Niireke Munnikhapelela “Nikula no Wisakihana, Ori Wamini”?

1-2. (a) Moovarihana ni aÉfeso 6:16, xeeni vanreerela aya okhalana “nikula no wisakihana”? (b) Mwaha ola, ninrowa waakhula makoho xeeni?

NIIREKE nyuwo mookhalana “nikula no wisakihana”? (Mmusome aÉfeso 6:16.) Moohaanyiherya, mookhalana. Ntoko siisaale nikula naakhapelela aya mipantta sinceene sa erutthu ya nakhotto, waamini wanyu onimookhapelelani wira muhihapuxiwe ni itthu soohiloka sa olumwenku ola wootakhala. Itthu iyo sinihela muhina orupihana woohiloka, otakhala murima ni itthu sotheene sihinivarihana ni malamulo a Muluku.

² Okhala wira ninkhala “okathi wokiserya”, waamini wahu onrowa otepaka weehereriwa. (2 Tim. 3:1) Nihaana oweha akhala wira nikula nahu na waamini ti nooloka. Munrowa owerya sai opaka eyo? Exeeni enrowa wookhaliheryani ovarexexa oratteene nikula nanyu? Mwaha ola, ninrowa woona waakhuliwa wa makoho awo.

NVARERYEKE SAANA NIKULA NANYU NOOWIISAAKIHANA

3. Nakhotto iiriha exeeni nikula nawe, ni nthowa xeeni?

³ Okathi aalempwa awe Biibiliya, anakhotto yaaniwara nikula noowiisaakihana. Anakhotto yaanimuhela ooleyo nikula naya wira ikweeceryo sihihononeye wala sihinye mukwitha aahiiso murawa. Akhala wira nikula naya naanihononeya awo yaanaakuvela olokiherya. Opaka eyo yaanimukhaliherya orowa okhottoni. Ntakiheryo nna ninvarihana sai ni waamini wanyu?

4. Xeeni vari aya vooloka okhapelela nikula nanyu ori waamini ni munrowa opaka sai eyo?

⁴ Ntoko siisaale anakhotto yaavarerya aya nikula naya, nyuwo muhaana ovarerya ni okhapelela khula nihiku nikula nanyu. Opaka eyo enimookhaliheryani okhala oolikana ene wira nwerye owana ekhotto anyu ya eKristau, eyo piiyo, ekhotto yomunepani ni malaikha ootakhala. (aÉf. 6:10-12) Muhiliyale wira khuuvo mutthu okhanle oowana ekhotto eyo nipuro nanyu. Exeeni enrowa wookhaliheryani woona akhala wira waamini wanyu onoolipa okathi muneehereriwa anyu? Etthu yoopacerya tiila: Muhaana onvekela nikhaliheryo Muluku. Nuumala-vo, murumeeleke Nuulumo na Muluku wira musuwele moonelo anyu waavarihanaka ni moonelo wa Muluku. (aHéb. 4:12) Biibiliya onihimya so: “Mwaroromeleke Apwiya ni murim’anyu wothene: muhiroromelé osuwela wanyu pahi! Nwupuwele Apwiya mothene munettanyu: awo anolokiha iphiro sanyu”. (Mir. 3:5, 6) Muupuwelaka iveersu iyo, nkahaya muupuwele soothanla mpanke anyu niinaano. Mwa ntakiheryo, niireke mwaahimaleliwa? Niireke okathi owo mwaahuupuwela yooleiherya ya Yehova eri aHéberi 13:5, yeeyo eni: “Miyo nkinonyanyalani-tho: kinimojalani mahiku othene”? Muupuwelaka yooleiherya ela, niireke mwaanikupali ni murima wotheene wira Yehova aamookhaliheryani? Akhala wira mwaahipaka eyo, munnikhapelela saana nikula nanyu, ori waamini ni munnooniherya wira ti nooloka.

5. Woonasa wene, exeeni mukhanle anyu owoona vaavo munvarerya anyu waamini wanyu?

⁵ Vaavo munivarerya anyu oratteene waamini wanyu, pooti oweha etthu muhaalipelela anyu. Woonasa wene, pooti woona sootteettheya sanyu muhaatonko anyu woona. Mwa ntakiheryo, pooti wira oxanka mootepana, itthu sowoothiwa ni okhulumuwa onnihonona waamini wanyu. Akhala wira eyo enniwiiraneelani, muhaana opaka exeeni wira mukhapelele waamini wanyu?

