Nwaakhele Saana!

1. Okathi xeeni onnivaha eparakha yuulupale yoovaha onamoona, ni nthowa xeeni?

¹ Okathi wa Wuupuwelela Okhwa wa Yesu, onninivaha eparakha yuulupale ya olaleya ihapari sooreera. Muthokorerye ela: Mwaakha ola, atthu anivikana imilyau 10 animoorwa wira Yuupuwelele Okhwa wa Yesu, ni owiriyana mwaha onilavula sa ophenta wuulupale wa Yehova ni Yesu orweela mwa yowoopola. (Yoh. 3:16; 15:13) Awo anirowa wiixutta voohimya sa mareeliho akhanle mwaha wa yoovaha ya Yehova. (Yes. 65:21-23) Masi, mulipa onirowa olavula mwaha khahiyo paahi tonrowa ovaha onamoona okathi ola. Anna otheene anookhalana eparakha yoovaha onamoona wuulupale awaakhelaka saana aletto.—aRom. 15:7.

2. Ninrowa owaakhela sai moohakalala aletto?

² Ohiya paahi ophiya osalau ni okilaathi nto khiyalipelela eprograma opacerya, ti vooloka opacerya waakhomasa aletto. Ale anirwa onixukurya, pooti oxankiheya ni ohisuwela yoopaka. Nto otheya wahu wa niphento ni waalavuliha ntoko apatthani, onimwaakhaliherya ohixanka ni ohakalala. Wira musuwele akhala wira mutthu owo orwaale mwaha woolattuliwa, pooti omukoha akhala wira ola mukwaha woopacerya onirwa awe mmithukumanoni sahu, wala akhala wira onnimusuwela mutthu mukina mmulokoni. Waaniheryasa, pooti onvekela wira okilaathi ni nyuwo wira mmurumeeleke hoothe Biibiliya anyu ni eliivuru anyu ya isipo. Akhala wira eSalau ya Omwene tenirumeeliwa, nyuwo pooti omutthokiherya vakhaani mukhalelo wa eSalau ahu. Nuumala mwaha, mwiivahererye waakhula makoho awe. Akhala wira muloko anyu ohaana okhuma mowaakuveya wira muloko mukina orumeele esalau eyo, nyuwo pooti omukoha so: “Moonenle sai muthukumano ahu? Moota xeeni nikhanle ahu ovaanela-tho? Moottharelana, mumpake palano wira mwamuxukurye nihiku nikina. Nave, axitokweene anitthuneya okhala oowehaweha wira yaalipihe anamalaleerya attharunwe olaleerya yaawo anikela orwa.

3. Xeeni vanitthuneya ahu wiimananiha owaakhela saana ale anirwa onixukurya okathi wa Wuupuwelela Okhwa wa Yesu?

³ Anamunceene anikela orwa, ela enrowa okhala ekwaha yoopacerya anirowa aya oweha ohakalala, murettele, ni wiiraana wa arumeyi a Yehova olelo-va. (Esal. 29:11; Yes. 11:6-9; 65:13, 14) Nto exeeni enirowa aya wuupuwela atthu awo nuumala muthukumano ola? Tthiri, awo animuupuwela itthu sooloka, akhala wira nnimwiimananiha owaakhela moohakalala!