Wuupuwelela ni Ovekela Ti Wootthuneya wa Arumeyi a Nthiti
1. Exeeni yaamukhalihenrye Yesu oheemererya wira atthu amuhiihe olaleya?
1 Nuumala nsuwa okela, Yesu aahiviriha okathi aavonihaka aretta ni owoomola axetwani. Vaavo awiixutti awe yamphwanyale aya mmeeloni mwaya, yaahihimya wira: “Atthu othene annophavelani”, ni khimutumererya ovikaniha opaka miteko sootikiniha. Masi Yesu kheemerenrye wira atthu ale amuhiihe ovara muteko muulupale wa olaleya ihapari sooreera. Yesu aawaakhunle so: “Nrowé okinaku, mittetthe sowattamela, wira weiwo-tho kalaleye ehapari yorera: p’itthu kirwenlyaka”. Exeeni yaamukhalihenrye ovikaniha olaleya? Yesu aanivenya voosiisu wira ovekele ni wuupuwelela itthu somunepani. (Mar. 1:32-39) Nto, moota xeeni wuupuwelela ni ovekela onrowa aya onikhaliherya olaleerya mwa nthiti?
2. Wira nikhaleleke nthiti olaleerya, nohaana wuupuwelela exeeni?
2 Itthu Xeeni Sinireerela ahu Wuupuwelelaka? Yesu aahoona wira atthu yaari “òthwelela ni ònyanyaliwa, ntoko ipwittipwitthi sihikhalanne makampusi aya”. (Math. 9:36) Moolikanasa, hiyo nohaana wuupuwela moota varyaaya vootthuneya atthu wiiwa ihapari sooreera. Nave-tho, nohaana wuupuwela wira okathi ohanle ori vakhaani. (1 aKor. 7:29) Hiyo pooti wuupuwelela miteko ni mikhalelo sa Yehova, eparakha erina ahu ya okhala Anamoona a Yehova, ni mihakhu somunepani sootthuneya seiyo siixuntte ahu mBiibiliyani, itthu seiyo sihinisuweliwa ni atthu a muttetthe ahu.—Esal. 77:12-14; Yes. 43:10-12; Math. 13:52.
3. Okathi xeeni onireerela ahu wuupuwelelaka?
3 Okathi wa Wuupuwelela: Amutakihaka Yesu, akina anuupuwelela myaha somunepani vaasiisu, okathi woomaaleleya. Akina anoona oreerela wuupuwelela ohiyu ahinatthi orupa. (Maph. 24:63) Pooti naatteliwe ene miteko, nnoowerya ophwanya okathi wira nuupuwelele myaha somunepani. Anna akina annuupuwelela myaha somunepani awenle ene mikukutta. Akina anuupuwelela okathi onimumula aya othana. Anamunceene annoona wira wuupuwelela myaha somunepani ahinatthi opacerya olaleerya, hata okathi vakhaani paahi, onnaakhaliherya olaleya ni nthiti ni mohoova.
4. Xeeni vanireerela ahu wuupuwelela?
4 Wuupuwelela ni ovekela onimuncererya ophavela wahu omurumeela Yehova, onikhaliherya ovaha efaita okokhorela wahu, ni onilipiha wira nivikaniheke olaleya. Yesu yoowo ori Murumeyi Muulupale a Muluku, aahittottela mureerelo wuupuwelela myaha somunepani, hiyo-tho nnoottottela mureerelo.