“Munjererye Wamini Wahu”

“Mukikhaliherye” olipiha waamini waka!”​—MAR. 9:24.

ISIPO: 54, 24

MWAAROWA WAAKHULA SAI?

Xeeni vanitthuneya ahu olipiha waamini wahu?

Itthu xeeni sinireerela ahu opaka wira nilipihe waamini wahu?

Ninrowa wooniherya sai wira nookhalana waamini onivara muteko?

1. Xeeni vanitthuneya ahu waamini? (Nwehe elatarato yoopacerya.)

MOOTOKO wiikoha so: ‘Kiireke miyo ka mutthu onireerela woopoliwa ni Yehova okathi wa maxakha maalupale ni okela elapo esya?’ Ekeekhai wira woopoliwa wa mutthu onivekela itthu sinceene, masi yookhala etthu yuulupale enittittimiheriwa ni murummwa Paulo ni masu ala: “Vano, khavo mutthu oniwerya omusiveliha Muluku, ahaminiki”. (aHéb. 11:6) Masu ala anikhala ntoko tookhweya, masi ekeekhai tiila eni: “mana khahiyó wira atthu othene animwamini”. (2 aTes. 3:2) Yoolepa ela enninikhaliherya wiiwexexa otthuneya waya okhalana waamini woolipa.

2, 3. (a) Exeeni enniixuttiha awe murummwa Pedru voohimya sa otthuneya waya okhala oowaamini? (b) Makoho xeeni anrowa ahu othokorerya nenna-va?

² Murummwa Pedru aahooniherya otthuneya waya waamini vaavo aalavunle awe wira ‘wamini wereriwaka’ nto “khoniwa okhala wolipa, onniphwanyiha ottottopeliwa n’uvuwa n’uttittimihiwa nihiku ninrwawe Yesu Kristu”. (Mmusome 1 Pedru 1:7.) Okhala wira maxakha maalupale ari vakhiviru, khamunoona oreerela osuwelexa vakhala wira mookhalana waamini onrowa woophwanyihani okhala vamosa ni atthu anrowa ovuwihiwa okathi onirwa awe Mwene oovuwa? Tthiri, hiyo nimphavela okhala ‘atthu òwamini, anettela ephiro yowòpowa’. (aHéb. 10:39) Nuupuwelaka eyo, nihaana oxonttela ntoko mulopwana ole aalavunle so: “Mukikhaliherye” olipiha waamini waka. (Mar. 9:24) Wala eyo eniiriheke olavula ntoko atthareli a Yesu yaawo yaahimmye so: “Munjererye wamini wahu”.​—Luka 17:5.

³ Otthuneya waya okhala oowaamini onnikumiherya makoho ala. Ninrowa okhalana sai waamini? Ninrowa wooniherya sai wira nookhalana waamini? Nroromelo xeeni nrina ahu wira navekela wuncereriwa waamini nnimwaakhuliwa?

NIKHALANEKE WAAMINI ONIMUSIVELA MULUKU

4. Matakiheryo xeeni anrowa onikhaliherya olipiha waamini wahu?

⁴ Okhala wira “sothene silempwe khalai, silepeliwe wira nixuttihiwe”, nto nnoowerya wiixutta itthu sinceene nisomaka matakiheryo a atthu oowaamini ari mBiibiliyani. (aRom. 15:4) Okathi onisoma ahu voohimya sa atthu ntoko Abrahamu, Sara, Isakhi, Yakobe, Moise, Rahabi, Gedeyoni, Baraki, ni akina, soohimmwa iya sinoonikhaliherya ovarerya waamini wahu. (aHéb. 11:32-35) Ohiya-vo, vaavo vanisoma ahu sowiiraneya sa anna ni arokora a mahiku ahu ala, yoonihenrye waamini wuulupale, eyo enoonikhaliherya olipiha waamini wahu.a

5. Moota xeeni Eliya oonihenrye awe wira aanimwaamini Yehova vanceene, nto ntakiheryo nawe ninniiriha wuupuwelela exeeni?

