“Mulipiheryeke Wamini”

“Mulipiheryeke wamini, . . . mwilipiheke”.​—1 AKOR. 16:13.

ISIPO: 23, 34

MWAAROWA WAAKHULA SAI?

Xeeni waamini oryaaya etthu yootthuneyexa okhalana?

Exeeni enrowa onikhaliherya osuwela wira waamini wahu woopacerya ovukuwa?

Xeeni vanitthuneya ahu olipiha waamini wahu ninwehexexaka Yesu?

1. (a) Exeeni yaamukhumelenle Pedru okathi wa mwanamukhaya Ephareya ya oGalileya? (Nwehe elatarato yoopacerya.) (b) Exeeni yaamwiirinhe Pedru opacerya osama?

MURUMMWA Pedru ni awiixutti akina a Yesu yaamananiha olapuxa ekalawa aya Ephareya ya oGalileya okathi wa mwanamukhaya aakhumelenle ohiyu. Naananoru annimoona Yesu eettaka vasulu va maasi. Pedru onnimwiitthana Yesu, nto khiyanvekela wira omweemererye weetta vasulu va maasi orowaka vaari Pwiya awe ole. Okathi Yesu onimwiirela awe murweeke, Pedru onnikhuma mukalawani nto vamwiirirya onapacerya weetta vasulu va maasi oosareya mawimpi orowaka vaari Yesu. Nuuvira okathi vakhaani, Pedru onnipacerya osama. Nthowa xeeni? Owo aawenhe mawimpi, nto onapacerya woova. Pedru aahikhuwela onvekelaka nikhaliheryo Yesu, owo mowaakuveya aahikaphula ntata nawe khumuhimeerya so: “Nyuwo, mulopwana òwamini vakhani, muhoveryenle-ni?”​—Math. 14:24-32.

2. Ninrowa othokorerya exeeni muru ola?

² Nrowe nithokorerye itthu tthaaru sa yowiiraneya ya Pedru sinivarihana ni waamini: (1) moota xeeni Pedru oonihenrye awe ororomela nikhaliheryo na Muluku, (2) exeeni yaamwiirinhe Pedru opacerya oyeleela waamini wawe, ni (3) exeeni yaamukhalihenrye Pedru otthikela okhala oowaamini. Othokorerya iponto iya onoonikhaliherya woona moota nikhanle ahu ‘olipiherya wamini’.​—1 aKor. 16:13.

NIROROMELEKE NIKHALIHERYO NA MULUKU

3. Exeeni yaamwiirinhe Pedru okhuma mukalawani, nto moota xeeni nipanke ahu etthu yoolikana ni eyo?

³ Okathi Pedru aakhumme awe mukalawani oneetta vasulu va maasi, owo aapanke eyo mwaha wa waamini. Yesu aaromwitthana Pedru, nto owo ahaamini owerya wa Muluku wira wammukhaliherya ntoko saamukhaliherya aya Yesu. Vamosaru, vaavo hiyo vaniivahererya ahu wa Yehova ni obatiziwa, ninnooniherya waamini wahu. Yesu ooniitthana wira nikhale atthareli awe, nittharaka mavalo awe. Hiyo nihaana omwaamini Yesu ni Yehova, niroromelaka wira awo anoonikhaliherya mwa inamuna sinceene.​—Yoh. 14:1; mmusome 1 Pedru 2:21.

4, 5. Moota xeeni waamini oryaaya etthu yooreerela okhalana?

⁴ Tthiri waamini etthu yooreerela okhalana. Ntoko siisaale waamini waamwiirinhe aya Pedru owerya weetta vasulu va maasi, nave waamini wahu onoonikhaliherya opaka itthu sihiniweryaneya ovariwa ni apinaatamu mekhaya. (Math. 21:21, 22) Mwa ntakiheryo, anamunceene aattharuwa mweettelo ni sowiira saya sa khalai naananoru vanavila waasuwela atthu awo mwaha wa marukunuxo apanke aya. Yehova oonikhaliherya okathi waimananiha ahu opaka mirukunuxo iyo mwaha wa omwaamini wahu. (Mmusome aKolosi 3:5-10.) Nuumala waamini wahu oniiriha wiivahererya wa Yehova, naahipacerya okhala apatthani awe, nto hiyo khinaawerya opaka eyo ni ikuru sahu paahi.​—aÉf. 2:8.

