Okathi wa Wuupuwelela Okhwa wa Yesu, Onnivaha Eparakha ya Wuncererya Olaleerya!
1. Mathowa xeeni arina ahu wira nincererye olaleerya myeeri sa Marso, Abril, ni Maio?
1 Munniwerya wuncererya okathi woolaleerya emaara ya Wuupuwelela okhwa wa Yesu enaattamela? Ilapo sinceene okathi owo khonivihexa wala oriiryexa, nave-tho vannipisa wiila. Nto, okhala wira anamalaleerya akina anoovahiwa ifeeriya omutekoni wala oxikola, awo pooti orumeela mahiku awo wira alaleerye. Nihiku 2 a Abril, ninrowa opacerya ekampaanya ya vameekhaaya ya waalattula ale anisiveliwa, wira arwe wuupuwelela ni hiyo okhwa wa Yesu, 17 a Abril. Nuumala-vo, nnimwiimananiha waakhaliherya ale anirwa, wira naalattule owiriyana mwaha a vameekhaaya onirowa wiiriwa esumana 25 a Abril. Tthiri, aakhala mathowa manceene wira nincererye olaleerya myeeri sa Marso, Abril, ni Maio.
2. Enamuna xeeni yooloka ya wuncererya olaleya wahu?
2 Opioneero Wookhaliherya: Enamuna emosa yooloka ya wuncererya olaleya ti orumeela ntoko pioneero ookhaliherya. Okhala wira otheene ahu ninnaatteliwa miteko, eyo enivekela olokiherya vahinatthi eprokrama ya miteko sahu. (Mir. 21:5) Waaniheryasa, nyuwo pooti wunteerya miteko sikina soohitthuneya sa khuta nihiku. (aFil. 1:9-11) Xeeni ohaaleelaka anna akina mmulokoni yoophavela anyu ya okhala pioneero? Eyo pooti owiiriha anna awo ophavela orumeela ni nyuwo ntoko pioneero.
3. Itthoko siniwerya sai wuncererya olaleerya waya?
3 Okathi onirowa anyu Omulompa Muluku Vatthokoni, nyuwo pooti ovaanela ni etthoko anyu voohimya sa soolukama sanyu. (Mir. 15:22) Wiiwanana vatthokoni, pooti owiiriha akina a etthoko eyo okhala pioneero ookhaliherya mweeri mmosa wala sinceene. Sai etthoko anyu yaahiweryeke orumeela ntoko pioneero? Etthoko eyo pooti wuncererya muteko aya, elaleeryaka makaaripi wala evirihaka okathi munceene wuumalani wa esumana.
4. Mareeliho xeeni anirowa ahu ophwanya nancererya olaleerya okathi wa Wuupuwelela okhwa wa Yesu?
4 Yehova onniweha ni onnisiveliwa wiimananiha onipaka ahu wira nimurumeele. (aHéb. 6:10) Nave-tho, ninnihakalala vaavo vanimurumeela ahu Yehova ni waakhaliherya akina. (1 Wah. 29:9; Mit. 20:35) Munoowerya wuncererya olaleerya okathi wa Wuupuwelela okhwa wa Yesu wira mphwanye ohakalala ni mareeliho manceene?