Mwa Inamuna Xeeni Yehova Onniphenta Awe?
“Mòneke ophenta wulupale onivahalyawe Muluku Tithi!”.—1 YOH. 3:1.
MUNOOWERYA OTTHOKIHERYA?
Xeeni atthu akina anoona aya okhala voovila osuwelexa wira Yehova onnaaphenta?
Moota xeeni Yehova oonihenrye awe wira onniniphenta mwa enamuna ennivaha awe itthu sinnithowa ni oniixuttiha ekeekhai?
Mwa enamuna xeeni nnooneya aya niphento na Muluku okathi onnivaha awe miruku ni onilakiherya?
1. Exeeni murummwa Yohani enaatumererya awe maKristau othokorerya, ni nthowa xeeni?
MASU a murummwa Yohani aniphwanyaneya yoolepa ya 1 Yohani 3:1 tooreerela wuupuwelela oratteene ni oxukhurela. Vaavo vaniirawe, “mòneke ophenta wulupale onivahalyawe Muluku Tithi”, Yohani aaphavela waatumererya maKristau wuupuwelela makhalelo ni munnuwelo wa oniphenta wa Muluku wira nisuwele moota owo onniphenta awe. Osuwelexa ele enitaphulela aya oniphenta wa Muluku onrowa wunnuuherya ni olipiha omphenta wahu ni wataana ni yena.
2. Exeeni eniwiiriha atthu akina waavila osuwelexa wira Muluku onnaaphenta?
2 Masi aakhala atthu akina ahinisuwela wira Muluku onnaaphenta atthu. Atthu awo anoona wira Muluku onireerela wooviwa ni wiiweleliwa paahi. Mwaha wa miyuupuwelelo soohiloka sirina aya atthu awo, annipacerya wuupuwelela wira khivaniweryaneya omphenta Muluku, hata owo khonniphenta. Masi, aakhala akina anikupali wira Muluku khonaathanya atthu ni wira owo onaaphenta atthu moohicikha etthu sa ele enipaka aya, wala ahinipaka aya. Okathi waasomihiwa anyu Biibiliya, nyuwo mwaahiixutta omphenta Yehova ni makhalelo awe oolokexa ni wira ophenta wawe woomwiiriha onivaha Mwanawe wira onoopole. (Yoh. 3:16; 1 Yoh. 4:8) Masi, nlelo sookhala itthu siniwerya ohonona omphenta wahu Muluku, itthu ntoko mahuweliwo ni elapo eyariwe ahu.
3. Ekeekhai xeeni yuulupale ennikhaliherya wiiwexexa wira Muluku onniniphenta?
3 Nto, Yehova onniphenta mwa inamuna xeeni? Waakhuliwa wa nikoho nla onilipa ni wiiwexexa ele enitaphulela aya wataana okhanle eriyari ya Yehova Muluku ni hiyo. Tthiri, Yehova Taapattunxe apinaatamu otheene. (Musome Esalimo 100:3-5.) Tivonto Biibiliya vanihimya awe wira Adamu “àpatuxiwe ni Muluku”, nave Yesu aahiwiixuttiha atthareli awe omulavulana Muluku amwiirelaka “Tith’ihu muri wirimu!”. (Luka 3:38; Math. 6:9) Okhala wira Yehova Tonivanhe Ekumi, owo Tiithi ahu; wataana wahu onoolikana ni iwe wa tiithi ni mwanawe. Nihimye mwa enamuna yookhweya, Yehova onniniphenta hiyo mwa enamuna emosa yeele tiithi oophenta sinaaphenta awe anaawe.
4. (a) Mwa enamuna xeeni Yehova onivirikana awe ni axitiithi apinaatamu? (b) Ninrowa othokorerya exeeni muru ola ni onittharelana?