⁵ Waamini wahu onnivikaniha onivaha ikuru. Waamini iwo onninikhaliherya owanana munyokhani ahu muulupale omunepani, Diabo. (aÉf. 6:16) Ohiya-vo, omwaamini wahu Yehova onninikhaliherya ovukula oxankiheya wahu okathi wa maxakha. Yehova onihimya wira vakhala wira waamini wahu onniniiriha ohela nipuro noopacerya miteko sawe, owo onrowa onikhaliherya ophwanya sotheene sinnithowa. (Math. 6:30-34) Ohiya-vo, mwaha wa waamini wahu, hiyo nnoowerya waakhela etthuvo yuulupale yeeyo mutthu ehiniwerya awe ophwanya ni ikuru sawe, eyo piiyo, ekumi yoohimala.​—Yoh. 3:16.

OHOVERYA KHONILIPIHA WAAMINI

6, 7. (a) Exeeni enlikana ni epheyo ni mawimpi yaamurukurenrye Pedru? (b) Xeeni vanireerela aya osuwela wira waamini wahu waakuva ovukuwa?

⁶ Epheyo ni mawimpi yaamurukurenrye Pedru okathi weetta awe vasulu va maasi pooti olikanyihiwa ni mixankiho ni soweeha sinniphwanya noomala wiivahererya wa Muluku. Hata mixankiho iyo sikhalaka suulupale, hiyo nnoowerya okhala oolipa nikhaliheriwaka ni Yehova. Musuweleke wira Pedru khaasamme mwaha wa epheyo wala mawimpi maalupale. Nkahaya mutthikele wuupuwelela etthu yaakhumelenle: “Nto, ònaka epheyo yatepa wopa, ahòva”. (Math. 14:30) Pedru aahihiya onwehexexa Yesu, nto waamini wawe waahivukuwa. Hiyo nnoosama vakhala wira nnoopacerya oweha “epheyo” ni owerya waya ni ohoverya wira Yehova onoowerya onikhaliherya.

⁷ Hiyo nihaana osuwelaka wira waamini wahu onoowerya ovukuwa, hata Biibiliya onnihimya ovukuwa wa waamini okhala “etampi ennipithela” wira enimoroxe. (aHéb. 12:1) Ntoko sinooniherya aya yowiiraneya ya Pedru, waamini wahu waakuva ovukuwa vakhala wira ninniwehexexa itthu soohikhalela. Masi exeeni enrowa onikhaliherya osuwela wira yookhala etthu enrowa ohonona waamini wahu? Nrowe nithokorerye makoho vakhaani anrowa onikhaliherya wiivarerya.

8. Moota xeeni sooleiherya sa Muluku sinrowa aya wooneyaka ohikhalana efaita ovikana soonela ahu khalai?

⁸ Kiireke vano kinniwoona anatiri a Muluku ohikhalana efaita ovikana khalai? Mwa ntakiheryo, Yehova ooleiherya wira onrowa opwetexa olumwenku ola wootakhala. Nto niireke vaamureerela weemererya ohapuxiwa ni itthekulelo sa olumwenku yoola sinihonona waamini wahu sooleiherya sa Muluku? Hiyo pooti opacerya wuupuwela wira wanikisa khokhanle vakhiviru. (Hab. 2:3) Nookhala ntakiheryo nikina. Muluku ooleiherya wira onrowa onilevelela itampi sahu orumeelaka mukuttho. Ankhi vakhala wira hiyo ninniivaha nthowa mwaha wa itampi sahu sa khalai, eyo khiyarowa wooniherya wira hiyo khannikupali wira Yehova ‘òttipiha’ itampi iyo? (Mit. 3:19) Eyo yaamuniiriha ohiya ovara miteko sa Muluku.