MWIIKHAPELELE NI OXANKA MOOTEPANA, ITTHU SOWOOTHIWA NI OKHULUMUWA

6. Inamuna xeeni sooloka sa oxanka?

⁶ Inamuna sikina sa oxanka ti sooloka. Mwa ntakiheryo, ti vooloka oxankela itthu sinimusivela Yehova ni Yesu. (1 aKor. 7:32) Akhala wira noopaka etampi yuulupale, oxanka onoonikhaliherya olokiherya waataana wahu ni Muluku. (Esal. 38:19) Nave, nihaana oxanka wira nimusivelihe ole nithelanne ahu ni okhapelela etthoko ahu. Ti vooloka oxanka voohimya sa makhalelo a anna ni arokora.​—1 aKor. 7:33; 2 aKor. 11:28.

7. Moovarihana ni Miruku 29:25, xeeni vahinreerela aya owoova atthu?

⁷ Musuweleke wira oxanka mootepana pooti ohonona waamini wahu. Mwa ntakiheryo, mutthu pooti oxanka vanceene voohimya sa yoolya ni soowara. (Math. 6:31, 32) Woonasa wene, etthu enniiriha otepa oxankela itthu iyo, mwaha woowi ninnitepa ophavelasa itthu sa werutthuni. Eyo pooti oniiriha omakela ophenta musurukhu. Akhala wira nnimweemererya eyo oniiraneela, omwaamini wahu Yehova onoovukuwa ni waataana wahu ni yena onoohononeya. (Mar. 4:19; 1 Tim. 6:10) Etthu ekina ekhanle oohonona waataana wahu ni Yehova, ori otepa oxanka voohimya sa moota atthu akina annoonela aya. Oxanka iwo pooti oniiriha woova oramusiwa, olupatthiwa ovikana woova omunyoonyiha Yehova. Wira niwerye wiikhapelela, nihaana omuxonttela Yehova wira onivahe waamini ni olipa murima wira nixintte mixankiho iyo.​—Musome Miruku 29:25, Luka 17:5.

8. Nihaana opaka exeeni vaavo ninleeliwa ahu itthu sowoothiwa?

⁸ Biibiliya onnimuhimya Satana okhala “tithi a wothá”, nto onnaarumeela atthu awe wira ahimyeke itthu sowoothiwa voohimya sa Yehova, anna ni arokora. (Yoh. 8:44) Mwa ntakiheryo, anammwareya annilaleya itthu sowoothiwa munternetini, TV, ni ikaruma sikina sinilaleya ihapari voohimya sa mutthenkeso wa Yehova. Sowootha iyo siniirela mpantta “matthere a moro anvonyiwa ni mutakhali”, eyo piiyo, Satana. (aÉf. 6:16) Munrowa opaka exeeni akhala wira ookhala mutthu oniphavela ovaanela ni nyuwo voohimya sa itthu iyo sowoothiwa? Muhikhala-khale nwiriyanaka! Mwaha wa xeeni? Mwaha woowi ninnimwaamini Yehova ni ninnaaroromela anna ni arokora. Ohiya-vo, hiyo khanimphavela waataana ni anammwareya. Tivonto muhikhala-khale munyakulihanaka naawo hata ahimyaka itthu sookuxa murima.

9. Exeeni okhulumuwa okhanle aya ooniiriha?

⁹ Okhulumuwa pooti otteettheiha waamini wahu. Tthiri nihaana ocalela mixankiho sahu. Maana ohipaka eyo waarowa okhala ololo. Masi muhikhala-khale mweemereryaka oxinttiwa aahiiso okhulumuliwa ni mixankiho sanyu. Akhala wira mixankiho sahu sinninikhulumula, nnooliyala nlipelelo noohakalaliha Yehova onivanhe awe. (Wis. 21:3, 4) Okhulumuwa pooti omaliha ikuru sahu mpakha oniiriha ohiya omurumeela Yehova. (Mir. 24:10) Ninrowa osyaka sai eyo?

