ni Elapo. (Yes. 55:11) Wira aakhwaniherye yoolakela awe ni ovuwiha okhulupale awe, Yehova onniipasoopa oratteene vaavo onipixa awe murima nnaamwi vatthuneyaka owehererya ovira iyaakha ikontosene wira yoolakela awe ekhumele saana.

5. Mareeliho xeeni aniphwanya ahu mwaha wa opixa murima wa Yehova?

⁵ Etthu ekina enimwiiriha Yehova opixa murima, mwaha woowi oniphavela wira atthu anceene ephwanye okumi woohimala. Nenna-va, onnipaka mareheryo wira oopole “muttitthi mulupale”. (Wis. 7:9, 14; 14:6) Yehova onnaaphwanya atthu orweela mwa muteko ahu woolaleerya, vaavo nnaalattula ahu wiixutta malamulo a Omwene awe. Mihupi sa Omwene, ti siri ihapari sootepexa oreera wa apinaatamu otheene; tthiri, iyo “ihapari sorera”. (Math. 24:14) Mutthu yoole onithanliwa ni Yehova wira iirele mpantta muloko awe wa olumwenku wotheene, owo onnaaphwanya apatthani oophenta anipaka itthu sooloka. (Yoh. 6:44-47) Muluku ahu oophenta, onnaakhaliherya atthu awo wira ekhale apatthani awe. Nave-tho, onnaathanla atthu akina wira yalamuleleke wiirimu. Orowa waya wiirimu onowiiriha okhalana eparakha ya waakhaliherya apinaatamu valoponi ophwanya okumi woomalela. Nnaamwi awehereryaka moopixa murima, Yehova nlelo onivara muteko wira aakhwaniherye yoolakela awe.

6. (a) Yehova oonihenrya sai opixa murima mahiku a Nowe? (b) Nto Yehova onooniherya sai opixa murima mahiku ahu ala?

⁶ Yehova toopixa murima pooti apaciwaka vanceene; ntoko niwenhe ahu moota Yehova aaphukenle awe atakhali okathi wa Epula ya Mutaaseke. Elapo yaahisareya otakhala, orupihana woohiloka, nto Yehova ‘murima waahinwereya’ mwaha wa otakhala wa pinaatamu. (Maph. 6:2-8) Owo khaarowa ohiya sootakhala sivikanihaka, nto aahiruuha epula ya mutaaseke wira aahonone atthu oohiiwelela. Vaavo Muluku ‘awehererya awe n‘uvilela’ okathi wa mahiku a Nowe, Yehova aahipaka malokiheryo wira amoopole Nowe ni emusi awe. (1 Ped. 3:20) Okathi woophwanelela Yehova aahimuleela Nowe etthu aakela awe opaka, nto khimuruma omuteka pakiti. (Maph. 6:14-22) Nave-tho, Nowe ‘anilaleya exariya’ ’wa anamwattamanana awe voohimya sa ohononiwa wa atakhali. (2 Ped. 2:5) Yesu oolavula wira mahiku ahu ala anlikana ni mahiku a Nowe. Yehova oothanla nihiku ninrowa awe omaliha sootakhala. Khuuvo onsuwela “nihiku wala okathi” onirwa aya wanikisa wa olumwenku ola. (Math. 24:36) Nto okathi ola, nihaana onvarela muteko Yehova naalopolaka atthu ni waakhaliherya wa moota ontthuna aya woopowa nihiku nlo.

7. Niireke Yehova toopisa waakhwaniherya soolakela sawe? Mutthokiherye.

⁷ Vanniweheya wira, opixa murima wa Yehova khontaphulela wira oniwehererya ovira okathi paahi. Nave tho, nihuupuweleke wira opixa murima wa Yehova ontaphulela wira khonaacalela atthu. Tthiri pooti okhala vooxankiha okhalana muupuwelo owo, mwaha wa mixankiho sa olumwenku ola wootakhala ntoko wuuluvala. Hiyo pooti woonaka wira soolaiherya sa Muluku sinoopisa wiiraneya. (aHéb. 10:36) Muhiliyale wira, opixa wawe murima weiwo oniiriha ovira okathi, onnaaphwanyiha mureerelo arumeyi awe. (2 Ped. 2:3; 3:9) Nkahaya nithokorerye opixa murima wa Yesu.

