Nipixeke Murima mMuteko Ahu Woolaleerya
1. Moota xeeni Yehova onooniherya awe opixa murima?
1 Okhuma khalai, Yehova onnaapixerya murima vanceene apinaatamu. (Okhum. 34:6; Esal. 106:41-45; 2 Ped. 3:9) Ntakiheryo nuulupale nnooniherya opixa wawe murima, ori olaleiwa ihapari sooreera sa Omwene elapo yotheene. Hata sivinre ene iyaakha sowiiraka 2.000, Yehova onnivikaniha waakhaliherya atthu aniphavela omurumeela. (Yoh. 6:44) Ninrowa otakiha sai opixa murima wa Yehova mmuteko woolaleerya?
2. Ninrowa wooniherya sai opixa murima naalaleeryaka?
2 Olaleerya Khuta Empa: Ninnitakiha opixa murima wa Yehova, nilaleeryaka ‘mohihiyererya’ mapuro yaale atthu akina ahiniphavela aya wiiwa masu a Muluku. (Mit. 5:42) Ninnivilela ohicaleliwa, oveehiwa, ni onyokhiwa. (Mar. 13:12, 13) Nave-tho, ninnipixa murima vaavo vaniimananiha ahu waaxukurya ale anisiveliwa ekeekhai, hata itthoko soovila waaphwanya atthu.
3. Efaita xeeni erina aya opixa murima naaxukuryaka atthu ni wiiriha soosoma sa Biibiliya?
3 Wiiriha Soosoma sa Biibiliya: Owehererya epyo wunnuwa, onitthuneya opixa murima. Hiyo pooti okhapelela epyo eyo, masi khaninwerya wunnuwiha. (Yak. 5:7) Moolikana ni epyo, mutthu onisomihiwa Biibiliya oniixutta vakhaani-vakhaani. (Mar. 4:28) Ale anaasomiha ahu, pooti waavilaka ohiya sowiixuttiha sa etiini yoowoka, wala itthu sihinivarihana ni Biibiliya. Nihaakhanyereryeke atthu anaasomiha ahu Biibiliya ohiya sookupali saya. Nihaana opixa murima vanceene wira munepa wa Muluku omukhaliherye ole onimusomiha ahu Biibiliya.—1 aKor. 3:6, 7.
4. Moota xeeni opixa murima onnikhaliherya aya waalaleerya amusi oohaamini?
4 Amusi Oohaamini: Nnaamwi niphavelaka vanceene wira amusi ahu oohaamini yiixutte ekeekhai, nihaana opixa murima nlipelelaka okathi onireerela waalaleerya. Nto, nihaahimeeryeke itthu sinceene ekwaha emosa. (Mus. 3:1, 7) Masi, mweettelo ahu okhaleke tonaalaleerya moohilavula etthu, naattittimihaka vanceene. (1 Ped. 3:1, 15) Tthiri, opixa murima mmuteko ahu woolaleerya onookumiherya mireerelo ni omuhakalaliha Yehova.