Olooliwa Xeeni Onrowa Anyu Othanla?

Omwiira operasau ehirumeeliwaka ephome, ti etthu enipakiwa vano mwa ixipitaali sinceene olumwenku wotheene. Niireke wira munnisuwela inamuna iyo sa olooliwa ehirumeeliwaka ephome seiyo siniphwanyaneya oxipitaali? Nto, ti vootthuneya osuwela wira mpake soothanla sanyu voohimya sa inamuna iyo sa oloola ni operasau. Moone eviidiyu Sem Sangue: A Medicina Encarou o Desafio. Nuumala othokorerya vamosa ni ovekela, muuluule ele yiixuntta anyu murumeelaka makoho anittharelana.—Nwehe ela: Okhala wira eviidiyu eyo enniwooniherya vakhaani atthu yiiriwaka operasau, anamuyari ahaana ovaha ephoole okathi oniweha aya eviidiyu eyo wira anaaya ahoone etthu ehinreerela wooniwa ni anamwane ooyeveela.

(1) Nthowa xeeni nuulupale ninwiiriha Anamoona a Yehova oheemererya oheleliwa ephome? (2) Voohimya sa olooliwa, enamuna xeeni ya olooliwa Anamoona a Yehova eniphavela aya? (3) Ehakhi xeeni yuulupale khuta muretta erina awe? (4) Xeeni varyaaya vookhalela ni vamiruku othanla inamuna sikina sa olooliwa ohiya iye sa oheleliwa ephome? (5) Vaavo vaniyiiheya aya ephome yinceene, itthu xeeni piili seiyo matotoro sinitthuneya aya opaka moohipisa? (6) Malakiheryo xeeni maxexe akhanle a inamuna sikina sa waaloola aretta mohaahelela ephome? (7) maMeediku anrowa owerya sai (a) ovukula oyiiheya ephome, (b) osuka ikoloobulu sooxeerya, (c) okhaliherya erutthu opaka ephome mowaakuva, ni (d) Ottikiherya ephome eniyiiheya? (8) Mutthokiherye mwiirelo wa olooliwa oniihaniwa (a) hemodiluição ni (b) recuperação intraoperatória de células. (9) Itthu xeeni sinitthuneya anyu osuwela voohimya sa inamuna sikina sa olooliwa moohiheleliwa ephome? (10) Nto, vanniweryaneya ompaka operasau muulupale ni ootikiniha ohiheleliwe ephome? (11) Etthu xeeni yooloka eniiraneya eriyari ya mameediku a ilapo sinceene?

Waakhulela inamuna sikina sa olooliwa sooniheriwe nviidiyuni, etthu khuta mmosa enireerela awe othanla moovarihana ni yowuupuxerya ya murima awe ottharihelaka malamulo a Biibiliya. Niireke wira nyuwo moothanla enamuna ya olooliwa voohiheleliwa ephome, yeeyo nyuwo ni aniinyu enrowa anyu weemererya, ni moolepa mukartauni DPA? Wira mwiiwexexe oratteene mwaha ola, nwehe “Perguntas dos Leitores”, A Sentinela 15 ya Junyo 2004, ni A Sentinela 15 ya Outubro 2000. Nwehe-tho esuplemento ya Orummwa Ahu wa Omwene ya Novembro 2006, mwaha oni: “Kinoonela Sai Ifrasau sa Ephome ni Inamuna sa Olooliwa Seiye Sinihela Muhina Orumeeliwa Ephome Aka?”, wira musuwele inamuna sa olooliwa sinirowa anyu othanla wala okhootta. Wanikisa waya, muhiliyale olepa mukartauni DPA soothanla sanyu. Nyuwo muhaana waatthokiherya saana mameediku anyu, amusi inyu ahikhanle Anamoona enamuna ya olooliwa enithanla anyu ni mathowa aniwiirihani opaka yoothanla eyo.