Niireke Munoowerya Orumeela Ntoko Pioneero Ookhaliherya Mweeri wa Março wala Abril?

Niireke munnuupuwela wuncererya muteko anyu okathi wa Wuupuwelela? (2 aKo 5:14, 15) Okhuma mweeri wa Março ni Abril mapioneero ookhaliherya annikhalana eparakha ya ovaha iwoora 30 wala 50. Akhala wira munoothanla orumeela ntoko pioneero ookhaliherya, pooti ovahererya eformulaario anyu Ekomisau ya Muteko ya Muloko. Mweeri wotheene, anoohimmwa masina a anamalaleerya otheene yeemereriwe orumeela ntoko mapioneero ookhaliherya. Nto muloko onimwaasuwela anna awo anirumeela ntoko mapioneero ni onimwaakhaliherya. Otheene ahu nihaana wuupuwela enamuna yoowuncererya muteko ahu okathi wa Wuupuwelela. Mwa enamuna eyo, nnoowerya okhumela saana muteko ahu woolaleerya ni nnoowerya olipihana.—1 aTe 5:11.