BIIBILIYA ONNIRUKUNUXA MIRIMA SA ATTHU

Vano kinoona wira kinoowerya waakhaliherya atthu akina

Elavuliwe ni: Julio Corio

MWAAKHA OYARIWE AWE: 1981

ELAPO OYARIWE AWE: GUATEMALA

MWAHA ENE: KIRI ENE MWAANA SAAHIKIKHUMELELA ITTHU SOOTAKHALA

MWEETTELO AKA WA KHALAI: Kiiyariwe wAcul, epooma ya omyaakoni mpantta onikhuma nsuwa wa oGuatemala. Emusi aka yaari ya atthu a nloko Ixil, a nihimo Maya. Ohiya Espanyola, kaahiixutta olavula mattaava ahu. Miyo kiyariwe okathi wa ekhotto yootakhalexa yaawaniwe elapo aka yeeyo yaamalinhe iyaakha 36. Eriyari ya okathi owo atthu anceene a nloko Ixil yaahikhwa.

Nihiku nimosa kirina ene iyaakha 4, muulupale aka a iyaakha 7 iira othweelaka ni egranada yeeyo yaaphuleyale mootutuxerya. Maitho aka yaahirakala mwaha wa ehasara ele. Mooriipiha murima, muulupale aka ole aahikhwa. Okhuma okathi yoowo, kaahiviriha onamwane aka kikhalaka opuro waakhapeleliwa anamwane ahinoona, epooma ya oGuatemala, weiwo kiixuttale aka eBraile. Miyo nkaiwexexa nthowa naya atthu a opuro ole yaakikhoottiherya aya olavula ni anamwane akina; nave ale yaasomanaka yaanikisyaka. Kaamakela okhala mekhaka nto khula eyaakha kaaniviriha myeeri miili kiri ene owaani ni amaama yaawo yaakiphenta ni okikhapelela. Mooriipiha murima amaama yaakhwiiye kirina eene iyaakha 10. Kaahoona wira kaahikhweliwa mutthu aakiphentexa molumwenkuni, nto kaahiriipiwa murima vanceene.

Kirina ene iyaakha 11, kaahitthikela owaani ni kinakhala ni munnaka a woopaapani hoothe ni emusi awe. Owo aanikikhapelela mwa werutthuni masi khuuvo aawerya okiphenta ntoko amaama. Ikwaha sikina kaaninla kiriki: “Xeeni amaama akhwiiye aya? Xeeni kirakanle aka?” Atthu yaakileela wira ihasara iye saakhuma wa Muluku. Kuupuwela wira Muluku khahiyo a xariya ni tootakhala. Kaaniphavela wiixiiva masi nkoona moota woopaka eyo.

Mwaha wa ohoona kaamakela ohaaxiwa. Kiri ene mwammiravo kaamakela otupheliwa wira kirihiwe itthu soohiirya. Khuuvo kaamuleela aka ikrime iye maana kuupuwela wira khuuvo aarowa ocalela. Ikwaha sinceene atthu khiyaakilavuliha, ni khuuvo kavaanelana aka. Kaaniriipiwa murima vanceene, nto khuuvo kaamuroromelaka-tho.

MOOTA BIIBILIYA ORUKUNUNXE AWE OKUMI AKA: Kisomaka oxikola, Anamoona a Yehova anli (mulopwana ni mwaarawe) yaahikaattamela okathi woophumurya oxikola. Prusoore mmosa yoowo aakimorela ikharari taavekenle Anamoona awo wira evaanele ni miyo. Awosa yaahikileela yooleiherya ya Biibiliya yoowi alipa ookhwa anoohihimuwa ni onoophiya okathi anirowa aya otthukuwa maitho a atthu ahinoona. (Yesaya 35:5; Yohani 5:28, 29) Ele yaakileela aya yaahikisivela masi kaanoona okhala vooxankiha ovaanela ni awosa maana nkaalimalenle ovaanela. Masi nnaamwi kaarakanle, awosa yaanikireerela murima ni yaahivikaniha okixukurya wira ekiixuttihe Biibiliya. Anamathelana awo yaaneetta ikiloomo saavikina 10 eviraka mmiyaakoni wira ephiye epooma kaakhala aka.

