WAAKHULIWA WA MAKOHO A MBIIBILIYANI
Niireke atthu akhwiiye anootthikela okhala akumi?
Yehova Muluku ti Maphattuwelo a okumi. (Esalimo 36:10) Nto ti vooloka okupali wira, Muluku onoowerya waavaha okumi atthu akhwiiye! Biibiliya onihimya wira Muluku onoopaka eyo muhoolo. (Musome Miteko 24:15) Masi exeeni enrowa omwiiriha Muluku waahihimuxa atthu akhwiiye?
Okhuma khalai, Mpattuxa ahu oniphavela wira atthu akhaleke valaponi moohimala. (Maphattuwelo 1:31; 2:15-17) Nlelo oniphavela siiso. Muluku onnoona owereya vaavo oniweha awe ele eniwiiraneela apinaatamu olelo-va, eyo piiyo: okumi woosareya mixankiho ni woohipisa.—Mmusome Yobi 14:1, 14, 15.
Anrowa okhalaka woowi ale anrowa ohihimuxiwa?
Niireke Muluku aapattunxe atthu wira ekhaleke wiirimu? Nnaari. Malaikha tapattuxiwe wira ekhaleke wiirimu. Apinaatamu apattuxiwe wira ekhaleke valaponi. (Maphattuwelo 1:28; Yobi 38:4, 7) Nkahaya muupuwele sa ale Yesu aattikihenrye awe okumi. Nuumala waahihimuxa, awo yaakhala valaponi vaava. Vamosaru, anamunceene anirowa ohihimuxiwa muhoolo anirowa otthikela okhala akumi valaponi vaava.—Mmusome Yohani 5:28, 29; 11:44.
Masi, Muluku ohaathanla atthu vakhaani wira yaakhele ohihimuwa wa wiirimu ntoko malaikha. (Luka 12:32; 1 aKorinto 15:49, 50) Atthu awo, anrowa okhala mamwene hoothe ni Kristu wira elamuleleke valaponi.—Mmusome Wisupulula 5:9, 10.
Wira musuwele soohimmwa sikina, muwehe muru 7 wa eliivuru ela, yoolaleiwa ni Anamoona a Yehova
Enniphwanyaneya-tho va www.jw.org/vmw