Khamunsuwela Nihiku, Nnákhala Okathi Ene

‘Nwehereryeke, okhala wira khamusuwenle nihiku, nnákhala okathi onrwawe Mwana a Mutthu’.​—MATH. 25:13.

MUNROWA WAAKHULA SAI?

Mireerelo xeeni siniphwanya ahu mwaha woohisuwela nihiku ni okathi oniphiya aya wanikisa wa olumwenku?

Moota xeeni maKristau oothanliwa anivikaniha aya okhala oowehaweha?

Ninkela wooniherya sai wira nihiitthokiha mpakha orwa wa Kristu?

1-3. (a) Myaha xeeni miili sinooniherya iponto piili saalavuliwe ni Yesu? (b) Makoho xeeni anitthuneya ahu waakhula?

NKUUPUWELANI, vaakhanle wira mukhulupale oottittimihiwa onoovekelani wira mmukuxe mukaaroni mwanyu, wala vamootani wira arowe omuthukumanoni onkela awe ovahiwa okhulupale. Sihalaka minutu vakhaani wira mwamukuxe, nyuwo muhuupuwela wira kasolina oomala mutankini. Nto nyuwo khiyatthimaka orowa omuthuma. Vano mukhumakaru siisaale, mutokweene owo onniphiya. Owo onniwehaweha opuro ole ahinawoonani. Khaniphavela-tho woolipelelani, vano khimwaavya mutthu mukina anakhuma. Okathi onihokolowa anyu khamunimpwanya, owo ookhuma. Nto mwaarowa woonela sai?

² Vano haya muupuwele-tho so, aakhanle wira nyuwo mwa mukhulupale yoole, nto muhaathanla alopwana araru oophwanelela wira eweetteke anakoso anyu. Nyuwo muhaalakiherya atthu awo, ni yeemererya. Masi okathi ontthika anyu, munaaphwanya anli paahi evanre ene muteko saana ntoko siniphavela anyu. Nto namuteko a neeraru, khavanre etthu, hata weererya; etthu yootepa onanara owo onnipacerya woovahani nthowa. Nyuwo mwaarowa woonela sai?

³ Matakiheryo a Yesu voohimya sa aximwali ni italento wala musurukhu, owo aahirumeela mukhalelo woolikana wira atakiherye mahiku ookiserya a maKristau oothanliwa yaarowa aya weehereriwa ntoko murumeyi oororomeleya ni ankhili; masi akina khiyaawenrye.a (Math. 25:1-30) Owo aahittittimiherya eponto ene ariki: “Nwehereryeke, okhala wira khamusuwenle nihiku, nnákhala okathi”, eyo piiyo okathi Yesu oniruuha awe maphukelo a Muluku wa olumwenku ola wa Satana. (Math. 25:13) Miruku iyo sinoowerya onikhaliherya olelo-va. Masi mareeliho xeeni ankela ahu ophwanya navikaniha okhala oowehaweha, ntoko Yesu otumerenrya awe? Tani oonihenrye okhala oolikaneene wira oopowe? Exeeni enitthuneya ahu opaka vano, wira nivikanihe okhala oowehaweha?

MIREERELO SINIKHUMELELA NAAVIKANIHAKA OWEHAWEHA

4. Nthowa xeeni okhala oowehaweha ohinitaphulela aya owehaka okathi wa eroroce?

⁴ Miteko sikina ntoko ovara ofaabrika, orowa wa meediku oxipitali, wala onwela karera, sotheene iya sinitthuneya otthara eprograma ya okathi othanliwe. Miteko sikina ntoko mabombeiro anittipiha mooro, owoopola atthu nuuvira ehasara, sotheene iyo sinitthuneya ephoole. Nto oweha eroroce mutthu ovaraka miteko iyo pooti okumiherya maxakha. Miteko sa owoopola atthu khisinveka otthara eprograma wala eroroce. Nto, okhala wira onnaattamela ophiya wanikisa, miteko sa Yehova sa owoopola atthu ti sootepexa otthuneya vano. MuKristau okhala oowehaweha, khonitaphulela, oweha okathi wa eroroce. Vano, sookhala mireerelo mithanu sinniiriha ohakalala mwaha woohisuwela okathi ene ni nihiku onimala aya olumwenku ola wootakhala.