9. Exeeni yaarowa okhumelela vakhala wira nnoopacerya okhalela nthiti miteko sahu paahi?

⁹ Kiireke nlelo kinnikhalela nthiti muteko wa Muluku ntoko kiira aka khalai? Murummwa Paulo ahooniherya wira okhalela nthiti miteko sa Yehova onoonikhaliherya osuwelexa wira nnoophwanya ‘vomalela sorera sinwehereryahu’. Masi, exeeni yaarowa okhumelela vaakhanle wira noopacerya okhalela nthiti wiiphavelela mireerelo sahu paahi, ntoko waavya muteko oniliviwa musurukhu munceene masi ohinnivaha okathi wa ovara miteko sa Muluku? Waamini wahu wanvukuwa, nto hiyo naarowa okhala “òwòjeya” nto nipaceryeke woolowela muteko wa Yehova.​—aHéb. 6:10-12.

10. Nnooniherya sai omwaamini Yehova vaavo vanaalevelela ahu akina?

¹⁰ Kiireke miyo kinniimananiha waalevelela ale ankitthekela? Vaavo atthu akina annitthekela aya, hiyo waakuva okuxerya oruttu nnarowa waapwapwela wala ohiya olavulana atthu awo. Masi vakhala wira hiyo ninnaalevelela atthu akina, nnimooniherya omwaamini wahu Yehova. Moota xeeni? Ale annitthekela anikhala ntoko aroonikophela, ntoko siisaale hiyo nimukophenle ahu Muluku vaavo vanimutthekela ahu. (Luka 11:4) Vaavo vanaalevelela ahu akina, hiyo ninniroromela wira nnoophentiwa ni Muluku, okhala wira opaka eyo etthu yooloka ovikana orowa waavekela ale anitthekenle wira anilive. Awiixutti a Yesu yaanisuwela wira waalevelela akina onivekela waamini. Okathi waahimeeriwe aya wira yahaana waalevelela hata atthu yaale yaatthekela ikwaha sinceene, awo yaahimuxonttela Yesu ariki: “Munjererye wamini wahu”.​—Luka 17:1-5.

11. Exeeni ekhanle oonooceeliha wiiwelela miruku sa mBiibiliyani?

¹¹ Kiireke miyo kinneemererya miruku sinikhuma mBiibiliyani? Ohiya wiiwelela miruku ni ottottela mureerelo, hiyo waakuva woona wira miruku iyo khasilonke ni wira ole onnivaha miruku iyo khoniphwanelela. (Mir. 19:20) Wira siiso waamuniiriha oyeleela weereryaniha muupuwelo ahu ni muupuwelelo wa Muluku.

12. Mutthu yoole onimakela owaapa ale arummwale ni Yehova wira yaahooleleke atthu awe, onooniherya exeeni?

¹² Kiireke miyo kinniwaapa anna anihoolela mmulokoni? Okathi aIsarayeli yaiwelenle aya masu yaalavuliwa ni anamahottela ale oohaamini awo yaahipacerya omwaapa Moise ni Aroni. Tivonto Yehova aamukonhe awe Moise wira: “Mpakha lini anrowaya okhotta okikupali miyo?”. (Moth. 14:2-4, 11) Tthiri waapa wa aIsarayeli wooniherya wira khiyaamukupali Muluku yoowo aamuthanlale Moise ni Aroni. Vamosaru, vakhala wira khula okathi ninniikhupanyiha mwaha wa atthu Yehova anaaruma awe wira yaahooleleke atthu awe, khamunoona wira eyo enooniherya wira omwaamini wahu Yehova woovukuwa?

13. Xeeni vahinreerela ahu okhulumuwa vakhala wira ninnoona wira yookhala etthu enivukula waamini wahu?

¹³ Ekeekhai wira khivanireerela okhala ooriipiwa murima vakhala wira okathi oniivarerya anyu munnoona wira waamini wanyu woopacerya ovukuwa. Hata Pedru, yoowo aari murummwa a Yesu, aahikhala owoova ni oohoverya. Tthiri, Yesu aahitoko waapwapwela awiixutti awe otheene owiirelaka “Alopwana òwamini vakhani!”. (Math. 16:8) Muupuweleke wira etthu eniixutta ahu mwa yowiiraneya ya Pedru ti ele yaapanke awe nuumala oyeleela waamini wawe onapacerya osama mphareya.