⁵ Ntakiheryo nimosa ninkhuma mBiibiliyani ti na profeta Eliya. Nkahaya muupuwelele sowiiraneya sinooniherya wira owo aanimuroromela moomalela Yehova. Okathi waamuleela awe Mwene Akhabi yoolakela ya Yehova wira khiyaarowa orupa epula elapo ele, owo ahooniherya ororomela wawe oriki: “Kinolopolani ni nsina n’Apwiya [Yehova] . . . anene ekumi, . . . iyakha iya khinirupa-tho epula, khunikhala-tho okame mpakha vankelaka ohimya”. (1 Mam. 17:1) Eliya aanikupali wira Yehova aarowa omphwanyiha owo ni atthu akina itthu saathowa okathi wotheene yaarowa aya ohirupaka epula. (1 Mam. 17:4, 5, 13, 14) Owo ahooniherya omuroromela wawe Yehova wira anwerya omuhihimuxa mwaana ookhwa. (1 Mam. 17:21) Owo aaniroromela wira Yehova ammoroxa mooro wiirimu wira opattihe mukuttho awe Omwaako Karmelo. (1 Mam. 18:24, 37) Nuumala ophiya okathi Yehova aarowa awe omaliha elimwe ele, hata nihikhanle neeku na epula nnakhala naamukhaani, Eliya aahimuhimeerya Akhabi wira: “Murowé, mwalyeke, nwuryeke. Kinnìwa ekakharakakhara y’epula”. (1 Mam. 18:41) Khamunoona wira soohimmwa moota ola sinninikhaliherya oweha vakhala wira waamini wahu ti woolipa woolikana ni iwo?

NINROWA OPAKA EXEENI WIRA NILIPIHE WAAMINI WAHU?

6. Nikhaliheryo xeeni ninkhuma wa Yehova ninrowa oniphwanyiha waamini?

⁶ Hiyo khanniwerya okhalana waamini nirumeelaka owerya wahu paahi. Waamini mukhalelo mmosa onikumiheriwa ni muhokorokho wa munepa wootteela wa Muluku. (aGal. 5:22) Nto, vaamureerela ottharihela miruku sa Yesu wira nivekeleke munepa wootteela okhala wira Yesu aahihimya wira Tiithi onrowa “wavaha” munepa wootteela ale aninvekela.​—Luka 11:13.

7. Muhimye nlikanyiho nnooniherya moota woolipiha waamini wahu.

⁷ Nuumala okhala oowaamini, hiyo nihaana ovikaniha wunnuuherya waamini iwo. Waamini wahu onilikana ni mooro opattihiwe sirumeeliwaka ikhuni. Okathi onipattihiwa awe mooro, owo onnivarela onakumiherya nlumi na mooro. Masi vakhala wira khiivo etthu ekina enipakiwa, mooro owo onnipacerya ovukuwa, onattipha, nto wuukiseryani waya onrowa okhala ettuurwa yooriirya paahi. Masi vakhala wira munnitetheererya, nto mooro owo onrowa ovarelaka voohimala. Vamosaru, waamini wahu onrowa ovikaniha wunnuwa, vaavo vanisoma ahu Nuulumo na Muluku. Vaavo vanimusoma ahu Biibiliya khula nihiku, nto ninrowa wunnuuherya omphenta wahu Mwaneene Biibiliya, nave eyo enoonikhaliherya olipiha waamini wahu.

8. Etthu xeeni ekina enrowa onikhaliherya wunnuherya ni olipiha waamini wahu?

⁸ Etthu xeeni ekina ekhanle ahu oopaka wira nikhalane ni olipiha waamini wahu? Muhitteeliweke murima ni itthu seiye mwiixuntte anyu sookhalihenryeni mpakha obatiziwa paahi. (aHéb. 6:1, 2) Muthokoreryeke iprofesia saakhwanenle siri mBiibiliyani okhala wira iyo sinimoovahani mathowa anrowa olipiha waamini wanyu. Nyuwo munoowerya orumeela Nuulumo na Muluku wira mphime vakhala wira waamini wanyu onnilikana ni ele enihimmwa okhala waamini woolipa.​—Mmusome Yakobo 1:25; 2:24, 26.

9, 10. Moota xeeni itthu iya sinilipiha aya waamini: (a) apatthani ooloka? (b) mithukumano sa mmulokoni? (c) muteko woolaleerya?

⁹ Murummwa Paulo aahaaleela maKristau akhwaawe wira yahaana ‘olipihana’ mukina ni mukhwaawe. (aRom. 1:12) Okathi onikhala ahu vamosa ni annihu, hiyo nnoolipiha waamini wa mukina ni mukhwaawe, vanceenexa vakhala wira nneetta ni yaale yoonihenrye wira ‘wamini waya ohehereriwa’, khooniwa okhala wooloka. (Yak. 1:3) Apatthani ootakhala annipwetexa makhalelo ooreera, masi apatthani ooloka annilipiha waamini. (1 aKor. 15:33) Eyo teniiriha otumereriwaka wira nihicompeleke “orowa omuthukumanoni”, masi “nilipiheryaneke” mukina ni mukhwaawe. (Mmusome aHéberi 10:24, 25.) Nthowa nikina okhala wira itthu sinilavuliwa omuthukumanoni sinnilipiha waamini wahu ni onilakiherya. Eyo ennivarihana ni masu a Paulo ani: “Wamini onikhala wiwaka” etthu enihimmwa. (aRom. 10:17) Niireke hiyo ninnisiveliwa orowa okhala vamosa ni anna omuthukumanoni khula esumana?

