“Aniinyu Ahiilokiherya?”
1. Xeeni vanitthuneya aya wira anamwane aneetta oxikola akhale oowiilokiherya?
1 Vaavo aniinyu anitthikela aya osoma oxikola nuumala ifeeriya sa eriyari ya mwaakha, moohaaniherya anookumana mixankiho sinceene. Nave-tho, anookhalana okathi wooreerela wira ‘alaleye ekekhai’. (Yoh. 18:37) Niireke wira aniinyu ahiilokiherya?
2. Itthu xeeni aniinyu sinitthuneya aya osuwela wira aweryeke waakhula oxikola?
2 Niireke wira aniinyu annisuwela nthowa naya maKristau ahinitthapela aya ifesta sa mulaponi ni iferiado sa atthu ahinaamini? Wala annisuwela moota woowaakhula akhala wira annikhanyereriwa orowa osoma universidade, onamorari, owurya wala orumeela mirette sinipahula? Niireke anirowa waakhula wira etiini aya tenikhoottiha, ohiya-vo, annisuwela moota wootthokiherya sookupali saya?—1 Ped. 3:15.
3. Anamuyari anirowa orumeela sai okathi wa Omulompa Muluku vatthokoni wira yaakhaliherye anaaya?
3 Murumeeleke Okathi wa Omulompa Muluku Vatthokoni: Pooti wira nyuwo munnivaanela ni aniinyu aneetta oxikola vaavo sinaaphwanya aya mixankiho. Othokorerya mixankiho sa oxikola, onimwaalipiha anamwane awo okathi ontthikela aya oxikola. Nto pooti orumeela okathi wa Omulompa Muluku vatthokoni wira muthokorerye mwaha owo. Nyuwo pooti waakoha aniinyu wira ahimye etthu enitepa waaxankiha, vaavo anuupuwela aya otthikela oxikola. Okhala wira aniinyu ahinnuwa, myaha seiye saathokorenrya anyu khalai, pooti otthikela othokorerya masi munnuuheryaka iponto sikina. (Esal. 119:95) Nave-tho, pooti ohela muhina ipantte sa winsayari seiyo nyuwo munikhala anyu ntoko prisoori, aahiiso prisoori onaakhaliherya anaxikola othanla muteko wala kursu, wala naxikola mukina. Nwiixuttiheke aniinyu moota woowaakhula makoho moovarihana ni Biibiliya, ni osuwela orumeela iliivuru ntoko Raciocínios vamosa ni Os Jovens Perguntam. Namuyari mmosa aahirumeela enamuna ya ipantte sa winsayari, wira omwiixuttihe mwanawe mwaamuthiyana moota wolavulana ni maprisoori awe vaavo aapaceriha awe khula ekalaase, ni moota wowaatthokiherya wira owo ti namoona a Yehova.— Nwehe erevista A Sentinela 15 ya Dezembro, 2010, ipaaxina 3-5.
4. Exeeni anamuyari a miruku anirowa aya opaka wira yaakhaliherye anaaya?
4 Tthiri, mixankiho sinaaphwanya anamwane a eKristau anisoma oxikola mahiku ala ookiserya, ti sootepa ‘oxankiha’. (2 Tim. 3:1) Anamuyari a miruku anrowa wuupuwelela vahinatthi mixankiho sinrowa waaphwanya anaaya ni waakhaliherya moota wooxintta mixankiho iyo. (Mir. 22:3) Tivonto, ahinatthi otthikela oxikola, mwiimananihe wira mwaakhaliherye aniinyu oxintta mixankiho sooxikola.