Okathi Muulupale wa Olaleerya.
1. Ohiya mwaha onrowa olavuliwa, etthu xeeni ekina enrowa waasivela aletto nihiku na Wuupuwelela okhwa wa Yesu? Mutthokiherye.
1 Silini? Ohiyu wa wuupuwelela okhwa wa Yesu. Anna aavara muteko muulupale a waalattula atthu wira arwe wuupuwelela ni hiyo. Etthu enrowa waasivela aletto awo, khahiyo paahi ele enrowa aya wiiwa. Nuumala owiriyana mwaha a Wuupuwelela, muthiyana mmosa aahimmye wira etthu yaamusivenle yaari ele yoonale awe, eyo piiyo, opatthaneya, oreera murima wa atthu otheene ni opuro wooratteleya yoowo waatekiwe ni anna owiivahererya. Tivonto, ohiya mulipa-onilavula mwaha paahi, otheene ahu nnoowerya olaleerya okathi owo wootepa otthuneya vamwaakhani.—aÉf. 4:16.
2. Moota xeeni khuta mutthu siniwerya awe waalaleerya atthu alattuliwe?
2 Mwaalavuliheke Aletto Moreerela Murima: Waalavuliha wahu mooreerela murima, vamosa ni masu anooniherya waaphenta wahu ale annixukurya, onrowa okhala onamoona muulupale. (Yoh. 13:35) Hata muhiweryaka olavula ni khuta mutthu olattuliwe, nyuwo pooti waalavuliha mooreerela murima atthu yaale awaattamenleni. (aHéb. 13:1, 2) Muhaana ophavelaka owuulumiha atthu yaale woonasa wene ahimmusuwela mutthu opuro owo. Pooti wira awo yaalattuliwe okathi wa ekampaanya ya waalattula atthu. Nyuwo pooti waakohaka so: “Olelo anoopacerya orwa muthukumano ola?” Mwaavekeleke wira akilaathi ni nyuwo, nto mwaaleeleke wira yaapaka nikoho nyuwo munimwaakhula. Akhala wira muloko anyu ohaana okhuma opuro owo mowaakuveya wira muloko mukina orumeele opuro owo, nto nyuwo pooti ohimya so: “Kimphavela osuwela moonelo aya voohimya sa muthukumano ola. Nintthuna okumana sai?”
3. Ninrowa owaakhelaka sai ale ahiiye olaleerya?
3 Nwaakhele Ale Ahiiye Olaleerya: Moohaaniherya ale ahiiye olaleerya animoorwa okathi owo, waahela muhina ale anirwa nihiku nimosa paahi vamwaakhani, eyo piiyo, nihiku na wuupuwelela okhwa wa Yesu. Nwaakheleke ni mwaaleeleke wira moohakalala okhala wira awo ahoorwa. (aRom. 15:7) Moohipisa axitokweene pooti orowa owannyeya wira yaalipiherye wira avikaniheke othukumana ni muloko. Ninlompa wira atthu otheene anirwa nihiku nno anvuwihe Muluku, ohiya mwaha wa ele enrowa aya wiiwa paahi, masi mwaha wa ele enrowa aya woona mwa ‘miteko sahu sorera’.—1 Ped. 2:12.