Niireke Vanniweryaneya Omusuwela Muluku?

“Muluku khonisuwanyeya”.​—Filo, filosofo a wAlexandriya, eseekulu yoopacerya.

“Muluku khankhala ottaiwene ni hiyo”.​—Saulo ooTarso, olavulaka ni mafilosofo a wAthena eseekulu yoopacerya.

ERIYARI ya ifrase iya piili, tiivixa enivarihana ni moonelo anyu? Anamunceene annoona moolumo a murummwa Paulo okhala oomaaliha ni ookuxa murima. (Miteko 17:26, 27) Tthiri, Biibiliya okhalana masu makina oolipiha. Mwa ntakiheryo, Yesu aahipaka nivekelo naarina masu oomaaliha wira atthareli awe emusuwele Muluku ni yaakhele mareeliho.​—Yohani 17:3.

Masi mafilosofo ntoko Filo, yaahikhalana moonelo woovirikana. Awo yaahimya wira hiyo khaninwerya omusuwela Muluku, maana owo khonisuwanyeya. Nto tiivi ekhanle ekeekhai?

Biibiliya onnooniherya wira sihaavo itthu sikina sa Muluku atthu ahiniiwexexa aya. Mwa ntakiheryo, okhala wawe, muupuwelo awe, ni miruku sawe khivaniweryaneya ophima, waalikelela ni ovarerya, maana khininwerya wiiwexexa. Itthu iyo sa Muluku khasinniiriha woonaka oxankiha omusuwela yena. Tthiri wuupuwelela saana itthu iyo onoonikhaliherya ‘omwattamela Muluku’. (Yakobo 4:8) Nrowe niwehe matakiheryo vakhaani a itthu nihinwerya ahu wiiwexexa. Nuumala-vo nnooweha itthu ninwerya ahu wiiwexexa tthiri.

Itthu Xeeni Voohimya sa Muluku Nihinwerya Ahu Wiiwexexa?

MULUKU ONIKHALA MAHIKU OTHEENE: Omuhimyaka Muluku, Biibiliya oni: “Nyuwo mwá Muluku okhuma wopajeryani mpakha mahiku othene”. (Esalimo 90:2) Eyo enooniherya wira Muluku khorina wanipacerya wala wanikisa. Mwa moonelo wa apinaatamu “Hiyo khaninwerya  . . . walikela watta wa iyakha sawe”.​—Yobi 36:26.

Mureerelo: Muluku ooleiherya woovahani okumi woohimala akhala wira munoomusuwela tthiri. (Yohani 17:3) Nto yooleiherya eyo khiyaarowa okhalana efaita vaakhanle wira Muluku khonikhala mwa okathi wotheene. Paahi “Mwené a mahiku òhimala” toniwerya waakhwaniherya yooleiherya eyo.​—1 Timótheyo 1:17.

MUUPUWELO AWE: Biibiliya onihimya wira “khavo onsuwela miruku” sa Muluku, maana miruku sawe ti soorakamelana ni sawihu. (Yesaya 40:28; 55:9) Biibiliya onnikoha wira: “T’ani onsuwela sintthokelelaya Apwiya? T’ani onwerya wavaha miruku?”​—1 aKorinto 2:16.

Mureerelo: Muluku onniwiriyana imilyau sinceene sa mavekelo anipakiwa okathi omosaru. (Esalimo 65:3) Owo onnimoona khula mwaapalame onikhwa. Nto nihuupuweleke wira Muluku khoreere waatteliwa miteko vahinwerya awe onoona ni oniwiriyana. Muupuwelo awe khorina mikano. Yesu aahimmye so: “Muhòveké: nyuwo muhavikana axipalame òwatta”.​—Matheyo 10:29, 31.

MOOTA SINIPAKA AWE ITTHU: Biibiliya oniixuttiha wira apinaatamu khaniwerya “osuwela orattene itthu [Muluku] sinìrawe okhuma wopajeryani”. (Musuweli 3: 11) Nto hiyo khaninkhala-khala nisuwelaka itthu sotheene voohimya sa Muluku. Moota Muluku sinipaka awe itthu “khaniwerya otaphulela”. (aRoma 11:33) Masi, Muluku onniphavela owooniherya iphiro sawe ale aniphavela omwiiwelela.​—Amosi 3:7.

Mureerelo: Omusoma ni omutokosa Biibiliya, onimookhaliheryani wiixutta itthu isya voohimya sa Muluku ni iphiro sawe. Eyo enitaphulela wira hiyo nnoowerya omwaattamela Tiithi ahu a wiirimu mwa okathi ohinimala.