4 Axitiithi akhanle apinaatamu toohimalela. Hata yiimananihaka vanceene wira yooniherye makhalelo a Yehova, awo khaniwerya ophenta ntoko owo oniira awe. Tthiri aakhala atthu ahuuwale etthoko yoosareya mixankiho nto itthu iyo soowiiriha ohalana mmuruni mwaya itthu sotakhala siirihiwe aya. Eyo etthu yootakhala, okathi mukina enikhala ehasara. Tthiri Yehova tiithi oovirikana ni atthu awo. (Esal. 27:10) Osuwela moota Yehova onniphenta awe onoonikhaliherya omwaattamela yena. (Yak. 4:8) Muru ola, ninrowa othokorerya inamuna xexe sa moota Yehova onniphenta awe. Muru onittharelana, ninrowa othokorerya inamuna sikina xexe sa moota nikhanle ahu omphenta Muluku.
YEHOVA ONNINIVAHA ITTHU SINNITHOWA MOOPHENTA
5. Etthu xeeni murummwa Paulo aahimenrye awe atthu a wAthena voohimya sa Muluku?
5 Okathi murummwa Paulo aaryaawe wAthena, oGresia, owo ahoona wira muttetthe ole waahisareya ilatarato ni amuluku atthu ale yaakokhorela aya ni yaakupali aya wira tiyaavaha ekumi ni khula etthu yaathowa mweekumini. Eyo yaahimwiiriha Paulo ohimya so: Muluku “yowo opattunxe olumwenku ni sothene siri memmo . . . ti yowo onavaha atthu ekumi n’umumula n’itthu sothene. . . . okhala wira hiyo nokhalana ekumi mwa yowo, ninnetta mwa yowo, nokhala mwa yowo”. (Mit. 17:24, 25, 28) Tthiri mwaha wa ophenta, Yehova oonivaha “itthu sothene” sinnikhaliherya okhala akumi. Nkahaya muupuwelele ele enitaphulela aya masu ala arookhalaru vakhaani.
6. Moota xeeni elapo enooniherya aya oniphenta wa Muluku? (Nwehe elatarato yoopacerya.)
6 Muthokorerye elapo yeeyo epattuxiwe ni Yehova nto khwaavaha “atthu”. (Esal. 115:15, 16) Masientista aahonona musurukhu munceene wira arowe wiirimu yawehe vakhala wira sookhala iplaneta sinilikana ni elapo enikhala ahu. Nnaamwi siphwanyiwe ene iplaneta imiya sinceene, awo aakhulumuwa okhala wira khaphwannye nipuro nirina makhalelo aneemererya wira apinaatamu yakhaleke ntoko siryaaya valaponi. Elapo ela tekhanle etthu yuulupalexa Muluku epattunxe awe. Nkahaya muupuwele ela: sookhala iplaneta sinceene muhina mwa egaláxia ahu Via-Láctea, eyo ennooniherya wira Yehova khopanke elapo wira ekhaliweke paahi, masi opanke wira ekhale yoopuheya, yooreera ni ntthoko nooreerela na apinaatamu! (Yes. 45:18) Eyo ennooniherya moota Yehova onniphenta awe.—Mmusome Yobi 38:4, 7; Esalimo 8:4-6.
7. Moota xeeni enamuna Muluku enipattunxe awe enooniherya aya wira onniniphenta?
7 Tthiri Yehova topattunxe elapo khwaavaha atthu, owo oosuwela wira otteeliwa wahu murima khonlipa paahi ni mireerelo sa werutthuni. Mwanamwane onnoona okhala oovareleleya vaavo vanoona awe wira anamuyari awe annimphenta. Yehova aapattunxe apinaatamu iilikanyihaka mmensawe, khwaavahaka makhalelo aniweemererya woona ni ovaha efaita niphento ni onikhapelela wawe. (Maph. 1:27) Tivonto, Yesu aalavunle awe so: “òreriwa t’ale ari amasikhini murohoni mwaya”. (Math. 5:3) Ntoko Tiithi oophenta, Yehova ‘onninivaha sorera sothene vowatta’ sa werutthuni ni somunepani.—1 Tim. 6:17; Esal. 145:16.