MUNWEHEXEXEKE YESU WIRA MULIPIHE WAAMINI WANYU

14, 15. (a) Pedru aapanke exeeni okathi aapacenrye awe osama? (b) Hiyo khanniwerya omoona Yesu, nto ninrowa owerya sai “onwehexexa” yoowo?

¹⁴ Vaavale Pedru aawenhe awe epheyo ele nto onapacerya osama, owo anwerya weererya otthikela mukalawani mmensawe. Owo aanisuwela okata, hata makhalelo ale yammutumererya opaka eyo. (Yoh. 21:7) Masi, ohiya wiiroromela mmensawe, owo aahitthikela onwehexexa Yesu ni aheemererya nikhaliheryo nawe. Vakhala wira ninnoona wira waamini wahu woopacerya ovukuwa, nihaana omutakiha Pedru. Masi ninrowa opaka sai eyo?

¹⁵ Ntoko siisaale Pedru aatthikenle awe onwehexexa Yesu, hiyo nave “ninwehexexeke Yesu pahi; owo t’onnihola ephiro yo wamini”. (Mmusome aHéberi 12:2, 3.) Ekeekhai wira hiyo khanniwerya omoona Yesu ntoko Pedru aamoona awe. Masi nnoowerya “onwehexexa” Yesu nithokoreryaka sowiixuttiha sawe, mweettelo awe ni otthara seiyo vakhiviru vene. Muthokorerye mavalo vakhaani anrowa onikhaliherya otthara ntakiheryo na Yesu. Vakhala wira nnoottharihela inamuna iyo, ninrowa waakhela nikhaliheryo ninrowa olipiha waamini wahu.

16. Nimusomeke sai Biibiliya wira nilipihe waamini wahu?

¹⁶ Mulipihe omwaamini wanyu Biibiliya. Yesu aanikupali wira Biibiliya tori Nuulumo na Muluku, yoowo paahi toniwerya ovaha malakiheryo ooloka mweekumini. (Yoh. 17:17) Nittharaka ntakiheryo na Yesu, hiyo nihaana omusoma Biibiliya khula nihiku, omwiiwexexa, ni wuupuwelela ele eniixutta ahu. Ohiya omusoma Biibiliya paahi, hiyo nihaana othokorerya saana itthu sihiniiwexexa ahu oratteene. Mwa ntakiheryo, nyuwo pooti wunnuuherya waamini wanyu wira ninkhala mahiku ookiserya, musomaka itthu kamosa-kamosa siri mBiibiliyani sinooniherya wira wanikisa ohaakuveya. Mulipihe waamini wanyu iprofesia sa mBiibiliyani sinilavula itthu sinrowa wiraneya muhoolo, muthokoreryaka iprofesia sinceene saakhwanenle. Munnuuherye ororomela wanyu miruku soovareleya muteko siri mBiibiliyani muthokoreryaka matakiheryo anooniherya moota Biibiliya onilokiherya awe ekumi ya atthu.a​—1 aTes. 2:13.

17. Xeeni Yesu aaryaawe owaamini khula okathi nnaamwi saamukhumelela mixankiho suulupale, nto nyuwo munrowa omutakiha sai?

¹⁷ Nwehexexeke mareeliho aleiheriwe ni Yehova. Mwaha wa owehexexa ‘otteliwa murima’ waasukeriwe awe, Yesu aahivikaniha okhala oowaamini nnaamwi saamukhumelenle mixankiho sinceene. (aHéb. 12:2) Owo khaawehexexa itthu sa mulaponi saakhanle okathi ole. (Math. 4:8-10) Nyuwo munoowerya omutakiha Yesu muupuwelelaka sooleiherya suulupale sa Yehova. Mmananiheke woona moota munrowa anyu okhalaka okathi owo mulepaka makhalelo awo, wala opaka edesenyo ya moota oniwehererya anyu orowa okhala elapo esya ya Muluku simalihiwe ene mixankiho sotheene. Mpakeke elista ya atthu aniphavela anyu orowa olavulana yahihimuxiwa ni khula etthu eniphavela anyu waakoha. Mooneke sooleiherya iya sa Muluku ohiya okhala sa atthu otheene, masi sikhaleke sawinyu.