YESU OVANHE SAI NTAKIHERYO NOOLOKA NA OPIXA MURIMA?

8. Itthu xeeni Yesu aavilenle awe?

⁸ Yesu onnisiveliwa opaka yootthuna ya Muluku, owo onnipaka eyo etthu yowiiraka iyaakha imilyau sinceene. Okathi Satana aamurukunuwenle awe Yehova, nto owo aahoona wira vaaloka omuruma Mwanawe mmoseene wira arowe valaponi ntoko Mesiya. Nkahaya muupuwele wira Yesu ahaana owehererya ikonto sinceene sa iyaakha wira ophiye okathi woorowa valaponi. (Mmusome aGalasia 4:4.) Owo khahiyo arokilaathi paahi awehereryaka okathi ophiya, masi aaniluttuweliwa ni ovara miteko aarummwe awe ni Tiithi awe. Nto, nuumala orwa valaponi, owo aahisuwela wira aarowa okhwa mmatatani mwa Satana ntoko vaahimmwale aya vahinatthi. (Maph. 3:15; Math. 16:21) Aiwelelaka yootthuna ya Muluku, moopixa murima aahivilela owereya wuulupale. Owo aahooniherya ororomeleya wuulupale. Owo khahiyo aaphavela okhulupale aahiiso ophwanya mureerelo awe.​—aHéb. 5:8, 9.

9, 10. (a) Exeeni Yesu aapaka awe okathi aamulipelela awe Yehova opaka siniphavela awe? (b) Nooneleke sai okathi Muluku onithanla awe?

⁹ Nuumala Yesu ohihimuxiwa, aahivahiwa okhulupale wiirimu ni valaponi. (Math. 28:18) Yesu onnirumeela okhulupale owo wira aakhwaniherye yootthuna ya Yehova moovarihana ni okathi wa Muluku. Moopixa murima, Yesu aahilipelela aryeene moono woolopwana wa Muluku awehereryaka eyaakha ya 1914 wira aanyakele awanani awe. (Esal. 110:1, 2; aHéb. 10:12, 13) Moohipisa onkela opwetexa olumwenku ola wootakhala wa Satana. Okathi mmosaru Yesu onkela ovaraka muteko ni atthu, ‘aholaka wehimeni, ori màsi èkumi’.​—Wis. 7:17.

¹⁰ Munniweha moota woomutakiha Yesu, wira mukhalane moonelo wooloka voohimya sa moota Yehova onirumeela awe okathi? Yesu khaaxankiheya, masi aanipaka sotheene Tiithi awe aamuruma awe opaka awehereryaka okathi wa Muluku. Vaavo nniwehererya ahu wanikisa wa olumwenku ola wa Satana, nihaana omutakiha Muluku okhala oopixa murima; nto nihikhala-khale naakuvihaka soolakela sa Muluku, wala otthikela ottuli. Nto nipakeke exeeni wira nikhale oopixa murima?

KINROWA OPIXA SAI MURIMA NTOKO YEHOVA?

11. (a) Ovarihana xeeni orina aya waamini ni opixa murima? (b) Exeeni enniiriha okhalana nroromelo noolipa?

¹¹ Yesu ahinatthi orwa valaponi, maprofeta ni arumeyi akina oororomeleya, ahooniherya wira apinaatamu oohimalela anniwerya ovilela. Tthiri vanniweheya ovarihana orina aya waamini ni opixa murima. (Mmusome Yakobo 5:10, 11.) Niireke wira atthu awo yahaamini ele Yehova aahimya awe, wala oyeleela waamini waya, awo yanwerya olipelela waakhwanihereya wa anatiri a Muluku? Khula okathi, awo yaanihaawa mixankiho sinceene seeherenrye waamini waya, masi yaanimuroromela Muluku wira yoolakela awe yaarowa wiiraneya. (aHéb. 11:13, 35-40) Nto nookhalana mathowa aniiriha waamini wira vano Yesu Mulipa onimaleliha waamini wahu. (aHéb. 12:2) Yesu ohaakhwaniherya iprofesia ni ohooniherya soolakela sa Muluku mmukhalelo onnivaha waamini wuulupale.