10. Ewarakha murokora aalempe awe, ewiixuttinheni exeeni?

¹⁰ Nwehe yowiiraneya ya murokora a wEstados Unidos. Iyawe khaareere owereiwa ni aahaana okhapeleliwa vanceene. Exeeni yaamukhalihenrye ohiyeleela waamini wawe okathi ole wooxankiha? Ewarakha aalepenle awe oseedi ahu ya olumwenku wotheene, owo aahimmye so: “Mukhalelo ahu waari wooriipiha murima ni wookhulumula. Masi nlipelelo nahu ti noolipa vanceene. Kinnixukhurela vanceene itthu sotheene Yehova onnivaha awe wira olipihe waamini wahu. Tthiri ninniphavela miruku iyo ninvahiwa ahu ni olipihiwa. Itthu iyo sinninikhaliherya ovilela mixankiho ni soweeha sa Satana”. Moolumo a murokora ola, anninikhaliherya woona wira vanniweryaneya oxintta okhulumuwa! Moota xeeni? Muthokoreryeke mixankiho sanyu ntoko soweeha sa Satana. Nave mukupaliki ni murima wotheene wira Yehova onimoomaalihani ni nvaheke efaita yoolya yomunepani ninvahiwa ahu.

11. Wira nisuwele akhala wira vannireerela olokiherya waamini wahu, makoho xeeni ninreerela ahu wiikoha?

¹¹ Niireke munniweha inamuna mukhanle anyu oolokiherya nikula nanyu na waamini? Niireke myeeri sookiserya moowerya osyaka oxanka mootepana? Moosyaka osoma wala owiriyana itthu sowoothiwa sinilavuliwa ni anammwareya ni onyakulihana naawo? Moowerya oxintta okhulumuwa? Akhala wira munaakhula wira aayo, eyo enooniherya wira nikula nanyu na waamini ti nooloka. Masi nihiikhuraane, maana Satana ookhalana ikapwitthi sikina oniphavela awe onihophana. Nrowe niwehe ikapwitthi vakhaani.

MWIIKHAPELELE WIRA MUHIPHENTEKE ITTHU SA WERUTTHUNI

12. Exeeni itthu sa werutthuni sikhanle aya ooniiriha?

¹² Itthu sa werutthuni aahiiso mihakhu, pooti oniiriha oliyala olokiherya nikula nahu na waamini. Biibiliya onihimya wira “ole onetta okhottoni, atthuna omusiveliha kapitau awe, khanetetela miteko sihikhanle s’ekhotto”. (2 Tim. 2:4) Tthiri, anakhotto ooRoma khiyeemereriwa omweetta nakoso. Exeeni yaarowa okhumelela vaakhanle wira nakhotto khaatthara malakiheryo awo?

13. Xeeni nakhotto aheemereriwa awe omweetta nakoso?

¹³ Nkahaya muupuwele ela: Egrupu emosa ya anakhotto enniviriha voosiisu wotheene yiixuttaka moota woowana ni ekatana. Masi nakhotto mmosa aahicompa. Nakhotto owo ocompale mwaha woowi aaronwe otumiha yoolya omerkaatu. Vano ohiyu, anakhotto annittottela mureerelo ovarerya ikaruma saya sa ekhotto ni onona ikatana saya. Masi nakhotto ole ontumiha yoolya, onnittottela mureerelo ohiyu ole wira olokiherye marotta onrowa awe otumiha nihiku ninttharelana. Nuumala oxa, awanani aya anniphiya mootutuxerya wira yaapwetexe. Nakhotto xeeni munoona anyu wira aahikhala oolikana ene wira owane ekhotto ni omusiveliha kapitau awe? Nakhotto xeeni aarowa woosivelani ovarana muteko? Niireke waarowa woosivelani ovara ni nakhotto iilokihenrye wala ole ohiilokihenrye ni aatumiha yoolya?

14. Okhala wira na anakhotto a Kristu, etthu xeeni eri yootepa otthuneya mookumini mwahu?

¹⁴ Hiyo nri anakhotto ooloka, khaninliyala yoolakela ahu yuulupale, eyo piiyo, weemereriwa ni makapitau ahu Yehova ni Kristu. Opaka eyo, etthu yootepa otthuneya ovikana ophwanya itthu sinikumiheriwa ni olumwenku ola wootakhala wa Satana. Hiyo ninniimananiha ophavelasa okathi ni ikuru wira nimurumeeleke Yehova, okhapelela saana ohiya paahi nikula nahu na waamini masi ikaruma sotheene sa ekhotto ahu ya omunepani.