5. Nthowa xeeni ohisuwela nihiku ni okathi onnikhaliherya aya osuwela mukhalelo wa murima ahu?

⁵ Mureerelo woopacerya: Ohisuwela nihiku ni okathi onimala aya olumwenku ola, onnooniherya etthu eri vamurimani vahu. Nto, ohisuwela nihiku nno, onninivaha ehakhi, wira nirumeeleke otaphuwa wahu wira nooniherye omuroromela wahu Yehova. Nnaamwi niwehereryaka woopoliwa wanikisa wa olumwenku ola wootakhala, hiyo nimmurumeela Yehova mwaha wa omphenta ohiya mwaha wa ophwanya okumi paahi. (Musome Esalimo 37:4.) Ninnihakalala wettela otthuna wa Muluku, nave ninnisuwela wira owo onniniixuttiha wira nittottele mureerelo. (Yes. 48:17) Malamulo awe khanvila weettela.​—1 Yoh. 5:3.

6. Yehova onoonela sai naamukokhorelaka moophenta, nto nthowa xeeni?

⁶ Mureerelo wa nenli: Ohisuwela nihiku wala okathi onninivaha eparakha ya ohakalaliha murima wa Yehova. Omurumeela wahu Yehova moophenta ohiya ophavela okumi paahi, onnimukhaliherya Yehova onvaanya nwanani Satana. (Yobi 2:4, 5; musome Miruku 27:11.) Wuupuwela maxakha, ni owereya wotheene Diabo okumihenrye awe, onniniiriha waakiherya moohakalala okhulupale wa Yehova, ni okhootta olamulelo wootakhala wa Satana.

7. Exeeni enookupalihani wira ophavela okhaliherya ti mweettelo wootthuneya?

⁷ Mureerelo wa neeraru: Omurumeela Yehova nihisuwenle nihiku wala okathi onirwa aya wanikisa, onninikhaliherya wiimananihaka mookumini mwahu. Atthu akina olelo-va ahinimusuwela Muluku, anoona wira olumwenku ola khonrowa ovikaniha okhala. Mwaha wa woova okhumelela ehasara yuulupale, awo arina muupuwelo woowi: “Nilyeke,niwuryeke, okhala wira melo nnimokhwa!” (1 aKor. 15:32) Masi hiyo khannoova. Nto, nilipiheryeke wataana ni anna, ni osyaka waakhalela nrima wala opaka itthu sinnisivela paahi. (Mir. 18:1) Ohiya-vo, ninniimananiha orumeela okathi ahu, ikuru sahu, ni itthu sikina wira naalaleerye atthu ihapari sooreera sa Omwene wa Muluku. (Mmusome Matheyo 16:24.) Ninnihakalala omurumeela Muluku, vaavo nnaakhaliherya ahu akina omusuwela.

8. Matakiheryo xeeni ari mBiibiliyani, anooniherya wira nihaana omuroromelaka saana Yehova ni Nuulumo nawe?

⁸ Mureerelo wa neexexe: Ohisuwela nihiku ni okathi, onninikhaliherya omuroromela vanceene Yehova, ni ovikaniha weettelaka Nuulumo nawe. Mwaha woottheka, hiyo onaakuvela ororomela murima ahu. Paulo ahaatumererya maKristau ariki: ‘Ole onòna wira ohèmela aìpasope wira ahimoré‘. Ohalaka okathi vakhaani wira anaIsarayeli akele elapo yaleiheriwa aya ahooleliwaka ni Yoxuwa, akina oowiiraka 23. 000 yaahiyeleela okela Elapo eyo. Paulo onihimya so: ‘Itthu iya sothene sahilempwa wira sinlopole hiyo, okhala wira omala wa mahiku onnattamela’.​—1 aKor. 10:8, 11, 12.

