Okathi Wonvuwiha Yehova Ohincerereya
1. Mareheryo xeeni masya anirowa onikhaliherya wuncererya ‘omutthapela [Yehova]’ vanceene?
1 Mweeri wa Março ovinre, aapakiwa mareheryo masya, anirowa waavahaka anamalaleerya eparakha yookhala mapioneero ookhaliherya anivaha iwoora 30 myeeri sa Marso ni Abril, ni mweeri anixukuriwa aya ni mutokweene a esirkwitu. Akhala wira oxukurya wa mutokweene a esirkwitu onnituphela mweeri mukina, anamalaleerya aniilepiha opineero wa iwoora 30, anoowerya othanla mweeri mmosa wa myeeri iyo miili wira akhale mapioneero ookhaliherya. Mapioneero ookhaliherya ahaana owiriyana muthukumano wotheene onirowa okhala ni mapioneero ookilaatheya ni a vameekhaaya. Tivonto, akhala wira khanniwerya ovaha iwoora 50, hiyo nnoowerya nlelo ‘omutthapela [Yehova]’ vanceene nikhalaka mapioneero ookhaliherya ikwaha xexe khula mwaakha nivahaka iwoora 30!—Esal. 109:30; 119:171.
2. Mareeliho xeeni anirowa aya ophwanya ale anirowa okhala mapioneero ookhaliherya okathi onixukurya awe mutokweene a esirkwitu?
2 Okathi Onixukurya Awe Mutokweene a Esirkwitu: Vano, atthu anceene anoowerya okhala mapioneero ookhaliherya okathi onixukurya awe mutokweene a esirkwitu ni olipihana mukina ni mukhwaawe avaraka nuuwo mmutekoni woolaleerya. (aRom. 1:11, 12) Mapioneero ookhaliherya anceene anoowerya ompaka palano wira akumihe nihiku nimosa na muteko eriyari ya esumana wira erowe yalaleerye ni mutokweene a esirkwitu. Ale anivara muteko wa mulaponi, pooti onvekela akhala wira onoowerya ovara muteko woolaleerya naawo eSaabadu wala Ettiminku. Nave-tho, vanrowa ohakalaliha vanci mapioneero ookhaliherya orowa owiriyana muthukumano wotheene vamosa ni mapioneero ookilaatheya ni a vameekhaaya!
3. Xeeni okathi wa Wuupuwelela Okhwa wa Yesu oryaaya wooreerela wira nikele opioneero wookhaliherya?
3 Mweeri wa Marso ni Abril: Anna otheene yaawo yaattottela mureerelo eparakha ya orumeela opioneero wookhaliherya avahaka iwoora 30 okathi wa Wuupuwelela Okhwa wa Yesu, vano anoowerya wuncerereya “mukuttho [aya] w’otthapela”! (aHéb. 13:15) Myeeri sa Março ni Abril ti okathi wooreerela wira nincererye muteko ahu woolaleerya nikelaka opioneero wookhaliherya. Khula mwaakha myeeri sa Março ni Abril, ninrowa opakaka ekampaanya yoohakalaliha ya waalattula akina wira arwe Yuupuwelele Okhwa wa Yesu. Ohiya-vo, okhala wira anna anceene annincererya olaleerya waya okathi wa Wuupuwelela, nto nnoowerya ovara muteko ni anamalaleerya oovirikana. Nuumala niira na Wuupuwelela, ninrowa waaxukuryaka ale naalattunle ahu wira arwe awiriyane mwaha wa atthu otheene a vameekhaaya. Niireke murima anyu khoniphavela tthiri ottottela mureerelo iparakha iya sincerereyale wira mukele opioneero wookhaliherya?—Luka 6:45.