Okathi Muluku aalamulela awe, itthu sotheene saari sowiiraana ni sa murettele

Xeeni Nimphavela Ahu Omwene wa Muluku?

Okathi aapattuxiwe awe mulopwana oopacerya valaponi, Mpattuxa ahu Yehova, taari Namalamulela mekhawe. Owo onilamulela moophenta. Maana aahipaka opuro wooreera wiihaniwa Ejardim ya wEdeni, yeeyo aavanhe awe apinaatamu. Ohiya-vo, owo aahaavaha yoolya yinceene ni yooloka. Nave-tho, Yehova aahaavaha muteko woohakalaliha wira avareke. (Maphattuwelo 1:28, 29; 2:8, 15) Apinaatamu yaarowa okhalaka ni murettele mahiku otheene, vaakhanle wira khiyaakhoottale olamulelo woophenta wa Muluku.

Adamu ovarenle ene muhokorokho ovahiwe awe ni Eva. — Apinaatamu oopacerya yaahikhootta olamuleliwa ni Muluku

Biibiliya onihimya wira nlaikha nimosa, muhoolo mwaya naasuweliwe okhala Satana Diabo, naahimmye wira Muluku khonireerela waalamulela apinaatamu. Tthiri Satana aahimya wira apinaatamu yaamuhakalalaka ahilamuleliwaka ni Muluku. Mooriipiha murima, anamuyari ahu oopacerya Adamu ni Eva, yaahikupali wootha wa Satana. Maana, amutakihaka Diabo, awo yaahithanla ohimwiiwelela Muluku.—Maphattuwelo 3:1-6; Wisupulula 12:9.

Okhala wira Adamu ni Eva yaahikhootta olamuleliwa ni Muluku, awo yaahipweteiwa eparayiisu ni eparakha ya okhala mahiku otheene ni okumi wooloka. (Maphattuwelo 3:17-19) Yoothanla aya yoohiloka, yaahaaphwanyiha maxakha anaaya yaarowa aya waayaraka muhoolo. Biibiliya onihimya wira, mwaha wa ohiiwelela wa Adamu “t’oruhale etampi mulaponi: etamp’iyo yoruha okhwa”. (aRoma 5:12) Nave etampi yooruuha muxankiho mukina muulupale, muxankiho ene tuula: “Àkhala-tho [atthu] akina anihawa epuheriwaka n’awo”. (Musuweli 8:9) Moolumo ala, anooniherya wira vaavo mutthu onimulamulela awe mutthu mukina, sinnikhumelela mixankiho.

APINAATAMU ANNIPACERYA OLAMULELA

Nemurodi eemenle ene moowiikuxererya. Mpantta mukina atthu atekaka empa yuulupale. — Nemurodi aahikhootta olamulela wa Yehova

Pinaatamu oopacerya olamulela onilavuliwa mBiibiliyani ti Nemurodi. Mulopwana ole aari namavirikanya ni khaaphavela wira Yehova aalamuleleke apinaatamu. Okhuma okathi wa Nemurodi mpakha olelo-va, ale anilamulela annirumeela okhulupale aya mwa enamuna yoohiloka. Tthiri iyaakha 3.000 sivinre, Mwene Salomoni aalempe so: “Kowona atthu anjene epuheriwaka n’uhaxiwa. Awo anninla, nto khavo onakhaliherya: ale analupattha t’alipa-òwerya”.—Musuweli 4:1.

Mpakha olelo-va, khiivo etthu eturukeyale. Mwaakha wa 2009, eliivuru emosa ya Organização das Nações Unidas, yaahimmye wira okathi wotheene onnooneya wira “ikuvernu sootakhala etthu yuulupale enikumiherya mixankiho molumwenkuni”.

MARUKUNUXO MUHOOLO!

Tthiri olumwenku onnaaphavela anamalamulela ooloka ni enamuna ekina ya olamulela. Moohaanyiherya, eyo ti etthu Mpattuxa ahu oleihenrye awe opaka!

Ifootu: Sookhumelela sa olamulelo wa apinaatamu. 1. Muthiyana a wÁsia okilaathale ene ephiro yoonanara omukunxe ene mwanawe mwaamuthiyana inlaka. 2. Mulopwana oowuuluvala aapaxanri ene oxiripitali. 3. Anakhotto awoopaka akapwitthi aya okhottoni. 4. Atthu ananariwe ene awanelaka idireitu saya. 5. Muthiyana ni mwanawe mwaamuthiyana yeemenle ene ota wa empa aya, nto anniphwanya ekoopho ohoolo wa mukhora aya ephweeyale ene. 6. Epooma esareyale ene mwiixi ni erina iposte sa energia. — Hata anamalamulela ooloka aapinaatamu khaawenrye omaliha mixankiho suulupale sa apinaatamu

Muluku oopaka Omwene awe, niire so, ekuvernu awe, yeeyo enrowa orantteliha ikuvernu sotheene sa apinaatamu, nto Omwene owo “onrowa okhalaka wa mahiku othene”. (Daniyeli 2:44) Owo, Omwene yoole atthu anceene anivekela aya khula nihiku. (Matheyo 6:9, 10) Muluku khonrowa olamulela Omwene owo mmensawe. Maana oomuthanla mutthu aatonko okhala valaponi wira okhale Mwene a Omwene wa Muluku. Tani Muluku omuthanlale awe?