9. Moota xeeni mixankiho sinilipiha aya wataana wahu ni Muluku?

⁹ Mureerelo wa neethanu: Ohisuwela nihiku ni okathi ene, onnikhaliherya olipiha waamini wahu. (Musome Esalimo 119:71.) Mahiku ala ookiserya, tthiri “mahiku òxanka”. (2 Tim. 3:1-5) Anamunceene ari elapo ela ya Satana, annininyokha, ni olupattha waamini wahu. (Yoh. 15:19; 16:2) Akhala wira ninniiyeveiha, ni wiiwelela malakiheryo a Muluku okathi wa mixankiho, nroromelo nahu ninrowa olipiheya wira nihimore okathi wa mixankiho. Hiyo khanintthikela ottuli. Masi, ninnimananiha otepa wataana ni Yehova ovikana khalai.​—Yak. 1:2-4; 4:8.

10. Exeeni eniiriha woonaka okathi waakuva ovira?

¹⁰ Ovikaniha owehaweha ononiiriha ohoonaka opisa ophiya wanikisa. Vaavo vanaatteliwa ahu miteko, khahiyo vooloka omakela oweha eroroce, maana okathi onnimala mowaakuveya. Moolikanasa, akhala wira ninrowa oluttuweliwa ni muteko Yehova onivanhe awe, nihiku nno ni okathi ene, onkela ophiya mootutuxerya. MaKristau oothanliwa anceene, aavaha ntakiheryo nooloka mmwaha ola. Nkahaya nuuluule vakhaani ele yaakhumelenle nuumala Yesu okhalihiwa Mwene eyaakha ya 1914, nave noone moota awo yaari aya oororomeleya, nnaamwi akina yahaawenrye.

MAKRISTAU OOTHANLIWA AHOONIHERYA OROROMELEYA WAYA

11. Nuumala eyaakha ya 1914, nthowa xeeni anna akina oothanliwa yoona aya wira Pwiya aanipisa?

¹¹ Muupuwele ntakiheryo na Yesu voohimya sa aximwali ni italento. Vaakhanle wira aximwali ale ni arumeyi ale yaahisuwela nihiku Pwiya aya onirwa awe, awo khiyaarowa otthuneya okhala oowehaweha. Masi awo khiyaasuwela, nto yahaana okhala oowiilokiherya. Nnaamwi maKristau oowoottihiwa wala oothanliwa yaawehexexa mwaakha wa 1914 okhala muulupale, awo khiyaasuwela saana itthu saarowa okhumelela. Vaavo vaakhala aya ntoko wira itthu khisaarowa wiiraneya ntoko yaawehererya aya, nto vaakhala wira Mulipa oothela ampisa orwa. Munna mmosa aahilavula ariki: “Akina a hiyo, noona wira ninrowa wiirimu wanipacerya wa esumana ya Outubro ya 1914”.

12. Moota xeeni anna oothanliwa yoonihenrye aya okhala oororomeleya ni ankhili?

¹² Nkahaya muupuwele moota atthu ale yaaxankale aya, mwaha wa ohiphiya wanikisa wa olumwenku okathi yoole! Nave-tho, anna ale yaahilupatthiwa okathi wa Ekhotto Yoopacerya ya Olumwenku. Nto mwaakha wa 1919, awo yahivenxiwa mwiikhoveni! Yesu aahirowa mpaani mwa Muluku, nto owo waari okathi wowaavarerya maKristau oothanliwa. Akina yaahiyeleela ovikaniha okhalana eparakha ya weettihaka ‘mihakhu’ sa Mwene. (Math. 25:16) Nto awo yaakhala ntoko atthu oothoiwa miruku; nto khuhihela makhura muxamaniyani mwaya ntoko aximwali ale oololo. Nave tho ntoko Murumeyi ole oolosowa nto awo khiyaaphavenle ohiya miteko saya wira ekhaliherye omwene. MaKristau anceene oothanliwa yaahivikaniha okhala oolipiha nroromelo naya wira emurumeele Pwiya hata okathi yoole wooxankiha wa ekhotto.