Munnaka ole aahikileela wira ale yaari atthu ootthokiheya, masi yaari atthu oohaawa. Hata vari siiso, yaanikiphentasa ni yaanikivaha etthu. Kaahoona wira paahi maKristau ekeekhai takhanle oowiivahererya mwa enamuna ele.

Kaanimusoma Biibiliya kirumeelaka iliivuru sa eBraile. Nnaamwi kaiwexexa itthu iye kaaxuttaka, ikwaha sikina nkaakupali. Mwa ntakiheryo, vaanikivila okupali wira Muluku aanikithokorerya, nave kuupuwela wira khuuvo aaphwanela okixuttiha voohimya sa Muluku. Kaahisuwela nthowa naya Yehova eemererya awe otakhala, masi vaanikixankiha omoona yena ntoko Tiithi oophenta.a

Vakhaani-vakhaani, ele kaaxutta aka yaahikikhaliherya orukunuxa moonelo aka. Mwa ntakiheryo, kaahixutta wira Muluku onniwoonela othunku ale anihaawa. Voohimya sa arumeyi awe yaahaaxiwa, owo aalavunle so: “Miyo kihona ohawa w’atthu aka”. (Okhuma 3:7) Osuwela mikhalelo sa Yehova waahikiiriha onvahererya okumi aka. Eyaakha ya 1998 kaahibatiziwa khukhala Namoona a Yehova.

Nuuvira mwaakha mmosa kibatiziwe ene kaahimwiira kursu a atthu ahinoona waattamela epooma ya Escuintla. Mutokweene mmosa a mmulokoni aahisuwela mixankiho kaaviriha aka wira kirowe omuthukumanoni kikhalaka owaani. Miyo kaahaana owela mwaako yoole yaavira aya anna yaale yaakisomiha Biibiliya, nto eyo yaari etthu yooxankiha. Axitokweene Anamoona yaahilavula ni emusi emosa ya Anamoona a Escuintla wira kikhaleke owannyeya ni ekikhaliheryeke orowa mithukumano sa Omwene. Mpakha olelo-va, awo annikikhapelela ntoko mmusi aya.

Kaahikhala oohimya matakiheryo manceene a ophenta wekeekhai anna a mmulokoni anikooniherya aya. Nto sowiiraneya iyo sinnikikupaliha wira ntoko Namoona a Yehova miyo kiri eriyari ya maKristau eeKeekhai.​—Yohani 13:34, 35.

MOOTA OTTOTTENLE AKA MUREERELO: Vano nkiniixoona ntoko mutthu ohina faita ni ohirina nlipelelo; nave kinnisuwela nthowa naya Muluku okipattuxale awe. Ohiya omakelaka wuupuwela orakala waka, kinniviriha okathi munceene kaakhaliheryaka atthu osuwela ekeekhai ya Biibiliya mmuteko wa okathi wotheene. Nave-tho, kookhalana eparakha ya orumeela ntoko mutokweene a mmulokoni, ni kinnilavula myaha sa atthu otheene. Kinnilavula-tho myaha omuthukumanoni wa muttetthe weiwo anirwa aya atthu ikonto-ikonto sene.

Eyaakha ya 2010, kaahimwiira kursu a Exikola ya Biibiliya ya Anna Oohithela, yeeyo vano eniitthaniwa (Exikola Eniwiixuttiha Anamalaleerya), wEl Salvador. Exikola eyo yookikhaliherya vanceene ovara saana miritti saka mmulokoni. Nikuruta nlo nookiiriha okupali wira kookhalana efaita ni kinniphentiwa ni Yehova Muluku, yoowo onimukhaliherya mutthu wira avare muteko awe.

Yesu aahimmye so: “Mulipa-òvaha onoreriwa onvikana mulipa-òvahiwa”. (Miteko 20:35) Olelo, kinniwerya ohimya wira ka mutthu oohakalala. Nave kinniwerya opaka etthu kahuupuwelaka wira kanwerya: waakhaliherya akina.

[Enoota]