YEHOVA ONNINIIXUTTIHA EKEEKHAI MWAHA WA ONIPHENTA WAWE
8. Xeeni vanireerela aya omphavelasa ‘Muluku a ekekhai’ wira niixutte ophenta?
8 Anamuyari annaaphenta anaaya ni anniphavela waakhapelela wira ahihapuxiwe. Anamuyari anceene, khaniwerya waalakiherya anaaya okhala wira awo aakhootta malakiheryo aniphwanyaneya munuulumoni na Muluku. Nto eyo ennikumiherya ohiiwanana ni okhulumuwa. (Mir. 14:12) Masi Yehova ti ‘Muluku ororomeleya’. (Esal. 31:6) Owo onnaaphenta anaawe ni vannimusivela waamwaleela ni waarya wa ekeekhai awe waalakiheryaka mwa khula enamuna mweekumini mwaya, vanceenexa myaha sinivarihana ni okokhorela waya. (Musome Esalimo 43:3.) Ekeekhai xeeni ekumihenrye awe Yehova nto eyo enooniherya sai wira owo onniniphenta?
9, 10. Moota xeeni Yehova onnooniherya awe oniphenta wawe mwaha wa oniixuttiha ekeekhai (a) voohimya sa owo mwaneene? (b) voohimya sa hiyo?
9 Etthu yoopacerya okhala wira Yehova onniniixuttiha ekeekhai awe. Owo onninisuweliha nsina nawe, nenno nimphwanyaneya ikwaha sinceene mBiibiliyani ovikana masina makina. Mwa enamuna eyo Yehova onninaattamela hiyo, oneemereryaka wira nimusuwele. (Yak. 4:8) Yehova onninisuweliha makhalelo awe. Nnaamwi olumwenku ola wooniheryaka owerya ni ankhili awe, Yehova onninooniherya makhalelo awe makina omurumeelaka Biibiliya ntoko exariya ni vanceenexa ophenta wawe ohinimala. (aRom. 1:20) Owo onoolikana ni tiithi ohiya okhala a ikuru ni a ankhili, owo nave tooreera murima ni oophenta, nto eyo enniwiiriha anaawe waakhweyerya omwaattamela.
10 Yehova onniniphwanyiha mureerelo vaavo vannisuweliha awe makhalelo ahu ni vannileela awe opuro ahu muhina mwa otthokeya wawe. Eyo ennikumiherya wiiraana ni murettele mweemusini mwawe yotheene. Okathi onimusoma ahu Biibiliya ninniixutta wira apinaatamu khapattuxiwe ni ehakhi ya wiilamula mmansaya, wala weetta mekhaya amuhiyaka Muluku ottuli ni wira nahiya weettela malakiheryo awe sinoonikhumelela mixankiho sooriipiha murima. (Yer. 10:23) Eyo ti yootthuneya wira nikhale akumi. Vakhala wira nnimweemererya okhulupale wa Muluku nnoophwanya murettele ni okhala oowiiraana. Tthiri osuwela ikeekhai iya oniiriheke okupali wira Yehova onniniphenta!
11. Sooleiherya xeeni Yehova opanke awe sinooniherya wira onniniphenta ni onikhapelela?
11 Tiithi oophenta onniphavela osuwela makhalelo a anaawe muhoolo, ophavelaka wira awo akhalane ekumi yekeekhai ni yooloka. Mooriipiha murima, atthu anceene anikhala mweepiphini, khanisuwela ele enrowa okhumelela, wala awo annikhalela nthiti itthu sihiniphwanyiha mireerelo soohimala. (Esal. 90:10) Hiyo nikhanle anamwane a Muluku, ninnimphenta vanceene okhala wira Yehova oonileiherya itthu sooloka muhoolo. Eyo enninivaha nlipelelo nooloka mweekumini mwahu.
