Nyuwo Pooti Omukhaliherya Namathela Wala Namatheliwa Ohikhanle Namoona?
1. Niireke wira maKristau iyaya wala mwaaraya ohikhanle namoona taniphavela paahi wira ole othelanne aya aakhulele ekeekhai?
1 Niireke wira aakhala anna akina a muloko anyu iyaya aahiiso mwaaraya ohikhanle namoona? Akhala wira ti siiso, anna ala anniphavela tthiri wira ole othelanne aya omukokhoreleke Yehova. Masi, yoophavela eyo khahiyo ya anna ala paahi. Amutakihaka Muluku, anna otheene a mmulokoni anniphavela wira “atthu othene yòpowe, esuwele ekekhai”. (1 Tim. 2:4) Nto ninrowa waakhaliherya sai anamalaleerya ala iyaya wala mwaaraya ohikhanle namoona?
2. Moota xeeni ankhili annikhaliherya aya omuthokorerya saana namathela wala namatheliwa ohikhanle namoona?
2 Wanipacerya, hiyo nohaana ophavela osuwela moonelo aya. Anceene a atthu ala ahikhanle anamoona, anniphenta emusi aya ni anniimananiha okhala namuyari ooloka ni omuhakalaliha ole othelanne aya. Pooti wira awo annikupali sowiixuttiha sa etiini aya seiyo sivirikanne ni sawihu. Khino namathela wala namatheliwa owo onisuwela itthu vakhaani paahi voohimya sa Anamoona a Yehova, seiye khino sileeliwa awe ni atthu ahinnisuwela saana wala ahinniphavela. Akina khivanaasivela vaavo iyaya wala mwaaraya vanirumeela awe okathi yoole khalai aakhala awe ni emusi awe, vano khiyarowa osalau. Ankhili anoonikhaliherya omuthokorerya moopatthaneya ni mwa nttittimiho ole ohinaamini, nisyakaka opaka itthu moonanariwa.—Mir. 16:20-23.
3. Tiivi khino eri enamuna yooreera enikhaliherya omwiiriha ole ohikhanle namoona waakhulela ekeekhai?
3 Waathokorerya Akina: Enamuna emosa yooreera enikhaliherya omwiiriha ole ohikhanle namoona waakhulela ekeekhai ti mweettelo ahu, ohiya omwiixuttiha Biibiliya. (1 Ped. 3:1, 2) Vano ti vootthuneya waathokorerya atthu awo. Nto, arokora mmulokoni pooti omuthokorerya muthiyana ootheliwa ohikhanle namoona, vano anna pooti omuthokorerya mulopwana oothela ohikhanle namoona. Moota xeeni?
4. Ninrowa wooniherya sai wira ninnaathokorerya atthu akina?
4 Akhala wira nlelo khimulavulanne namathela wala namatheliwa ohikhanle namoona, wanipacerya nyuwo pooti olavula toko ni iyawe aahiiso mwaarawe okhanle Namoona. Muhikhumuwe akhala wira ole oohaamini wanipacerya khoniwaakhelani saana. Moolumo ahu oopatthaneya ni omuthokorerya wahu pooti omwiiriha woona wira Anamoona a Yehova atthu ooreera murima. (aRom. 12:20) MaKristau makina oolipa momunepani annimulattula namathela wala namatheliwa ohikhanle namoona ni etthoko awe wira axantari hoothe, aphavelaka omusuwela saana ni omaliha muupuwelo woohiloka waarina awe ole oohaamini. Pooti wira mmapuro mwa omuthipelela owiriyana myaha sa Biibiliya, awo yaalavula myaha sinimusivela ole ohinaamini. Nto, vaavo mutthu owo vanaalimalela awe anna, pooti opacerya omulaleerya. Akhala wira onnaasuwela anna akina a mmulokoni, owo pooti weemererya orowa omuthukumanoni wira owehe ele eniixutta amwaarawe. Hata ohiphavelaka osuwela ekeekhai, nimuttottopeleke mwaha wa omukhaliheryaka ole othelanne awe.
5. Moota xeeni axitokweene anrowa aya omukhaliherya ole ohikhanle namoona?
5 Vanceenexa, axitokweene ahaana waavya inamuna sa omukhaliherya ole othenle wala otheliwe ohikhanle namoona aphavelaka omulaleerya. Ole ohikhanle namoona ahaasiveliwa myaha sa Biibiliya, pooti vano ophavelaka owiriyana myaha iyo akhala wira ori oxipitali mwaha woowereiwa. Vaavo itthoko iya vanikumana aya maxakha, ntoko okhwa mutthu mmosa vatthokoni-vo, axitokweene pooti onvekela ole oohaamini wira okhale opuro owo okathi vanilavula aya masu oomaaliha.
6. Exeeni enniiriha wiimananihaka wira nimukhaliherye namathela wala namatheliwa ohikhanle namoona?
6 Nkahaya muupuwele ohakalala oniphwanya awe muKristau a muloko ahu vaavo ole othelanne awe vanaakhulela awe okela enamoona! Tthiri, yowiiraneya eyo yotteeliha murima ennimuhakalaliha-tho Yehova, malaikha, ni anna otheene a mmulokoni. (Luka 15:7, 10) Masi, akhala wira ole ohinaamini khaakhulenle enamoona, nihikhumuwe mwaha woowi wiimananiha wahu onnimuhakalaliha Yehova, yoowo ohiniphavela “wira mutthu apweteye, nnákhala mmosá. Ontthunexawe wira atthu othene erukunuxe murima”.—2 Ped. 3:9.
[Eponto yuulupale ya epaaxina 6]
Enamuna emosa yooreera enikhaliherya omwiiriha ole ohikhanle namoona waakhulela ekeekhai ti mweettelo ahu, ohiya omwiixuttiha Biibiliya