13. Muupuwelo xeeni yaarina aya maKristau oothanliwa eyaakha ya 1914, nto olelo-va arina muupuwelo xeeni?

¹³ Nuumala eyaakha ya 1914, A Sentinela (Owehaweha) yaahilavula masu ala a efaita yuulupale: “Anna yaale ari ni hiyo, arina mweettelo woophwanelela ohoolo wa Muluku, khantthikela ottuli voohimya sa mareheryo a Muluku. Hiyo khanimphavela opaka yootthuna ahu. Nto, vaavo moovonyeya naawehererya ahu wira naamurowa wiirimu mweeri wa Outubro eyaakha ya 1914, hiyo nahihakalala osuwela wira Pwiya ahu khaahiiye onikhaliherya. Nave khinaaphavela wira ahiye onikhaliherya. Masi naaphavenle osuwela ipalano sawe ni soolaiherya sawe”. Mweettelo ola wa wiiyeviha, ni wiivahererya, nlelo onniweheya wa alipa oothanliwa a Pwiya. Awo khanihimya wira anuupuxeriwa ni Muluku ntoko maprofeta a khalai, masi anneemererya weettiha ‘mihakhu’ sa Pwiya siri valaponi. Nto vano, “muttitthi mulupale” wa “ipwittipwitthi sikina”, wala maKristau arina nlipelelo na okhala valaponi, annitakiha mweettelo ola wooluttuweliwa ni owehaweha.​—Wis. 7:9; Yoh. 10:16.

NOONIHERYE OKHALA ATTHU OOWIILOKIHERYA

14. Wataana saana ni murumeyi ororomeleya a Muluku yoowo onivaha yoolya onnikhaliherya sai?

¹⁴ Yaatakihaka maKristau oothanliwa, anna a muttitthi muulupale, annaataana saana ni murumeyi oothanliwa ni Muluku wira ekaweleke yoolya ya omunepani. Nto awo anikhala ntoko wira anihela makhura mithuko saya sa omunepani, eyo piiyo, Nuulumo na Muluku. (Musome Esalimo 119:130; Yoh. 16:13.) Nto nuumala wiilipiha, annooniherya okhala oowiitthokiha alipelelaka okathi Kristu ontthika awe wira ephwanyiwe eryeene oolipa hata elupatthiwaka. Mwa ntakiheryo: Nipuro nimosa maNazista yaatthukwela aya atthu, wanipacerya anna yaarina Biibiliya mmosa paahi. Nto awo yaanivekela wira ekhalane yoolya yomunepani. Mowaakuveya awo yaahisuwela wira ohoorwa munna mmosa oorakala aavariwe yoowo aaruuhale erevista Owehaweha, yeeyo aahenle awe muhina mwa mwetto awe wa ethaapwa. Munna mmosa mwa yaale yooponwe mukhatteya mme aari Ernest Wauer yoowo ori oowoottihiwa, owo onihimya so: “Yehova aaninikhaliherya mmukhalelo wootikiniha wira nuupuweleke myaha soolipiha saatonko ahu osoma”. Owo onnivikaniha oriki: “Mahiku ahu ala, ti vootepa okhweya ophwanya yoolya yomunepani, masi niireke wira ninnivaha efaita yoolya eyo?” Kinnikupali wira Yehova onnaavaha yoolya yomunepani yinceene yaale animuroromela, wira elyeeke vameesa vawe.”

15, 16. Moota xeeni munna ni murokora athelanne yaareelihiwe aya mmuteko aya woolaleerya, nto nyuwo muniixutta exeeni?