¹⁰ Okathi onivara ahu muteko woolaleerya, khannilipiha waamini wa atthu anaalaleerya ahu paahi, waamini wahu onninnuwa nave. Moolikana ni maKristau a eseekulu yoopacerya, hiyo ninniixutta omwaamini Yehova ni okhala oolipa murima wira niwerye olaleerya khula nipuro.​—Mit. 4:17-20; 13:46.

11. Moota xeeni Kalebi ni Yoxuwa yaawenrye aya okhalana waamini woolipa, nto hiyo ninrowa waatakiha sai?

¹¹ Okathi oniwerya ahu woona moota Yehova onnikhaliherya awe mweekumini mwahu ni moota onaakhula awe mavekelo ahu, onoolipiha waamini wahu. Eyo yaahimukhumelela Kalebi ni Yoxuwa. Awo yaahooniherya omuroromela waya Yehova nuumala ohottela Elapo Yooleiheriwa. Tthiri nuumala woona moota Yehova aareelinhe awe khula nivalo mweekumini mwaya, waamini waya waahincerereya. Tivonto vahintikhina ahu moota Yoxuwa aalavunle awe moolipiherya ohoolo wa aIsarayeli oriki: “Apwiya Muluku anyu àmaliherya molumo othene yahimyalyaya, yorerihakani. Muhìreliwa sothene; khanivo nulumo nihimalelihiwe, nnákhala nimosa”. Muhoolo mwaya aalavunle so: “Nto, mwattittimiheke Apwiya n’uwova; mwarumeleke Apwiya ni murim’anyu wothene n’ankhili anyu othene . . . Miyo va n’amusi aka othene nintthuna warumelaka Apwiya [Yehova]!” (Yox. 23:14; 24:14, 15) Okathi onilawiha ahu oreera murima wa Yehova, hiyo nave nnookhalana waamini omosaru yaarina aya atthu awo.​—Esal. 34:9.

NOONIHERYEKE WAAMINI WAHU

12. Etthu xeeni Yakobo ehimmye awe enitthuneya wira nooniherye waamini wahu?

¹² Ninrowa wooniherya sai wira nookhalana waamini onivara muteko? Mwiixutti Yakobo onnaakhula nikoho nlo vaavo vanihimya awe so: “Vano miyo, kìraka itthu sorera, kinowoniheryani wamini waka”. (Yak. 2:18) Miteko sahu ti sinooniherya wira hiyo nookhalana waamini. Nrowe niwehe matakiheryo vakhaani.

13. Mwa inamuna xeeni muteko woolaleerya onnikhaliherya awe wooniherya waamini wahu?

¹³ Ovara muteko woolaleerya ti enamuna yootepexa otthuneya wira nooniherye waamini wahu. Moota xeeni? Okhala wira muteko ola onivekela omwaamini Muluku ni wira omala wa makhalelo ala a itthu ori vakhiviru, nikupaliki tthiri wira “khivaninteya!” (Hab. 2:3) Enamuna emosa ya ophima waamini wahu ti oweha munnuwelo ni wiimananiha onipaka ahu mmutekoni woolaleerya. Niireke ninnipaka siniwerya ahu, woonasa wene naavyaka inamuna sa wunnuuherya muteko ahu woolaleerya? (2 aKor. 13:5) Tthiri, “mutthu onihimya wamini wawe oholo w’atthu” onnooniherya wira ookhalana waamini vamurimani vawe.​—Mmusome aRoma 10:10.

14, 15. (a) Ninrowa wooniherya sai wira hiyo naatthu oowaamini khula nihiku? (b) Muhimye yowiiraneya emosa enooniherya moota waamini onivara aya muteko.

¹⁴ Hiyo ninrowa wooniherya-tho wira ninnaamini okathi oniwanana ahu mixankiho sa khula nihiku. Hata niwereyasiwaka, okhulumuwa, wiiniwa murima, osikhini wala muxankiho mukina, hiyo ninnaamini wira Yehova ni Mwanawe anrowa onikhaliherya “okathi wophwanelela”. (aHéb. 4:16) Hiyo nnimooniherya ororomela iwo okathi onivekela ahu nikhaliheryo nlo ohiya paahi na omunepani. Yesu aalavunle wira nivekeke-tho itthu sa werutthuni ohela muhina “yolya emphavelahu khula nihiku”. (Luka 11:3) Soohimmwa sa mBiibiliyani sinninikhaliherya woona wira Yehova onoowerya oniphwanyiha itthu iyo. Okathi yahaarupa aya epula wIsarayeli khalai, Yehova aahinvaha profeta Eliya yoolya ni maasi. Ntoko Yehova saamuleihenrye awe, “Anakhuku yanimuruhela ephau n’inama vasisu ni makáripi; vano owo aniwurya màsi a muró”. (1 Mam. 17:3-6) Hiyo ninnaamini wira Yehova onoolokiherya itthu wira niphwanye khula etthu ennithowa.