12. Nipakeke exeeni wira nilipihe waamini wahu?

¹² Inamuna xeeni nikhanle ahu oolipiha waamini, ni opixa wahu murima? Nnoowerya opaka eyo akhala wira nnimwiiwelela miruku sa Muluku! Mwa ntakiheryo: nyuwo muhaana owehaka nthowa naya vanitthuneya aya ohela nipuro noopacerya mookumini mwahu Omwene wa Muluku. Munoonela sai, munniwerya wiiwelela miruku siri mMatheyo 6:33? Nto eyo enitaphulela ovukula itthu sinivara anyu, wira murumeeleke okathi munceene mulaleeryaka. Muhiyeveehe moota Yehova onireeliha awe wiimananiha wanyu mpakha vano. Waaniheryasa owo ohookhaliheryani nto khumphwanya mutthu oomusomiha Biibiliya, wala muhaakhela “murettele wa Muluku, onvikana osuwela wa mutthu”. (Mmusome aFilipi 4:7.) Vaavo nyuwo munivarexexa anyu mareeliho aniphwanya anyu, mwaha wa otthara malakiheryo a Yehova, nto munrowa wunnuuheryaka opixa wanyu murima.​—Esal. 34:8.

13. Ninrowa olikanyiha sai wunnuuherya waamini wahu ni opixa murima?

¹³ Opixa murima, onlikana ni olima, waala mmiso, ni ohepha. Okathi mulipa oolima onihepha awe ipyo sinceene, owo onnikupali-tho wira ohaana waala mmiso okathi onittharelana. Hata okathi owo orakamenleene, owo onnipixa murima nto orumeelaka mmiso ohemphe awe, owo onincererya waala epantte ekina ya ematta awe ovikana khalai. Owo onnipaka eyo mwaha wookupali wira onoohepha ipyo sinceene. Moolikanasa, akhala wira ninnivikaniha ororomela malakiheryo a Yehova ni ovarihela muteko, ninrowa ottottela mureerelo; nto omuroromela wahu Yehova onrowa wunnuwa. Nave nroromelo nahu ninrowa wunnuwa vaavo vanrowa aya onikhweela owehereryaka ophiya wanikisa.​—Mmusome Yakobo 5:7, 8.

14, 15. Nooneleke sai mixankiho sinaakhumelela apinaatamu?

¹⁴ Enamuna ekina ya wunnuuherya opixa wahu murima, ori otokosa makhalelo a okumi ahu. Muhaana oweha itthu ntoko Muluku siniweha awe. Nkuupuwelani so: Yehova onoonela sai ohaawa wa apinaatamu? Owo onnoona othunku apinaatamu yaahaawaka ni oxankiheya mwaha wa waavila opaka itthu sooloka. Nto owo oomuruma Mwanawe mmoseene wira “apwetexe miteko sa Satana”, ni omala-maliha maxakha otheene anaaphwanya apinaatamu. (1 Yoh. 3:8) Neekeekhai, ohaawa wotheene onoomala, masi miteko sa Muluku sinrowa ovikanihaka okhala. Moolikanasa, nivikaniheke osyaka ohapuxiwa ni olamulelo ola wootakhala wa Satana, nto nihooneke opisa ophiya wanikisa, masi, nilipiheke nroromelo nahu niwehaka itthu soohimala seiyo nlelo sihinooneya. Yehova onnisuwela saana okathi woomaliha sootakhala, nave onkela omala-maliha waphiya okathi.​—Yes. 46:13; Nah. 1:9.