18. Moota xeeni nivekelo ninrowa aya wookhaliheryani olipiha waamini wanyu?

¹⁸ Nvekeleke wira waamini wanyu olipe. Yesu aahiwiixuttiha atthareli awe wira anvekeleke Yehova munepa wootteela. (Luka 11:9, 13) Okathi onipaka anyu eyo, tthiri munivekela wira waamini wanyu olipe, okhala wira eyo eniirela mpantta muhokorokho wa munepa wootteela. Okathi onipaka anyu mavekelo mulavuleke mooluluwanya, munvekeleke Muluku wira wookhaliheryeni ovikana muxankiho yoowo onoona anyu wira tonivukula waamini wanyu, ntoko ohiwerya waalevelela akina.

19. Exeeni enireerela wuupuwelela okathi onaathanla ahu apatthani ahu?

¹⁹ Mweetteke ni atthu oowaamini. Yesu aahaathanla mwa miruku apatthani awe, vanceenexa yaale yeettana awe khula nihiku. Atthu yeettana awe, arummwa awe, yaahooniherya wira yaari atthu oowaamini ni oororomeleya yiiwelelaka sooruma sawe. (Mmusome Yohani 15:14, 15.) Vano okathi onaathanla anyu apatthani anyu, mwaathanleke atthu aniwoona anyu wira annimwaamini ni omwiiwelela Yesu. Musuweleke wira etthu enimwiiriha mutthu okhala mpatthani ooloka ti osuwela olavulihana, hata eyo evekelaka waakhela wala ovaha miruku.​—Mir. 27:9.

20. Mureerelo xeeni oniphwanya ahu okathi onaakhaliherya ahu akina olipiha waamini waya?

²⁰ Mwaakhaliheryeke akina olipiha waamini waya. Itthu saalavula awe ni saapaka awe Yesu saanilipiha waamini wa awiixutti awe. (Mar. 11:20-24) Hiyo nihaana otthara ntakiheryo nawe, okhala wira waakhaliherya akina olipiha waamini waya, onoolipiha waamini wahu nave. (Mir. 11:25) Okathi onilaleerya anyu ni wiixuttiha, muttittimiheryeke wira Muluku ookhala, onninikhapelela, ni wira Biibiliya Nuulumo nawe. Mwaakhaliherye anna ni arokora wira alipihe waamini waya. Vakhala wira ennikhumelela etthu eniwiirihani opacerya ohoverya, munapacerya owaapa ale anihoolela mmulokoni, muhaakuveke waathanya anna awo. Ohiya-vo, mooreera murima mweereryeke waakhaliherya olipiha waamini waya. (Yuda 22, 23) Vakhala wira munoosoma oxikola nto munapacerya osomihiwa wira atthu aroothatuwa, moolipa murima mwaakiherye waamini wanyu wira atthu aroopattuxiwa, nyuwo munoophwanya otteeliwa murima mwaha wa waakhaliherya atthu akina.

21. Exeeni Yehova emuleihenrye awe khula mutthu voohimya sa waamini?

²¹ Okhaliheriwaka ni Yehova ni Yesu, Pedru aahixintta woova wawe ni ohoverya, khukhala nlipiheryo na waamini wa maKristau a eseekulu yoopacerya. Mwa enamuna emosaru, Yehova ooleiherya onikhaliherya wira nikhalane waamini woolipa. (Mmusome 1 Pedru 5:9, 10.) Khula wiimananiha onipaka ahu wira nilipihe waamini wahu, ti wooreerela okhala wira ninrowa ovahiwa etthuvo yuulupalexa ehirina etthu enilikana aya.

[Enoota]