¹⁵ Hiyo ninnaamini wira ottharihela miruku sa mBiibiliyani pooti onikhaliherya ophwanya yoolya ya khula nihiku. Rebecca, murokora mmosa ootheliwa a wÁsia yaahitoko omwiiraneela eyo vatthokoni vawe. Awo yaahittharihela miruku siri eliivuru ya Matheyo 6:33 ni Miruku 10:4, khuhela miteko sa Omwene nipuro noopacerya mweekumini mwaya avaraka muteko mwa nthiti. Rebecca onihimya wira waahikhala okathi iyawe oonawe wira sookhanyererya sa omutekoni wawe saamuhonona makhalelo awe ooloka a omunepani nto khihiyaka muteko owo. Hata vari siiso, awo yaahikhalana anamwane axexe yaatthuneya olyihiwa. Rebecca onninihimeerya ele yaakhumelenle oriki: “Hiyo naahipacerya waapeya yoolya ni otumiha. Yaahivira eyaakha ntero nikhalaka siiso, nto nahoona wira Yehova khaatonko oninyanyala. Khinaatonko ovira nihiku nihilyiiye etthu”. Niireke nyuwo mootoko wooniherya wira munnaamini wira Biibiliya ookhalana malakiheryo oolokexa anaakhaliherya atthu mahiku ala?

16. Exeeni enrowa onikhumelela vakhala wira nnoomuroromela Muluku?

¹⁶ Hiyo nihihoveryeke wira natthara malakiheryo a Muluku nnoophwanya mureerelo. Paulo, oromolaka masu yaalempwale ni profeta Habakuki aahimmye so: “Mutthu àxariya òkhalana ekumi mwaha wo wamini”. (aGal. 3:11; Hab. 2:4) Tivonto, vanitthuneya ahu omwaamini Ole oniwerya onikhaliherya. Paulo onninuupuxerya wira Muluku onniwerya “onìrela itthu sulupalexa sintepa ovikana iye sininvekelahu ni sintthokelelahu”. (aÉf. 3:20) Arumeyi a Yehova annipaka sotheene aniwerya aya wira avare ele enimusivela, masi mwaha wa osuwela ohiwerya waya, awo anniroromela wira Yehova onimwaareeliha. Niireke khannitteeliwa murima mwaha woosuwela wira Muluku ori ni hiyo?

OLE ONIVEKELA WAAMINI ONOOVAHIWA

17. (a) Moota xeeni nivekelo na arummwa naakhuliwe aya? (b) Xeeni hiyo vanikupali ahu wira ovekela wahu waamini onimwaakhuliwa?

¹⁷ Nuumala othokorerya oratteene mwaha ola, woonasa wene ninrowa olavulaka ntoko saalavunle aya arummwa yaawo yaamwiirenle Yesu: Pwiya “Munjererye wamini wahu”. (Luka 17:5) Nivekelo naya nahaakhuliwa, vanceenexa okathi wa Pentekoositi a 33 EC, vaavale yaamwarexeliwe aya munepa wootteela nto khivahiwa wiiwexexa oratteene yoolakela ya Muluku. Eyo yaahincererya waamini waya. Mwaha wa eyo awo yaahipacerya ovara muteko muulupalexa wa olaleerya okathi ole. (aKol. 1:23) Niireke hiyo nihaana owehereryaka wira ovekela wahu waamini onimwaakhuliwa? Biibiliya onninilipiherya wira nnimwaakhuliwa vakhala wira ninninvekela Muluku ‘nittharaka otthuna wawe’.​—1 Yoh. 5:14.

18. Moota xeeni Yehova onaareeliha awe ale aniphavela okhalana waamini woolipa?

¹⁸ Tthiri vanniweryaneya woona wira Yehova onnitteeliwa murima ni ale animwaamini ni murima aya wotheene. Yehova onrowa onaakhula nanvekela wira onivahe waamini, nto waamini wahu onrowa wunnuwa vanceene, eyo enrowa oniiriha okhala atthu anrowa “okela momweneni” mwa Muluku.​—2 aTes. 1:3, 5.

[Enoota]