Muhooveleleke Olaleerya
1. Nipuro xeeni nintthuneya ahu olipa murima, ni nthowa xeeni?
1 Mootoko ohiya olaleerya oxikola mwaha wa woova oveehiwa? Tthiri olaleerya oxikola onivekela olipa murima, vanceenexa akhala wira munuuliwa muru. Exeeni enrowa wookhaliheryani?
2. Nthowa xeeni vanitthuneya ahu okhala a miruku naalaleeryaka oxikola?
2 Mukhaleke a Miruku: Nnaamwi oxikola oryeene ntoko muttetthe anyu woolaleerya, musuweleke wira khivanitthuneya omulaleerya khula mutthu, okhalaka ntoko wira munlaleerya khuta empa. Mukhaleke a miruku wira musuweleke okathi oniphwanela olavula. (Mus. 3:1, 7) Mwaha onisoma anyu oxikola, wala miteko sinithanleliwa anyu ovara, pooti woovahani muraarelo woolaleerya. Wala mwaapara anyu ooxikola, pooti wookohani nthowa naya muhiniirela anyu mpantta miteko sikina sa oxikola. MaKristau makina okathi anipacerya aya orowa oxikola, annaaleela maprusoore aya wira awo Anamoona a Yehova, ni annaavaha iliivuru sinitthokiherya sookupali sahu. Akina annipweha iliivuru saya vasulu va meesa, wira okathi anaxikola akhwaaya anaakoha aya yaalaleeryeke.
3. Munrowa wiilokiherya sai wira nweryeke olaleerya oxikola?
3 Mwiilokiheryeke: Akhala wira muhiilokiherya, munoovikaniha olipa murima. (1 Ped. 3:15) Mmananiheke wuupuwelela makoho anrowa okhumelela, nto muupuweleke moota wowaakhula. (Mir. 15:28) Vaaweryaneyaka, mwaarowaka oxikola mmukuxeke Biibiliya anyu ni iliivuru vakhaani, ntoko Raciocínios, iliivuru Jovens Perguntam, ni iliivuru sinilavula sa Opattuxiwa wa itthu wira mwarumeeleke okathi sinitthuneya aya. Mwaavekele anamuyari anyu wira okathi Woomulompa Muluku vatthokoni, munsayariki moota wowaakhula makoho oxikola.
4. Nthowa xeeni vanitthuneya anyu ovikaniha olaleeryaka oxikola?
4 Muupuweleleke Itthu Sooloka: Muhuupuweleke wira akhwiinyu ooxikola, khula okathi anrowa wooveehani mwaalaleeryaka. Akina anrowa woottottopelani mwaha wa olipa wanyu murima, ni woowiriyanani. Masi, muhikhumuwe akhala wira khuuvo oniphavela woowiriyanani. Yehova onoohakalala mwaha wa wiimananiha wanyu. (aHéb. 13:15, 16) Nvikaniheke onvekela wira ookhaliheryeni ‘olaleya molumo mohova etthu’. (Mit. 4:29; 2 Tim. 1:7, 8) Tthiri munoohakalala vanceene onweha mutthu eemereryaka ekeekhai. Mutthu owo pooti orowa vahoolo mpakha okhala murumeyi a Yehova!