Mwiirihe Niira na Wuupuwelela Okhala Noohakalaliha!
1. Enamuna xeeni emosa enirowa wuncererya ohakalala wahu okathi wa Wuupuwelela Okhwa wa Yesu?
1 Niireke munniphavela wuncererya ohakalala wanyu myeeri sa Março, Abril, ni Maio? Enamuna emosa ya opaka eyo, ori okela opioneero wookhaliherya. Opioneero onrowa wuncererya sai ohakalala wanyu?
2. Moota xeeni wunnuuherya olaleerya onincererya aya ohakalala?
2 Muncererye Ohakalala Wanyu: Yehova oonipattuxa wira nihakalaleke mwaha woomukokhorela, ni oniphavela wira nilipiheke wataana wahu ni yena. (Math. 5:3) Nave, oniphavela wira nihakalaleke vaavo nnaakhaliherya ahu akina. (Mit. 20:35) Olaleerya onniniiriha opaka itthu piili: omulompa Muluku ni waakhaliherya akina. Nto oluttuweliwa muteko ola onnihakalaliha vanceene. Ohiya-vo, olaleerya vanci onniniiriha olimalela. Vaavo ninlimalela ahu olaleerya, ninnilipa ni ovukula woova. Nave, ninnikhalana okathi munceene woolaleerya ni opaceriha soosoma sa Biibiliya. Iya ti itthu sinnihakalaliha vanceene.
3. Xeeni Março ni Abril oryaaya okathi wooreerela okhala pioneero ookhaliherya?
3 Março ni Abril onirowa okhala okathi wa vameekhaaya wookela opioneero wookhaliherya, mwaha woowi anna pooti othanla ovaha iwoora 30 wala 50. Nave, okhuma eSaabadu 22 a Março, mpakha eSegunda-feira, 14 a Abril nihiku na Wuupuwelela, ninrowa opaka ekampaanya yowaalattula atthu. Miloko sinoohakalala vanceene maana anna anci anirowa ovara muteko ni “murima mmosaru” wira alaleerye muttetthe wotheene.—Sof. 3:9.
4. Nipakeke exeeni, naaphavelaka okhala pioneero ookhaliherya?
4 Mwiilokiherye Vano: Akhala wira khamwiilokiherye, muhaana wuuluula eprograma anyu wira moone mareheryo munrowa anyu opaka wira munnuuherye olaleerya mweeri mmosa wala miili. Munvekeleke Muluku wira ookhaliheryeni. (Yak. 1:5) Nvaanele ni emusi anyu ni anna a mmulokoni. (Mir. 15:22) Mwiira siiso, munimoona wira hata murina ene muxankiho wa ekumi wala waatteliwa miteko, munoohakalala mwaha wookhala pioneero ookhaliherya.
5. Exeeni enrowa okhumelela nancererya olaleerya okathi wa Wuupuwelela okhwa wa Yesu?
5 Yehova oniphavela wira arumeyi awe ehakalaleke. (Esal. 32:11) Nto, wiilipiherya wahu olaleerya okathi wa Wuupuwelela okhwa wa Yesu, onimuncererya ohakalala wahu ni omuhakalaliha Yehova.—Mir. 23:24; 27:11.