¹⁵ Mahiku ala ookiserya ni ooxankiha, hiyo pooti oniphwanya mixankiho sineehererya waamini wahu. Nto itthu iyo saniphwanya, wala saaphwanya ale anaaphenta ahu, nihikhaleke oonanariwexa mwaha wa sootakhala iyo, masi nivikaniheke omuroromela vanceene Yehova. Okhala wira naatthu oohimalela khivanikhweya okhala oowiimaaliha. Masi nkahaya muupuwele etthu Yesu aapanke awe, masu ari mMatheyo 26:39.​—Mmusome.

16. Itthu xeeni sinitthuneya ahu osyaka okathi ola ohanle?

¹⁶ Etthu enrowa onikhaliherya wira nikhale oopixa murima ntoko Muluku, ori okhala atthu oowerya olipelela. Eyo enitaphulelani? Niire so: mutthu yoole onipacerya woona opisa wanikisa, onnaapaka apalano ahinivarihana ni Yehova. Owo pooti olavula so: ‘kinimoonaka akhala wira tthiri masu olavunle awe Yehova animwiiraneya’. Nto mutthu owo anaphavela wiivuwiha paahi mulaponi-mu, ophavela muhakhu, ororomela osoma oniversidade wira ophwanye opuha wa okumi wa vano, nto khiyahiya ororomela Omwene wa Muluku. Nto opaka eyo khahiyo ethoonyeryo ya othoiwa waamini? Muupuweleke wira Paulo aahinitumererya waatakiha alipa owaamini yaawo yaakhenle soolaiherya sa Yehova mwaha wa ‘wamini ni ovilela’. (aHéb. 6:12) Moovarihana ni yoolakela ni okathi Yehova onoona awe oreerela, owo khanrowa ohiya olumwenku ola wootakhala ovikanihaka okhala. (aHéb. 2:3) Nto nihimurumeeleke Yehova mookhummwa murima paahi. Masi nihaana ovikaniha ovaraka muteko mowiilipiha saana nilaleeryaka ihapari sooreera, seiyo sinnihakalaliha vanceene olelo va.​—Luka 21:36.

MAREELIHO XEENI ANIKHUMELELA MWAHA WA OPIXA MURIMA?

17, 18. (a) Vano mureerelo xeeni orina ahu wa wooniherya opixa wahu murima? (b) Mareeliho xeeni aniphwanya ahu mwaha wa opixa murima vano?

¹⁷ Pooti yaale apacenrye omurumeela Muluku myeeri sivinre vakhaani, wala aniiriha iyaakha miloko sinceene, otheene ahu niphaveleke omurumeela mahiku otheene. Opixa murima onniniiriha ovilela wira noopowe, moohicikha okathi onihala wira sootakhala iya simale. Ola okathi Yehova onnivaha awe wira nooniherye omuroromela wahu ni murima wotheene mwa soopaka sawe. Nto akhala wira vanitthuneya ohaawa ninrowa ohaawa mwaha wa nsina nawe. (1 Ped. 4:13, 14) Nave Muluku onooniixuttiha wira nikhaleke atthu oopixa murima wira noopowe.​—1 Ped. 5:10.

¹⁸ Yesu oovahiwa owerya wa okhulupale wiirimu ni elapo ya vathi, nave khiivo enrowa owooceelihani okhapeleliwa nuuwo. Mutthu mwaneene tonithanla. (Yoh. 10:28, 29) Nto khivantthuneya-tho woova itthu sa muhoolo wala omoova naakhwa. Yaale anrowa ovilela mpakha wanikisa, animoopowa. Nto nihaana wiikasoopa wira olumwenku ola ohiniwoke, nave wira nihihiye omuroromela Yehova. Masi, nikhale oowiilipiha wira ninnuuherye waamini wahu, ni orumeela mwa miruku okathi ola wa opixa murima wa Muluku.​—Math. 24:13; mmusome 2 Ped 3:17, 18.

[Elatarato epaaxina 18]

[Ilatarato siri epaaxina 21]

[Elatarato epaaxina 21]

Otakiha opixa murima wa Muluku, onninikhaliherya owehexexa soophavela sa Omwene ni waakhela mareeliho!