15. Nlopolo xeeni murummwa Paulo ovanhe awe, ni nthowa xeeni?

¹⁵ Xontte, nihikhala-khale niikhuraanaka! Mwaha wa xeeni? Mwaha woowi, murummwa Paulo onlopola wira otheene ale aniphavela “wunjererya muhakhu aya annimorela vantaphani na Satana” ni ‘ohapuwela ottaiwene ni wamini’. (1 Tim. 6:9, 10) Nuulumo noowi ‘ohapuwela’ nnooniherya wira, akhala wira ninniimananiha ophavelasa mihakhu paahi, hiyo pooti orimeela. Nave vamurimani vahu pooti opacerya wunnuwa itthu “s’ololo ni sotakhala”. Ohiya weemererya itthu iyo soohiloka sinnuwaka vamurimani vahu, nihaana woona itthu iyo ntoko ikapwitthi Satana onirumeela awe wira ohonone waamini wahu.

16. Moovarihana ni Marko 10:17-22, nihaana wiikoha makoho xeeni?

¹⁶ Woonasa wene, nyuwo mookhalana musurukhu munceene woothumana itthu sinceene sa werutthuni. Niireke ti voohiloka othuma itthu nninlela ahu masi nihimphavela ahu? Pooti wira nnaari. Masi nkahaya muupuwele makoho ala: ‘Hata kirina ene musurukhu woothumana etthu ela, kiireke kookhalana okathi ni ikuru wira kirumeeleke ni okhapelela? Kiireke nkinrowa opacerya ophenta vanceene itthu sa werutthuni kirina aka? Kiireke ophenta itthu iyo, onookiiriha okhala ntoko mmiravo ole aakhoottale nlattulo na Yesu?’ (Mmusome Marko 10:17-22.) Tthiri ti vooloka okhweiherya okumi ahu wira nikhalaneke okathi ni ikuru wira nipakeke yootthuna ya Muluku!

NVAREXEXE ORATTEENE NIKULA NANYU NOOWIISAAKIHANA ORI WAAMINI

17. Etthu xeeni nihinreerela ahu oliyala?

¹⁷ Muhikhala-khale muliyalaka wira ninniwana ekhotto, nto khula nihiku nihaana okhala oolikana ene wira niwane ekhotto eyo. (Wis. 12:17) Musuweleke wira anna ni arokora akina khanrowa okuxa nikula nahu na waamini nipuro nahu. Tthiri muritti ahu ovarela oratteene ni olipiha waamini wahu.

18. Khalai, exeeni yaawiiriha anakhotto ovarelela oratteene nikula naya?

¹⁸ Khalai, nakhotto aalipa murima okathi wa ekhotto aanitthuveliwa ni ottittimihiwa vanceene. Masi akhala wira aanitthikela owaani ohikunxe nikula nawe, owo aanuuliwa muru vanceene. Tácito, mulipa-oolepa sowiiraneya olempe so: “Akhala wira nakhotto aanihiya nikula nawe, owo aanuuliwa muru vanceene ni khaattittimihiwa”. Eyo ti etthu yaawiiriha anakhotto ovarelela oratteene nikula naya.

19. Ninrowa ovarelela sai oratteene nikula nahu?

¹⁹ Hiyo nave nihaana ovarelela oratteene nikula nahu na waamini. Moota xeeni? Nrowelaka mithukumano sahu sotheene, waalaleerya atthu voohimya sa Yehova ni Omwene awe. (aHéb. 10:23-25) Nave nihaana omusoma Biibiliya khula nihiku ni onvekela Yehova wira onikhaliherye ovarihela muteko itthu onniixuttiha awe. (2 Tim. 3:16, 17) Akhala wira nnoopaka eyo, khiivo etthu Satana okhanle awe oopaka enrowa onikumiherya mixankiho mahiku otheene. (Yes. 54:17) Tthiri “nikula no wisakihana, ori wamini” nnoonikhapelela vanceene. Ninrowa ovaraka moolipa murima ni anna ni arokora. Khahiyo paahi ninrowa oxintta ekhotto ahu ya khula nihiku, masi nnookhalana eparakha ya omoona Yesu omuxinttaka Satana ni atthareli awe.​—Wis. 17:14; 20:10.