Itthu Siniwerya Ahu Wiiwexexa

Okhala wira hiyo khaninwerya osuwela saana mikhalelo sotheene sa Muluku, khentaphulela wira khaninwerya omusuwela-tu. Biibiliya ookhalana soohimmwa sinci sinnikhaliherya omusuwela saana Muluku. Moone matakiheryo vakhaani:

NSINA NA MULUKU: Biibiliya onniixuttiha wira Muluku ohiivaha nsina. Owo oni: “Miyo kà Yavéh [Yehova], nla ti nsina naka”. (Yesaya 42:8, Biblya Exirima) Nsina na Muluku ninniphwanyaneya mBiibiliyani ikwaha sowiiraka 7.000, ovikana masina makina.

Mureerelo: Yesu aavekenle so: “Tith’ihu, muri wirimu! Nsina nanyu nivuwihiwe”. (Matheyo 6:9) Niireke munnirumeela nsina na Muluku okathi munivekela anyu? Yehova onoowoopola otheene yaale anittittimiha nsina nawe.​—aRoma 10:13.

OPURO ONKHALA AWE: Biibiliya onniixuttiha wira ahaavo mapuro manli anikhaliwa: “Wirimu” weiwo onikhala malaikha ni “vathí-va”. (Yohani 8:23; 1 aKorinto 15:44) MBiibiliyani nuulumo noowi “wirimu” nintaphulela mapuro ahinooneya. “Nipuro onkhalawe’mo” Mpattuxa ti “wirimu”.​—1 Mamwene 8:43, BE.

Mureerelo: Osuwela ekeekhai ela onnookhaliheryani wiiwexexa moota Muluku siri awe. Mpattuxa ahu khahiyo ikuru sihinsuwanyeya siri eriyari ya khula mutthu ni khula etthu. Yehova ti Muluku okhanle tthiri ni onikhala opuro wekeekhai. Biibiliya oni: “Khivo etthu epattuxiwe envitheya va maithoni va Muluku”.​—aHéberi 4:13.

MIKHALELO SAWE: Biibiliyaonniixuttiha wira Yehova ookhalana mikhalelo sookuxa murima. “Muluku ophentá”. (1 Yohani 4:8) Owo khonootha. (Tito 1:2) Khorina nthalu, toomoriwa ikharari, ni toopisa onanariwa. (Okhuma 34:6; Miteko 10:34) Nto tivoohakalaliha osuwela wira Mpattuxa ahu “onnìvahererya w’ale animphenta” ni animuttittimiha.​—Esalimo 25:14.

Mureerelo: Nyuwo munoowerya okhala mpatthani a Yehova. (Yakobo 2:23) Akhala wira munimwiixutta mikhalelo sa Yehova, munoowerya omwiiwexexa Biibiliya.

MUMPHAVELE YEHOVA

Biibiliya onnooniherya saana wira Yehova ti Muluku oopatthaneya. Owo khahiyo mutthu ohinisuwanyeya, maana oniphavela wira nyuwo mmusuwele. Biibiliya oni: “Mwàphavelaka Apwiya, awo animorwa okumana ni nyuwo”. (1 Wahala 28:9) Nto mwiimananihe omusuwela Muluku orweela wa osoma ni wuupuwelela myaha sa mBiibiliyani. Mwapaka eyo, Biibiliya onnileiherya wira “Muluku onowattamelani”.​—Yakobo 4:8.

Waaniheryasa nyuwo pooti wuupuwela so: ‘Okhala wira nkinwerya wiiwexexa itthu sotheene voohimya sa Mpattuxa, nto nkinwerya okhala mpatthani awe’. Muthokorerye ela: Mutthu onoowerya okhala mpatthani a meediku hata ohisuwelaka oloola iretta. Mpatthani a meediku pooti okhalana muteko mukina ohiya oloola iretta. Veekeekhai vanniweryaneya wataana ni Muluku. Tthiri mpatthani a meediku onnisuwela makhalelo awe, ele enimusivela ni ele ehinimusivela. Vamosaru, nyuwo munoowerya wiixutta mBiibiliyani makhalelo a Yehova, eyo piiyo, ele munitthuneya anyu osuwela wira mukhale mpatthani a Muluku.

Biibiliya khonihimya itthu sotheene voohimya sa Mpattuxa ahu, masi ookhalana soohimmwa sinceene sinnikhaliherya omusuwela saana Muluku. Niireke munniphavela osuwela itthu sikina voohimya sa Yehova? Anamoona a Yehova annivaha yoosoma ya Biibiliya ehinliviwa etthu. Xontte mulavule naawo wala murumeele esaite ahu, www.jw.org/vmw.

[Eponto yuulupale epaaxina 13]

Okhala wawe Mpattuxa ahu, muupuwelo awe, ni miruku sawe khivaniweryaneya ophima