¹⁵ Nave ipwittipwitthi sikina sinnilipiherya ovara muteko wa Pwiya vaavo sinaakhaliherya aya axinnawe Kristu. (Math. 25:40) Moovirikana ni murumeyi yoole a ntakiheryo na Yesu ahaavanre muteko aarummwe awe, maKristau ekeekhai anniimananiha okhaliherya miteko sa Omwene erumeelaka mikhalelo saya sotheene. Mwa ntakiheryo: Jon ni Masako anamathelana yaawo yaalattuliwe okhaliherya ekrupu ya eChina elapo ya oKeniya, wanipacerya yaanoovelela. Masi nuumala ovekela ni othokorerya saana mwaha ole, awo yaahirowa okhaliherya oKeniya.

¹⁶ Awosa, yaahireelihiwa vanceene ni muteko yaavara aya. Nto awo anihimya wira: “Muteko woolaleerya nno, ti woohakalaliha vanceene”. Yaahipaceriha wiiriha soosoma sa Biibiliya thanu na piili. Nave awo annihimya sowiiraneya sikina soohakalaliha eriki: “Ninnimuxukhuru Yehova khuta nihiku mwaha wooniiriha orwa nno”. Tthiri aakhala anna ni arokora anceene yaawo anooniherya mukhalelo ola wa ovara muteko wa Muluku vanceene ewehereryaka ophiya wanikisa. Nkahaya nwuupuwele anna anceene yaale avinre Exikola ya Biibiliya ya Gileadi, nto khurowa muteko wa omisionaario. Nyuwo pooti osoma myaha sinilavula sa miteko iyo, ntoko mwaha oni: “Fazemos o Melhor Que Podemos”! oniphwanyaneya mwa A Sentinela 15 a Outubro 2001. Vaavo munisoma anyu myaha sa miteko sa mamisionaario, muupuweleleke moota mwaarowa anyu wunnuuherya muteko anyu wa Muluku wira munvuwihe ni mphwanye ohakalala.

VIKANIHANI OKHALA OOWEHAWEHA

17. Mureerelo xeeni oniphwanya ahu mwaha woohisuwela nihiku ni okathi onirwa aya wanikisa?

¹⁷ Nto, ohisuwela wahu nihiku ni okathi wa omala olumwenku ola wootakhala, woonivaha mareeliho manceene. Nto nihikhaleke ooxanka wala otthikela ottuli, masi nivikaniheke opatthana ni Yehova, Tiithi ahu oophenta vaavo ninvara ahu saana muteko awe. Nookoleke matata ahu wira nivareke muteko, nisyakaka ohapuxiwa; wira siiso nnoophwanya ohakalala nivaraka muteko wa Pwiya ahu.​—Luka 9:62.

18. Nthowa xeeni nihimphavela ahu ohiya waamini wahu?

¹⁸ Ninnaattamela nihiku noophukela na Muluku. Nto, khuuvo a hiyo oniphavela omunyoonyiha Yehova ni Yesu. Awo aanivaha eparakha yuulupale ya ovara muteko aya mahiku ala ookiserya. Mwaha woonivaha eparakha ela yuulupale ya muteko, ethoonyeryo ya oniroromela!​—Mmusome 1 Timótheyo 1:12.

19. Ninrowa wooniherya sai wira nihiitthokiha?

¹⁹ Nto otheene ahu, pooti okhala anna anrowa wiirimu, wala ale anrowa waakhela eParayiisu valaponi, nivikaniheke ororomeleya nivaraka muteko ovahiwa ahu ni Muluku wowaapaka awiixutti. Nlelo khaninsuwela okathi nimphiya aya nihiku na Yehova; masi niireke vannitthuneya osuwela? Hiyo nihaana wiimananiha ovikaniha okhala oowiitthokiha. (Math. 24:36, 44) Ninnimuroromela tthiri Yehova ni okupali wira ohela opuro woopacerya Omwene awe, onoonivaha mareeliho.​—aRom. 10:11.

[Enoota]

[Elatarato epaaxina 26]

Hata okathi wa mixankiho mphaveleke yoolya ya omunepani

[Elatarato epaaxina 27]

Okathi onnivira mowaakuveya akhala wira ninvarexexa miteko sa eKristau