YEHOVA ONNAAVAHA MIRUKU NI WAALAKIHERYA ANAAWE
12. Moota xeeni miruku ni malakiheryo Yehova anvanhe awe Kayini ni Barukhi yoonihenrye aya niphento ni waakhapelela atthu awe?
12 “Exeni enanareliwanyu? Owitho wanyu orwelenle-ni mannyari? Mwira-ru sorera, ekhove anyu enimokòkolani . . . Nto nyuwo munniwerya oxintta [etampi]?” (Maph. 4:6, 7) Miruku iye saari soovareleya muteko ni saavahiwe okathi wooreerela. Yehova aamulopola Kayini vaavo owo aahanle awe vakhaani opaka etthu yootepexa otakhala. Vooriipiha murima, Kayini khaiwelenle yoolopola ele, nto aahiphwanya maxakha. (Maph. 4:11-13) Okathi yoole Barukhi mulipa oolepa a Yeremiya aakhulumunwe awe, Yehova aahinvaha malakiheryo yaamukhalihenrye woona muxankiho aarina awe. Moovirikana ni Kayini, Barukhi aheemya malakiheryo a Yehova, eyo yaahimukhaliherya woopola ekumi awe.—Yer. 45:2-5.
13. Xeeni Yehova oneemererya awe wira saakhumeleleke mixankiho arumeyi awe oororomeleya?
13 Murummwa Paulo aalempe so: “Tthiri Apwiya annapwapwela yale anaphentaya; annimuttaruxa khula mutthu onimwakhelaya ntoko mwan’aya”. (aHéb. 12:6) Opwapwela wala olaka, khonihela muhina ohukhumu khula okathi. Olaka wookhalana inamuna soovirikana. Aakhala matakiheryo manceene mBiibiliyani a arumeyi oororomeleya yaarina mixankiho suulupale yaatthuneya olakiwa ni wiixuttihiwa etthu. Nkahaya mmuupuwele Yosefe, Moise ni Davidi. Soohimmwa sa ekumi ya atthu ala siri mBiibiliyani ti soomalela ni soowiiwanyeya oratteene. Osoma moota Yehova aaryaawe ni atthu awo okathi wa mixankiho ni woona moota yaavahiwe aya miteko sootthuneya ni Yehova, onooniiriha woona wira tthiri Yehova onnaaphenta ni waakhapelela arumeyi awe.—Musome Miruku 3:11, 12.
14. Ninwerya sai woona wira Yehova onniniphenta vaavo vannilaka awe?
14 Olaka wa Yehova onninikhaliherya woona enamuna ekina ya ophenta wawe. Okathi ale anipaka etthu yoohiloka anilakiwa aya ni Yehova, nto vaavo aneemererya yoolaka eyo ni ottharuwa etampi aya Yehova ‘onnakuva walevelela’. (Yes. 55:7) Eyo entaphulela exeeni? Davidi aahitthokiherya munnuwelo wa olevelela wa Yehova ni masu ala oovara murima: “Ti yawo anlevelela sottheka saka sothene; anvoniha iretta saka. Ti yawo anòpola ekumi aka mokhwani; ankisariha eparakha, ankikhapelela n’uphenta. Ntoko vanrakamelanaya onikhuma n’unkela nsuwa, siso Apwiya anninimwalanyiha ni sottheka sahu”. (Esal. 103:3, 4, 12) Hiyo nihaana waakuvela wiiwelela miruku sa Yehova, nisuwelaka wira iyo sinooniherya oniphenta wawe wuulupale.—Esal. 30:6.
YEHOVA ONNINIKHAPELELA NI ONAAKIHERYA
15. Exeeni enooniherya wira Yehova onnaavaha efaita atthu awe?
15 Khivanivaanyihaniwa wira yoolakela yoopacerya ya tiithi oophenta ti okhapelela ni waakiherya emusi awe wira ehiphwanyiwe ehasara yuulupale. Tiithi ahu a wiirimu Yehova, onnipaka eyo waavikana apinaatamu. Omuhimyaka Yehova, nasaalimo onihimya so: “Apwiya [Yehova] annasuka atthu anarumela, anniwakiherya mmatatani mw’alipa-òtakhala”. (Esal. 97:10) Muthokorerye ntakiheryo nimosa. Munoonela sai maitho anyu? Yehova oniwoonela siiso atthu awe. (Mmusome Zakariya 2:13.) Tthiri Yehova onnaavaha efaita yuulupale atthu awe!
16, 17. Muhimye inamuna Yehova sinirumeela awe wira aakhapelele ni owaakiherya atthu awe mahiku ala.
16 Enamuna emosa Yehova enaakhapelela awe atthu awe ti oruma malaikha awe. (Esal. 91:11) Nlaikha nimosa naahoopola muttetthe wa oYerusalemu naapwetexaka anakhotto a wAsiria 185.000 ohiyu omosa. (2 Mam. 19:35) Murummwa Pedru ni Paulo yaahitoko woopoliwa ni nlaikha khikumihiwa mukhatteya. (Mit. 5:18-20; 12:6-11) Mahiku ala enniiraneya etthu emosaru, Yehova onnaakhaliherya atthu awe. Munna mmosa aarummwale oSeedi mundiale wira axukurye efiliyaali emosa wÁfrica aahimmye wira manyaku-nyaku a anapoliitika ni alipa a etiini yaahipahula elapo ele. Ekhotto, wiiyeryaniwa, otupheliwa athiyana ni wiivananiwa waahisareya elapo ele nto ohiiwananiwa yaari ti makhalelo. Hata vari siiso, khuuvo munna wala murokora wiiviwe mwaha wa manyaku-nyaku awo, nnaamwi akina ayeeleelale ene mireerelo ni mihuwo saya. Okathi waakohiwe aya moota yaari aya, khula mutthu anaakhula mootteeliwa murima ariki “Otheene ahu naakumi mwaha wa Yehova onnikhaliherya!” Anna ale yahoona wira Yehova aanaaphenta.
17 Wookhala okathi Yehova eemerenrye awe wira awanani awiiveke atthu oowaamini ntoko Sitéfano. Masi Muluku onnaakhapelela atthu awe, aalopolaka wira ahiweriwe ni olavilavi wa Satana. (aÉf. 6:10-12) Orumeelaka Nuulumo nawe ni iliivuru sinimutthokiherya Biibiliya sinilempwa ni otthokeya wawe, Yehova onninikhaliherya woona itthu soowoka ntoko mihakhu, orupihana woohiloka, otthekula onooniherya itthu sa owali, orumeela Interneti woohiloka ni itthu sikina. Ntoko siisaale siniira awe Tiithi oophenta, Yehova onniphavela waakhapelela ni owaakiherya atthu awe.
EPARAKHA YUULUPALE ERINA AHU
18. Munoonela sai woophentani wawe Yehova?
18 Nuumala othokorerya inamuna vakhaani sa moota Yehova onooniherya awe oniphenta wawe, khiivo-tho ekina erina ahu yoohimya ohiya omutakiha Moise. Uupuwelelaka iyaakha sinceene aavirinhe awe omurumeelaka Yehova, Moise aalavunle so: “Nihiku ti nihiku munisarihe oniphenta wanyu, wira nìpeke mahiku othene nitteliwaka murima”. (Esal. 90:14) Eparakha yuulupale erina ahu ti osuwela ni opuha niphento nuulupale na Yehova, nave awo mareeliho manceene olelo-va. Ntoko murummwa Yohani, eyo enooniiriha olavula so: “Mòneke ophenta wulupale onivahalyawe Muluku Tithi!”—1 Yoh. 3:1.